Bulchiinsa Kaayyoo Waaqayyoo Galmaan Ga’u

“Waaqayyo wanti hundinuu akka akeeka isaatii fi akka fedha isaatiitti akka ta’u in godha.”—EFESOON 1:11.

1. Gumiin Dhuga Baatota Yihowaa hundi Roobii galgala Ebla 12, 2006 maaliif walitti qabamu?

NAMOONNI miliyoona 16 ta’an Irbaata Gooftaa kabajuuf Roobii galgala, Ebla 12, 2006 walitti qabamu. Bakka walga’ichi itti godhamu hundaatti, maxinoon hin bukaa’in dhagna Kiristositti fakkeeffameefi wayinii diimaan dhiigasaatti fakkeeffame minjaalarra kaa’ama. Haasawaan Yaadannoo duuti Yesus hiika maalii akka qabu ibsu yommuu xumuramuu ga’u, jalqaba maxinichi, itti aanseemmoo wayinichi namoota ayyaanicharratti argamaniif naanneffama. Gumii Dhugaa Baatota Yihowaa muraasa keessatti namni tokko yookiin isaa ol ta’an maxinichaafi wayinicharraa hirmaatu. Gumiiwwan baay’ee keessatti garuu namoota ayyaanicharratti argaman keessaa wantoota kanarraa kan hirmaatan hin jiran. Haata’u malee, namoonni baay’een walga’icharratti argamaniifi bara baraaf lafarra jiraachuuf abdii qaban maxinichaafi wayinicharraa utuu hin hirmaatin, Kiristiyaanonni muraasni samiirra jiraachuuf abdii qaban qofti kan hirmaatan maaliifi?

2, 3. (a) Yihowaan haala kaayyoosaa wajjin wal simuun wantoota kan uume akkamitti? (b) Yihowaan lafaafi namoota kan uume maaliifi?

² Yihowaan Waaqa kaayyoo qabudha. Kaayyoosaa kana galmaan ga’uufis “wanti hundinuu akka akeeka isaatii fi akka fedha isaatiitti akka ta’u in godha.” (Efesoon 1:11) Jalqabarratti Ilmasaa isa tokkicha uume. (Yohannis 1:1, 14; Mul’ata 3:14) Achiis, Ilmasaa kanaan fayyadamee ergamoota, lafaafi ilmaan namootaa dabalatee wanta hundumaa uume.—Iyoob 38:4, 7; Faarfannaa 103:19-21; Yohannis 1:2, 3; Qolosaayis 1:15, 16.

³ Sabni Kiristiyaanaa baay’een akka barsiisanitti, Yihowaan lafa kan uume namoota maatiisaa isa samii jirutti dabalamuuf ga’eessota ta’an irratti qoruuf jedhee miti. Lafa kan uume kaayyoo ifa ta’eef, jechuunis namoonni ‘akka irra jiraataniifidha.’ (Isaayaas 45:18) Waaqayyo lafa kan uume namaaf yeroo ta’u, namootas kan uume lafarra akka jiraataniifidha. (Faarfannaa 115:16) Kaayyoonsaa lafti guutummaatti jannata akka taatu, akkasumas namoota qajeeloo jannata kana babal’isaniifi kunuunsaniin akka guutamtu ture. Yihowaan, matumaa Addaamiifi Hewwaan yeroo booda gara samii akka dhaqan hin abdachiifne.—Uumama 1:26-28; 2:7, 8, 15.

Mormii Kaayyoo Waaqayyoorratti Ka’e

4. Jalqaba seenaa ilmaan namootaarratti akkaataa Yihowaan olaantummaasaa itti fayyadamurratti mormiin kan ka’e akkamitti?

⁴ Ergamoota Waaqayyoo keessaa inni tokko Waaqayyorratti ka’ee, mirga filannoo gochuuf isaaf kennameen seeraan ala gargaaramuudhaan kaayyoon Yihowaa akka galma hin geenye gochuu barbaade. Gochisaa kunis, nageenya uumamawwan jaalalaan kaka’anii olaantummaa Yihowaatiif bitamuu barbaadanii booresse. Seexanni Addaamiifi Hewwaan Waaqayyorraa adda ba’anii ofiisaaniitiin akka of bulchan taasise. (Uumama 3:1-6) Seexanni Waaqayyo humna qabaachuusaa haaluu baatus, karaa Yihowaan itti olaantummaasaatti fayyadamuufi mirga inni uumamasaa bulchuuf qaburratti mormii kaase. Kanaan kan ka’es, jalqaba seenaa ilmaan namootaarratti olaantummaa Yihowaarratti gaaffiin ka’e.

5. Gaaffii gara biraa akkamiitu ka’e? Gaaffiin kunoo eenyufaa dabalata?

⁵ Mormiin Seexanni jalqabarratti olaantummaa Yihowaan uumama cufarratti qabu ilaalchisee kaasee, bara Iyoobittis gaaffii garabiraan akka ka’u godheera. Seexanni, sababii uumamnisaa Yihowaadhaaf itti bitamaniifi Isa tajaajilanirratti gaaffii kaase. Uumamnisaa kan isa tajaajilan yaada ofittummaatiin kaka’anii akka ta’eefi utuu qoramanii Waaqayyoon akka ganan dubbate. (Iyoob 1:7-11; 2:4, 5) Mormiin kun kan ka’e namoota tajaajiltoota Yihowaa ta’anii wajjin haala wal qabateen ta’uyyuu, Ilmasaa isa tokkicha dabalatee ergamoota Waaqayyoos kan ilaalu ture.

