Gaaffilee akkasii of gaafattee beektaa? Taanaan, gaaffii kana kan gaafatu si qofa miti. Namoonni addunyaa mara irra jiran gaaffilee gurguddaa jireenya keessatti isaan mudatan sammuu isaanii keessa deddeebiʼu. Gaaffilee kanaaf deebii argachuu ni dandeessaa?

Namoonni miliyonaan lakkaaʼaman, gaaffii kanaaf deebii “Eeyyee!” jedhu kennu. Maaliif? Gaaffii isaaniitiif Macaafa Qulqulluu keessaa deebii quubsaa waan argataniifi. Wanta Macaafni Qulqulluun barsiisu beekuu ni barbaaddaa? Taanaan, sagantaa Qayyabannaa Macaafa Qulqulluu Dhugaa Baatonni Yihowaa qopheessan irraa kaffaltii malee fayyadamuu ni dandeessa.a

Eeyyee, namoonni tokko tokko waaʼeen Macaafa Qulqulluu qayyabachuu yeroo kaʼu, “Yeroo hin qabu,” “Baayʼee ulfaataa dha” ykn “Dirqama wayii keessa galuu hin barbaadu” jedhu. Namoonni kaan garuu ilaalcha kana irraa adda taʼe qabu. Carraa wanta Macaafni Qulqulluu barsiisu barachuuf argatanitti ni fayyadamu. Fakkeenyota muraasa ilaali:

• “Waldaalee Kaatolikii fi Pirootestaantii, manneen sagadaa Siikii fi Budihaa deemeera, akkasumas yunivarsiitiitti tiʼooloojii (barumsa amantii) baradheera. Haa taʼu malee, Waaqayyoon ilaalchisee gaaffii ani qabu hedduun naaf hin deebine. Achiis, gaaf tokko Dhugaa Baatuun Yihowaa tokko mana koo dhufte. Deebiin isheen Macaafa Qulqulluu irraa naa kennite waan na gammachiiseef, Macaafa Qulqulluu qayyabachuufan walii gale.”—Giil, Ingilaandi.

• “Jireenya ilaalchisee gaaffii hedduun qaban ture; taʼus deebii paastariin waldaa keenyaa naa kenne na hin quufsine. Dhugaa Baatuun Yihowaa tokko garuu Macaafa Qulqulluutti fayyadamee gaaffii koo naa deebise. Wanta dabalataa barachuuf fedhii akka ani qabu yeroo na gaafatetti, afeerraa isaa nan fudhadhe.”—Kaffii, Beeniin.

• “Haala namoonni duʼan keessa jiran beekuuf fedhii guddaan qaban ture. Namoonni duʼan warra lubbuudhaan jiran miidhuu ni dandaʼu jedheen amana ture; taʼus wanta Macaafni Qulqulluun jedhu beekuun barbaade. Kanaaf, hiriyaa koo Dhugaa Baatuu taʼe tokkoo wajjin Macaafa Qulqulluu qayyabachuun jalqabe.”—Joosee, Biraaziil.

• “Macaafa Qulqulluu dubbisuuf yaalee kan ani ture taʼus, hubachuu hin dandeenye. Yeroo booda, Dhugaa Baatonni Yihowaa mana koo dhufanii, raajiiwwan Macaafa Qulqulluu keessa jiran hedduu sirriitti naa ibsan. Kanaaf, wanta dabalataa barachuun barbaade.”—Deeniiz, Meeksikoo.

• “Waaqayyo kan anaaf yaadu taʼuu isaa beekuu barbaadeen ture. Kanaaf, gara Waaqayyo isa Macaafa Qulqulluu keessatti ibsameetti kadhannaa dhiheessuufan murteesse. Guyyaa itti aanutti, Dhugaa Baatonni mana koo kan dhufan siʼa taʼu, afeerraa Macaafa Qulqulluu akkan qayyabadhuuf naa dhiheessan nan fudhadhe.”—Aanjuu, Neeppaal.

Muuxannoowwan kun yaada Yesuus, “Karaa hafuuraatti hiyyeessota warri taʼan haa gammadan” jechuudhaan dubbate nu yaadachiisu. (Maatewos 5:3) Eeyyee, ilmaan namootaa uumamaan fedhii hafuuraa qabu. Fedhii isaanii kana guutuufii kan dandaʼu Waaqayyo qofa siʼa taʼu, akkas kan godhus karaa Macaafa Qulqulluu ti.

Qayyabannaan Macaafa Qulqulluu maalfaa dabalata? Si fayyaduu kan dandaʼu akkamitti? Gaaffileen kun mata duree itti aanu keessatti deebii argatu.

Dhugaa Baatonni Yihowaa namootaaf lallabuudhaan beekamu. Haa taʼu malee, sagantaa qayyabannaa Macaafa Qulqulluu addunyaa maratti geggeeffamu akka qabnu beektaa?

