Qayyabannaawwan Macaafa Qulqulluu Amalawwan Yihowaa Akka Dinqisiifatan Gargaaraa
1 Tajaajila keenyaan, dhugaawwan Macaafa Qulqulluu bu’uura ta’an warra kaan barsiisuu caalaas waan goonu qabna. Namoonni Yihowaan qaama kan qabu ta’uusaa akka beekaniifi amalawwansaa akka dinqisiifatan isaan gargaarra. Namoonni garaa qajeelaa qaban dhugaan waa’ee Waaqayyoo baratan, ‘jireenya gooftaadhaaf ta’u jiraachuufi yeroo hundumaa waan isatti tolu gochuudhaan’ jireenyasaaniirratti jijjiirama guddaa akka godhan isaan kakaasa.—Qol. 1:9, 10; 3:9, 10.
2 Kitaaba Haaraa Qayyabannaadhaaf Gargaaru: Kitaabni Barumsa Macaafa Qulqulluu jalqabaa kaasee waa’ee amalawwan Yihowaa ibsa. Boqonnaan jalqabaa gaaffiiwwan, Dhugumaan Waaqayyo waa’ee kee ni yaadaa?, Waaqayyo, Waaqa akkamiiti?, akkasumas Waaqayyotti Dhihaachuun ni danda’amaa? jedhaniif deebii kenna. Boqonnaan kun waa’ee qulqullummaa Yihowaa (key. 10), waaqa qajeelaafi gara laafessa ta’uusaa (key. 11), jaalalasaa (key. 13), humnasaa (key. 16) akkasumas oo’a qabeessa, ayyaana qabeessa, dhiifama gochuuf kan qophaa’e, obsa qabeessaafi amanamaa (key. 19) ta’uusaa addeessa. Keeyyanni digdamaffaanimmoo: “Waa’ee Yihowaa caalaatti yeroo barachaa adeemtu, innis caalaatti siif dhugooma; kunis caalaatti akka isa jaallattuufi isatti dhihaattu si godha” jechuudhaan yaada xumuraa kenna.
3 Qayyabannaawwan Macaafa Qulqulluu Yihowaatti akka dhihaatan gargaaruuf kitaaba Barumsa Macaafa Qulqulluutti fayyadamuu kan dandeenyu akkamitti? Keeyyata amalawwan Waaqayyoo keessaa tokko addeessurratti erga mari’annee booda, akkas jechuudhaan baraticha gaafachuu dandeenya: “Kun waa’ee eenyummaa Yihowaa maal si barsiisa?” ykn “Kun Waaqayyo dhuunfaatti akka siif yaadu kan argisiisu akkamitti?” Yeroo tokko tokko qayyabannaa gidduutti gaaffiiwwan akkasii gaafachuudhaan, barattoonni keenya waan baratanirratti akka xiinxalan barsiisuufi amalawwan Yihowaa akka dinqisiifatan gargaaruu dandeenya.
4 Yaada Irra Deebiitti Fayyadamaa: Dhuma boqonnaa hundumaarratti, baratichi qabxiiwwan saanduqa “Wanta Macaafni Qulqulluun Barsiisu” jedhu keessa jiranirratti jecha mataasaatiin yaada akka kennu afeeri. Caqasawwan yaannisaanii hin kaa’amnerratti akka xiyyeeffatu godhi. Baratichi waan garaasaa keessa jiru akka dubbatu gochuuf yeroo tokko tokko, “Barumsa kana ilaalchisee yaada Macaafni Qulqulluun kennurratti ilaalcha maalii qabda?” jettee gaafachuu dandeessa. Kana gochuudhaan qabxiiwwan ijoo boqonnichaa addeessuu qofa utuu hin ta’in, wanta baratichi dhugumaan amanus gadi fageenyaan beekuu dandeessa. Kunis baratichi walitti dhufeenya Yihowaa wajjin qabu akka cimsatu gargaara.