‘Dubbii Amanamaa’ Soorachuu
1 Nama Waaqayyoo ta’anii jiraachuun carraaqqii guddaa gaafata. (1 Xim. 4:7-10) Kanaaf jabina keenya qofaan jireenya akkasii hordofuuf yoo yaalle, dadhabuufi gufachuu dandeenya. (Isa. 40:29-31) Yihowaarraa jabina argachuu kan itti dandeenyu karaan inni tokko, ‘dubbii amanamaa’ soorachuutti guddachuudhaani.—1 Xim. 4:6.
2 Nyaata Hafuuraa Ga’aa ta’e: Yihowaan karaa Sagaleesaa, karaa ‘hojjetaa amanamaafi ogeessaatiin’ nyaata hafuuraa ga’aa ta’e nuu dhiheessa. (Mat. 24:45) Qophii kanarraa fayyadamuuf hamma dandeenye gochaa jiraa? Guyyaa guyyaadhaan Macaafa Qulqulluu ni dubbisnaa? Qayyabannaa dhuunfaa gochuufi waan qayyabannerratti xiinxaluuf yeroo ramadnaa? (Far. 1:2, 3) Nyaanni hafuuraa akkasii kun, dhiibbaa addunyaan Seexanaa nurraan geessisuun akka hin dadhabneef nu jabeessa. (1 Yoh. 5:19) Sammuu keenya wantoota gaarii ta’aniin yoo soorreefi wantoota kana jireenya keenya keessatti hojiirra yoo oolchine, Yihowaan nu wajjin ta’a.—Filp. 4:8, 9.
3 Yihowaan walga’iiwwan gumiitiinis nu jajjabeessa. (Ibr. 10:24, 25) Qajeelfamni hafuuraafi walitti dhufeenyi gaariin walga’iiwwan kanarratti argannu, yeroo qorumsi dhufu jabaannee dhaabachuuf nu gargaara. (1 Phe. 5:9, 10) Shamarreen Kiristiyaanaa tokko akkas jetteetti: “Guyyaa guutuu mana barumsaa oolee ennaan dhufu nan dadhaba. Walga’iiwwan gumii garuu, akkuma jannata gammoojjii keessa jiruutti guyyaa mana barumsaa itti aanuuf na jajjabeessu.” Walga’iiwwanirratti argamuuf carraaqqii gochuu keenyaan eebifamneera.
4 Dhugaa Labsuu: Warra kaaniif lallabuun Yesusiif akka nyaataa ture. (Yoh. 4:32-34) Nuyis akkasuma, abdii dinqisiisaa Waaqayyo kenne warra kaaniitti ennaa lallabnu ni jabaanna. Akkasumas tajaajilaan qabamuun keenya, garaaniifi sammuun keenya Mootummattiirrattiifi eebbawwan dhihootti dhufuuf jiranirratti akka xiyyeeffannu nu gargaara. Dhugumaan hojiin lallabaa nu jajjabeessa.—Mat. 11:28-30.
5 Soorata hafuuraa Yihowaan yeroo har’aatti sabasaatiif dhiheessurraa hirmaachuu keenyaan dhugumaan eebbifamneerra. Eegaa sagalee keenya ol kaasnee isa galateeffachuu keenya itti haa fufnu.—Isa. 65:13, 14.