7. Mootummaan Waaqayyoo seerawwan hundumaa irra caalan qaba

Mootummoonni seerawwan lammiilee isaanii fayyadanii fi eegumsa isaaniif godhu jedhanii yaadan baasu. Mootummaan Waaqayyoos seerawwan lammiileen isaa hordofuu qaban qaba. Qorontos Tokkoffaa 6:9-11 dubbisaa, achiis gaaffiiwwan kanneen irratti mariʼadhaa:

• Yeroo namni hundi seera Waaqayyoo hordofutti addunyaan maal fakkaachuu dandaʼa jettee yaadda?a

• Yihowaan lammiileen Mootummichaa seera isaa akka hordofan isaan irraa eeguun isaa sirrii sitti fakkaataa? Maaliif?

• Namoonni seerawwan kanneeniif hin ajajamne jijjiiramuu akka dandaʼan kan argisiisu maali dha?—Lakkoofsa 11 ilaali.

Namoonni hedduun waaʼee saalqunnamtii dubbachuun isaan qaanessa. Haa taʼu malee, Kitaabni Qulqulluun waaʼee saalqunnamtii ifatti, garuu immoo karaa kabaja qabuun dubbata. Dhimma kana ilaalchisee wanti inni dubbatus nu fayyada. Kitaabni Qulqulluun, Yihowaa isa Uumaa keenya taʼe biraa waan dhufeef, kan nu fayyadu taʼuun isaa kanuma eegamu dha. Yihowaan wanti hunda caalaa nuuf wayyu maal akka taʼe beeka. Gochi keenya akkamitti isa gammachiisuu akka dandaʼuu fi wanti gammachuudhaan bara baraaf jiraachuuf nu gargaaru maal akka taʼe nutti hima.

1. Yihowaan saalqunnamtiidhaaf ilaalcha akkamii qaba?

Saalqunnamtiin kennaa Yihowaa biraa argame dha. Dhiirrii fi dubartiin gaaʼela godhatan saalqunnamtii irraa gammachuu akka argatan barbaada. Kennaan kun hiriyoonni gaaʼelaa ijoollee akka godhatan qofa utuu hin taʼin, jaalala waliif qaban karaa sirrii fi gammachiisaa taʼeen akka walii ibsan isaan gargaara. Dubbiin Waaqayyoo, “Haadha manaa dargaggummaa [keetti] gammadi” kan jedhu kanaafi. (Fakkeenya 5:18, 19) Yihowaan Kiristiyaanonni gaaʼela godhatan hiriyaa gaaʼelaa isaaniitiif amanamoo akka taʼan isaan irraa eega; kanaafuu matumaa ejja hin raawwatan.—Ibroota 13:4 dubbisi.

2. Halalummaan maali dha?

Kitaabni Qulqulluun, “Warri halaleen . . . Mootummaa Waaqayyoo hin dhaalan” jedha. (1 Qorontos 6:9, 10) Barreessitoonni Kitaaba Qulqulluu Afaan Giriikiitiin barreessan halalummaa ibsuuf, jecha poorniyaa jedhutti fayyadamaniiru. Jechi kun (1) saalqunnamtiia namoota seeraan gaaʼela hin godhanne gidduutti raawwatamu, (2) saalqunnamtii saala wal fakkaatu gidduutti raawwatamuu fi (3) saalqunnamtii bineeldotaa wajjin raawwatamu kan dabalatu dha. ‘Halalummaa irraa yommuu fagaannu,’ Yihowaa ni gammachiisna, ofii keenyaafis faayidaa arganna.—1 Tasalonqee 4:3.

CAALAATTI BARADHU

3. Halalummaa irraa baqadhu

Namni amanamaan Yoseef jedhamu karaa naamusaa qulqulluu taʼee jiraachuuf carraaqqii guddaa godheera. Uumama 39:1-12 dubbisaa, achiis gaaffiiwwan kanneen irratti mariʼadhaa:

• Yoseef akka baqatu kan isa kakaase maali dha?—Lakkoofsa 9 ilaali.

• Yoseef murtoo sirrii kan godhe sitti fakkaataa? Maaliif?

VIIDIYOO: Halalummaa Irraa Fagaadhaa (5:06)

Yihowaan hundi keenya iyyuu halalummaa irraa akka fagaannu barbaada. Qorontos Tokkoffaa 6:18 dubbisaa, achiis gaaffiiwwan kanneen irratti mariʼadhaa:

• Haalawwan namni tokko halalummaa akka raawwatu isa taasisan tokko tokko kam faʼi?