6. Yihowaan Maqaasaafi kaayyoosaatiif amanamaa ta’uusaa kan argisiise akkamitti?

⁶ Yihowaan kaayyoosaafi hiika maqaansaa qabuuf amanamaa ta’uudhaan Raajiifi Fayyisaa ta’eera.a Seexanaan akkas jedhe: “Ani sii fi dubartittii gidduu, sanyii isheetii fi sanyii kee gidduus diinummaa nan buusa; inni mataa kee in buruqsa, atis koomee isaa in iddita.” (Uumama 3:15) Yihowaan ‘dubartiisaa’ jechuunis jaarmiyaasaa ishee samiirratti argamtuun fayyadamee gaaffii Seexanni kaaseef deebii kennuusaarrayyuu, sanyiin Addaam badiisarraa oolanii jireenya akka argatan qophii godheera.—Roomaa 5:21; Galaatiyaa 4:26, 31.

‘Dhoksaa Fedhasaa’

7. Yihowaan karaa Phaawulos kaayyoosaa isa kam ibse?

⁷ Phaawulos xalayaa Kiristiyaanota Efesooniif barreesserratti, Yihowaan kaayyoosaa galmaan ga’uuf wantoota akkamitti akka bulchu argisiisuuf ibsa gaariidhaan gargaarameera. Akkas jechuudhaan barreesse: “Waaqayyo waan isatti gaarii fakkaate karaa Kristos itti yaadee of dura kaa’atee ture; ammas dhoksaan fedha isaa kun nu biratti akka beekamu godhe. Barri murame yeroo guututti, Waaqayyo akka ittiin [bulchiinsa kanaan NW] fayyisuuf akeeketti, wanta bantii waaqaa keessa jiru, wanta lafa irra jiru, wanta hundumaas harka Kristos jalatti walitti in qaba.” (Efesoon 1:9, 10) Kaayyoon Yihowaa inni dinqisiisaan, ilmaan namootaas ta’an ergamoonni jaalalaan kaka’anii olaantummaasaatiif bitaman tokko akka ta’an gochuudha. (Mul’ata 4:11) Karaa kanaanis, maqaan Waaqayyoo qulqulluu ta’ee ni eegama; Seexanni sobduu ta’uunsaa ni mirkanaa’a; akkasumas jaalalli Waaqayyoo ‘akka waaqarratti ta’u, lafarrattis ni ta’a.’—Maatewos 6:10.

8. Jechi “bulchiinsa” jedhu hiiknisaa maalidha?

⁸ Kaayyoon yookiin ‘fedhiin Yihowaa inni gaariin’ karaa “bulchiinsa” tokkoo raawwiisaa argata. Jechi Phaawulos asirratti gargaarame kallattiidhaan yeroo hiikamu, “bulchiinsa maatii” jechuudha. Kunis bulchiinsa akka Mootummaa Masiihichaa kan argisiisu utuu hin ta’in, karaa itti wantoonni raawwataman kan argisiisudha.b Yihowaan kaayyoosaa galmaan ga’uuf karaan inni itti wantoota raawwatu “dhoksaa” yeroo ta’u, dhoksaan kunis yeroo gara garaatti suuta suutaan ifa ta’eera.—Efesoon 1:9; 3:9, miiljalee, Hiika Addunyaa Haaraa isa hiika jechootaa qabu ilaali.

9. Yihowaan “dhoksaan fedha isaa” suuta suutaan ifa akka ta’u kan godhe akkamitti?

⁹ Yihowaan Jannata Eeden keessatti Sanyii abdachiise ilaalchisee kaayyoo qabu akkamitti akka raawwatu kakuu yeroo gara garaatti galeen suuta suuta ifa godheera. Kakuu Abrahaamii wajjin galerratti, Sanyiin abdachiifame gara biyya lafaatti kan dhufu karaa hidda dhalootaasaa akka ta’eefi “sabni biyya lafaa irraa hundinuu” karaa Sanyii kanaa akka eebbifaman ibseera. Kakuun kunis, namoonni kaan sanyii abdachiifame kanaa wajjin akka wal ta’iinsa uuman ibseera. (Uumama 22:17, 18) Yihowaan kakuu Seera saba Israa’elii wajjin galeenimmoo, “luboota mootii waaqaa fi lafaa” qopheessuuf kaayyoo akka qabu ibsee ture. (Ba’uu 19:5, 6) Kakuun inni Daawitii wajjin gale Sanyiin kun mootummaa tokkorratti bara baraaf mataa akka ta’u kan argisiisu ture. (2 Saamu’el 7:12, 13; Faarfannaa 89:3, 4) Kakuun Seera Musee Yihudoota gara Masiihichaatti erga geessee booda, Yihowaan karaa kaayyoosaa kana itti raawwatu caalaatti ifa godheera. (Galaatiyaa 3:19, 24) Akka dursee raajiidhaan dubbatametti, ilmaan namootaa sanyii isa abdachiifamee wajjin tokko ta’an “luboota mootii waaqaa fi lafaa” ta’u. Isaan kunis “Israa’el” warra hafuuraa haaraa ta’uudhaan “kakuu haaraa” keessa galu.—Ermiyaas 31:31-34; Ibroota 8:7-9.c

10, 11. (a) Yihowaan, eenyummaa Sanyii dursee raajiidhaan dubbatamee ifa kan godhe akkamitti? (b) Ilmi Waaqayoo inni tokkichi gara lafaa kan dhufe maaliifi?

¹⁰ Yeroon Sanyiin abdachiifame kun kaayyoo Waaqayyoo raawwachuuf gara lafaa itti dhufu ni ga’e. Yihowaan Gabri’el ergamaa gara Maariyaamitti erguudhaan ilma Yesus jedhamu akka deessuu itti hime. Ergamichis akkas isheedhaan jedhe: “Inni guddaa in ta’a ilma aabbaas jedhamee in waamama, Waaqayyo gooftaanis teessoo abaabilii isaa Daawit in kennaaf. Mana Yaaqoob irratti bara baraan in mo’a, barri mootummaa isaas dhuma hin qabu.” (Luqaas 1:32, 33) Eenyummaan Sanyii abdachiifame kanaa karaa kanaan ifa ta’e.—Galaatiyaa 3:16; 4:4.

