Amantiin Waaqayyorratti Qabdan Hammam Jabaadha?

“Duraan dursitanii yaada keessan Mootummaa Waaqayyoo . . . barbaaduutti hidhaa!”—MAATEWOS 6:33.

1, 2. Dargaggeessi tokko haala hojiidhaa wajjin wal qabateen tarkaanfii akkamii fudhate? Kana kan godhe maaliifi?

DARGAGGEESSI tokko caalaatti gumii gargaaruu barbaada ture. Haata’u malee, hojiinsaa yeroo hundumaa walga’ii gumiirratti akka hin argamne gufuu itti ta’e. Rakkina kanaaf furmaata argachuu kan danda’e akkamitti? Jireenyasaa salphaa gochuudhaan hojiisaa gadhiise; yeroo boodas hojii sochii gumii keessatti qabu akka raawwatu isa gargaaru argate. Yeroo ammaatti mindaa duraan argaturra baay’ee xiqqoo kan argatu ta’us, wanta maatiisaatiif barbaachisu dhiheessaa, caalaatti gumii gargaaraa jira.

² Dargaggeessi kun sirreeffama akkasii maaliif akka godhe hubatteettaa? Atihoo haala isaa wajjin wal fakkaatu keessa utuu jiraattee tarkaanfii akkasii ni fudhatta turtee? Kiristiyaanonni hedduun sirreeffama wal fakkaatu gochuunsaanii kan isaan galateeffachiisudha. Tarkaanfiinsaanii kunis abdii Yesus akka armaan gadiitti jechuudhaan kennetti akka amanan kan argisiisudha: “Duraan dursitanii yaada keessan Mootummaa Waaqayyoo fi qajeelummaa isaa barbaaduutti hidhaa! Kana malees kan barbaachisu hundinuu immoo isiniif in kennama.” (Maatewos 6:33) Hojiisaaniitti utuu hin ta’in Yihowaatti amanamu.—Fakkeenya 3:23, 26.

3. Namoonni tokko tokko yeroo ammaatti duraan dursanii yaada ofii Mootummaa Waaqayyoo barbaachuutti hidhuun kan danda’amu ta’uusaa kan shakkan maaliif ta’uu danda’a?

³ Namoonni tokko tokko haala rakkisaa yeroo ammaatti keessa jiraannurraa ka’uudhaan, dargaggeessi sun murtoo sirrii gochuusaa ni shakku. Yeroo ammaatti, namoonni tokko tokko sadarkaa jireenyaa olaanaa seenaa keessatti argamee hin beekne keessa yeroo jiraatan, warri kaan garuu hiyyummaa kana hin jedhamne keessa jiraatu. Namoonni biyyoota hiyyeeyyii keessa jiraatan hedduun, carraa jireenya fooyya’aa jiraachuuf isaan dandeessisu hundumaa argachuu hawwu. Karaa garabiraammoo, namoonni biyyoota sooressa ta’an keessa jiraatan, haalli dinagdeefi haalli hojii waan jijjiiramuuf, akkasumas namoonni isaan hojjechiisan yeroofi humna baay’ee isaanirraa waan barbaadaniif jireenyasaanii isa gaarii jiraachuusaanii itti fufuun rakkisaa ta’aa dhufeera. Namoonni tokko tokko waan ittiin jiraatan argachuuf hojjechuun rakkisaa waan itti ta’eef ‘yeroo kanatti duraan dursanii yaada ofii Mootummaa Waaqayyoo barbaachuutti hidhuun akkamitti danda’amaa?’ jedhanii gaafatu ta’a. Gaaffii kanaaf deebii argachuuf, waa’ee namoota Yesus dhimma kana ilaalchisee isaanitti himaa turee haa ilaallu.

“Hin Yaadda’inaa!”

4, 5. Yesus, sabni Waaqayyoo yaaddoo jireenyaatiin dhiphachuun akka isaanirra hin jirre fakkeenyaan kan ibse akkamitti?

⁴ Yesus Galiilaatti tuuta sonaan baay’ee biyya adda addaatii dhufanitti dubbachaa ture. (Maatewos 4:25) Isaan keessaa namoonni muraasni sooressa yoo ta’anillee, baay’eensaanii hiyyeessa turan. Ta’us, Yesus namoonni kun qabeenya argachuuf utuu hin ta’in, badhaadhina karaa hafuuraa argamuuf dursa kennuu akka qaban isaan akeekkachiiseera. (Maatewos 6:19-21, 24) Akkas isaaniin jedhe: “Waa’ee jireenya keessanitti, waan nyaattanii fi waan dhugdaniif yookiis dhagna keessaniif waan uffattaniif hin yaadda’inaa! Jireenyi nyaata irra, dhagnis uffata irra guddaa in caala mitii ree?”—Maatewos 6:25.

⁵ Gorsi kun namoota Yesusiin dhaggeeffachaa turan hedduudhaaf hin liqimsamne ta’a. Jabaatanii yoo hojjetan malee maatiinsaanii akka rakkatu beeku. Haata’u malee, Yesus waa’ee simbirrootaa isaanitti hime. Simbirroonni guyyaa guyyaatti wanta nyaataniifi bakka jireenyaa argachuu qabu; wanta kana akka argatan kan isaan gargaaru Yihowaadha. Yesus itti aansuudhaanis, Yihowaan daraarota Solomoon isa ulfina guddaa qabu caalaa miidhaganiif akkamitti akka kunuunsa godhu isaanitti hime. Yihowaan simbirrootaafi daraarotaaf kunuunsa kan godhu erga ta’ee, nuufimmoo caalaatti kunuunsa hin godhuu? (Maatewos 6:26-30) Akkuma Yesus jedhe, lubbuufi dhagni keenya nyaata lubbuu keenya tursuuf binnuufi uffata dhagna keenyatti uffachuuf binnurra baay’isee caala. Nyaataafi uffata argachuuf qofa carraaqqii cimaa kan goonu yoo ta’eefi Yihowaa tajaajiluuf yeroo kan hin qabne yoo ta’e, kaayyoon jireenyaa inni guddaan maal akka ta’e daganneerra jechuudha.—Lallaba 12:13.