• Halalummaa irraa baqachuu kan dandeessu akkamitti?

4. Qorumsa si mudatu moʼuu ni dandeessa

VIIDIYOO: Kitaaba Qulqulluu Dubbisuudhaan Qorumsa Si Mudatu Dandamadhu (3:02)

• Obboleessi viidiyicha irratti ibsame, yaanni isaa fi gochi isaa haadha manaa isaatiif akka hin amanamne isa taasisuu akka dandaʼu yommuu hubatu maal godhe?

Kiristiyaanonni amanamoo taʼan illee yeroo tokko tokko yaada qulqulluu qabaachuuf qabsoo gochuun isaan barbaachisa. Wantoota naamusaan ala taʼan irra deddeebitee yaaduu irraa fagaachuu kan dandeessu akkamitti? Filiphisiyus 4:8 dubbisaa, achiis gaaffiiwwan kanneen irratti mariʼadhaa:

• Wantoota akkamii irratti yaaduu qabna?

• Kitaaba Qulqulluu dubbisuunii fi hojiin Yihowaa akka nuuf baayʼatu gochuun, qorumsa cubbuu akka raawwannu nu irra gaʼu dandamachuuf kan nu gargaaru akkamitti?

5. Ulaagaaleen Yihowaa nu fayyadu

VIIDIYOO: Hubannaa Qabaadhaa (9:31)

• Dargaggeessi kun haala qorumsaaf isa saaxilu keessa kan gale akkamitti?—Fakkeenya 7:8, 9 ilaali.

• Fakkeenyi 7:23, 26 akka jedhutti, halalummaan miidhaa guddaa geessisa. Karaa naamusaa qulqulluu taanee yoo jiraanne rakkoowwan akkamii irraa baraaramna?

• Karaa naamusaa qulqulluu taʼuun gammachuudhaan bara baraaf jiraachuuf kan nu gargaaru akkamitti?

Namoonni tokko tokko wanti Kitaabni Qulqulluun saalqunnamtii saala wal fakkaataa gidduutti raawwatamu ilaalchisee dubbatu jaalala irratti kan hundaaʼe miti jedhanii dubbatu. Haa taʼu malee, Yihowaan inni Waaqa jaalalaa taʼe namni hundi gammachuudhaan bara baraaf akka jiraatu barbaada. Bara baraaf jiraachuuf immoo ulaagaalee isaa wajjin wal simnee jiraachuu qabna. Qorontos Tokkoffaa 6:9-11 dubbisaa, achiis gaaffii kana irratti mariʼadhaa:

• Akka ilaalcha Yihowaatti wanti dogoggora taʼe saalqunnamtii saala wal fakkaatu gidduutti raawwatamu qofa dhaa?

Waaqayyoon gammachiisuuf, hundi keenya jijjiirama tokko tokko gochuu qabna. Maarree akkas gochuuf carraaquun kee faayidaa qabaa? Faarfannaa 19:8, 11 dubbisaa, achiis gaaffiiwwan kanneen irratti mariʼadhaa:

• Ulaagaaleen naamusaa Yihowaan baase sirrii sitti fakkaataa? Maaliif?

MAAL BARATTE?

Saalqunnamtiin kennaa Yihowaan haati manaa fi abbaan manaa akka itti gammadaniif kenne dha.

Irra Deebii

• Halalummaan maalfaa dabalata?

• Halalummaa irraa fagaachuuf maaltu nu gargaara?

• Ulaagaalee naamusaa Yihowaa hordofuun kan nu fayyadu akkamitti?

QORANNOO DABALATAA GODHI

Waaqayyo dhiirri tokkoo fi dubartiin takka seeraan gaaʼela akka godhatan kan barbaadu maaliif akka taʼe qoradhu.

“Gaaʼela Utuu hin Dhaabbatin Waliin Jiraachuu Ilaalchisee Kitaabni Qulqulluun Maal Jedha?” (Mata duree jw.org irratti baʼe)

Barumsi Kitaaba Qulqulluu saalqunnamtiin saala wal fakkaatu gidduutti raawwatamu dogoggora akka taʼe ibsu, namoota akkasii jibbuu qabna jechuu kan hin taane maaliif akka taʼe baradhu.

“Saala Wal Fakkaatu Wajjin Saalqunnamtii Raawwachuun Dogoggoraa?” (Mata duree jw.org irratti baʼe)

Seerri Waaqayyo saalqunnamtii ilaalchisee kenne eegumsa kan nuuf godhu akkamitti akka taʼe baradhu.

