Yesus Waa’ee Mootummaa Waaqayyoo Barsiise

YESUS gara lafaa kan dhufe maaliifi? “Misraachoo mootummaa Waaqayyoo . . . lallabuun ana irra jira, kanaaf anuu ergame” jechuudhaan dubbateera. (Luqaas 4:43) Mootummaa Waaqayyoo isa ijoo lallabasaa ta’e ilaalchisee, wantoota inni barsiise arfan ilaali.

1. Yesus Mootii ta’uusaa. Yesus Masiihicha raajiidhaan dubbatame ta’uusaa ibseera. (Yohannis 4:25, 26) Mootiin Daani’el raajichi mul’ataan arges isa akka ta’e dubbateera. Yesus, gara fuulduraatti “ulfina isaatiin teessoo irra” akka taa’uufi ergamoonnisaas teessoowwanirra akka taa’an isaanitti himeera. (Maatewos 19:28) Bulchitoota kana, “karra xinnayyoo” jedhee kan waame si’a ta’u, “hoolota kan biraa” tuuta kanaan ala ta’anis akka qabu ibseera.—Luqaas 12:32; Yohannis 10:16.

2. Mootummaan Waaqayyoo firdii qajeelaa kan argamsiisu ta’uusaa. Yesus Mootummaan kun, maqaa Yihowaa qulqulleessuufi arrabsoo Seexanni Eedenii jalqabee maqaa kanarra tuulerraa walaba gochuudhaan, murtoo qajeelaa isa guddaa akka raawwatu dubbateera. (Maatewos 6:9, 10) Yesus dhiirotaafi dubartoota, sooreyyiifi hiyyeessota loogii tokko malee barsiisuudhaanis, namoota akka wal hin caalchifne argisiiseera. Yesus adda durummaadhaan Israa’eloota barsiisuuf kan ergame ta’us, namoota Samaariyaa, warra saba Waaqayyoo ykn Yihudoota hin taanes gargaaruuf carraaqqii godheera. Geggeessitoota amantii bara sanaarraa haala adda ta’een, karaa kamiiniyyuu looguurraa fagaateera.

3. Mootummaan Waaqayyoo kan biyya lafaa akka hin taane. Yesus kan jiraate yeroo jeequmsi siyaasaa guddaan turettidha. Biyyisaa bittaa biyya ormaa jala turte. Ta’us, yeroo namoonni dhimma siyaasaa keessatti isa hirmaachisuuf yaalii godhan isaan dhiisee baqateera. (Yohannis 6:14, 15) Nama siyaasaa tokkoon, “Mootummaan inni kan kootii mootummaa biyya lafa kanaa miti” jedheera. (Yohannis 18:36) Duuka buutotasaatiin ‘Isin kan biyya lafaa miti’ jedheera. (Yohannis 15:19) Duuka buutonnisaa miidhaa namoonni isarraan ga’anirraa isa oolchuufillee meeshaa waraanaatti akka hin fayyadamne isaan dhowweera.—Maatewos 26:51, 52.

4. Bulchiinsi Kiristos jaalalarratti kan hundaa’e akka ta’e. Yesus, ba’aa namootaa akka isaanirraa salphisuufi boqonnaa akka isaanii kennu waadaa galeera. (Maatewos 11:28-30) Wanta dubbate kanas raawwateera. Dhiphina mo’uu, warra kaanii wajjin walitti dhufeenya gaarii qabaachuu, qabeenya jaallachuurraa fagaachuufi gammachuu argachuu ilaalchisee, jaalalaan kaka’ee gorsa gaarii kenneera. (Maatewos, boqonnaa 5-7) Yesus jaalala qabeessa waan ta’eef, namoonni haala addaddaa qaban isatti dhihaatu turan. Namoota cunqurfaman dabalatee, namoonni hundi gaarummaafi ulfinaan akka isaan qabu abdachuudhaan garasaa dhufu turan. Dhugumayyuu, Yesus Bulchaa gaarii nuu ta’a!

Karaa gaariin Yesus waa’ee Mootummaa Waaqayyoo itti barsiise garabiraanis jira. Dinqiiwwan hedduu raawwateera. Dinqiiwwan kana kan raawwate maaliifi? Mee haa ilaallu.

—Macaafa Maatewos, Maarqos, Luqaasiifi Yohannis irratti kan hundaa’e.