ADDUNYAA MARA IRRAA
Oduu Ameerikaa Irratti Xiyyeeffate
Oduun Hemisfeera Lixaa irraa argame ogummaan Kitaaba Qulqulluu keessa jiru kan yeroon itti hin dabarre taʼuu isaa mirkaneessa.
Miidhaa Irraa Bayyaannachuu
Gabaasni Waldaa Eegumsa Bineensotaa akka argisiisutti, Beelizii fi naannoo Kaareebiyaanii kaanitti iddoo qabeenya uumamaatti fayyadamuun dhorkametti, “lakkoofsi bineensota bishaanii kan akka konchii, loobisterii fi qurxummii dabalaa jira.” Itti fufees akkana jedheera: “Sanyiiwwan dhumaa turan, iddoo itti kiyyeessamu irraa haala adda taʼeen, iddoo dhorkametti bayyaannachuuf waggaa 1-6 fudhata; guutummaatti bayyaannachuuf garuu . . . waggaa kudhaniin lakkaaʼamu fudhachuu dandaʼa.” Daayirektarri waldichaa, Jaaneet Giibsan, Beeliziin ilaalchisee, “Iddoon qabeenya uumamaatti fayyadamuun dhorkame qabeenya qurxummii fi lubbu qabeeyyii biyyattii ni guddisa” jetteetti.
WANTA IRRATTI YAADAMUU QABU: Uumamni bayyaannachuun isaa, Uumaan ogummaa qabu jiraachuu isaa hin argisiisuu?—Faarfannaa 104:24, 25.
Yeroo Itti Iimeelii Ilaaltu Hirʼisuudhaan Dhiphina Hirʼisi
Qoʼannaan Kaanaadaatti adeemsifame akka argisiisutti, namoonni iimeelii isaanii irra deddeebiʼanii ilaaluu mannaa guyyaatti siʼa sadii qofa yoo ilaalan dhiphina hirʼisuu ni dandaʼu. Kostadin Kushlev, inni qoʼannaa kana geggeesse akkana jedheera: “Namoonni iimeelii isaanii irra deddeebiʼanii ilaaluuf baayʼee kan qoraman taʼus, qorumsa kana moʼuun dhiphina isaanii hirʼisa.”
WANTA IRRATTI YAADAMUU QABU: ‘Yeroo addaa baayʼee rakkisaa taʼe’ keessa waan jiraannuuf, karaa itti dhiphina hirʼisnu barbaaduu hin qabnuu?—2 Ximotewos 3:1.
Yakka Biraaziil Keessa Jiru
Dhaabbanni oduu Ashensiyaa Biraaziil jedhamu yakki Biraaziil keessatti dabalaa akka jiru gabaaseera. Bara 2012 tti lakkoofsi ajjeechaa 56,000 caaleera; kunis lakkoofsa waggaa tokko keessatti Ministeera Fayyaatiin hanga ammaatti galmeeffame keessaa isa guddaa dha. Ogeessi nageenya hawaasaa, Luyis Saaporiin ajjeechaan dabaluun isaa naamusni mancaʼuu isaa kan argisiisu akka taʼe amanu. Namoonni seeraaf kabaja yeroo dhaban “fedhii isaanii raawwachuuf humnatti fayyadamuu jalqabu” jedhaniiru.
KANA BEEKTAA? Kitaabni Qulqulluun yeroo itti jaalalli ‘qabbanaaʼuu’ fi hamminni itti dabalu akka dhufu ni dubbata. —Maatewos 24:3, 12.