“Saalqunnamtiin Afaaniin Godhamu Dhuguma Saalqunnamtii Jedhamaa?” (Mata duree jw.org irratti baʼe)

Muuxannoo “Na Kabajaniiru” jedhu irraa, namni kanaan dura saala wal fakkaataa wajjin saalqunnamtii raawwachaa ture tokko Waaqayyoon gammachiisuuf jireenya isaa akka jijjiiru kan isa kakaase maal akka taʼe dubbisi.

“Kitaabni Qulqulluun Jireenya Namootaa ni Jijjiira” (Mata duree Masaraa Eegumsaa irratti ba’e)

Addunyaa maratti namoonni dhugaatii alkooliitiif ilaalcha adda addaa qabu. Namoonni tokko tokko michoota isaanii wajjin darbee darbee dhugaatii alkoolii dhuguun isaan gammachiisa. Kaan immoo guutummaa guutuutti dhuguu dhiisuuf filataniiru. Hamma machaaʼanitti kan dhuganis jiru. Maarree Kitaabni Qulqulluun hoo waaʼee dhugaatii alkoolii maal jedha?

1. Dhugaatii alkoolii dhuguun dogoggoraa?

Kitaabni Qulqulluun dhugaatii alkoolii dhuguu hin dhorku. Kanaa mannaa, Kitaabni Qulqulluun kennaawwan Waaqayyo nuuf kenne yommuu tarreessu ‘daadhii wayinii garaa namaa gammachiisu’ ni caqasa. (Faarfannaa 104:14, 15) Dhiironnii fi dubartoonni Kitaaba Qulqulluu keessatti caqasaman tokko tokko dhugaatii alkoolii ni dhugu turan.—1 Ximotewos 5:23.

2. Kitaabni Qulqulluun namoota dhugaatii alkoolii dhuguuf filataniif gorsa akkamii kenna?

Yihowaan garmalee dhuguu fi machaaʼuu ni balaaleffata. (Galaatiyaa 5:21) Dubbiin isaa, “Namoota daadhii wayinii hedduu dhuganii wajjin . . . hin taʼin” jedha. (Fakkeenya 23:20) Kanaafuu dhuunfaattis taʼe namoota wajjin dhuguuf yoo filanne hamma sirriitti yaaduu dadhabnutti, hamma dubbii fi gocha keenya toʼachuu dadhabnutti ykn hamma fayyaa keenya miinutti dhuguu hin qabnu. Hamma dhugnu toʼachuu hin dandeenyu taanaan garuu guutummaatti dhugaatii alkoolii dhuguu dhiisuuf murteessuu qabna.

3. Murtoo warri kaan dhugaatii alkoolii ilaalchisee godhan kabajuu kan dandeenyu akkamitti?

Namni hundi dhugaatii alkoolii dhuguuf ykn dhiisuuf murtoo mataa isaa gochuu qaba. Nama dhugaatii alkoolii utuu hin baayʼisin dhuguuf filatetti murteessuu hin qabnu. Nama dhuguu hin barbaannes akka dhugu dirqisiisuu hin qabnu. (Roomaa 14:10) Dhugaatii alkoolii dhuguun keenya warra kaan miidhuu kan dandaʼu yoo taʼe dhuguu dhiisuuf filanna. (Roomaa 14:21 dubbisi.) ‘Faayidaa mataa keenyaa utuu hin taʼin faayidaa nama kan biraa’ barbaaduu qabna.—1 Qorontos 10:23, 24 dubbisi.

CAALAATTI BARADHU

4. Dhugaatii alkoolii ilaalchisee murtoo dhuunfaa godhi

Yesuus dhugaatii alkoolii dhuguu ilaalchisee ilaalcha akkamii qaba ture? Deebii isaa beekuuf mee dinqii inni yeroo jalqabaaf raawwate haa ilaallu. Yohaannis 2:1-11 dubbisaa, achiis gaaffiiwwan kanneen irratti mariʼadhaa:

• Ilaalcha Yesuus dhugaatii alkoolii fi namoota dhugaatii alkoolii dhuganiif qabu ilaalchisee dinqii kana irraa maal baranna?

• Yesuus dhugaatii alkoolii dhuguu hin balaaleffatu erga taʼee, Kiristiyaanonni namoota dhugaatii alkoolii dhuguuf filataniif ilaalcha akkamii qabaachuu qabu?