¹¹ Ilmi Waaqayyoo inni tokkichi gara biyya lafaa dhufee hamma du’aatti qoramuu qaba ture. Gaaffii Seexanni kaaseef deebii kennuun amanamummaa Yesus argisiisurratti kan hundaa’e ture. Hanga dhumaatti jabaatee Abbaasaa cina ni dhaabataa laata? Kun dhoksaa ture. Yeroo booda, Phaawulos wanta Yesus raawwate akkas jechuudhaan ibseera: “Nama Waaqayyoo ta’uu keessa iyyuu dhoksaan guddaan akka jiru amanamaa dha; kanaafis, ‘Inni foon uffatee mul’ateera, hafuurichi dhugaa galcheeraaf, ergamoota Waaqayyootti argameera, saba biyya lafaa keessatti lallabameera, guutummaa biyya lafaa keessatti itti amanameera, ulfinaan ol fudhatameera’ jedhamee himameera.” (1 Ximotewos 3:16) Eeyyee, amanamummaan Yesus sodaa tokko malee amma du’aatti argisiise, gaaffii Seexanni kaaseef deebii ga’aa argamsiiseera. Ta’us ammayyuu wantoonni dhoksaa ta’an jiru.

‘Dhoksaa Mootummaa Waaqayyoo’

12, 13. (a) Dhoksaa Mootummaa Waaqayyoo keessaa inni tokko maalidha? (b) Yihowaan namoonni muraasni gara samii akka dhaqan yeroo filetti maal gochuun isa barbaachiseera?

¹² Yesus lallabaaf gara Galiilaa yeroo adeemetti, bulchiinsi kun Mootummaa Masiihichaa isa inni Mootii irratti ta’uu wajjin walitti dhufeenya akka qabu dubbateera. Bartootasaatiin akkas jedhee ture: “Dhoksaa mootummaa waaqaa beekuun isiniif kennameera.” (Maatewos 13:11) Maarqos 4:11⁠rrattimmoo, “Dhoksaan mootummaa Waaqayyoo isiniif kennameera” jedheera. Yihowaan, namoota ilmasaa wajjin tokko ta’uudhaan kutaa Sanyichaa ta’aniifi 144,000 ta’an, jechuunis “karra xinnayyoo” filachuunsaa dhoksaa kana keessaa isa tokkodha.—Luqaas 12:32; Mul’ata 14:1, 4.

¹³ Namoonni kan uumaman lafarra akka jiraataniif waan ta’eef, Yihowaan namoonni muraasni gara samii akka dhaqan gochuuf “uumama haaraa” qopheessuun isa barbaachisa ture. (2 Qorontos 5:17) Namoota abdii adda ta’e akkasii qaban keessaa tokko kan ture Phexros akkas jechuudhaan barreesseera: “Waaqayyo abbaa gooftaa keenyaa Yesus Kristosiif galanni haa ta’u! Inni araara isaa isa guddaadhaan, Yesus Kristos warra du’an keessaa ka’uu isaatiin, abdii isa jiraataa kanatti qabamnee akka jiraannuuf haaraa godhee nu dhalachiiseera. Waan hin badne, waan xurii hin qabne, waan gad deebi’aa hin adeemnes, isa waaqa keessatti isiniif eegamee jirutti darbitanii akka fudhattan godheera.”—1 Phexros 1:3, 4.

14. (a) Namoonni Yihudoota hin taane ‘dhoksaa mootummaa Waaqayyoo’ keessatti kan qooda fudhatan akkamitti? (b) “Yaada Waaqayyoo isa gad fagoo” hubachuu kan dandeenye akkamitti?

¹⁴ Dhoksaan, Mootummaa Waaqayoo isa fuulduratti dhufuu wajjin wal qabate garabiraanimmoo, namoota muraasa samiirratti Kiristosii wajjin akka bulchaniif filataman keessa, namoonni Yihudoota hin taanes akka filataman Kaayyoo Waaqayyoo ta’uusaati. Phaawulos “bulchiinsa” yookiin karaa Yihowaan itti kaayyoosaa raawwatu yommuu ibsu akkas jedheera: “Dhaloota darban keessatti dhoksaan kun ilmaan namaatti hin argisiifamne; amma garuu Waaqayyo hafuura isaatiin ergamoota qulqullootaa fi raajotatti mul’iseera. Dhoksaan kunis warri saba Waaqayyoo hin ta’in wangeelatti amanuudhaan wanta Yihudoonni argatan akka argatan, isaanii wajjin bu’aa dhagna tokkoo akka ta’an, abdii isa Waaqayyo karaa Kristos Yesus kenne keessaas akka hirmaatan gochuuf kan qophaa’e ture.” (Efesoon 3:5, 6) Dhoksaan kun ‘ergamoota qulqullootatti’ mul’ifamee ture. Har’as haaluma wal fakkaatuun, gargaarsa hafuura qulqulluu utuu argachuu baannee “yaada Waaqayyoo isa gad fagoo” hubachuu hin dandeenyu turre.—1 Qorontos 2:10; 4:1; Qolosaayis 1:26, 27.

15, 16. Yihowaan warra Kiristosii wajjin bulchan ilmaan namootaa keessaa kan filatee maaliifi?