Ilaalcha Sirrii Qabaachuu

6. (a) Kiristiyaanonni itti gaafatamummaa akkamii qabu? (b) Guutummaatti kan amananihoo eenyutti?

⁶ Yesus namoonni isa dhaggeeffachaa turan wanta maatiisaaniitiif barbaachisu Waaqayyo nuu qopheessa jedhanii hojjechuu akka dhiisan isaan jajjabeessuusaa hin turre. Simbirroonnillee ofiifis ta’e ilmooleesaaniitiif nyaata barbaachuu qabu. Kanaaf, Kiristiyaanonnis nyaachuu yoo barbaadan hojjechuu qabu turan. Itti gaafatamummaa maatii keessatti qaban raawwachuu qabu turan. Kiristiyaanonni tajaajiltootaafi garboota ta’an namoota isaan hojjechiisaniif ciminaan hojjechuu qabu turan. (2 Tasaloniiqee 3:10-12; 1 Ximotewos 5:8; 1 Phexros 2:18) Phaawulos yeroo baay’ee wanta jireenyaaf isa barbaachisu argachuuf dunkaana hodha ture. (Hojii Ergamootaa 18:1-4; 1 Tasaloniiqee 2:9) Ta’uyyuu, Kiristiyaanonni kun hojiisaaniitti utuu hin ta’in Yihowaatti amanamu turan. Kanaan kan ka’es, keessasaaniitti nagaa warri kaan hin arganne argataniiru. Faarfatichi akkas jechuudhaan dubbateera: “Warri Waaqayyoon amanatan, akka tulluu Xiyoon isa hin mittiqnee, isa bara baraan dhaabatuu ti.”—Faarfannaa 125:1

7. Namni Yihowaarratti amantaa cimaa hin qabne tokko ilaalcha akkamii qabaachuu danda’a?

⁷ Namni Yihowaarratti amantaa cimaa hin qabne haala kanarraa faallaa ta’een yaaduu danda’a. Namoonni hedduun wanti baay’ee amansiisaa ta’e qabeenyadha jedhanii yaadu. Kanaan kan ka’es, hojii mindaa gaarii argamsiisu argachuuf isaan qopheessa jedhanii abdachuudhaan warri ijoolleensaanii barumsa sadarkaa olaanaa akka hordofan jajjabeessu. Ijoolleensaanii jireenya hafuuraatiif xiyyeeffannaa kennuu dhiisuudhaan qabeenyaaf bakka guddaa kennuunsaanii maatiiwwan tokko tokkorratti rakkoo guddaa geessisuunsaa baay’ee nama gaddisiisa.

8. Kiristiyaanonni hojiidhaafis ta’e jireenya hafuuraatiif ilaalcha akkamii qabu?

⁸ Kanaaf, Kiristiyaanonni gamna ta’an, gorsi Yesus jaarraa jalqabaatti kenne yeroo ammaattis akka hojjetu ni hubatu; akkasumas itti gaafatamummaa qaban sirriitti raawwachuuf yaalii godhu. Itti gaafatamummaa caaffata Qulqullaa’aarratti isaaniif kenname raawwachuuf sa’aatii dheeraa hojiirratti yoo dabarsanillee, horii argachuuf jecha jireenya hafuuraa isa baay’ee barbaachisaa ta’e hin dagatan.—Lallaba 7:12.

‘Wantoota Nama Yaaddessan Garabiraa’

9. Yesus namoota guutummaatti Yihowaatti amanaman maal jedhee jajjabeesse?

⁹ Yesus Lallabasaa isa Tabbaarratti akkas jechuudhaan dhaggeeffattootasaa gorseera: “Kanaafis isin ‘Maal nyaanna?’ yookiis ‘Maal dhugna?’ yookiis ‘Maal uffanna?’ jettanii hin yaadda’inaa! Warri saba Waaqayyoo hin ta’in yaada isaanii isaan kanatti hidhanii jiru’o; isaan kun hundinuu isiniif barbaachisoo akka ta’an garuu abbaan keessan inni waaqa irraa in beeka.” (Maatewos 6:31, 32) Dhugumayyuu jechoonni kun kan nama jajjabeessan mitii? Guutummaatti Yihowaatti yoo amanamne inni yeroo hundumaa nu gargaaruuf qophaa’aadha. Haata’u malee, jechoonni Yesus dhaamsa garabiraas of keessaa qabu. Jechoonni kun qabeenya barbaaduutti ‘yaada keenya yoo hiine’ akka namoota Kiristiyaanota dhugaa hin taanee jechuunis akka ‘warra saba Waaqayyoo hin ta’inii’ akka taanu nu yaadachiisu.

10. Dargaggeessi tokko gorsa argachuuf ennaa garasaatti dhufe, Yesus wanta inni caalaatti jaallatu ifa kan godhe akkamitti?

¹⁰ Yeroo tokko dargaggeessi baay’ee sooressa ta’e tokko jireenya barabaraa argachuuf maal gochuun qaba jedhee Yesusiin gaafatee ture. Yeroo sanatti seerri sun waan hojjetuuf Yesus ulaagaa Seera Musee keessatti argamu isa yaadachiise. Dargaggeessichis deebisee, “Kana hundumaa raawwadheera; egaa amma maaltu na duraa hir’ate?” jedhee Yesusiin gaafate. Deebiin Yesus dargaggeessa kanaaf kenne namoota baay’eetti sirrii fakkaachuu dhiisuu danda’a. Yesus akkas jedhe: “Raawwattee guutuu ta’uu yoo feete, dhaqi qabeenya kee gurguri, warra deegaadhaaf kenni, waaqa irratti badhaadhummaa in qabaatta! Kottuutii ana duukaa bu’i!” (Maatewos 19:16-21) Dargaggeessichis qabeenyaasaa dhabuu waan hin barbaanneef gaddee achii deeme. Namni kun Yihowaa caalaatti qabeenyasaa jaallateera.

11, 12. (a) Yesus sooruma ilaalchisee akeekkachiisa barbaachisaa ta’e akkamii kenne? (b) Qabeenyi, Yihowaa akka hin tajaajillee gufuu namatti ta’uu kan danda’u akkamitti?

