Qabiyyee Hiika Addunyaa Haaraatti Guutummaatti Fayyadami

Kitaabni Qulqulluun Hiikni Addunyaa Haaraa caqasoota wal fakkaatan (marginal references) qaba. Caqasoonni kun yaada maddiisaanii jiruu wajjin walitti dhufeenya waan qabaniif kutaawwan Kitaaba Qulqulluu akka wal siman argisiisu. Caqasoota kana qubeewwan xixinnoo jecha tokkotti aananii jiran ilaaluudhaan argachuun ni dandaʼama. Kitaaba Qulqulluu maxxanfamerraa caqasoota kana argachuuf toora gidduu kitaabichaarraa qubee sana barbaadi. Weebsaayitii jw.org ykn appilikeeshinii JW Library^® irratti caqasoota wal fakkaatan argachuuf qubee jecha tokkotti aanee jiru tuqi.

Caqasoonni wal fakkaatan (marginal references) kun kanneen armaan gadii keessaa isa tokkotti ykn isaa olitti si geessuu dandaʼu:

Seenaa wal fakkaatu: Caqasoonni kun gara caqasoota kan biroo seenaa wal fakkaatu qabatanitti si geessu. Fakkeenyaaf, 2 Saamuʼel 24:1 fi 1 Seenaa Baraa 21:1 ilaali.

Yaada caqasa biraarraa fudhatame: Caqasoonni kun gaaleen ykn yaanni tokko eessarraa akka fudhatame argisiisu. Fakkeenyaaf, Maatewos 4:4 fi Keessa Deebii 8:3 ilaali.

Raajii raawwiisaa argate: Caqasoonni kun raajii tokkoo fi raawwiisaa wal qabsiisu. Fakkeenyaaf, Maatewos 21:5 fi Zakkaariyaas 9:9 ilaali.