¹⁵ “Namoonni kumaatamni dhibbaa fi kumni afurtamii arfan” ‘hoolichaa’ [Yesus Kiristosii] wajjin tulluu Xiyoon isa samiirra dhaabatanii argaman, warra “biyya lafaa keessaa furaman” akkasumas “warra sanyii namaa keessaa Waaqayyoo fi hoolichaaf furaman” jedhamanii waamamaniiru. (Mul’ata 14:1-4) Yihowaan ilmaansaa warra samiirratti argaman keessaa, Ilmisaa inni jalqabaa sanyii Eeden keessatti abdachiifame keessaa isa duraa akka ta’u filateera. Haata’u malee, warra Kiristosii wajjin bulchan ilmaan namootaa keessaa kan filate maaliifi? Phaawulos, Yihowaan namoota lakkoofsisaanii muraasa ta’e kana “warra akka akeeka isaatiitti waamamanii” fi “akka fedha isaa isa gaariitti” waamaman jechuudhaan ibseera.—Roomaa 8:17, 28-30; Efesoon 1:5, 11; 2 Ximotewos 1:9.

¹⁶ Kaayyoon Yihowaa maqaansaa inni qulqulluuniifi inni guddaan qulqulluu ta’ee akka eegamu gochuufi olaantummaasaa mirkaneessuudha. Yihowaan ogummaasaa isa homtinuu ittiin wal gituu hin dandeenyeen gargaaramee, karaa “bulchiinsa” qopheesse kanaa yookiin karaa wantoota ittiin raawwachiisuun Ilmasaa isa tokkicha gara lafaatti kan erge yeroo ta’u, innis hamma du’aatti qorameera. Kana malees, Yihowaan Mootummaan Masiihichaa inni karaa Ilmasaa bulchu kun ilmaan namootaa warra hamma du’aatti olaantummaasaatiif amanamoo ta’an akka dabalatu godheera.—Efesoon 1:8-12; Mul’ata 2:10, 11.

17. Kiristosis ta’e namoonni isaa wajjin bulchan lafarra jiraatanii kan darban ta’uusaanii beekuun keenya kan nu gammachiisu maaliifi?

¹⁷ Yihowaan Ilmisaa gara lafaa akka dhufu gochuufi ilmaan namootaa Mootummaa Ilmasaa kana keessatti isaa wajjin akka bulchan filachuudhaan, ilmaan Addaamiif jaalala guddaa akka qabu argisiiseera. Abeelii jalqabee namoonni amanamummaasaanii eegan garabiraan kanarraa faayidaa maalii argatu? Kaayyoon Yihowaa inni jalqabaa galmasaarra akka ga’u yoo barbaadame, ilmaan namootaa garboota cubbuufi du’aa ta’anii dhalatan, karaa hafuuraas ta’e qaamaan fayyina argachuufi gara gonkummaatti deebi’uu isaan barbaachisa. (Roomaa 5:12) Namoonni bara baraan lafarra jiraachuuf abdatan hundi, mootiinsaanii yeroo lafarra turetti akkuma bartootasaatiif gochaa ture, isaaniinis akka jaallatuufi rakkoosaanii akka isaaniif hubatu beekuunsaanii baay’ee isaan jajjabeessa. (Maatewos 11:28, 29; Ibroota 2:17, 18; 4:15; 7:25, 26) Warri Kiristosii wajjin samiirratti lubootaaf mootota ta’anis, dhiiraafi dubartoota amanamoo akkuma keenya cubbuu dhaalanii wajjin qabsaa’aa turaniifi bu’aa ba’ii jireenyaa argan akka ta’an hubachuunsaanii baay’ee isaan jajjabeessa.—Roomaa 7:21-25.

Kaayyoon Yihowaa Utuu Hin Raawwatamin Hin Hafu

18, 19. Jechoonni Phaawulos Efesoon 1:8-11⁠rratti argaman ifa kan nuuf ta’an maaliifi? Mataduree itti aanurratti waa’ee maalii ilaalla.

¹⁸ Jechoonni Phaawulos Efesoon 1:8-11⁠rratti Kiristiyaanota dibamtootaaf barreesse hiika maalii akka qaban amma akka gaariitti hubanneerra. Phaawulos, Yihowaan Kiristiyaanota kanaaf “dhoksaa fedhasaa” akka isaan beeksise, Kiristosii wajjin (‘dhaala akka argatan’, 1899) akkasumas “Waaqayyo wanti hundinuu akka akeeka isaatii fi akka fedha isaatiitti akka ta’u” gochuusaa ibseera. Kunis, “bulchiinsa” Yihowaan kaayyoosaa isa dinqisiisaa galmaan ga’uuf ittiin fayyadamuu wajjin walitti dhufeenya kan qabu ta’uusaa hubanneerra. Kana hubachuun keenyammoo Irbaata Gooftaarratti maxinichaafi wayinicharraa kan hirmaatan Kiristiyaanota muraasa qofa kan ta’an maaliif akka ta’e akka hubannu nu gargaara.

¹⁹ Mataduree itti aanurratti, Yaadannoon du’a Kiristos Kiristiyaanota gara samii dhaquuf abdii qabaniif hiika maalii akka qabu, akkasumas namoonni miliyoonaan lakkaa’amaniifi bara baraan lafarra jiraachuuf abdii qaban Ayyaana Yaadannootiif xiyyeeffannaa guddaa kan kennan maaliif akka ta’e ilaalla.

[Miiljaleewwan]

Wanta Bantii Waaqaa Keessa Jiruufi Wanta Lafarra Jiru Walitti Qabuu

“Waan isatti gaarii fakkaate . . . wanta bantii waaqaa keessa jiru, wanta lafa irra jiru, wanta hundumaas harka Kristos jalatti walitti in qaba.”—EFESOON 1:9, 10.

