‘Phaawulos Waaqayyoon Galateeffate; Akkasumas Jajjabina Argate’

Obboloonni gumii Roomaa keessa jiran Phaawulos dhufaa akka jiru yommuu dhagaʼan, gareedhaan isa simachuuf gara kiiloo meetira 64 deemaniiru. Jaalalli fedhii ofii aarsaa gochuudhaan argisiisan kun Phaawulos irratti dhibbaa akkamii geessise? Phaawulos “yommuu isaan argu Waaqayyoon galateeffate; akkasumas jajjabina argate.” (HoE 28:15) Phaawulos gumiiwwan daawwachaa ture jajjabeessuudhaan kan beekamu taʼus, yeroo kanatti garuu hidhamee waan jiruuf jajjabinni isa barbaachisa ture.—2Qo 13:10.

Yeroo harʼaatti ilaaltoonni ol aanaa aanaa obbolootaa fi obboleettota jajjabeessuuf gumiidhaa gara gumii deemu. Haa taʼu malee yeroo tokko tokko akkuma tajaajiltoota Waaqayyoo kaanii dadhabuu, dhiphachuu fi abdii kutachuu dandaʼu. Yeroo itti aanu ilaaltuun ol aanaa aanaa haadha manaa isaa wajjin gumii keessan yommuu daawwatan, isaan ‘jajjabeessuuf’ maal gochuu dandeessa?—Rom 1:11, 12.

• 

  Walgaʼii tajaajila dirree irratti argamuu. Babalʼistoonni torban sochiin addaa kun itti godhamu irraa guutummaatti faayidaa argachuuf yommuu carraaqqii godhanitti ilaaltuun ol aanaa aanaa jajjabina argata. (1Ta 1:2, 3; 2:20) Jiʼa inni daawwatutti qajeelchaa gargaaraa taʼuuf karoora baafachuu dandeessu. Innii fi haati manaa isaa sii wajjin tajaajila dirree irratti ykn tokkoon isaanii qoʼannaa Kitaaba Qulqulluu ati geggeessitu irratti akka hirmaatan afeeruu dandeessaa? Babalʼistoota haaraa ykn hojii lallabaa irratti muuxannoo akka hin qabne isaanitti dhagaʼamuu dabalatee, babalʼistoota gara garaa wajjin tajaajiluun isaan gammachiisa.

• 

  Keessummummaa isaan simachuu. Mana keessan akka buufatan ykn nyaata isaan afeeruu dandeessuu? Kunis ilaaltuu ol aanaa aanaa fi haadha manaa isaa akka jaallattan argisiisa. Taʼus isaan wanti baayʼeen akka isaaniif qopheeffamu hin barbaadan.—Luq 10:38-42.

• 

  Qajeelfamaa fi gorsa inni siif kennu fudhachuu, akkasumas hojii irra oolchuu. Ilaaltuun ol aanaa aanaan tajaajila Yihowaadhaaf dhiheessinu ilaalchisee jaalalaan kakaʼee karaa itti fooyyessuu dandeenyu nutti argisiisa. Yeroo tokko tokko immoo, gorsa cimaa kennuun isa barbaachisa taʼa. (1Qo 5:1-5) Isaaf ajajamuunii fi isaaf bitamuun keenya gammachuu isaaf argamsiisa.—Ibr 13:17.

• 

  Dinqisiifannaa isaaniif qabdu ibsiif. Carraaqqiin ilaaltuun ol aanaa aanaa fi haati manaa isaa godhan akkamitti akka si fayyade isaanitti himi. Kanas isaanumatti dubbachuudhaan ykn kaardii irratti barreessuudhaan isaaniif ibsuu dandeessa.—Qol 3:15.