¹¹ Wanti kunis Yesus wanta haaraa hin eegamne tokko akka dubbatu isa godhe: “Namni sooressi Mootummaa waaqaatti galuun rakkisaa dha. . . . sooressi tokko mootummaa Waaqayyootti galuu irra, gaalli qaawwa lilmoo keessa ba’uutu salphata” jedhe. (Maatewos 19:23, 24) Yesus, namni sooressa ta’e Mootummaa Waaqayyoo hin dhaalu jechuusaa turee? Itti aansuudhaan: “Waaqayyoof garuu wanti hundinuu in danda’ama” waan jedheef kana jechuusaa hin turre. (Maatewos 19:25, 26) Dhugumayyuu, yeroo sanatti namoonni sooressa turan tokko tokko gargaarsa Yihowaatiin Kiristiyaanota dibamoo ta’uu danda’aniiru. (1 Ximotewos 6:17) Ta’uyyuu, Yesus jechoota nama dinqisiisan kana yeroo dubbate sababii quubsaa qaba ture. Akeekkachiisa kennaa ture.

¹² Namni tokko akkuma dargaggeessa sanaa garmalee qabeenyaaf xiyyeeffannaa kan kennu yoo ta’e, qabeenyisaa kun garaa guutuudhaan akka Yihowaa hin tajaajille gufuu itti ta’uu danda’a. Haalli kun nama sooressa ta’eefis ta’e nama ‘sooromuu barbaaduuf’ ni hojjeta. (1 Ximotewos 6:9, 10) Namni tokko qabeenyarratti amantaa guddaa gatuunsaa, ‘wanta karaa hafuuraa isa barbaachisu akka dagatu’ gochuu danda’a. (Maatewos 5:3, NW) Kunimmoo, gargaarsi Yihowaa akka isa hin barbaachisne akka itti dhaga’amu gochuu danda’a. (Keessa Deebii 6:10-12) Obboloonni gummii keessatti argamanis ulfina addaa akka isaaf kennan eeguu danda’a. (Yaaqoob 2:1-4) Yihowaa tajaajiluu mannaa yeroosaa gara caalaa qabeenyasaatiin bashannanuutti dabarsuu danda’a.

Ilaalcha Sirrii Qabaachuu

13. Warri Laa’odiiqeyaa ilaalcha sirrii hin taane akkamii qabu turan?

¹³ Jaarraa jalqabaatti namoonni gumii Laa’odiiqeyaa keessa turan tokko tokko qabeenyaaf ilaalcha sirrii hin taane qabu turan. Yesus akkas isaaniin jedhe: “Atis, ‘Ani sooressa, geessifadheera, wanti ana barbaachisus hin jiru’ in jetta; ati nama gadadamaa namni boo’uufiin ta’u, deegaa, jaamaa, qullaas ta’uu kee hin beektu.” Warra gumii Laa’odiiqeyaa keessatti argaman karaa hafuuraa kan boo’amuuf kan isaan godhe qabeenyasaanii hin turre. Haala akkasiirra kan isaan geessise Yihowaa caalaa qabeenyasaaniitti amanamuusaaniiti. Karaa hafuuraa bu’aa’aa waan ta’aniifis, Yesus ‘afaansaatii isaan tufuuf’ ture.—Mul’ata 3:14-17.

14. Phaawulos Kiristiyaanota Ibrootaa galateeffachuu kan qabu maaliif ture?

¹⁴ Karaa garabiraammoo, Phaawulos Kiristiyaanota Ibrootaa yeroo ari’atamni isaanirra ga’etti ija jabina argisiisaniif akkas jechuudhaan isaan galateeffateera: “Isin warra hidhamanii wajjin dhiphattaniittu; qabeenya isa caalaa wayyuu fi isa hin darbine akka qabdan waan beektaniifis, saamamuu qabeenya keessanii gammachuudhaan fudhattaniittu.” (Ibroota 10:34) Kiristiyaanonni sun qabeenyasaanii dhabuusaaniitti abdii hin kunne. Wanta gati jabeessa ta’e, jechuunis “qabeenya isa caalaa wayyuufi isa hin darbine” waan qabaniif gammachuusaanii hin dhabne. Fakkeenya Yesus kenne keessatti namicha callee babba’eessa argachuuf jecha wanta qabu hundumaa gurguree wajjin haala wal fakkaatuun, isaanis aarsaa akkamiiyyuu yoo isaan kaffalchiise abdii Mootummicharratti qaban akka hin dhabne murteessanii turan. (Maatewos 13:45, 46) Kun ilaalcha sirrii mitii?

15. Obboleettiin biyya Laayibeeriyaatti argamtu tokko duraan dursitee yaadashee Mootummaa Waaqayyootti kan hiite akkamitti?

¹⁵ Yeroo ammaattis namoonni hedduun ilaalcha gaarii kanaa wajjin wal fakkaatu qabu. Fakkeenyaaf, obboleettiin biyya Laayibeeriyaa jiraattu tokko yunivarsiitii galtee barachuuf carraa argattee turte. Carraan akkasii biyya sana keessatti akka waan guddaatti ilaalama. Haata’u malee, obboleettiin kun qajeelchaa ta’uusheerrayyuu, yeroo muraasaaf qajeelchaa addaa akka taatuuf afeerriin isheedhaaf dhihaatee ture. Obboleettiin kun duraan dursitee yaadashee Mootummaa Waaqayyoo barbaaduutti hidhuuf filachuudhaan qajeelchaa taatee hojjechuushee itti fufte. Bakka ramadamte dhaquudhaanis ji’a sadii gidduutti namoota 21 Macaafa Qulqulluu qayyabsiisuu jalqabde. Obboleettii kana dabalatee namoonni akkashee ta’aniifi kumaan lakkaa’aman, duraan dursanii yaadasaanii Mootummaa Waaqayyoo barbaaduutti hidhuudhaan qabeenya guddaa argachuu danda’an aarsaa godhaniiru. Biyya lafaa isa qabeenyaaf bakka guddaa kennu kana keessatti ilaalcha gaarii akkasii qabaachuu kan danda’an akkamitti? Amalawwan gaggaarii hedduu waan horataniifidha. Mee amalawwan kana keessaa tokko tokko haa ilaallu.

