Teetiraagiraamaatanii isa maqaa Waaqayyoo isa Yihowaa jedhamu argisiisuu fi qubee Afaan Ibrootaatiin mirga gara bitaatti dubbifamu
Yaada Baayʼee Amansiisaa Qubee Afaan Ibrootaa Ishii Xinnoo Irraa Argamu
Waadaan Waaqayyo gale hundi akka raawwatamu mirkanaaʼoo taʼuu ni dandeenyaa? Yesuus kun akka taʼu mirkanaaʼaa kan ture siʼa taʼu, barumsi isaas amantii dhaggeeffattoota isaa kan cimsu ture. Fakkeenya Lallaba isaa isa Gaaraa irratti dubbatee fi Maatewos 5:18 irratti argamu ilaali: “Dhuguman isiniin jedha, wanti Seericha keessa jiru hundi ni raawwatama; Seericha keessaa qubee xinnoon tokko yookiin tuqaan tokko utuu hin raawwatamin hafuu mannaa, samii fi lafti utuu darbanii ni salphata.”
Qubeen xinnoon Afaan Ibrootaa י (yood) yeroo taʼu, qubeen kun qubee jalqabaa Teetiraagiraamaatanii isa maqaa Waaqayyoo argisiisuu fi Yihowaa jedhuu ti.a Barsiisonni seeraa fi Fariisonni jechootaa fi qubeewwan Seera Waaqayyoo qofa utuu hin taʼin, ‘tuqaa tokko’ illee baayʼee barbaachisaa akka taʼetti ilaalu turan.
Yesuus Seericha keessaa yaanni xinnoon utuu hin raawwatamin hafuu mannaa, samii fi lafti utuu darbanii akka salphatu dubbachuu isaa ture. Taʼus, Kitaabni Qulqulluun samii fi lafti kun bara baraaf kan jiraatan akka taʼan mirkaneessa. (Faarfannaa 78:69) Kanaaf, yaanni Yesuus dubbate kun, wanti Seericha keessatti ibsame tokko tokkoon utuu hin raawwatamin akka hin hafne argisiisa.
Yihowaan yaadawwan xixinnoodhaaf xiyyeeffannaa ni kennaa? Eeyyee, ni kenna. Fakkeenya kana ilaali: Israaʼeloonni durii lafee hoolaa Faasikaa keessaa tokko illee akka hin cabsine isaanitti himamee ture. (Baʼuu 12:46) Tarii yaada xinnoo fakkaata taʼa. Israaʼeloonni sababii lafeen tokko illee cabuu itti hin qabne hubatanii turanii? Taʼuu dhiisuu dandaʼa. Yihowaan garuu, yaanni kun raajii Masiihichi yeroo muka dhiphinaa irratti fannifamee duʼu, lafee isaa keessaa tokko illee akka hin cabne argisiisu taʼuu isaa beeka ture.—Faarfannaa 34:20; Yohaannis 19:31-33, 36.
Maarree wanti Yesuus dubbate maal nu barsiisa? Nutis wanti Yihowaan waadaa gale hundi tokko illee utuu hin hafin akka raawwatamu guutummaatti amanuu ni dandeenya. Kun yaada baayʼee amansiisaa qubee Afaan Ibrootaa ishii xinnoo irraa argamu dha!
a Qubee xinnoon Afaan Giriikii iʼoota yeroo taʼu, qubeen kun qubee Afaan Ibrootaa י (yood) jedhuu wajjin wal fakkaachuu hin oolu. Seerri Musee jalqaba kan barreeffame Afaan Ibrootaatiin waan turee fi afaanuma kanaan daddarbaa kan dhufe waan taʼeef, Yesuus dubbachaa kan ture waaʼee qubee Afaan Ibrootaa taʼuu dandaʼa.