Ijaarsa Galma Mootummaa Addunyaa Maraa Biyyoota Awuroppaa Tokko Tokkotti
1 Waggoota kurnan xiqqoo dura Awuroppaa bahaa dabalatee biyyoota Awuroppaa hedduutti hojiin Dhuga-baatota Yihowaa ittisamee ture. Ittisni kunis hacuuccaa guddaa kan qabu ture. Ifatti walga’ii geggeessuuniifi galma mootummaatti fayyadamuun dhowwaadha jechuun hin danda’ama ture. Waggoota dhihoodhaa as garuu, “Waaqayyo waan guddaa nuuf hojjetee argisiiseera; nuyi warra gammachuu in taane.”—Far. 126:3.
2 Bara 1983 jalqabee, hacuuccaa cimaan Dhuga-baatota Yihowaarra ture salphachaa dhufeera. Bara 1989, Poolaandiifi Hangaariin Dhuga-baatonni Yihowaa seeraan beekamummaa argachuu isaanii amananii fudhataniiru. Bara 1991tti Dhuga-baatonni Yihowaa biyya Ruusiyaa keessatti seraan bekamanii galmeeffamaniiru. Yeroo sanaa jalqabee hojiin Dhuga-baatota Yihowaa Ruusiyaafi Rippabliikoota Tokkummaa Soovyet durii keessatti babal’achuu danda’eera. Bitootessa 1996 hanga Onkololeessa 1998tti Qaamni Bulchiinsaa biyyoota Awuroppaa 11tti Galmawwan Mootummaa 359 ijaaruuf gaaffii liqii dhihaateef heyyama laateera.
3 Akka Fakkii Miiltoo Tajaajila Mootummaa kanarratti argitutti, Yihowaan waan guddaafi dinqisiisaa saba isaatiif raawwate irratti xiinxaluu dandeessa. (Far. 136:4) Buusiin obboloonni addunyaa maratti argaman godhan akka seeraan hojiirra ooluufi, jecha Yesus Yohannis 13:35 irratti “jaalala yoo waliif qabaattan, kanaan namoonni hundinuu akka isin bartoota koo taatan in beeku” jedhee akka dhugoomsu beekuun kee sigammachiisa.
4 Biyyoota Awuroppaa galiinsaanii xiqqoo ta’e kan qophii gargaarsa ijaarsa Galma Mootummaa argatan keessaa Rumaaniyaan ishee tokko yeroo taatu, Adoolessa 2000 jalqabee Galmi Mootummaa 36 ijaarameera. Sadarkaa plaanii Galma Mootummaatiif ba’een fayyadamuudhaan Yukreen bara 2001tti Galma Mootummaa 61 kan ijaarte yeroo ta’u, bara 2002tti ammoo Galma Mootummaa 76 dabalanii ijaaraniiru. Buusii qarshii Galma Mootummaatiif godhamuun gargaaramuudhaan Bulgaariyaa, Kru’eeshiyaa, Maqedooniyaa, Moldoovaa, Ruusiyaafi Sarbiyaafi Monteeneegroo Galmawwan Mootummaa dhibbaan lakkaa’aman ijaaramaniiru.
5 Biyyoota Awuroppaa tokko tokkotti dhimmawwan seeraan walqabataniin kan ka’e Galma Mootummaa ijaaruun salphaa miti. Ijaarsa Galma Mootummaa utuu hin jalqabiin dura bu’aa ba’ii baay’ee gochuutu barbaachisa ture. Qophiin ijaarsa Galma Mootummaatiif godhamu yeroo baay’ee fudhata. Kana malees biyyoota Afriikaa hedduufi Ameerikaa kibbaa caalaa biyyoota Awuroppaatti Galma Mootummaa ijaaruun baasii guddaa gaafata. Haata’u malee, lakkoofsi namoota Yihowaa waaqeffatanii dabalaa waan jiruuf biyyoottan Awuroppaa galii xiqqoo qaban keessatti Galma Mootummaa dhibbaan lakkaa’amantu barbaachisa.
6 Ijaarsi Galma Mootummaa saffisaan dabalaa adeemuusaa ilaaluun keenya hangam nama gammachiisaa! Muuxannoowwan hedduun akka argisiisanitti yeroo Galmi Mootummaa ijaaramu, ollaawwan naannoo Galmichaatti argamaniif akka gaariitti dhugaa bahameera. Naannoo tokko tokkotti obboloonni seera ijaarsaa naannoo sanaaf ba’e hordofuunsaanii namoota taayitaarra jiran dinqisiiseera.
7 Yihowaan karaa Isaayaas raajichaa guddina Waaqeffannaa dhugaa bara keenyaa ilaalchisee “ani Waaqayyoo dha; yeroo isaatti kana hundumaa dafee nan raawwadha” jechuudhaan dubbatee ture. (Isa. 60:22) Dhugumaaniyyuu, Yihowaan waggoottan kurnan darbanitti Awuroppaa bahaatti guddinni akka argamu godheera. Ijaarsa Galma Mootummaatiif gargaarsa qarshii gochuudhaan hojiin kun saffisaan akka raawwatamu carraaqqii nuyi goonuuf Yihowaan eebba isaa dhangalaasuu itti haafufu! Kun ammoo
biyyoota galii xiqqoo qabantti Galmawwan baay’een akka dabalataan ijaarman gargaara. Kunis naannoowwan Awuroppaa hedduutti guddina waaqeffannaa dhugaafi “biyya lafaa hundaatti” bal’inaan akka dhugaa bahamu taasisa.—HoE. 13:47.
[Fakkii fuula 3rra jiru]
Galma Mootummaa
Mooskoo Ruusiyaatti Ijaarame
[Fakkii fuula 4-6rra jiru]
Galmawwan Mootummaa Haaraa Baha
Awuroppaatti Ijaaraman
Istruumiisaa, Maqedooniyaa
Daaruuvaar, Kru’eeshiyaa
Sookaal, Koonyaa Laviiv, Yukreen
Bitooliyaa, Maqedooniyaa
Soofiyaa, Bulgaariiyaa
Ploovdiif, Bulgaariyaa
Kraasnokiitiyaabriskii, Maaykoop, Naannoo Ruusiyaa
Baatchaakaa Piitroovaatz, Sarbiyaafi Monteeneegroo
Tlumaak, Koonyaa Ivaanoo-Fraankoosk, Yukreen
Raavaa-Ruskaa, Koonyaa Laviiv, Yukreen
Istaaraa Paazoovaa, Sarbiyaafi Monteeneegroo
Zeeneetisaa, Boosniyaafi Herzegooviinaa
Sookeel, Koonyaa Laviiv, Yukreen
Zeedaachiival, Koonyaa Laviiv, Yukreen