16, 17. (a) Yihowaatti amanamuuf gad of qabuun keenya barbaachisaa kan ta’e maaliifi? (b) Abdii Waaqayyo kennetti amanuu kan qabnu maaliifi?

¹⁶ Gad of qabuu. Macaafni Qulqulluun akkas jedha: “Garaa kee guutuu Waaqayyoon amanadhu, hubannaa ofii keetiitti hin hirkatin! Karaa kee hundumaatti isa yaadi, innis daandii kee siif in qajeelcha. Ani ogummaa qaba ofiin hin jedhin.” (Fakkeenya 3:5-7) Darbee darbee, wantoonni tokko tokko ija fooniitiin yommuu ilaalaman sirrii fakkaachuu danda’u. (Ermiyaas 17:9) Yeroo kanattillee taanaan, Kiristiyaanni yaada qajeelaa qabu qajeelfama Yihowaa argachuuf yaalii gochuu qaba. (Faarfannaa 48:14) ‘Karaasaa hundumaatti’, jechuunis dhimmawwan gumii, barumsa, hojii, bashannana ykn maaliyyuu yoo godhe gad of qabuudhaan gargaarsa Yihowaa argachuuf carraaqqii godha.—Faarfannaa 73:24.

¹⁷ Abdii Yihowaan kennetti amanuu: Phaawulos akkas jedheera: “Eenyu illee Waaqayyootti dhi’aachuu yoo barbaade, inni akka jiru, warra isa barbaadaniifis gatii isaanii akka kennuuf amanuun isa irra jira.” (Ibroota 11:6) Yihowaan abdii kenne raawwachuusaarratti shakkii yoo qabaanne, guutummaatti ‘biyya lafaatti dhimma ba’uun’ sirrii nutti fakkaachuu danda’a. (1 Qorontos 7:31) Amantaa cimaa yoo qabaanne garuu, duraan dursinee yaada keenya Mootummaa Waaqayyoo barbaaduutti hidhuuf murteessina. Amantaa cimaa qabaachuun kan danda’amu akkamitti? Yeroo hundumaa kadhannaa garaa guutuutiin Yihowaatti dhihaachuufi qayyabannaa dhuunfaa gochuudhaan amantii cimaa qabaachuu dandeenya. (Faarfannaa 1:1-3; Filiphisiiyus 4:6, 7; Yaaqoob 4:8) Akkuma Daawit Mootichaa akkas jechuudhaan kadhachuu dandeenya: “Ani si amanadheera yaa Waaqayyo, ‘Ati Waaqayyo koo ti’ jedheera.” ‘Gaarummaankee attam baay’eedha!’—Faarfannaa 31:14, 19.

18, 19. (a) Ciminaan hojjechuun keenya amantaa Yihowaarratti qabnu kan nuuf jabeessu akkamitti? (b) Kiristiyaanni tokko aarsaa kaffaluuf fedhii qabaachuu kan qabu maaliifi?

¹⁸ Tajaajila Yihowaatti jabaachuu: Phaawulos akkas jechuudhaan yeroo barreessetti, abdii Yihowaan kennetti amanuu jabaatanii hojjechuu wajjin wal qabsiisee ibseera: “Isinis abdichi guutummaan isaa kan hin mamsiifne ta’uu isaa beektanii, tokkon tokkon keessan isumaaf dhimmuu keessan hamma dhumaatti akka argisiiftan in barbaanna.” (Ibroota 6:11) Tajaajilasaarratti yeroo dheeraa kan dabarsinu yoo ta’e Yihowaan nu gargaara. Gargaarsa kana yeroo hundaa argachuun keenya, amantaan isarratti qabnu nuu cimsuusaarrayyuu, ‘utuu hin socho’in jabaannee dhaabachuu’ akka dandeenyu nu gargaara. (1 Qorontos 15:58) Amantaan keenya ni haaromfama, abdiin keenyas ni cima.—Efesoon 3:16-19.

¹⁹ Aarsaa kaffaluuf fedhii qabaachuu: Phaawulos Yesusiin hordofuuf jecha, hojii bakka guddaa isaaf argamsiisu aarsaa godheera. Darbee darbee sababii hiyyummaatiin rakkinni kan isarra ga’e yoo ta’ellee, filannaa gaarii gochuusaa hin shakkinu. (1 Qorontos 4:11-13) Yihowaan jireenya qananii jiraattu jedhee waadaa waan hin galleef, darbee darbee tajaajiltootasaarras rakkinni ga’uu danda’a. Jireenya salphaa jiraachuuf jecha, aarsaa kaffaluuf fedhii qabaachuun keenya Yihowaa tajaajiluuf murteessuu keenya argisiisa.—1 Ximotewos 6:6-8.

20. Namni duraan dursee yaadasaa Mootummaa Waaqayyoo barbaaduutti hidhu obsi kan isa barbaachisu maaliifi?

²⁰ Obsa: Yaaqoob akkas jechuudhaan namoota hidhata amantiisaa ta’an gorseera: “Ammas obboloota ko, hamma gooftaan deebi’ee dhufutti obsaan danda’aa!” (Yaaqoob 5:7) Biyya lafaa ariitiidhaan guutame kana keessatti obsa argisiisuun rakkisaadha. Wanti tokko dafee akka nuuf godhamu barbaanna. Ta’us, Phaawulos fakkeenya namoota “amantii fi obsaan wanta abdachiifame argachuuf jedhanii” akka hordofnu nu gorseera. (Ibroota 6:12) Obsaan Yihowaa eeggachuuf fedhii qabaadhaa. Lafa jannata taaturra bara baraan jiraachuun abdii obsaan eegamuu qabudha.

21. (a) Duraan dursinee yaada keenya Mootummaa Waaqayyoo barbaaduutti hidhuun keenya maal argisiisa? (b) Mataduree itti aanurratti waa’ee maalii mari’anna?