1. Yihowaan bantiiwwan waaqaafi lafaaf ‘wanta gaarii akkamii yaade’?

NAGAA UUMAMA CUFAA! Yihowaan “inni nagaa kennu” kaayyoonsaa kanadha. (Ibroota 13:20) Yihowaan, Phaawulos geggeessaa hafuura qulqulluutiin akkas jedhe akka barreessu godhee ture: “Waan isatti gaarii fakkaate . . . wanta bantii waaqaa keessa jiru, wanta lafa irra jiru, wanta hundumaas harka Kristos jalatti walitti in qaba.” (Efesoon 1:9, 10) Jechi caqasa kanarratti “walitti qaba” jedhame hiiknisaa maalidha? Hayyuu Macaafa Qulqulluu kan ta’an Joon Laayitfuut akkas jedhaniiru: “Ibsi kun uumamni cufti walta’iinsa akka qabaatu, akkasumas qaamonni orma ta’aniifi wal qooduu fidan badanii hundinuu karaa Kiristos akka tokko ta’an argisiisa. Cubbuun, duuni, gaddiifi dhiphinni hin jiraatu.”

“Wanta Bantii Waaqaa Keessa Jiru”

2. ‘Wantoonni bantii waaqaa keessa jiraniifi’ walitti qabamuun isaan barbaachisu eenyufa’i?

² Phexros, abdii dinqisiisaa Kiristiyaanonni qaban akkas jechuudhaan barreesseera: “Nuyi garuu akka abdii inni nuuf kenneetti, bantiiwwan waaqaa haaraa, lafa haaraas warra qajeelummaan keessa buufatu in eegganna.” (2 Phexros 3:13) ‘Bantii waaqaa haaraan’ asirratti abdachiifame, bulchiinsa haaraa jechuunis Mootummaa Masiihichaati. Phaawulos ergaa Kiristiyaanota Efesooniif barreesserratti ‘wantoonni bantii waaqaa keessa jiran’ “Kiristos jalatti” akka walitti qabaman ibseera. Wantoonni bantii waaqaa keessatti argaman kun, namoota lakkoofsa muraasa qabaniifi Kiristosii wajjin samiirratti bulchan kan argisiisanidha. (1 Phexros 1:3, 4) Kiristiyaanonni 144,000 ta’aniifi hafuura qulqulluudhaan dibaman kun, Kiristosii wajjin Mootummaa isa samii akka dhaalaniif warra “biyya lafaa keessaa furaman” akkasumas “warra sanyii namaa keessaa . . . furaman” ta’uunsaanii ibsameera.—Mul’ata 5:9, 10; 14:3, 4; 2 Qorontos 1:21; Efesoon 1:11; 3:6.

3. Kiristiyaanonni hafuuraan dibaman utuu lafarra jiranii ‘bantii waaqaa keessaa akka iddoon isaaniif kennametti’ kan ibsaman maaliifi?

³ Kiristiyaanonni dibamoon karaa hafuuraa ijoollee Yihowaa akka ta’aniif hafuura qulqulluudhaan lammaffaa dhalataniiru. (Yohannis 1:12, 13; 3:5-7) Yihowaan akka ‘ilmaansaatti’ waan isaan simateef, obbolaa Yesus ta’aniiru. (Roomaa 8:15; Efesoon 1:5) Utuu lafarra jiranii, ‘Karaa Kristos Yesus isumaa wajjin du’aa ka’anii, isumaa wajjin bantii waaqaa keessaa iddoon akka isaaniif kenname’ kan ibsames kanumaafi. (Efesoon 1:3; 2:6) Iddoo guddaa akkasii argachuu kan danda’an ‘hafuura qulqulluu isa abdachiifameen waan mallateeffamaniifidha. Hafuurri qulqulluunimmoo wanta isaan argachuuf jiraniif qabdiisaaniiti.’ (Efesoon 1:13, 14; Qolosaayis 1:5) Yihowaan lakkoofsasaanii dursee waan murteesseef, ‘wantoonni bantii waaqaa keessa jiraniifi’ walitti qabamuun isaan barbaachisu isaan kanadha.

Walitti Qabuun Ni Jalqabame

4. ‘Wantoota bantii waaqaarratti argaman’ walitti qabuun yoomiifi akkamitti jalqabame?

⁴ “Bulchiinsi” Yihowaa, jechuunis karaan inni itti wantoota raawwatu, hojii ‘wantoota bantii waaqaa keessatti argaman’ walitti qabuu kan jalqabu “barri murame yeroo guututti” ture. (Efesoon 1:10) Barri murame kunis, Dh.K.B. bara 33 guyyaa Phenxeqosteetti jalqabe. Guyyaa sanatti, ergamoota Yesusirra, durbaafi dhiira bartoota ta’anirra hafuurri qulqulluun ni bu’e. (Hojii Ergamootaa 1:13-15; 2:1-4) Kunis kakuu inni haaraan hojii jalqabuusaa kan argisiisu yeroo ta’u, karaa kanaanis, gumiin Kiristiyaanaa “Israa’el Waaqayyoo” jechuunis sabni Israa’el inni hafuuraa ni dhalate.—Galaatiyaa 6:16; Ibroota 9:15; 12:23, 24.

