Faarfannaa 23:4—“Ani Bowwaa Dukkanaaʼaa Sodaachisaa Keessa Yoon Adeeme Iyyuu”

“Ati anaa wajjin waan jirtuuf, sulula dukkanaaʼaa keessa yoon deeme illee, miidhaan na irra gaʼa jedhee hin sodaadhu; uleen ittiin tiksituu fi uleen ittiin qajeelchitu na jajjabeessu.”—Faarfannaa 23:4, Kitaaba Qulqulluu Hiika Addunyaa Haaraa.

“Ani bowwaa dukkanaaʼaa sodaachisaa keessa yoon adeeme iyyuu, hamaan anatti dhufa jedhee hin sodaadhu; ati anaa wajjin jirta, uleen keetii fi dhaabanni kee ana in jajjabeessu.”—Faarfannaa 23:4, Kitaaba Qulqulluu Hiika Bara 1997.

Hiika Faarfannaa 23:4a

Tajaajiltoonni Waaqayyoo yeroo haalawwan rakkisoon isaan mudatanitti illee gargaarsaa fi kunuunsa isaa ni argatu. Caqasni kun kunuunsa Yihowaan tajaajiltoota isaatiif godhu, kunuunsa tikseen tokko hoolota isaatiif godhuu wajjin walbira qabee ibsa.b Haalawwan rakkisoo caqasa kana irratti ibsaman kanneen akka sulula dukkanaaʼaa ykn dukkanaa fi balaawwan duʼaaf nama saaxilan yommuu isaan mudatanitti illee kophaa isaanii akka taʼan isaanitti hin dhagaʼamu. Waaqayyo isaanii wajjin akka jirutti waan yaadaniif, eegumsa akka qaban isaanitti dhagaʼama.

Bara duriitti tikseen tokko hoolota isaa bineensota isaan adamsan irraa eeguuf ulee isaatti fayyadama ture. Akkasumas hoolota isaa qajeelchuuf ykn balaa irraa eeguuf ulee dheeraa karaa tokkoon hookkoo qabutti fayyadama. Haaluma wal fakkaatuun, Waaqni keenya Yihowaan akkuma Tiksee jaalala qabeessa tajaajiloota isaatiif eegumsa godhuu fi isaan qajeelchuu ti. Yommuu haalawwan baayʼee rakkisoo taʼan isaan mudatanitti illee, Yihowaan karaawwan garaa garaatiin kunuunsa isaaniif godha.

• Kitaaba Qulqulluu isa Dubbii isaa taʼee fi barreeffamaan jirutti fayyadamee isaan barsiisa, akkasumas isaan jajjabeessa.—Roomaa 15:4.

• Kadhannaa isaanii dhagaʼuudhaan, nagaa sammuu fi miiraa isaaniif kenna.—Filiphisiyus 4:6, 7.

• Tajaajiltoota isaatti fayyadamee isaan jajjabeessa.—Ibroota 10:24, 25.

• Wantoota hamoo yeroo ammaatti isaan irra gaʼaa jiran balleessuudhaan, gara fuulduraatti wantoota gaggaarii akka isaaniif fidu abdii amansiisaa isaaniif kenneera.—Faarfannaa 37:29; Mulʼata 21:3-5.

Yaada naannoo Faarfannaa 23:4⁠tti argamu

Faarfannaa 23 kan barreesse, Daawit isa ijoollummaa isaatti tiksee turee fi yeroo booda immoo mootii saba Israaʼel durii ture dha. (1 Saamuʼel 17:34, 35; 2 Saamuʼel 7:8) Faarfannaan kun Yihowaan akkuma tikseen tokko hoolota isaatiif godhu, tajaajiltoota isaa akka geggeessu, akka sooruu fi akka haaromsu ibsuudhaan jalqaba.—Faarfannaa 23:1-3.

Daawit Faarfannaa 23:4 irratti eegumsa Waaqayyoo yommuu ibsu, bamaqaa “inni” jedhu irraa gara “ati” jedhutti jijjiireera. Jijjiiramni xiqqoon kun Daawit Yihowaa wajjin hariiroo cimaa akka qabu ibsa. Daawit Waaqayyo akka isaaf yaaduu fi rakkoowwan isa irra gaʼan akka beeku hubateera. Kanaan kan kaʼes Daawit hin sodaanne.

Lakkoofsota itti aanan lamaan irratti, jechuunis Faarfannaa 23 lakkoofsa 5 fi 6 irratti fakkeenyi sun tiksee fi hoolota isaa irraa gara keessummeessaa fi keessummaa isaatti jijjiirameera. Yihowaan akkuma keessummeessaa arjaa taʼe tokkootti, akka keessummaa kabajamaatti Daawitiin simateera. Diinonni Daawit illee Waaqayyoo akka isa hin kunuunsine gochuu hin dandaʼan. Daawit, Waaqayyo bara jireenya isaa hundumaatti gaarummaa fi jaalala akka isatti argisiisu amanannaa qabu ibseera.

Ibsi Faarfannaa 23 irratti argamu Waaqayyo tajaajiltoota isaa jaalalaan kunuunsuu isaa akka itti fufu argisiisa.—1 Pheexiros 2:25.