Harreen Tokko Ni Dubbatte

HARREEN yeroo dubbattu dhageessee beektaa? ‘Lakki’ jettee deebista ta’a. ‘Bineensonni dubbachuu hin danda’an.’ Haata’u malee, Macaafni Qulqulluun harreen tokko dubbachuushee nutti hima. Kun akkamitti akka ta’e haa ilaallu.

Israa’eloonni biyya Kana’aanitti galuuf qophaa’aa jiru. Balaaq mootiin biyya Mo’aab saba Israa’eliin sodaateera. Kanaafuu, mootiin Mo’aab Balaaq, Israa’eloota akka isaaf abaaruuf jedhee nama beekaa Bala’aam jedhamu tokkotti erge. Balaaq qarshii baay’ee akka isaaf kennu itti himee waan tureef, Bala’aam harreesaa yaabbatee gara Balaaq deemuuf ka’e.

Yihowaan, Bala’aam sabasaa akka abaaru hin barbaadne. Kanaafuu, ergamaansaa tokko billaa dheeraa qabatee Bala’aamiin deebisuuf karaarra akka dhaabatu godhe. Bala’aam ergamicha arguu hin dandeenye; harrittiin garuu isa argiteetti. Kanaafuu, harrittiin ergamicharraa goruuf yaaltee, ta’uufii didnaan karaarra ciiste. Bala’aam baay’ee waan aareef harreesaa uleedhaan reebe.

Kanaafuu, Yihowaan harreen Bala’aam akka dubbattu godhe. ‘Maal si godheetan na rukutta?’ jettee isa gaafatte.

‘Gowwaa na godhatte. Utuu billaan na harka jiraatee sin ajjeesan ture!’ jedheen.

‘Kanaan dura akkas si godhee beekaa?’ jettee isa gaafatte.

‘Lakki, akkas na gootee hin beektu’ jedheen.

Achiis Yihowaan, Bala’aam ergamicha billaa qabatee karaarra dhaabatu akka argu godhe. Ergamichi akkas jedheen: ‘Harree kee maaliif rukutte? Saba Israa’el akka hin abaarreef karaa keerraa si deebisuun dhufe. Harreen kee utuu narraa hin deebine ta’e, ishee hambisee siin nan ajjeesan ture.’

Bala’aam: ‘Cubbuu hojjedheera. Karaarra dhaabachuu kee hin argine’ jedhe. Ergamichi, Bala’aam karaasaa akka deemu isa dhiise; Bala’aamis gara Balaaq dhaqe. Ammayyuu Israa’eloota abaaruuf yaalee ture; Yihowaan garuu al sadi saba Israa’eliin akka eebbisu isa godhe.