5. Yihowaan, “saba” haaraa Israa’eloota warra fooniitiin bakka buufaman kan uume maaliifi?

⁵ Kakuun Seerichaa Yihowaan Israa’eloota warra foonii wajjin gale, “luboota mootii waaqaa fi lafaa . . . saba qulqullaa’aa” ta’ee bara baraaf samiirratti tajaajilu argamsiisuu hin dandeenye. (Ba’uu 19:5, 6) Yesus geggeessitoota amantii Yihudootaatiin: ‘Mootummaan Waaqayyoo isin irraa fudhatamee, saba ija isaaf godhatuuf kennama’ jedheera. (Maatewos 21:43) Sabni kun, Israa’eloota warra hafuuraa, jechuunis Kiristiyaanota warra hafuuraan dibamaniifi kakuu haaraa keessa galfaman kan qabatedha. Phexros Kiristiyaanota kanaaf akkas jechuudhaan barreesseera: “Isin garuu qomoo fo’amaa dha, luboota mana mootummaa ti, saba qulqullaa’aa dha, warra dhuunfaa Waaqayyoo ta’anii dha. Waaqayyo hojii isaa isa jajamaa akka labsitaniif dukkana keessaa, gara ifa isaa isa dinqisiisaatti isin waame. Isin takka saba Waaqayyoo hin turre, amma garuu saba isaa taataniittu.” (1 Phexros 2:9, 10) Israa’eloonni warri foonii saba Waaqayyoo warra kakuun galameef ta’uunsaanii ni hafe. (Ibroota 8:7-13) Akkuma Yesus dursee dubbate, mirgi isaan kutaa Mootummaa Masiihichaa ta’uuf qaban isaanirraa fudhatamee miseensota Israa’el warra hafuuraa 144,000 ta’aniif kenname.—Mul’ata 7:4-8.

Kakuu Mootummaatti Galuu

6, 7. Yesus obbolootasaa warra hafuuraan dibamaniif kakuu addaa akkamii gale? Kun isaaniif bu’aa maalii argamsiisa?

⁶ Yesus galgala ayyaana Yaadannoo du’asaa dhaaberratti ergamootasaa warra amanamoodhaan akkas jedhee ture: “Isin qorama koo keessatti warra anaa wajjin turtanii dha. Abbaan koo mootummaa akka anaaf kaa’e, anis immoo akkasuma isiniif nan kaa’a. Mootummaa kootti maaddii koo irraa in nyaattu, in dhugdu, teessota irra teessanii gosa Israa’el kudha lamaan keessatti firdii in kennitus.” (Luqaas 22:28-30) Yesus asirratti kan dubbate, waa’ee kakuu addaa namoota “hamma du’aatti amanamaa” ta’aniifi ‘warra mo’an’ jechuunis namoota 144,000 hafuuraan dhalataniifi obbolootasaa ta’anii wajjin galedha.—Mul’ata 2:10; 3:21.

⁷ Namoonni lakkoofsisaanii muraasaafi miseensota kutaa kanaa ta’an hundi, abdii bara baraaf fooniin lafarra jiraachuuf qaban aarsaa godhaniiru. Samiirratti Kiristosii wajjin bulchu; akkasumas teessoorra taa’anii ilmaan namootaatiif firdii kennu. (Mul’ata 20:4, 6) Mee ammammoo, caqasawwan garabiraa waa’ee Kiristiyaanota hafuuraan dibamanii dubbataniifi sababii ‘hoolonni kan biraan’ ayyaana Yaadannoorratti maxinichaafi wayinicharraa itti hin hirmaanneef haa ilaallu.—Yohannis 10:16.

8. Kiristiyaanonni hafuuraan dibaman maxinicharraa nyaachuunsaanii hiika maalii qaba? (Saanduqa fuula 11⁠rra jiru ilaali.)

⁸ Kiristiyaanonni hafuuraan dibaman akkuma Kiristos rakkinni kan isaanirra ga’u yommuu ta’u, du’a inni du’e du’uufis fedhii qabu. Miseensa tuuta kanaa kan ta’e Phaawulos ‘Kiristosiin bu’aasaa godhachuudhaaf, kanaafis isa duwwaa beekuuf, humna du’aa ka’uusaas miyeeffachuuf, dhiphinasaarraa, du’asaarraas hirmaachuuf’ aarsaa kamiyyuu kaffaluuf qophaa’aa ta’uusaa ibseera. Eeyyee, Phaawulos “du’a isaa irraas” hirmaachuuf fedhii qaba ture. (Filiphisiiyus 3:8, 10) Kiristiyaanonni dibamoon baay’een yeroo lafarra jiraatan, “milikkita du’atti geeffamuu Yesus,” dhagnasaaniitti baatanii adeemu.—2 Qorontos 4:10.

9. Maxinoon Ayyaana Yaadannoorratti dhihaatu maaliif fakkeenya ta’a?

⁹ Yesus Irbaata Gooftaa yeroo dhaabe: “Kun dhagna koo ti!” jedheera. (Maarqos 14:22) Akkas jechuunsaa, dhagnasaa isa yeroo muraasa booda reebamuufi dhiigaan faalamu argisiisuusaa ture. Maxinoon raacitii hin qabne foon Yesusiif fakkeenya gaariidha. Maaliif? Macaafa Qulqulluu keessatti raacitiin cubbuu yookiin hammeenya waan argisiisuufidha. (Maatewos 16:4, 11, 12; 1 Qorontos 5:6-8) Yesus nama gonkummaa qabuufi cubbuurraa walaba ta’e ture. Foonsaa isa cubbuu hin qabne kana aarsaa godhee dhiheessa. (Ibroota 7:26; 1 Yohannis 2:2) Kana gochuunsaa, Kiristiyaanota amanamoo samiirras ta’e lafa jannata taaturra bara baraaf jiraachuuf abdatan hundaa kan fayyadudha.—Yohannis 6:51.