²¹ Eeyyee, Yesus duraan dursinee yaada keenya Mootummaa Waaqayyoo barbaaduutti akka hiinu nu gorsuunsaa sirrii ture. Kana yoo goone, dhugumaan Yihowaatti akka amannuufi daandii sirrii Kiristiyaanonni irra adeemuu qaban akka filanne argisiifna. Kanaafuu, Yesus “duraan dursitanii yaada keessan . . . qajeelummaa [Waaqayyoo] barbaaduutti hidhaa!” jechuudhaan nu gorseera. Gorsi kun keessumaa yeroo ammaatti barbaachisaa kan ta’e maaliif akka ta’e mataduree itti aanurratti ilaalla.

Yaada Keenya Qajeelummaatti Hidhuun Keenya Eegumsa Nuuf Argamsiisa

“Duraan dursitanii yaada keessan . . . qajeelummaa isaa [Waaqayyoo] barbaaduutti hidhaa!” —Maatewos 6:33.

1, 2. Obboleettiin tokko maal murteessite? Maaliifi?

OBBOLEETTIIN biyya Eeshiyaatti argamtu tokko waajjira mootummaa keessatti barreessituu taatee hojjetti turte. Hojiishee sirriitti kan hojjettu yeroo ta’u, sa’aatii itti hojiin jalqabamu duras hojiisheerratti argamti turte; sa’aatii hojiittis asiif achi hin adeemtu. Haata’u malee, hojjetaa dhaabbataa waan hin turreef hojiinshee ni gamaaggamama ture. Hoogganaanshee, isaa wajjin saalqunnamtii yoo raawwatte hojjetaa dhaabbataa akka taatuufi itti gaafatamummaas akka argattu isheetti hime. Kana gochuu diduunshee hojii kan ishee dhabsiisu yoo ta’ellee, matumaa wanta kana akka hin raawwanne itti himte.

² Kan gochuunshee dogoggora turee? Matumaa! Wanta Yesus: “Duraan dursitanii yaada keessan . . . qajeelummaa [Waaqayyoo] barbaaduutti hidhaa!” jechuudhaan dubbate sirriitti hordofteetti. (Maatewos 6:33) Seeraan ala saalqunnamtii raawwachuudhaan bu’aa argachuu mannaa, seerawwan qajeelummaarratti hundaa’an hordofuun isheedhaaf waan guddaa ture.—1 Qorontos 6:18.

Qajeelummaan Barbaachisaa Kan Ta’e Maaliifi?

3. Qajeelummaa jechuun maal jechuudha?

³ “Qajeelummaan” seerawwan amalaa cimsanii eeguu kan argisiisudha. Macaafa Qulqulluu keessatti jechi afaan Giriikiitiinis ta’e afaan Ibrootaatiin qajeelummaa jedhu yaada “sirrii” ykn “qajeelaa” jedhu kan dabarsudha. Kana jechuun garuu ulaagaa ofii baasuudhaan akka qajeelaatti of ilaaluu jechuu miti. (Luqaas 16:15) Kanaa mannaa seera Yihowaan qajeelummaadhaaf baase eeguu kan argisiisudha. Jechi kun qajeelummaa Waaqayyoos kan argisiisudha.—Roomaa 1:17; 3:21.

4. Kiristiyaana tokkoof qajeelummaan barbaachisaa kan ta’e maaliifi?

⁴ Qajeelummaan barbaachisaa kan ta’e maaliifi? Yihowaan ‘Waaqa qajeelaa’ waan ta’eefi sabasaa kan eebbisu yeroo isaan wanta qajeelaa raawwatan waan ta’eefidha. (Isaayaas 45:21; Fakkeenya 2:20-22; Anbaaqom 1:13) Namni jal’ina hojjetu kamiyyuu, Yihowaa wajjin walitti dhufeenya gaarii qabaachuu hin danda’u. (Fakkeenya 15:8) Phaawulos, Ximotewos ‘kajeellaa yeroo dargaggummaatti hammaaturraa baqachuudhaan qajeelina duukaa akka bu’uufi’ amalawwan barbaachisan garabiraa akka horatu kan isa gorses kanaaf ture. (2 Ximotewos 2:22) Phaawulos waa’ee mi’a lolaa hafuuraa adda addaa yeroo ibsetti, waa’ee ‘qajeelummaa maddaa sibiilaa’ kan dubbates kanumaaf ture.—Efesoon 6:14

5. Namoonni gonkummaa hin qabne yaadasaanii qajeelummaa barbaaduutti hidhuu kan danda’an akkamitti?

⁵ Dhugaadha, eenyuyyuu guutummaatti qajeelaa ta’uu hin danda’u. Addaamirraa mudaa waan dhaalleef, hundi keenya uumamaan cubbamootaafi qajeelummaa kan hin qabnedha. Ta’uyyuu, Yesus duraan dursinee yaada keenya qajeelummaa barbaaduutti hidhuu akka qabnu nu gorseera. Kun akkamitti danda’ama? Yesus lubbuusaa isa gonkummaa qabu aarsaa godhee waan nuu kenneef, aarsaa sanatti yoo amanne Yihowaan cubbuu keenya nuu dhiisa. (Maatewos 20:28; Yohannis 3:16; Roomaa 5:8, 9, 12, 18) Kanaaf, seerawwan Yihowaan qajeelummaadhaaf baase yoo baranne, isaaniinis hojiirra oolchuudhaaf hanga dandeenyu carraaqqii yoo gooneefi dadhabbii keenya mo’uuf gargaarsasaa yoo kadhanne, Yihowaan waaqeffannaa keenyatti ni gammada. (Faarfannaa 1:6; Roomaa 7:19-25; Mul’ata 7:9, 14) Kana beekuun kan nama jajjabeessu mitii?

Biyya Lafaa Qajeelaa Hin Taane Keessatti Qajeelummaa Argisiisuu

6. Biyyi lafaa Kiristiyaanota jaarraa jalqabaatiif rakkisaa kan ture maaliifi?

⁶ Abboommiin Yesus “hamma andaara lafaatti” dhugaa baatuukoo taatu jechuudhaan bartootasaatti hime haalli rakkisaan akka isaan eegu kan argisiisu ture. (Hojii Ergamootaa 1:8) Naannoon tajaajilaasaanii hundi “harka isa hamaa,” jechuunis Seexana jala jira ture. (1 Yohannis 5:19) Biyyi lafaa hafuura hamaadhaan waan guutamee tureef, Kiristiyaanonni dhiibbaa gadhee kanaaf saaxilamuunsaanii hin oolle. (Efesoon 2:2) Biyyi lafaa isaaniif bakka rakkisaa ture. Amanamummaasaanii eeganii jiraachuu kan danda’an duraan dursanii yaadasaanii qajeelummaa Waaqayyootti yoo hidhan qofadha. Isaan keessaa baay’eensaanii kana gochuu kan danda’an ta’us, muraasnisaanii garuu ‘karaa qajeelummaarraa’ goraniiru.—Fakkeenya 12:28; 2 Ximotewos 4:10.

