Namoota Gad Of Deebisan Daandii Waaqayyoorra Akka Deddeebi’an Barsiisaa
1 Bartoonni Yesus jaarraa jalqabaatti turan ‘daandii wangeelaarra’ akka adeemaa turan ibsameera. (HoE. 9:2) Kiristiyaana dhugaa ta’uun guutummaa jireenya nama tokkoo kan ilaallatudha. (Fak. 3:5, 6) Kanaafuu, yeroo qayyabannaa Macaafa Qulqulluu geggeessinu, beekumsa sirrii Macaafa Qulqulluurratti argamu isaan barsiisuu caalaa waan dabalatu qaba. Daandii Yihowaarra akka deddeebi’an isaan gargaaruu qabna.—Far. 25:8, 9.
2 Yihowaafi Yesusiin Akka Jaallatan Gargaaraa: Namoonni gonkummaa hin qabne, yaadasaanii, ilaalchasaanii, dubbiisaaniifi amalasaanii jaalala Waaqayyoo wajjin wal simsiisuun akka isaan rakkisu beekamaadha. (Rom. 7:21-23; Efe. 4:22-24) Haata’u malee, jaalalli namoonni gad of deebisan Yihowaafi Ilmasaatiif qaban wanta rakkisaa ta’e kana akka godhan isaan kakaasa. (Yoh. 14:15; 1 Yoh. 5:3) Barattoonni keenya jaalala kana akka qabaatan gargaaruu kan dandeenyu akkamitti?
3 Barattoonnikee Yihowaan Waaqa akkamii akka ta’e akka beekan isaan gargaari. Obboleessi tokko akkas jedheera: “Namoonni nama hin beekne tokko jaallachuu waan hin dandeenyeef, guyyaa qayyabannaa isa jalqabaatii jalqabee, Macaafa Qulqulluurraa maqaa Waaqayyoon isaanitti argisiisa; achiis carraan argadhetti waa’ee amalawwan Yihowaa karaan itti isaaniif ibsun barbaada.” Yesusis amalawwan Waaqayyoo kana calaqqisuusaa ibsuudhaan akka Waaqayyoon beekan gochuu dandeenya. (Yoh. 1:14; 14:9) Itti dabalees, kitaaba Barumsa Macaafa Qulqulluu jedhamurratti saanduqa maree irra deebii dhuma boqonnaa hundaarratti argamanitti fayyadamuudhaan, amalawwan Waaqayyoofi Ilmasaarratti akka xiinxalan godhi.
4 Fakkeenya Isaaniif Ta’uudhaan Barsiisaa: Barsiistotaafi geggeessitoota waan taaneef, karaa Waaqayyoorra deddeebi’uu jechuun maal jechuu akka ta’e hojii keenyaan isaanitti argisiisna. (1 Qor. 11:1) Fakkeenyaaf, barattoonni Macaafa Qulqulluu baay’een namoota hin beeknetti waa’ee amantiisaanii himuu hin sodaatu. Kanaafuu, jaalala, amantiifi ija jabinaan hojii lallabaafi bartoota taasisuurratti akka hirmaatan isaan gargaaruun obsaafi ogummaa gaafata. (2 Qor. 4:13; 1 Tas. 2:2) Fedhiin barattoota keenya geggeessuuf qabnu, yeroo isaan tajaajilarratti hirmaachuu jalqabanitti wajjin tajaajiluuf nu kakaasa.
5 Fakkeenyikee akkaataa jireenyaasaanii warra kaanis akkamitti geggeessuu akka qaban isaan barsiisuu danda’a. Nama dhukkubsate yeroo gaafattu ykn obboloota gumii keessa jiran miira ho’aadhaan yeroo nagaa gaafattu arguunsaanii jaalalakee hojiidhaan akka argan isaan gargaara. (Yoh. 15:12) Yeroo Galma Mootummaa qulqulleessitu ykn yeroo warra kaan gargaartus, akkamitti tajaajiluu akka danda’an isaan barsiisaa jirta. (Yoh. 13:12-15) Jireenya salphaa ta’e akka jiraattu arguusaanii, ‘duraan dursanii yaada ofii mootummaa Waaqayyootti hidhuu’ jechuun maal jechuu akka ta’e isaan hubachiisa.—Mat. 6:33.
6 Hojiin Sagalee Waaqayyoo barsiisuufi bartoota taasisuu carraaqii guddaa gaafata. Namoonni gad of deebisan ‘dhugaatti qabamanii jiraachuusaanii’ arguun baay’ee nama gammachiisa!—3 Yoh. 4.
[Gaaffiiwwan Qayyabannaa]
1. Hojiin bartoota taasisuu maal dabalata?
2. Barattoonni Macaafa Qulqulluu abboommiiwwan Waaqayyoo akka eegan wanti isaan kakaasuu danda’u maalidha?
3. Barattoonni Yihowaafi Yesusiif jaalala akka qabaatan gargaaru kan dandeenyu akkamitti?
4. (a) Barattoonni baay’een lallabuun kan isaanitti ulfaatu maaliifi? (b) Barattoonni keenya tajaajilarratti hirmaachuu akka jalqaban akkamitti gargaaruu dandeenya?
5. Fakkeenya gaarii ta’uufi abboommiiwwan Waaqayyootiif ajajamuun maalfaa akka dabalatu barsiisuuf kan gargaaru akkamitti?
6. Namoonni Yihowaa akka tajaajilan gargaaruun gammachuu akkamii argamsiisa?