Haa taʼu malee, Kiristiyaanni tokko dhuguu waan dandaʼuuf qofa yeroo hundumaa dhuguun isaa gaarii dha jechuu miti. Fakkeenya 22:3 dubbisaa, achiis haalawwan armaan gadii murtoo kee irratti jijjiirama kan fidan akkamitti akka taʼe mariʼadhaa:

• Konkolaachisuuf ykn maashinii irratti hojjechuuf jetta yoo taʼe.

• Ulfa yoo taate.

• Doktarri dhugaatii alkoolii akka hin dhugne sitti himeera yoo taʼe.

• Hamma dhugdu toʼachuun si rakkisa yoo taʼe.

• Seerri dhugaatii alkoolii dhuguu siif hin heyyamu yoo taʼe.

• Nama kanaan dura hamma dhugu toʼachuun isa rakkisuu fi dhuguu dhiisuuf filatee wajjin jirta yoo taʼe.

Cidha gaaʼelaa irratti ykn qophiiwwan kan biroo irratti dhugaatii alkoolii dhiheessuu qabdaa? Wanta murtoo gochuuf si gargaaru ilaaluuf VIIDIYICHA taphachiisaa.

VIIDIYOO: Dhugaatii Alkoolii Dhiheessuun Qabaa? (2:41)

Roomaa 13:13 fi 1 Qorontos 10:31, 32 dubbisaa. Erga dubbistanii booda gaaffii kana irratti mariʼadhaa:

• Qajeelfamoota kana hojii irra oolchuun kee murtoo Yihowaa gammachiisu gochuuf kan si gargaaru akkamitti?

5. Hammam akka dhugdu murteessi

Dhugaatii alkoolii dhuguuf yoo murteessite Yihowaan dhugaatii alkoolii dhuguu akka hin dhorkine, garuu immoo garmalee dhuguu akka dhorke yaadadhu. Maaliif? Hoseʼaa 4:11, 18 dubbisaa, achiis gaaffii kana irratti mariʼadhaa:

• Namni tokko garmalee yoo dhuge maaltu uumamuu dandaʼa?

Garmalee dhuguu irraa of qusachuu kan dandeenyu akkamitti? Humna keenya beekuu qabna. Fakkeenya 11:2 dubbisaa, achiis gaaffii kana irratti mariʼadhaa:

• Hamma dhugdu murteessuun gaarii kan taʼe maaliifi?

6. Namni tokko garmalee dhuguu dhiisuuf wanti isa gargaaru maali dha?

VIIDIYOO: ‘Akkaataa Jireenyaa Kootti hin Gammanne’ (6:32)

• Viidiyoo kana irratti, Dimitriin yommuu dhugaatii alkoolii dhugu amala akkamii argisiisa ture?

• Dhuguu isaa yeruma sana dhaabuu dandaʼeeraa?

• Dhuma irratti araada dhugaatii alkoolii moʼuu kan dandaʼe akkamitti?

Qorontos Tokkoffaa 6:10, 11 dubbisaa, achiis gaaffiiwwan kanneen irratti mariʼadhaa:

• Kitaabni Qulqulluun machii ilaalchisee maal jedha?

• Namni dhugaatii alkoolii garmalee dhugaa ture tokko jijjiiramuu akka dandaʼu kan agarsiisu maali dha?

Maatewos 5:30 dubbisaa, achiis gaaffii kana irratti mariʼadhaa:

• Harka of irraa kutanii gatuun Yihowaa gammachiisuuf aarsaa kaffaluu argisiisa. Araada dhugaatii alkoolii garmalee dhuguu wajjin qabsoo gochaa jirta yoo taʼe maal gochuu dandeessa?a

Qorontos Tokkoffaa 15:33 dubbisaa, achiis gaaffii kana irratti mariʼadhaa:

• Namoota garmalee dhuganii wajjin yoo michoomte dhiibbaa akkamii si irraan geessisuu dandaʼu?

MAAL BARATTE?

Yihowaan dhugaatii alkoolii akka itti gammannuuf nuu kenne. Taʼus garmalee dhuguu fi machaaʼuu ni balaaleffata.

Irra Deebii

• Kitaabni Qulqulluun waaʼee dhugaatii alkoolii maal jedha?

• Dhugaatii alkoolii garmalee dhuguun balaa akkamii qaba?

• Dhugaatii alkoolii dhuguu ilaalchisee murtoo warra kaanii kabajuu kan dandeenyu akkamitti?