Bara 2014⁠tti, Dhugaa Baatonni 8,000,000 ol taʼanii fi biyyoota 240 keessa jiran jiʼa jiʼaan namoota gara 9,500,000 taʼan Macaafa Qulqulluu qayyabsiisaniiru.a Baayʼinni namoota nuu wajjin Macaafa Qulqulluu qayyabatanii baayʼina uummataa biyyoonni 140 taʼan dhuunfaatti qaban ni caala!

Dhugaa Baatonni Yihowaa hojii barsiisuu kana raawwachuuf waggaa waggaatti gara afaan 700tiin Macaafa Qulqulluu, kitaabota, barruulee fi barreeffamoota Macaafa Qulqulluu qayyabachuuf gargaaran gara biliyoona tokkoo fi walakkaa maxxansu! Carraaqqiin guddaan taasifame kun namoonni afaan barbaadaniin Macaafa Qulqulluu akka qayyabatan gargaara.

DEEBII GAAFFILEE SAGANTAA QAYYABANNAA MACAAFA QULQULLUU KEENYA ILAALCHISEE YEROO HEDDUU GAAFATAMANIIF KENNAME

Qayyabannaan kun haala akkamiitiin geggeeffama?

Yaada Macaafa Qulqulluu garaa garaa kaasnee, caqasoota dhimmichaa wajjin wal qabatan qorra. Fakkeenyaaf, Macaafni Qulqulluun gaaffii akka armaan gadiitiif deebii kenna: Waaqayyo eenyu dha? Qaama akkamii qaba? Maqaa qabaa? Eessa jiraata? Isatti dhihaachuu ni dandeenyaa? Haalli isaa ulfaataa akka taʼu kan godhu, deebiin gaaffilee kanaa Macaafa Qulqulluu irraa eessatti akka argamu beekuu dadhabuu dha.

Namoonni gaaffilee kanaaf deebii akka argatan gargaaruuf, Kitaaba fuula 224 qabuu fi Macaafni Qulqulluun Maal Barsiisa?b jedhamutti fayyadamna. Kitaabni kun namoonni barumsa buʼuuraa Macaafa Qulqulluu akka hubatan gargaaruuf qophaaʼe. Kutaalee waaʼee Waaqayyoo, Yesus Kiristos, rakkina ilmaan namootaa, duʼaa kaʼuu, kadhannaa fi mata dureewwan kan biraa hedduu ibsan qabateera.

Qayyabannaan kun yoomii fi eessatti geggeeffamuu dandaʼa?

Qayyabannaan kun saʼaatii fi iddoo sii mijatutti geggeeffamuu dandaʼa.

Qayyabannaan yeroo tokkoo saʼaatii hammamii fudhata?

Namoonni baayʼeen Macaafa Qulqulluu qayyabachuudhaaf torbanitti saʼaatii tokko ykn isaa ol ramadu. Haa taʼu malee, dheerinni saʼaatii isaa akka haala isaatti kan jijijjiiramu dha. Sagantaa keetiif haala taʼuun sii mijeessina. Namoonni tokko tokko torbanitti daqiiqaa 10 ykn 15f qofa qayyabatu.

Qayyabannichi kaffaltii qabaa?

Barumsichis taʼe barreeffamoonni ittiin qayyabsiisnu kaffaltii malee kennamu. Kunis qajeelfama Yesus, “Gatii utuu itti hin baasin fudhattan, isinis gatii utuu itti hin baasisin kennaa!” jechuudhaan bartoota isaatiif kennee wajjin wal sima.—Maatewos 10:8.

Guutummaan qayyabannaa kanaa yeroo hammamiitiif tura?

Yeroon qayyabannaan kun fudhatu haala kee irratti kan hundaaʼe dha. Kitaabni Macaafni Qulqulluun Maal Barsiisa? jedhamu boqonnaa 19 qaba. Boqonnaa filatte qofa ykn guutummaa isaa saffisa barbaaddeen qayyabachuu dandeessa.

Yeroon xumuru Dhugaa Baatuu Yihowaa taʼuun qabaa?

Lakki. Namni hundi wanta itti amanu filachuuf mirga akka qabu sirriitti beekna. Haa taʼu malee, namoonni beekumsa buʼuuraa Macaafa Qulqulluu irraa argatan irratti hundaaʼanii, murtoo barbaadan gochuu dandaʼu.

Odeeffannoo dabalataa eessaan argachuu dandaʼa?

Weebsaayitiin jw.org jedhamu, wanta Dhugaa Baatonni Yihowaa itti amananii fi hojiiwwan isaan hojjetan ilaalchisee odeeffannoo sirrii kenna.

Macaafa Qulqulluu akka na qayyabsiisan gaafachuu kanan dandaʼu akkamitti?

• ● Unka www.jw.org/om irra jiru guutii ergi.

• Teessoo fuula lammaffaa barruu kanaa irra jiru keessaa isa sitti dhihaatutti barreessi.

• Dhugaa Baatota Yihowaa naannoo kee jiran haasofsiisi.