7. Kiristiyaanni tokko dhiibbaa biyya lafaarraa fagaachuuf maal gochuu qaba?

⁷ Biyyi lafaa Kiristiyaanota yeroo ammaatti argamaniif bakka gaariidhaa? Matumaa! Yeroo ammaatti biyyi lafaa jaarraa jalqabaa caalaatti manca’eera. Kana malees, Seexanni gara biyya lafaatti waan darbatameef Kiristiyaanota dibamoo jechuunis,‘sanyii [dubartittii] warra kaanitti, warra abboommii Waaqayyoo eegan, isa Yesus dhugaa ba’etti jabaatanirrattis’ waraana baneera. (Mul’ata 12:12, 17) Seexanni warra “sanyii” sana deggeran hundarrattis miidhaa geessisuu barbaada. Ta’us, Kiristiyaanonni biyya lafaarraa eessayyuu dhaquu hin danda’an. Kan biyya lafaa ta’uu baatanillee, isuma keessa jiraatu. (Yohannis 17:15, 16) Kiristiyaanonni namoota jireenya bara baraatiif qophaa’an argachuufi bartoota Yesus akka ta’an isaan barsiisuuf, biyya lafaa kana keessatti lallabuu qabu. (Maatewos 24:14; 28:19, 20) Kanaaf, Kiristiyaanonni dhiibbaa biyya lafaa kana balleessuu yoo baatanillee, dhiibbaan kun akka isaanirra hin geenye mormuu qabu. Mee amma dhiibbaawwan kana keessa arfansaanii haa ilaallu.

Balaa Amalli Addaggummaa Geessisu

8. Israa’eloonni waaqolii Mo’aabotaa waaqeffachuu kan jalqaban maaliif ture?

⁸ Israa’eloonni hedduun adeemsasaanii isa lafa onaa waggaa 40 xumuruu yeroo ga’anitti karaa qajeelummaarraa jal’atanii turan. Yihowaan birmaduu isaan baasuuf wanta isaaniif godhe hundumaa arguusaaniirrayyuu, Biyyattii Abdachiifamtetti galuuf yeroo muraasatu isaan hafa ture. Haata’u malee, yeroo murteessaa ta’e kanatti waaqolii Mo’aabotaa waaqeffachuu jalqaban. Maaliif? ‘Hawwii fooniitti’ waan qabamaniifidha. (1 Yohannis 2:16) Macaafni Qulqulluun: “Isaan keessaa jarri tokko dubartoota Mo’aabii wajjin ejjuutti in ka’an” jedha.—Lakkoobsa 25:1.

9, 10. Hawwiin foonii dogoggora ta’e ejjennoo keenya balleessuu akka danda’u yeroo hundaa yaadachuun keenya barbaachisaa ta’uusaa wantoonni argisiisan maalfa’i?

⁹ Seenaan kun hawwiin foonii dogoggora ta’e namoota of eeggannoo hin goone mancaasuu akka danda’u argisiisa. Keessumaa yeroo amalli addaggummaa akka waan sirrii ta’eetti ilaalamu kanatti, seenaa kanarraa barumsa argachuu qabna. (1 Qorontos 10:6, 8) Gabaasni Yuunaayitid Isteets keessaa argame tokko akkas jedha: “Bara 1970 dura biyyoota Ameerikaa hundaatti utuu wal hin fuudhin waliin jiraachuun akka seeraan alaatti ilaalama ture. Amma garuu waan baramedha. Namoota wal fuudhan keessaa harki walakkaa ol seeraan utuu wal hin fuudhin dura waliin jiraachaa kan turanidha.” Gochi kunis ta’e hojiin amala addaggummaa garabiraan biyya tokko qofatti kan baraman miti. Wantoonni kun addunyaa maratti kan baraman ta’uusaaniirrayyuu, Kiristiyaanonni tokko tokko daandii biyya lafaa kana hordofuusaaniitiin gumii Kiristiyaanaa keessaa baafamaniiru.—1 Qorontos 5:11.

¹⁰ Akkasumas, amalli addaggummaa idduma hundaatti babal’ateera. Viidiyoowwaniifi sagantaan televijiinii dargaggoonni gaa’ela dura saalqunnamtii gochuunsaanii sirrii ta’uusaa dubbatu. Namoonni saala wal fakkaatu qaban saalqunnamtii gochuunsaanii fudhatama argachaa dhufeera. Fiilmiiwwan yeroo saalqunnamtiin ifatti raawwatamu argisiisan babal’ataniiru. Intarneetiirraas fakkiiwwan saalqunnamtii argisiisan salphaadhumatti argachuun ni danda’ama. Fakkeenyaaf, namni gaazexaa qopheessu tokko ilmisaa umuriinsaa waggaa torba ta’e tokko, mana barumsaatii yeroo galu hiriyoonnisaa Intarneetii banuudhaan dubartoonni qullaasaanii yeroo saalqunnamtii raawwatan arguusaa itti hime. Abbaansaa kana yeroo dhaga’e baay’ee na’e; haata’u malee, ijoolleen wanta akkasii akka ilaalan warrasaaniitti himan hammam ta’u? Warri haasawaan viidiyoo ijoolleensaanii taphatan maal maal akka qabu beekan hangamsaaniiti? Taphawwan hedduun, amala addaggummaa, hafuura xuraa’ummaafi hammeenya kan babal’isanidha.