QORANNOO DABALATAA GODHI

Dhugaatii alkoolii ilaalchisee ijoolleen umurii waggoota kurnanii keessa jiran murtoo gaarii gochuu kan dandaʼan akkamitti?

Dhugaatii Alkoolii Dhuguu Kee Dura Itti Yaadi (2:31)

Araada dhugaatii dhuguu injifachuuf tarkaanfiiwwan fudhachuu dandeessu hubadhu.

“Dhugaatii Alkooliitiif Ilaalcha Sirrii Qabaachuu” (Masaraa Eegumsaa, Adoolessaa-Fulbaanaa 2010)

Kiristiyaanni tokko dhugaatii alkoolii yommuu dhugu burcuqqoo ol fuudhee warra kaanii wajjin walitti buusuu qabaa?

“Gaaffii Dubbistootaa” (Mata duree Masaraa Eegumsaa irratti ba’e)

Seenaa jireenyaa “Barmeelii Urataan Ture” jedhu irraa, namni tokko araada dhugaatii alkoolii kan injifate akkamitti akka taʼe dubbisi.

“Kitaabni Qulqulluu Jireenya Namootaa ni Jijjiira” (Mata duree Masaraa Eegumsaa irratti ba’e)

Yihowaa garaadhaa kan jaallattuu fi wanta isa gaddisiisu kam iyyuu raawwachuu dhiisuuf carraaqqii cimaa yoo goote illee, darbee darbee dogoggora raawwachuun kee hin oolu. Haa taʼu malee, cubbuun tokko tokko baayʼee cimaa taʼuu dandaʼa. (1 Qorontos 6:9, 10) Cubbuu cimaa yoo hojjette, Yihowaan si jaallachuu isaa akka hin dhiisne yaadadhu; inni dhiifama sii gochuu fi si gargaaruuf fedhii qaba.

1. Yihowaan dhiifama akka nuu godhuuf maal gochuu qabna?

Namoonni Yihowaa jaallatan cubbuu cimaa akka hojjetan yommuu hubatan baayʼee gaddu. Taʼus waadaa Yihowaan, “Cubbuun keessan diimaa dhiiga fakkaatu yoo taʼe illee, akkuma cabbii adii ni taʼa” jechuudhaan saba isaatiif gale irraa jajjabina argatu. (Isaayyaas 1:18) Garaadhaa yoo yaada geddaranne, Yihowaan guutummaatti dhiifama nuuf godha. Haa taʼu malee, yaada geddarachuu keenya akkamitti argisiisna? Wanta hojjechaa turretti garaadhaa gaabbinee wanta sana raawwachuu dhiisuu fi Yihowaan dhiifama akka nuuf godhu kadhachuudhaan kana gochuu dandeenya. Achiis ilaalcha ykn barsiifata dogoggoraa cubbuu sana raawwachuutti nu geesse dhiisuuf carraaqqii guddaa gochuu fi ulaagaalee Yihowaa qulqulluu taʼanii wajjin walsimnee jiraachuuf yaaluu qabna.—Isaayyaas 55:6, 7 dubbisi.

2. Yeroo cubbuu hojjennutti Yihowaan jaarsoliitti fayyadamee kan nu gargaaru akkamitti?

Yeroo cubbuu cimaa hojjennutti Yihowaan ‘jaarsolii gumii akka ofitti waammannu’ nu ajajeera. (Yaaqoob 5:14, 15 dubbisi.) Dhiironni muudaman kun Yihowaa fi hoolota isaa ni jaallatu. Isaan Yihowaa wajjin deebisnee hariiroo gaarii akka qabaannu nu gargaaruu kan dandaʼan akkamitti akka taʼe barataniiru.—Galaatiyaa 6:1.

Maarree jaarsoliin yeroo cubbuu cimaa hojjennutti kan nu gargaaran akkamitti? Jaarsoliin lama ykn sadii gorsa Kitaaba Qulqulluutti fayyadamanii nu sirreessu. Kana malees, yaada ykn jajjabina irra deebinee cubbuu akka hin hojjenne nu gargaaran nuu kennu. Jaarsoliin gumicha dhiibbaa gadhee irraa eeguuf, nama cubbuu cimaa hojjetee fi yaada geddarachuu dide kam iyyuu gumiidhaa baasu.

