Amantiin Dhugaa Maali Dha?

AMANTII dhugaa qabaachuu jechuun Waaqayyo akka jiru amanuu qofa jechuu miti. Namoonni miliyoonaan lakkaaʼaman Waaqayyotti kan amanan taʼus, taʼe jedhanii wantoota hamoo raawwatu. “Amantiin” akkasii maallaqa sobaa wajjin wal fakkaata. Maallaqni sobaa kun maallaqa dhugaa kan fakkaatu taʼus, gatii hin qabu. Maarree, amantiin dhugaa maali dha?

Amantiin dhugaa beekumsa Kitaaba Qulqulluu isa sirrii taʼe irratti kan hundaaʼe dha. Yaadawwan gaggeessaa hafuura qulqulluutiin barreeffaman kun waaʼee Waaqayyoo dhugaa isaa nutti himu, akkasumas isa beekuu akka dandeenyu nu gargaaru. Seerawwan, kaayyoowwanii fi barumsawwan isaa nuuf ibsu. Barumsawwan kun kanneen armaan gadii dabalatu:

• Waaqayyo tokko dha. Kan isaan qixxaatu hin jiru.

• Yesuus Waaqa Hundumaa Dandaʼu miti. Inni raajii Waaqayyoo ti.

• Waaqayyo waaqolii tolfamoo akkamii iyyuu waaqeffachuu ni balaaleffata.

• Ilmaan namootaa gara fuulduraatti guyyaan murtii isaan eeggata.

• Namoonni duʼan hedduun duʼaa kaʼanii Jannata keessa jiraatu.

Amantiin dhugaa hojiiwwan gaggaarii akka hojjennu nu kakaasa. Hojiiwwan akkasii Waaqayyoof ulfina fidu, akkasumas nuunis taʼe namoota kaan ni fayyadu. Hojiiwwan gaggaariin kun wantoota armaan gadii dabalatu:

• Waaqayyoon waaqeffachuu.

• amaloota Waaqayyoon gammachiisan—keessumaa jaalala qabaachuu.

• yaadawwanii fi fedhiiwwan hamoo taʼan irraa fagaachuu.

• rakkoowwan yoo jiraatanis Waaqayyo irratti amantii qabaachuu.

• waaʼee Waaqayyoo namoota barsiisuu.

Amantii Dhugaa Qabaachuu kan Dandeessu Akkamitti?

Waaqayyo akka si gargaaru isa gaafadhu. Museen raajichi, “Maaloo, . . . akkan si beekuu fi si duratti fudhatama argachuu koo akkan itti fufuuf daandiiwwan kee na beeksisi” jedhee Waaqayyoon kadhatee ture.a Waaqayyo kadhannaa isaa dhagaʼeera, deebiis isaaf kenneera. Museen amantii qabaachuudhaan fakkeenya gaarii taʼeera. Waaqayyo atis amantii dhugaa akka qabaattu si gargaara.

Kitaaba Qulqulluu qoʼachuuf yeroo ramadi. Kitaabonni gaggeessaa hafuura qulqulluutiin barreeffaman kanneen akka Tooraa, Faarfannaa fi Wangeelotaa jiran Kitaaba Qulqulluu isa addunyaa irratti balʼinaan hiikamee fi raabsame keessatti argamu. Kitaaba gaggeessaa hafuuraatiin barreeffame kana qabdaa?

Gorsa Kitaaba Qulqulluu jireenya kee keessatti hojii irra oolchi. Amantiin akkuma irree yeroo itti fayyadamnu ni guddata. Amantii kee hojiidhaan yommuu argisiistu guddachaa deema. Gorsi Waaqayyoo sirrii akka taʼe ofuma keetii ni argita. Dhuguma iyyuu gorsi hojii irra ooluu dandaʼuu fi Kitaaba Qulqulluu keessatti argamu jireenya namoota hedduu jijjiireera. Fakkeenya muraasa ilaaluuf dubbisuu kee itti fufi.