Yesus Wantoota Addunyaa Maratti Raawwataman Ilaalchisee Raajii Dubbate

ERGAMOOTA Yesus keessaa afur, Gaara Ejersaa isa Yerusaalemiifi mana qulqullummaashee akka gaariitti arguuf isaan dandeessisurra taa’anii, wanta Yesus sanaan dura dubbate ilaalchisee gaaffii tokko tokko kophaatti isa gaafatan. Yesus, manni qulqullummaa Yerusaalem akka balleeffamu yeroo xinnoo dura isaanitti himeera. Sana durammoo waa’ee “dhuma biyya lafaa” isaanitti himee ture. (Maatewos 13:40, 49) Kanaan kan ka’es bartoonnisaa, “Milikkinni dhufa keetii, kan dhuma barichaas maali?” jedhanii isa gaafatan.—Maatewos 24:3.

Yesus, badiisa Yerusaalem dura maaltu akka raawwatamu isaanitti hime. Haata’u malee, deebiin inni kenne yeroo sanatti qofa raawwatamee kan hafu hin turre. Raajiin inni dubbate, yeroo boodas addunyaa maratti kan raawwatamu ture. Yesus, raajiiwwan hedduu addunyaa maratti raawwatamaniifi walitti qabamanii milikkita dhuma barichaa ta’an dubbate. Milikkinni kun, namoonni lafarra jiran, yeroo Yesus samiirratti Mootii ta’uu itti jalqabe akka hubatan isaan gargaara. Akkasumas, Yihowaan Mootummaa Masiihichaa isa yeroo dheeraa dura abdachiifamerratti Yesusiin Mootii gochuusaa argisiisa. Milikkinni kun, Mootummichi hammina balleessuudhaan ilmaan namootaatiif nagaa akka fidu kan argisiisudha. Wantoonni Yesus raajiidhaan dubbate, dhuma biyya lafaa, jechuunis dhuma sirna amantii, siyaasaafi hawaasummaa yeroo ammaatti argamuu, akkasumas jalqaba sirna haaraa argisiisu.

Yesus Mootii ta’ee yeroo samiirratti argamu, addunyaa maratti waraanni, beelli, socho’i lafaa guddaaniifi dhukkubni akka ta’u dubbateera. Seera malee jiraachuun ni babal’ata. Duuka buutonni Yesus warri dhugaan, misiraachoo Mootummaa Waaqayyoo addunyaa maratti ni lallabu. Wantoonni kun hundi erga raawwatamanii booda, “rakkinni guddaan” kanaan dura ta’ee hin beekne ni dhufa.—Maatewos 24:21.

Duuka buutonni Yesus, rakkinni guddaan kun dhufuusaa akkamitti beekuu danda’u? Yesus, “Muka harbuu fakkeenya godhadhaatii irraa baraa!” jedheera. (Maatewos 24:32) Dameen muka harbuu yommuu baala godhatu, bonni dhufuusaatiif mallattoo gaarii ta’a. Haaluma wal fakkaatuun, milikkinni Yesus dubbate hundi yommuu wal faana raawwataman, dhumni dhihaachuunsaa ni beekama. Guyyaafi sa’aatii rakkinni guddaan kun itti jalqabu, Abbaa malee eenyuyyuu hin beeku. Kanaan kan ka’es Yesus, ‘Dammaqaa! Yerichi sun yoom akka ga’u hin beektan’ jechuudhaan bartootasaa gorseera.—Maarqos 13:33.

—Maatewos boqonnaa 24 fi 25; Maarqos boqonnaa 13; Luqaas boqonnaa 21⁠rratti kan hundaa’e.