Saanduqa Gaaffii (1)

◼ Gumii gargaaruuf jecha meeshaawwan gurguruu ykn qophiilee galii argamsiisan qopheessuun sirriidhaa?

Amantiiwwan baay’ee keessatti qophiiwwan gargaarsi ittiin sassaabaman, jechuunis irbaata qopheessuun, wantoota tokko tokko gurguruun ykn qophii ayyaanaa gochuun kan baramedha. Namoonni tokko tokko qophiin kun gaarii akka ta’e isaanitti dhaga’amuyyuu, gochi kun kadhaa wajjin tokkodha. Dhugaa Baatonni Yihowaa garuu karaa kanaan gargaarsa qarshii argachuu hin barbaadan.

Masaraa Eegumsaa Hagayya 1879, maxxansa lammaffaarratti, amantiiwwan kan biraa wajjin haala wal fakkaatuun qarshii gaafachuu maaliif akka didne ilaalchisee akkas jedhamee ture: “‘Masaraa Eegumsaa Xiyoon’ kan gargaaru YIHOWAA akka ta’e ni amanna; innimmoo matumaa gargaarsa namootaa hin kadhatu ykn hin gaafatu. Waaqni, ‘Warqeeniifi meetiin gaarotaa hundi hankooti’ jedhe, qarshii nu barbaachisu argamsiisuu yoo dadhabe, yoos barruu kana maxxansuu keenya dhaabuun akka nurra jiraatu beekna.”

Seera bu’uuraa akkas jedhu hordofuu keenya itti fufna: “Namni adduma addaan garaa duuba yookiis giddiidhaan utuu hin ta’in, akka garaa isaatti murtoo godhetti kennuutu isaaf ta’a; Waaqayyo nama gammachuudhaan kennu in jaallata.” (2 Qor. 9:7) Saanduqoonni buusii Galma Mootummaa keessatti kan argaman si’a ta’u, abbaan barbaade akkuma fedhasaatti buusii gochuu danda’a. (2 Mot. 12:9) Buusiin kadhaadhaan ykn yaada deebisee argachuun danda’a jedhuun kaka’amee kan godhamu miti.