10. Namoonni ayyaana Yaadannoorratti wayinicharraa hirmaatan ‘dhiiga Kiristosirraa kan hirmaatan’ akkamitti?

¹⁰ Phaawulos, wayinii Kiristiyaanonni dibamoon ayyaana Yaadannoorratti dhugan ilaalchisee yeroo barreessu: “Xoofoo eebbaa isa eebbifannu irraa hirmaachuun keenya, dhiiga Kristos irraa hirmaachuu keenya mitii ree?” jedheera. (1 Qorontos 10:16) Namoonni wayinicharraa hirmaatan ‘dhiiga Kiristosirraa kan hirmaatan’ akkamitti? Isaanumtiyyuu fayyina argachuun waan isaan barbaachisuuf, Kiristosii wajjin ta’anii ilmaan namootaatiif aarsaa ta’uu hin danda’an. Humna dhiigni Kiristos fayyisuuf qabutti amanuusaaniitiin cubbuunsaanii kan isaaniif dhiifame yeroo ta’u, samiirratti jireenya argachuu akka danda’aniif qajeelota ta’anii ilaalamaniiru. (Roomaa 5:8, 9; Tiitoos 3:4-7) Kiristiyaanonni Kiristosii wajjin dhaalaniifi 144,000 ta’an kun kan ‘qullaa’an,’ kan adda baafamaniifi kan “qulqullaa’an” karaa dhiiga Kiristos isa dhangala’edha. (Ibroota 10:29; Daani’el 7:18, 27; Efesoon 2:19) Eeyyee, Kiristos dhiigasaa isa dhangala’een ‘gosa hundumaa keessaa, afaan hundumaa keessaa, nama hundumaa keessaa, saba hundumaa keessaas, namoota Waaqayyoof bite. Waaqayyo keenyaaf mootummaadhaaf, luboota isaas akka ta’an isaan godhe, isaanis lafa irratti mo’uuf jiru.’—Mul’ata 5:9, 10.

11. Kiristiyaanonni dibamoon wayinii ayyaana Yaadannoorratti dhihaaturraa dhuguudhaan maal argisiisu?

¹¹ Kiristos ayyaana Yaadannoo du’asaa yeroo dhaabetti, ergamootasaa warra amanamoodhaaf xoofoo wayinii qabu erga kennee booda akkas isaaniin jedhe: “Hundumti keessan kanattii dhugaa! Kun dhiiga koo ti, dhiigni kun kakuu dhaabate sana cimsuudhaaf, dhiifamuu cubbuu namoota baay’eetiif dhangala’a.” (Maatewos 26:27, 28) Kakuun Seerichaa Waaqayyo saba Israa’elii wajjin galee ture dhiiga jibootaafi dhiiga re’ootaatiin akkuma dhaabatee ture, kakuu haaraan Yihowaan Dh.K.B. bara 33 guyyaa Phenxeqosteetii jalqabee Israa’eloota warra hafuuraa wajjin gales dhiiga Yesusiin dhaabate. (Ba’uu 24:5-8; Luqaas 22:20; Ibroota 9:14, 15) Kiristiyaanonni hafuuraan dibaman wayinii isa “dhiiga kakuu” argisiisu dhuguunsaanii kakuu isa haaraa keessa akka galaniifi faayidaa kakuun kun argamsiisurraa hirmaachaa akka jiran argisiisa.

12. Kiristiyaanonni hafuuraan dibaman Kiristositti dabalamuuf kan cuuphaman akkamitti?

¹² Kiristiyaanonni dibamoon wayinii kanarraa dhuguunsaanii wanta isaan yaadachiisu garabiraas qaba. Yesus bartootasaa warra amanamoodhaan akkas jedheera: “Xoofoo ani keessaa dhuguuf jedhu keessaa dhuguuf jirtu, cuuphaa ani ittiin cuuphamus cuuphamuuf jirtu.” (Maarqos 10:38, 39) Phaawulos yeroo booda, Kiristiyaanonni ‘du’a Kiristositti dabalamuudhaaf akka cuuphaman’ dubbateera. (Roomaa 6:3) Kiristiyaanonni dibamoon jireenya aarsaa kaffaluu gaafatu jiraatu. Abdii bara baraaf lafarra jiraachuuf qaban fedhasaaniitiin waan dhiisaniif duutisaanii du’a aarsaati. Kiristiyaanonni kun amanamummaadhaan erga du’anii booda, Kiristosii wajjin samiirratti ‘mo’uuf’ qaama hafuuraa ta’anii yeroo du’aa kaafaman, cuuphaan isaan Kiristositti dabalamuudhaan cuuphaman ni dhaabata.—2 Ximootewos 2:10-12; Roomaa 6:5; 1 Qorontos 15:42-44, 50.

Maxinoofi Wayiniirraa Hirmaachuu

13. Kiristiyaanonni lafarra jiraachuuf abdii qaban maxinoofi wayiniirraa kan hin hirmaanne maaliifi? Haata’u malee, ayyaana Yaadannoorratti maaliif argamu?

¹³ Yeroo ayyaana Yaadannootti maxinoofi wayinii naanneffamurraa hirmaachuun wantoota kana hundaa kan dabalatu waan ta’eef, Kiristiyaanonni lafarra jiraachuuf abdii qaban maxinichaafi wayinicharraa hirmaachuunsaanii sirrii akka hin taane ifaadha. Kiristiyaanonni lafarra jiraachuuf abdii qaban, kutaa Kiristiyaanota dibamoo qaama Kiristos akka hin taaneefi Yihowaan kakuu haaraa namoota Kiristosii wajjin bulchanii wajjin gale keessa akka hin jirre ni hubatu. ‘Xoofichi’ kakuu haaraa kan argisiisu waan ta’eef, maxinicharraafi wayinicharraa hirmaachuu kan danda’an Kiristiyaanota kakuu haaraa keessa galan qofadha. Kiristiyaanonni bulchiinsa Mootummaa Waaqayyoo jalatti jireenya bara baraa argatanii lafarra jiraachuuf abdii qaban, du’a Kiristositti dabalamuuf hin cuuphamne; isaa wajjin gara samii dhaquufis hin filatamne. Kiristiyaanonni kun maxinichaafi wayinicharraa yoo hirmaatan, gochisaanii kun waa’eesaanii yaada dogoggoraa dabarsuu danda’a. Kanaafuu, ayyaana Yaadannoorratti argamanii sirnasaa kabajaan hordofu malee maxinichaafi wayinicharraa hin hirmaatan. Dhiiga Yesus Kiristos isa dhangala’een dhiifama cubbuu akka argatan karaa isaaniif banuusaa dabalatee, qophiiwwan Yihowaan karaa Ilmasaa isaaniif godheef ni galateeffatu.

