AKKA KIRISTIYAANA TOKKOOTTI JIRAACHUU

Qophii Haaraa Walgaʼii Torban Gidduutti Godhamutti Dabalame

Amajjii 2018tii eegalee, walgaʼiin torban gidduutti godhamu qabxiiwwan qoʼannaa fi miidiyaa, Kitaaba Qulqulluu Hiika Addunyaa Haaraa maxxansa qoʼannaa (nwtsty) jedhamu irratti hundaaʼe kan dabalatu taʼa. (Kun yeroodhaaf Afaan Oromootiin hin qophoofne.) Odeeffannoon kun qophii walgaʼii keessaniif gootan akka isiniif gabbisu hin shakkisiisu. Hunda caalaa immoo, Yihowaa Abbaa keenya isa jaalala qabeessa taʼetti caalaatti dhihaachuuf isin gargaara!

QABXIIWWAN QOʼANNAA

Qabxiiwwan qoʼannaa aadaa, taaʼumsa lafaa fi qooqaa caqasoota Kitaaba Qulqulluu balʼinaan ibsaman hedduu ilaalchisee hubannaa nuuf kennu dha.

Maatewos 12:20

Foʼaa ibsaa aaru: Ibsaan namoonni bara duriitti itti fayyadamaa turan suphee xinnoo zayitii ejersaatiin guutame ture. Foʼaan isaa zayitii isaa harkisee akka bobaʼu godha. Jechi Afaan Giriikii “foʼaa ibsaa aaru” jedhamee hiikame, foʼaa ibsaa badaa jiruu ykn dhaamuuf jedhuu kan argisiisu dha. Raajiin Isaayaas 42:3 irratti dubbatame Yesuus gara laafessa taaʼuu isaa ibseera; Yesuus abdii dhumaa namoota gad of qaboo fi cunqurfamanii matumaa hin dhaamsine.

Maatewos 26:13

Dhugumaan: Afaan Giriikiitiin ameen jechuu siʼa taʼu, jecha Afaan Ibrootaa ameen jedhuu irraa kan fudhatame dha; hiikni isaas “haa taʼu” jechuu dha. Yesuus waan tokko dubbachuu isaa, abdii kennuu ykn raajii dubbachuu isaa dura wanti inni dubbatu guutummaatti dhugaa fi kan amanamu taʼuu isaa argisiisuuf, yeroo baayʼee jecha kanatti fayyadamaa ture. Yesuus jecha “dhugumaan” ykn ameen jedhu Kitaaba Qulqulluu keessatti karaa adda taʼeen itti fayyadameera. Walitti aansuudhaan yommuu irra deebiʼamu immoo (ameen ameen), akkuma guutummaa Wangeela Yohaannis afaan jalqaba ittiin barreeffame keessatti ibsame, dubbiin Yesuus “dhuguma, dhuguma”jedhamee hiikameera.—Yoh 1:51.

MIIDIYAA

Suuraa, fakkii fi viidiyoo sagalee hin qabne, aanimeeshinii seenaa Kitaaba Qulqulluu balʼinaan ibsuuf gargaaru kan qabate dha.

Beetafaagee, Gaara Ejersaa fi Yerusaalem

Viidiyoo gabaabaan kun magaalaa yeroo ammaatti eet-Tuur jedhamtu, jechuunis ishii Kitaaba Qulqulluu keessatti Beetafaagee akka taate yaadamtuu kaasee hamma iddoo ol kaʼaa Gaara Ejersaatti jirutti kallattii bahaatiin gara Yerusaalemitti geessu kan argisiisu dha. Bitaaniyaan baha Beetafaagee karaa bahaatiin irraan gadee Gaara Ejersaa irratti argamti. Yesuusii fi barattoonni isaa yeroo Yerusaalem keessa turanitti galgala kan dabarsan, Bitaaniyaa ishii yeroo ammaatti magaalaa eel-ʽAazaariyaa (Eel ʽEeʼizaariiyaa) Afaan Arabaatiin hiikni isaa “Biyya Alaazaar” jedhutti ture. Yesuus mana Maartaa, Maariyaamii fi Alaazaar buufatee akka ture hin shakkisiisu. (Mat 21:17; Mar 11:11; Luq 21:37; Yoh 11:1) Yesuus mana isaaniitii gara Yerusaalem yommuu deemu, karaadhuma viidiyoo kana irratti ibsamee wajjin wal fakkaatu irra deemee taʼuu dandaʼa. Niisaan 9, Dh.K.B. bara 33 Yesuus yeroo ilmoo harree irra taaʼee Gaara Ejersaa irra baʼee Beetafaageedhaa kaʼee gara Yerusaalem deemuuf karaadhuma kana irra baʼee taʼuu dandaʼa.

Daandii Bitaaniyaadhaa garaa Beetafaageetti geessu
Beetafaagee
Gaara Ejersaa
Dachaa Qedroon
Bakka Manni Qulqullummaa Itti Argamu

Mismaara Lafee Koomee Irra Jiru

Suuraan lafee koomee namaa mismaara sibilaatiin waraaname argisiisu kun seenti meetira 11.5 dheerata ture. Bocni kun jalqaba kan argame bara 1968⁠tti yommuu kaaba Yerusaalem qotamutti siʼa taʼu, bara warri Roomaa turanitti kan hojjetame dha. Ragaan arkiʼooloojii nama muka irratti fannisuuf mismaaratti fayyadamaa akka turan argisiisa. Mismaarri kun mismaara loltoonni Roomaa Yesuus Kiristoosiin muka irratti fannisanii ittiin ajjeesanii wajjin kan wal fakkaatu taʼuu dandaʼa. Bocni kun saanduqa dhagaa ooshuweerii jedhamu keessatti kan argame siʼa taʼu, reeffi nama duʼee erga tortoree booda lafeen isaa sassaabamee saanduqa kana keessa kaaʼama ture. Kunis namni muka irratti fannifame tokko kan awwaalamu akka taʼe argisiisa.—Mat 27:35.