Namni Qayyabachuu Barbaadu Kan Biraa Jiraachuusaa Nama Qayyabsiistu Ni Gaafattaa?
Yeroo ammaatti nama Macaafa Qulqulluu qayyabsiistu yoo qabaatte, hiriyoota, firootasaa, ykn nama beeku keessaa wanta Macaafni Qulqulluun barsiisuu beekuu kan barbaadu yoo jiraate maaliif isa hin gaafattu? Namoota baay’ee sitti himuu danda’a. Yeroo namoota kana Macaafa Qulqulluu akka qayyabatan afeeruu dhaqxutti maqaasaa caqasuun rakkoo akka hin qabaanne isa gaafadhu. Akkas jechuu dandeessa: “[Maqaa baratichaa caqasiitii] Macaafa Qulqulluu qayyabachuusaatti gammadeera; atis sagantaa qayyabannaa kaffaltii malee kennamu kanarraa faayidaa argachuu akka barbaaddu isatti dhaga’ama.” Achiis, kitaaba Barumsa Macaafa Qulqulluu jedhamutti fayyadamuudhaan akkatti qayyabannaan geggeeffamu gabaabumatti itti argisiisi.
Barataa guddina argisiisaa jiru yoo qabaatte, hiriyootaafi miseensota maatiisaatti qophii qayyabannaa kana akka isaaniif ibsu jajjabeessi. Qayyabannaasaarratti isaan afeeruu danda’a. Kun mijaa’aa yoo ta’uu baatemmoo, ati isaaniin wal argitee qophii Macaafa Qulqulluu qayyabachuuf godhame kana akka ibsituuf gochuu danda’a. Baratichi kana gochuunsaa beekumsa Macaafa Qulqulluurraa argate warra kaaniitti himuu akka jalqabu isa jajjabeessa.
Namoonni deddeebitee gaafattus ofiisaaniitiif qayyabannaa walirraa hin cinne jalqabuu baataniyyuu, nama qayyabsiistu sii arguu danda’u. Kitaaba Barumsa Macaafa Qulqulluu jedhamu ennaa kennituuf akkas jettee gaafachuu dandeessa: “Nama kitaaba kana qabaachuu barbaadu kan biraa beektaa?”
Yeroo ariifachiisaa keessa waan jirruuf, namoonni misiraachicha dhaga’anii akka fudhatan gargaaruuf carraa arganne hundumaatti fayyadamuu barbaanna. Namni qayyabachuu barbaadu kan biraa jiraachuusaa nama qayyabsiistu ni gaafattaa?