11. Maatiin tokko addaggummaa amalaa biyya lafaarraa fagaachuu kan danda’u akkamitti?

¹¹ Maatiin tokko “bashannana” gadhee akkasiirraa fagaachuu kan danda’u akkamitti? Duraan dursinee yaada keenya qajeelummaa Waaqayyootti hidhuudhaan wanta dogoggora ta’e hundumaarraa fagaachuu dandeenya. (2 Qorontos 6:14; Efesoon 5:3) Warri sochiiwwan ijoolleesaanii to’ataniifi ijoolleesaaniis ta’e ofiisaanii jaalala Yihowaafi seerasaa isa qajeelaa barsiisan, ijoolleensaanii fakkiiwwaniifi taphawwan viidiyoo saalqunnamtii argisiisaniifi qorumsa kan biraatiif akka hin mo’amne isaan gargaaru.—Keessa Deebii 6:4-9.a

Dhiibbaa Karaa Hawaasummaatiin Ga’u

12. Jaarraa jalqabaatti rakkina akkamiitu uumamee ture?

¹² Phaawulos yeroo Lisxiraa ishee biyya Eeshiyaa xinnoo keessa turetti, dinqii raawwachuudhaan nama dhukkubsate tokko fayyiseera. Seenaansaa akkas jedha: “Namoonni baay’atanii achi turan waan Phaawulos hojjete yommuu argan, sagalee isaanii ol fudhatanii afaan Liqaa’oniyaatiin, ‘Waaqayyoliin namoota fakkaatanii gara keenyatti gad bu’aniiru’ jedhanii dubbatan. Baarnaabaasin ‘Ze’os’ jedhan, Phaawulosin immoo kan dubbate isa waan tureef, akka ergamaa waaqayyolii isaaniitti ‘Hermees’ jedhanii moggaasan.” (Hojii Ergamootaa 14:11, 12) Xinnuma turanii namootumti kun Phaawulosiifi Baarnaabaasin ajjeesuu barbaadan. (Hojii Ergamootaa 14:19) Kanarraa ifatti ilaaluun akka danda’amutti namoonni kun dhiibbaa hawaasa naannoosaaniitiin mo’amanii turan. Namoota naannoo kana turan keessaa warri tokko tokko erga Kiristiyaanota ta’anii boodas ilaalcha amantii sobaa qabaachuu hin oolu. Phaawulos xalayaa Kiristiyaanota Qolosaayisiif barreesserratti ‘ergamoota waaqarraa waaqeffachuurraa’ akka fagaatan isaan akeekkachiisee ture.—Qolosiyaas 2:18.

13. Duudhaawwan Kiristiyaanni tokko irraa fagaachuu qabu tokko tokko maalfa’i? Jabina kana gochuuf isa dandeessisu eessaa argachuu danda’a?

¹³ Haaluma wal fakkaatuun Kiristiyaanonni yeroo ammaatti argamanis, duudhaawwan amantii sobaarratti hundaa’aniifi namoota hedduu biratti fudhatama argatanirraa, akkasumas seera Kiristiyaanotaaf kenname cabsuurraa fagaachuu qabu. Fakkeenyaaf, biyyoota tokko tokkotti ayyaanonni yeroo dhalootaattis ta’e yeroo du’aatti kabajaman baay’eensaanii, barumsa sobaa du’a booda lubbuun jiraachuushee itti fufti jedhurratti kan hundaa’edha. (Lallaba 9:5, 10) Biyyoottan tokko tokkotti ijoollee durbaa dhagna qabuun beekamaadha. Kun, gocha gara jabinaafi hojii gadhee warri ijoolleesaaniirratti raawwachuu hin qabnedha. (Keessa Deebii 6:6, 7; Efesoon 6:4) Kiristiyaanonni dhiibbaa hawaasummaa mo’uudhaan gocha akkasiirraa fagaachuu kan danda’an akkamitti? Guutummaatti Yihowaatti amanamuudhaan kana gochuu danda’u. (Faarfannaa 31:6) Waaqayyo qajeelaa waan ta’eef, namoota garaa guutuudhaan akkas jechuudhaan isa kadhatan ni jajjabeessa akkasumas wanta isaan barbaachisu isaanii dhiheessa: “Ani sitti kooluu galeera, ati masaraa koo ti; ati Waaqayyo koo isa ani amanadhuu dha.”—Faarfannaa 91:2; Fakkeenya 29:25.

Yihowaa Hin Irraanfatinaa

14. Yihowaan Israa’eloonni Biyyattii Abdachiifamtetti galuusaanii yeroo muraasa dura akeekkachiisa akkamii isaanii kenne?

¹⁴ Israa’eloonni gara Biyyattii Abdachiifamtetti galuusaanii yeroo muraasa dura, Yihowaan akka isa hin irraanfanne akkas jechuudhaan isaan akeekkachiisee ture: “Egaa ati abboommii isaa, wanta qajeelaa ta’e, seerrata isaas warra ani har’a si abboomu eeguu dhiisuudhaan, Waaqayyoon gooftaa kee akka hin irraanfannetti of eeggadhu! Kanaa achi ati yeroo nyaattee quuftu, manneen gaggaariis ijaarrattee yeroo keessa jiraattu, saawwan kee fi bushaayeen kee yeroo wal horan, meetiin kee fi warqeen kee yeroo baay’atu, wanti ati qabdu hundinuus yeroo guddatu, yommus ati garaa keetti ol of qabuu in jalqabda, Waaqayyoon gooftaa kee . . . in irraanfatta.” (Keessa Deebii 8:11-14)

15. Yihowaa akka hin irraanfanne akkamitti mirkanaa’oo ta’uu dandeenya?

¹⁵ Yeroo ammaattoo dogoggorri wal fakkaatu hojjetamuu danda’aa? Eeyyee, wantoota dursi kennamuufii hin qabneef dursa kan laannu yoo ta’e uumamuu danda’a. Duraan dursinee yaada keenya qajeelummaa Waaqayyoo barbaaduutti yoo hiine garuu, hundumaa dura waaqeffannaa dhugaatiif dursa laanna. Akkuma Phaawulos nu jajjabeessettis, ‘yeroo nuu kenname utuu hin dabarsin itti hojjechuudhaan’ miira ariitiitiin tajaajila keenya raawwanna. (Qolosaayis 4:5; 2 Ximotewos 4:2) Haata’u malee, gumiirratti argamuufi tajaajilarratti hirmaachuu caalaa bashannana ykn yeroo gaarii dabarsuuf dursa kan laannu yoo ta’e, isaaf sadarkaa lammaffaa laachuudhaan Yihowaa irraanfachuu dandeenya. Phaawulos guyyoota gara dhumaatti namoonni “Waaqayyoon jaallachuu caalaa, warra waan isaan gammachiisu jaallatan ta’uuf jiru” jedheera. (2 Ximotewos 3:4) Kiristiyaanonni garaa qajeelaa qaban ilaalchi akkasii akka isaanirratti dhiibbaa hin gooneef yeroo hundumaa of qoru qabu.—2 Qorontos 13:5.