14. Dibamtoonni maxinoofi wayinicharraa hirmaachuunsaanii karaa hafuuraa jajjabina kan isaaniif argamsiisu akkamiitti?

¹⁴ Kiristiyaanonni lakkoofsa muraasa qabaniifi Kiristosii wajjin samiirratti akka bulchaniif filataman yeroon itti mallatteeffamanii xumuraman dhihaateera. Dibamtoonni kun jireenyasaanii isa lafarraa hanga aarsaa godhanii kennanitti, maxinichaafi wayinicharraa hirmaachuudhaan karaa hafuuraa jajjabina argatu. Akkas gochuusaaniitiinis obbolootasaanii warra kutaa qaama Kiristos ta’anii wajjin tokkummaa akka qaban argisiisu. Maxinichaafi wayinicharraa hirmaachuunsaanii hamma du’aatti amanamoo ta’uu akka qaban isaan yaadachiisa.—2 Phexros 1:10, 11.

“Wanta Lafa Irra Jiru” Walitti Qabuu

15. Kiristiyaanota dibamoo cinatti walitti qabamaa kan turan eenyufa’i?

¹⁵ Bara 1935 jalqabee, ‘hoolonni kan biraan’ lakkoofsisaanii baay’achaa dhufeefi miseensa kutaa “karra xinnayyoo” hin ta’in, bara baraan lafarra jiraachuuf abdii qaban dibamtoota wajjin tokko ta’anii hojjechuu jalqabaniiru. (Yohannis 10:16; Luqaas 12:32; Zakaariyaas 8:23) Namoonni kun obboloota Kiristos amanamummaadhaan deggeranii, ‘wangeela mootummaa’ saba hundumaaf lallabamurratti hirmaachuudhaan gargaarsa guddaa isaaniif godhaniiru. (Maatewos 24:14; 25:40) Kana gochuusaaniitiinis, yeroo Kiristos sabootarratti faraduuf dhufu ‘hoolotasaa’ ta’uudhaan namoota isa biratti fudhatama argachuudhaan “mirga isaa” dhaabatan keessaa tokko ta’u. (Maatewos 25:33-36, 46) Amantaa dhiiga Kiristosirratti qabaniin “rakkina guddaa keessaa” ooluudhaan kutaa “tuuta sonaan baay’ee” ta’u.—Mul’ata 7:9-14.

16. ‘Wanti lafarra jiru’ eenyufaa dabalata? Isaan kun hundinuu carraa “ijoollee Waaqayyoo” ta’uu kan argatan akkamitti?

¹⁶ Namoonni miseensota 144,000 ta’an, erga mallatteeffamanii raawwatamanii booda, ‘qilleensonni’ badiisaa sirna Seexanaa isa hamaa kanarratti gad dhiifamu. (Mul’ata 7:1-4) Yesus namoota moototaafi luboota ta’anii wajjin waggaa kuma tokkoof yeroo bulchu, namoonni du’aa kaafamaniifi lakkoofsisaanii hangana hin jedhamne tuuta sonaan baay’ee wajjin walitti makamu. (Mul’ata 20:12, 13) Isaan kunis, Mootummaa Masiihichaa isa Yesus Kiristosiin geggeeffamu jala bara baraaf lafarra jiraachuuf carraa argatu. Dhuma waggaa kuma tokkoorratti ‘wantoonni lafarra jiran’ hundinuu yeroo dhumaatiif qoramu. Namoonni qorumsicha amanamummaadhaan mo’an “ijoollee Waaqayyoo” warra lafarratti argaman ta’u.—Efesoon 1:10; Roomaa 8:21; Mul’ata 20:7, 8.

17. Kaayyoon Yihowaa raawwiisaa kan argatu akkamitti?

¹⁷ Yihowaan “bulchiinsa” tokkoon yookiin karaa itti wantoota raawwatuun fayyadamee kaayyoosaa isa ‘wanta bantii waaqaa keessa jiru, wanta lafa irra jiru, wanta hundumaas harka Kiristos jalatti walitti qabuuf’ baase kana galmaan ga’a. Ergamoonni samiirratti argamanis ta’e ilmaan namootaa hundi, Yihowaa isa kaayyoosaa galmaan ga’uufi bulchiinsasaa isa qajeelummaarratti hundaa’eef gammachuudhaan bitamuudhaan nagaa uumama cufaa jalatti walitti qabamu.

18. Dibamtoonnis ta’an namoonni hidhatasaanii ta’an kaan ayyaana Yaadannoorratti argamuusaaniitiin faayidaa maalii argatu?

¹⁸ Kiristiyaanonni dibamoon lakkoofsa muraasa qabanis ta’e hoolonni kan biraan hidhatasaanii ta’an ayyaana Yaadannoo Ebla 12, 2006 kabajamurratti argamuunsaanii amantaasaanii isaaniif jabeessa. Abboommii Yesus: “Kanas seenaa kootiif godhadhaa!” jedheef ajajamuudhaan ayyaana Yaadannoo du’a Kiristos kabaju. (Luqaas 22:19) Namoonni ayyaana Yaadannoorratti argaman hundi, qophii Yihowaan karaa tokkicha Ilmasaa isa jaallatamaa isaaniif godhe yaadachuu qabu.