Waaqayyo Eenyudha?

1. Waaqayyoon waaqeffachuu kan qabnu maaliifi?

Wantoota hunda kan uume Waaqa dhugaati. Inni jalqabas taʼe dhuma hin qabu. (Faarfannaa 90:2) Maddi misiraachoo Macaafa Qulqulluu Isadha. (1 Ximotewos 1:11) Jireenya kan nuu kenne Waaqayyo waan taʼeef isa qofa waaqeffachuu qabna.​—Mulʼata 4:11 dubbisi.

2. Waaqayyo maal fakkaata?

Waaqayyo Hafuuradha; jechuunis qaama uumamawwan lafarra jiran hunda caalu waan taʼeef, namni kamiyyuu matumaa isa arguu hin dandaʼu. (Yohannis 1:18; 4:24) Haataʼu malee, wantoota Waaqayyo uume ilaaluudhaan amalawwansaa hubachuu dandeenya. Fakkeenyaaf, akaakuu kuduraaleefi abaaboowwan addaddaa ilaaluudhaan jaalalaafi ogummaa inni qabu hubachuu dandeenya. Balʼinni uumama cufaas humnisaa hangam guddaa akka taʼe nu hubachiisa.​—Roomaa 1:20 dubbisi.

Macaafa Qulqulluu dubbisuudhaanis waaʼee amalawwan Waaqayyoo caalaatti barachuu dandeenya. Fakkeenyaaf, Macaafni Qulqulluun Waaqayyo maal akka jaallatuufi akka jibbu, namoota akkamitti akka qabuufi haalawwan addaddaa keessatti tarkaanfii akkamii akka fudhate nuu ibsa.​—Faarfannaa 103:7-10 dubbisi.

3. Waaqayyo maqaa qabaa?

Yesus, “Yaa isa waaqa irra jirtu abbaa keenyaa! Maqaan kee qulqulluu taʼee haa eegamu” jedheera. (Maatewos 6:9) Waaqayyo maqaawwan ulfinaa hedduu qabaatuyyuu, maqaansaa garuu tokko qofadha. Afaan hunda keessatti karaa garaagaraatiin waamama. Yeroo baayʼee afaan Ingiliffaatiin “Jehovah” jedhamee waamama. Namoonni tokko tokko garuu “Yaahwee” jedhanii isa waamu.​—Uumama 22:14 dubbisi.

Hiikawwan Macaafa Qulqulluu hedduun, maqaa Waaqayyoo keessaa baasanii maqaawwan ulfinaa Gooftaa ykn Waaqayyo jedhamaniin bakka buusaniiru. Macaafni Qulqulluun jalqaba yommuu barreeffame garuu, maqaan Waaqayyoo al 7,000 taʼu argama ture. Yesus waaʼee Waaqayyoo yeroo namoota barsiisaa ture, maqaan Waaqayyoo akka beekamu godheera.​—Yohannis 17:26 dubbisi.

Viidiyoo, Waaqayyo Maqaa Qabaa? jedhu ilaali.

4. Yihowaan waaʼee keenya ni yaadaa?

Rakkinni baayʼachuunsaa Yihowaan waaʼee keenya akka hin yaanne argisiisaa? Namoonni tokko tokko Waaqayyo nu qoruuf jedhee akka dhiphannu godha jedhu; kun garuu dhugaa miti.​—Yaaqoob 1:13 dubbisi.

Waaqayyo, ilmaan namootaa mirga filannaa gochuuf isaan dandeessisu akka qabaatan gochuudhaan akka isaan kabaju argisiiseera. Waaqayyoon tajaajiluu filachuuf mirga argachuu keenya hin dinqisiifannuu? (Iyaasuu 24:15) Haataʼu malee namoonni hedduun wanta gadhee warra kaanirratti raawwachuu waan filataniif, dhiphinni garmalee babalʼateera. Yihowaan jalʼina akkasii yommuu argu baayʼee gadda.​—Uumama 6:5, 6 dubbisi.

Yihowaan nuu yaada. Gammachuu akka argannus ni barbaada. Yeroo dhihootti dhiphinaafi qaamota dhiphinaaf sababii taʼan ni balleessa. Hammasitti garuu, yeroo murtaaʼeef dhiphinni akka jiraatu heyyamuuf sababii gaʼaa qaba. Waaʼee kanaa caalaatti Barumsa 8⁠ffaarratti baranna.​—2 Phexros 2:9; 3:7, 13 dubbisi.

5. Waaqayyotti dhihaachuu kan dandeenyu akkamitti?

Yihowaan kadhannaadhaan akka isatti dhihaannu nu afeera. Dhuunfaattis xiyyeeffannaa nuu kenna. (Faarfannaa 65:2; 145:18) Akkasumas dhiifama gochuuf qophaaʼaadha. Yeroo tokko tokko kan dogoggorru taanuyyuu, carraaqqii isa gammachiisuuf goonu ni hubata. Kanaaf mudaa kan qabnu yoo taanellee, michuu Waaqayyoo taʼuu ni dandeenya.​—Faarfannaa 103:12-14; Yaaqoob 4:8 dubbisi.

Jireenya kan nuu kenne Yihowaa waan taʼeef, eenyuyyuu caalaa isa jaallachuu qabna. (Maarqos 12:30) Jaalala Waaqayyoof qabdu argisiisuuf, waaʼeesaa caalaatti barachaa yommuu adeemtuufi wanta inni sirraa barbaadu raawwachuukee yommuu itti fuftu, caalaatti isatti dhihaatta.​—1 Ximotewos 2:4; 1 Yohannis 5:3 dubbisi.