CAALAATTI BARADHU

3. Cubbuu keenya himachuun michummaa Yihowaa wajjin qabnu haareffachuuf nu gargaara

Cubbuun hojjennu kam iyyuu Yihowaa ni gaddisiisa, kanaafuu cubbuu keenya isatti himachuun keenya sirrii dha. Faarfannaa 32:1-5 dubbisaa, achiis gaaffii kana irratti mariʼadhaa:

• Cubbuu hojjenne dhoksuuf yaaluu mannaa Yihowaatti himachuun keenya gaarii kan taʼe maaliifi?

VIIDIYOO: “Yihowaan Warra Jaallatu ni Adaba” (3:01)

• Akkuma viidiyicha irratti ibsame jaarsoliin, Kaanon gara Yihowaatti akka deebiʼu kan isa gargaaran akkamitti?

Iftoominaa fi amanamummaadhaan jaarsoliitti dubbachuu qabna; isaanis nu gargaaruuf qophaaʼoo dha. Yaaqoob 5:16 dubbisaa, achiis gaaffii kana irratti mariʼadhaa:

• Cubbuu hojjenne ilaalchisee dhugaa isaa dubbachuun keenya jaarsoliin nu gargaaruun akka isaanitti salphatu kan godhu akkamitti?

4. Yihowaan cubbamootatti araara ni argisiisa

Namni cubbuu cimaa hojjete tokko qajeelfama Yihowaa hordofuu yoo dide, gumiidhaa baafama; nutis isa wajjin yeroo dabarsuu hin qabnu. Qorontos Tokkoffaa 5:6, 11 dubbisaa, achiis gaaffii kana irratti mariʼadhaa:

• Akkuma raacitiin bukoo bukeessu, nama cubbuu hojjetee fi yaada hin geddarannee wajjin yeroo dabarsuun gumicha irratti dhiibbaa kan godhu akkamitti?

• Akkaataan itti Yihowaan cubbamoota qabu Waaqa yaadasaatti hin cichine, araara qabeessaa fi jaalala qabeessa taʼuusaa kan argisiisu akkamitti?

5. Yaada yoo geddaranne Yihowaan dhiifama nuuf godha

Yesuus fakkeenya namni tokko yeroo yaada geddaratu wanta Yihowaatti dhagaʼamu hubachuuf nu gargaaru dubbateera. Luqaas 15:1-7 dubbisaa, achiis gaaffii kana irratti mariʼadhaa:

• Caqasni kun waaʼee Yihowaa maal si barsiisa?

Hisqiʼel 33:11 dubbisaa, achiis gaaffii kana irratti mariʼadhaa:

• Yaada geddarachuun tarkaanfii barbaachisaa akkamii fudhachuu dabalata?

MAAL BARATTE?

Cubbuu cimaa yoo hojjenne, garuu immoo garaadhaa yoo gaabbinee fi cubbuu sana raawwachuu dhiisuuf yoo murteessine Yihowaan dhiifama nuuf godha.

Irra Deebii

• Cubbuu keenya Yihowaatti himachuun keenya gaarii kan taʼe maaliifi?

• Cubbuun keenya akka nuuf dhiifamuuf maal gochuu qabna?

• Cubbuu cimaa yoo hojjenne, gargaarsa jaarsolii gaafachuu kan qabnu maaliifi?

QORANNOO DABALATAA GODHI

Namni tokko akkuma Isaayyaas 1:18 irratti ibsame, araara Yihowaa kan argate akkamitti akka taʼe ilaali.

Yihowaan Dhiifama Akka Isiniif Godhu Matumaa hin Shakkinaa (5:02)

Jaarsoliin namoota cubbuu ­cimaa hojjetan gargaaruuf kan yaalan akkamitti?

“Namoota Cubbuu Hojjetanitti Jaalalaa fi Araara Argisiisuu” (Masaraa Eegumsaa, Hagayya 2024)

Cubbamoota yaada hin geeddarannetti jaalalaa fi araara argisiisuun akkamitti akka dandaʼamu dubbisi.

Gargaarsa Nama Gumiidhaa Baafameef Taʼu” (Masaraa Eegumsaa, Hagayya 2024)

Seenaa jireenyaa “Gara Yihowaatti Deebiʼuun Barbaade” jedhu irraa, namni Yihowaa irraa fagaatee ture tokko Yihowaan gara isaatti akka isa deebise kan isatti dhagaʼame maaliif akka taʼe baradhu.

“Kitaabni Qulqulluun Jireenya Namootaa ni Jijjiira” (Masaraa Eegumsaa, Eblaa-Waxabajjii 2012)