Dallaawwan Yerusaalem

Mee waggoota muraasa gara duubaatti haa deebinu. Tajaajilaa Arxeksis Mootichaa kan taʼe Nahimiyaan, nama Israaʼel Shushaan ishii magaalaa warra Faarsi taate keessa jiraatu ture. Obboleessi Nahimiyaa Yihudaadhaa oduu gaddisiisaa akkana jedhu fidee dhufe: ‘Namoonni gara Yerusaalemitti deebiʼan balaadhaaf saaxilamoodha. Dallaawwanii fi karrawwan magaalattii warri Baabilon balleessan hin ijaaramne.’ Nahimiyaan ni aare. Gargaarsa gochuuf gara Yerusaalem deemuu waan barbaadeef mootichi akka isaaf heyyamu kadhannaa dhiheesse.

Boodas mootichi Nahimiyaan akka gadde hubate. ‘Takkaa akkana taatee si argee hin beeku. Maali rakkinni jiraa?’ isaan jedhe. Nahimiyaanis, ‘Magaalaan koo Yerusaalem akkuma diigamtetti utuu jirtuu maaliifan hin gaddu?’ jedhe. Mootichis, ‘Maal akkan siif godhu barbaadda?’ jedhee isa gaafate. Nahimiyaanis yeruma sana sagalee isaa utuu hin dhageessisin kadhannaa dhiheesse. Achiis, ‘Maaloo, gara Yerusaalem dhaqeen dallaawwan sana deebisee ijaara’ jedhe. Arxeksis Mootichis Nahimiyaan deemuu akka dandaʼu itti hime; akkasumas karaan isaa nagaa akka isaaf taʼu gargaarsa isaaf godhe. Nahimiyaan bulchaa Yihudaa akka taʼuu kan godhe siʼa taʼu, dallaawwan magaalattii akka ittiin ijaaruufis muka isaaf kenne.

Nahimiyaan yommuu Yerusaalem gaʼu dallaawwan magaalattii naannaʼee ilaale. Achiis lubootaa fi bulchitoota walitti qabee, ‘Haalli kun ulfaataadha. Hojiitti seenuu qabna’ isaaniin jedhe. Namoonni sunis irratti walii galanii dallaawwan sana deebisanii ijaaruu jalqaban.

Haa taʼu malee, diinonni Israaʼelootaa tokko tokko isaanitti qoosuudhaan, ‘Dallaa isin ijaaraa jirtan Jeedalli iyyuu diiguu dandeessi’ isaaniin jedhan. Hojjettoonni sun garuu arrabsoo isaanii tuffachuudhaan ijaaruu isaanii itti fufan. Dallichis dheerachaa fi cimaa deeme.

Diinonni sunis kallattii garaa garaatiin dhufanii Yerusaalem irratti tasa miidhaa geessisuuf murteessan. Yihudoonni waaʼee karoora isaanii kanaa yommuu dhagaʼan ni sodaatan. Haa taʼu malee Nahimiyaan, ‘Hin sodaatinaa. Yihowaan nu wajjin jira’ isaaniin jedhe. Hojjettoota sana eeguuf eegdota ramade; kanaafuu, diinonni isaanii isaan miidhuu hin dandeenye.

Guyyaa 52 gidduutti dallaawwanii fi karrawwan sana ijaaranii xumuran. Nahimiyaan Leewwoonni hundi eebbaaf gara Yerusaalem akka dhufan godhe. Achiis garee faarfattootaa lamatti isaan qindeesse. Isaanis karaa Karra Burqaa Bishaanii jedhamuun yaabbannoodhaan gara dallichaatti ol baʼuudhaan magaalattiitti marsanii kallattii faallaatiin deeman. Malakata, siimbaalii fi baganaa taphachuudhaan, Yihowaadhaaf faarfatan. Hamma mana qulqullummaa biratti walitti dhufanitti, Izraan garee isa tokkoo wajjin, Nahimiyaan immoo garee isa kaanii wajjin deeman. Dhiirota, dubartootaa fi ijoollee dabalatee namoonni hundi Yihowaadhaaf aarsaa dhiheessan; akkasumas ni gammadan. Sagaleen isaan gammachuudhaan dhageessisan kun fagootti iyyuu ni dhagaʼama ture.