1 Dhuga-baatota Yihowaa hir’ina qaamaa qaban keessaa tokko yoo taate, ammayyuu tajaajila bu’aa qabu raawwachuu ni dandeessa. Haalli keessa jirtu kun dhugaa ba’uufi warra kaan jajjabeessuuf carraa addaa siif banuu danda’a.

2 Carraawwan Dhugaa Ba’uuf Dandeessisan: Dhuga-baatonni hedduun hir’ina qaamaa qabaataniyyuu tajaajilarratti hirmaannaa guutuu gochaa jiru. Fakkeenyaaf, obboleettiin sababa oppireeshinii sammuu godhatteen dandeettiin socho’uufi dubbachuushee hubame tokko abbaan manaashee iddoo namoonni baay’atanitti konkolaataasaa yeroo dhaabuuf konkolaataa keessa teessee karaa foddaa barruulee raabsiti turte. Yeroo tokko sa’aatii lama gidduutti barruulee 80 raabsiteetti. Haalli ati keessa jirtu namoota argachuun rakkisaa ta’e haasofsiisuuf carraa addaa siif bana.

3 Tajaajilli kee bu’aa guddaa argamsiisuu ni danda’a. Warri kaan murtoo ati gooteefi, bu’aa gaarii Macaafni qulqulluun jireenya keerratti argamsiise yeroo argan ergaa Mootummichaa dhaga’uu danda’u. Kana malees muuxannoo mataa keerraa ka’uudhaan namoota rakkoo adda addaarra jiran Sagalee Waaqayyootiin gargaaramtee jajjabeessuu ni dandeessa.​​—⁠2 Qor. 1:⁠4.

4 Warra Kaan Jajjabeessuu:Seenaan Looral Nizbeet ishee waggaa 37 guutuudhaaf meeshaa akka sombaatti tajaajilu keessa jiraattee, namoota 17 gara dhugaatti fiddee sinjajjabeessinee? Haaluma walfakkaatuun, fakkeenyi kees obboloonni kaanYihowaa akka tajaajilan kakaasuu danda’a.​​—⁠Dammaqaa! Amajjii 22, 1993 ful. 18-​21. (Ingiliffa)

5 Haalli kee akka barbaaddetti tajaajilarratti hirmaachuu yoo sidhowwellee, ammayyuu warra kaan jajjabeessuu ni dandeessa. Oboleessi tokko akkas jedheera, “namni tokko hir’ina qaamaa jabaa qabaatuyyuu warra kaan gargaaruu akka danda’u baradheera. Aniif haati manaa koo obboloota gumii keessatti argamaniif madda jajjabinaa taaneerra. Haala keenyaan kan ka’e olii gadi deemuu waan hin dandeenyeef obboloonni yeroo barbaadanitti nuargachuu danda’u.” Haata’u malee, hir’ina qaamaa qabaachuu keetiin kan ka’e hamma fedhii keetii tajaajiluu akka hin dandeenye beekamaadha. Ta’uyyuu, gargaarsa siif godhamuun tajaajilarratti dammaqinaan hirmaachuu dandeessa. Kanaafuu, gargaarsa yoo barbaadde jaarsolii ykn gumii keessaa kan sigargaaruu danda’anitti himuurraa duubatti hin jedhin.

6 Isa tajaajiluuf jettee carraaqqii ati gootu Yihowaan ni ilaala; garaa kee guutuudhaanis wanta ati raawwattutti ni gammada. (Far. 139:​1-4) Yoo isatti amante humna siikenna; tajaajilli kees bu’a qabeessaafi gammachiisaa akka ta’u sigargaara.​​—⁠2 Qor. 12:​7-​10.