Yaada Ofiitiin Geggeeffamuurraa Of Eegaa

16. Hewwaaniifi obboloonni bara Phaawulos turan tokko tokko dogoggora akkamii hojjettan?

¹⁶ Seexanni dhaaba Eeden keessatti, Hewwaan yaada ofiitiin akka gaggeeffamtuuf yaaliin godhe isaaf mijaa’eera. Hewwaan wanta dogoggoraafi sirrii ta’e ofiisheetiin murteeffachuu barbaaddee turte. (Uumama 3:1-6) Jaarraa jalqabaattis, obboloonni gummii Qorontos keessa turan tokko tokko amala yaada ofiitiin geggeeffamuu argisiisanii turan. Phaawulos caalaa beekumsa qabna jedhanii waan yaadaniif innis ergamoota warra hundumaarra caalan jedhee isaan waamuudhaan isaanitti ga’iseera.—2 Qorontos 11:3-5; 1 Ximotewos 6:3-5.

17. Yaada ofiitiin gaggeeffamuurraa fagaachuu kan dandeenyu akkamitti?

¹⁷ Namoonni yeroo ammaa jiran hedduunis “warra of arguu dhabuudhaan of bokoksan” waan ta’aniif, Kiristiyaanonni tokko tokkos ilaalcha akkasiitiif saaxilamaniiru. Isaan keessaa tokko tokko dhugaa mormuutti ka’aniiru. (2 Ximotewos 3:4; Filiphisiiyus 3:18) Nuti garuu haala waaqeffannaa dhugaa wajjin wal qabateen, Yihowaan qajeelfama akka nuu kennu kadhachuun keenya, “hojjetaa amanamaafi ogeessa” akkasumas jaarsolii gumii wajjin tokkummaa qabaachuun keenya baay’ee barbaachisaadha. Akkas gochuun keenya yaada keenya qajeelummaa barbaaduutti akka hiinu nu gochuusaarrayyuu, yaada ofiitiin geggeeffamuurraa akka fagaannu nu gargaara. (Maatewos 24:45-47; Faarfannaa 25:9, 10; Isaayaas 30:21) Gumiin Kiristiyaanota dibamoo “utubaa fi demdemoo dhugaa ta’ee dha.” Yihowaan gumii kana kan nuu qopheesse, eegumsaafi qajeelfama akka irraa argannuufidha. (1 Ximotewos 3:15) Ga’ee gumiin kun qabu hubachuun keenya, fedha Yihowaa isa qajeelummaarratti hundaa’eef yeroo abboomamnu ‘of dhiibuudhaan waan tokkollee akka hin hojjenne’ nu gargaara.—Filiphisiiyus 2:2-4; Fakkeenya 3:4-6.

Fakkeenya Yesus Hordofaa

18. Karaawwan kam fa’iin fakkeenya Yesus akka hordofnu gorsamneerra?

¹⁸ Macaafni Qulqulluun Yesusiin ilaalchisee: “Ati qajeelina jaallattee jal’ina jibbite” jechuudhaan raajii dubbata. (Faarfannaa 45:7; Ibroota 1:9) Kun, fakkeenya gaarii hordofuu qabnu mitii? (1 Qorontos 11:1) Yesus seerawwan Yihowaa beekuu qofa utuu hin ta’in seerawwan kana ni jaallata ture. Kanaaf, yeroo Seexanni lafa onaatti isa qore, Yesus ‘karaa qajeelummaarraa’ akka hin jallanne ija jabinaan argisiiseera.—Fakkeenya 8:20; Maatewos 4:3-11.

19, 20. Yaada ofii qajeelummaa barbaaduutti hidhuun bu’aa akkamii argamsiisa?

¹⁹ Dhugaadha, fedhiin keenya inni jal’aan nu rakkisuu danda’a. (Roomaa 7:19, 20) Ta’us, qajeelummaadhaaf bakka guddaa laachuun keenya, hamminarraa fagaachuuf nu gargaaruu danda’a. (Faarfannaa 119:165) Jaalalli qajeelummaadhaaf qabnu wanti dogoggora ta’e yeroo nu mudatu eegumsa nuu ta’a. (Fakkeenya 4:4-6) Haala akkamii keessattiyyuu qorumsa nurra ga’uuf harka kennuun keenya Seexanaaf injifannoo argamsiisuu keenya ta’uusaa irraanfachuu hin qabnu! Kanaa mannaa, Seexanaan mormuudhaan Yihowaadhaaf injifannoo argamsiisuun keenya gaarii mitii?— Fakkeenya 27:11; Yaaqoob 4:7, 8.

²⁰ Kiristiyaanonni dhugaan yaadasaanii qajeelummaatti waan hidhaniif: “Ija karaa Yesus Kristos qajeelummaa irraa argamuun guutamanii ulfina Waaqayyoof galata isaatiifis ta’uuf jiru.” (Filiphisiiyus 1:10, 11) “Namummaa haaraa isa qajeelummaa fi qulqullummaa dhugaatti, fakkaattii Waaqayyootiin uumame” uffataniiru. (Efesoon 4:24) Isaan kan Yihowaa waan ta’aniif, isa tajaajiluuf jiraatu malee of gammachiisuuf miti. (Roomaa 14:8; 1 Phexros 4:2) Yaadasaaniis ta’e gochisaanii kan to’atu ilaalcha kanadha. Kana gochuunsaanii Abbaasaanii isa samii kan gammachiisu mitii?—Fakkeenya 23:24.

[Miiljalee]

Ibsuu Ni Dandeessaa?