MATA DUREE FUULA JALQABAA | MACAAFA QULQULLUU QAYYABACHUU NI BARBAADDAA?

Sagantaa Qayyabannaa Macaafa Qulqulluu Namoota Hundaaf

Dhugaa Baatonni Yihowaa namootaaf lallabuudhaan beekamu. Haa taʼu malee, sagantaa qayyabannaa Macaafa Qulqulluu addunyaa maratti geggeeffamu akka qabnu beektaa?

Nama bakka hojii isaatti Macaafa Qulqulluu qayyabachaa jiru

Bara 2014⁠tti, Dhugaa Baatonni 8,000,000 ol taʼanii fi biyyoota 240 keessa jiran jiʼa jiʼaan namoota gara 9,500,000 taʼan Macaafa Qulqulluu qayyabsiisaniiru.a Baayʼinni namoota nuu wajjin Macaafa Qulqulluu qayyabatanii baayʼina uummataa biyyoonni 140 taʼan dhuunfaatti qaban ni caala!

Dhugaa Baatonni Yihowaa hojii barsiisuu kana raawwachuuf waggaa waggaatti gara afaan 700tiin Macaafa Qulqulluu, kitaabota, barruulee fi barreeffamoota Macaafa Qulqulluu qayyabachuuf gargaaran gara biliyoona tokkoo fi walakkaa maxxansu! Carraaqqiin guddaan taasifame kun namoonni afaan barbaadaniin Macaafa Qulqulluu akka qayyabatan gargaara.

“Mana barumsaa yeroon turetti qayyabachuu hin jaalladhun ture; qayyabannaan kun garuu baayʼee namatti tola. Wantoonni ani baradhe immoo kan nama jajjabeessani dha!”—Kaatlegoo, Afriikaa Kibbaa.

“Barumsichi gaaffilee koo hundaaf deebii naa kenneera; barumsa hedduus irraa argadheera.”—Beertaa, Meeksikoo.

“Macaafa Qulqulluu kan na qayyabsiisan mana kootti, saʼaatii naa mijatutti ture. Kana caalaa maalan barbaada ree!” —Iiziikiʼeel, Biraaziil.

“Qayyabannaan kun yeroo tokko tokko daqiiqaa 15 hanga 30, yeroo kaan immoo isaa ol fudhata ture. Akkuma naaf taʼutti mijeeffama ture.”—Viiniyaanaa, Awustiraaliyaa.

“Kanan qayyabadhe kaffaltii malee ti. Baayʼee nama ajaaʼibsiisa!”—Eemii, Beeniin.

“Barsiistuun Macaafa Qulqulluu koo obsa qabeettii fi nama gaarii turte. Baayʼee walitti dhihaannee turre.”—Kaaren, Aayerlaandi Kaabaa.

“Namoonni hedduun Dhugaa Baatuu taʼuun utuu isaan irraa hin eegamin Macaafa Qulqulluu qayyabatu.” —Deentan, Ingilaandi.

DEEBII GAAFFILEE SAGANTAA QAYYABANNAA MACAAFA QULQULLUU KEENYA ILAALCHISEE YEROO HEDDUU GAAFATAMANIIF KENNAME

Qayyabannaan kun haala akkamiitiin geggeeffama?

Yaada Macaafa Qulqulluu garaa garaa kaasnee, caqasoota dhimmichaa wajjin wal qabatan qorra. Fakkeenyaaf, Macaafni Qulqulluun gaaffii akka armaan gadiitiif deebii kenna: Waaqayyo eenyu dha? Qaama akkamii qaba? Maqaa qabaa? Eessa jiraata? Isatti dhihaachuu ni dandeenyaa? Haalli isaa ulfaataa akka taʼu kan godhu, deebiin gaaffilee kanaa Macaafa Qulqulluu irraa eessatti akka argamu beekuu dadhabuu dha.

Namoonni gaaffilee kanaaf deebii akka argatan gargaaruuf, Kitaaba fuula 224 qabuu fi Macaafni Qulqulluun Maal Barsiisa?b jedhamutti fayyadamna. Kitaabni kun namoonni barumsa buʼuuraa Macaafa Qulqulluu akka hubatan gargaaruuf qophaaʼe. Kutaalee waaʼee Waaqayyoo, Yesus Kiristos, rakkina ilmaan namootaa, duʼaa kaʼuu, kadhannaa fi mata dureewwan kan biraa hedduu ibsan qabateera.

Qayyabannaan kun yoomii fi eessatti geggeeffamuu dandaʼa?

Qayyabannaan kun saʼaatii fi iddoo sii mijatutti geggeeffamuu dandaʼa.

Qayyabannaan yeroo tokkoo saʼaatii hammamii fudhata?

Namoonni baayʼeen Macaafa Qulqulluu qayyabachuudhaaf torbanitti saʼaatii tokko ykn isaa ol ramadu. Haa taʼu malee, dheerinni saʼaatii isaa akka haala isaatti kan jijijjiiramu dha. Sagantaa keetiif haala taʼuun sii mijeessina. Namoonni tokko tokko torbanitti daqiiqaa 10 ykn 15f qofa qayyabatu.

Qayyabannichi kaffaltii qabaa?

Barumsichis taʼe barreeffamoonni ittiin qayyabsiisnu kaffaltii malee kennamu. Kunis qajeelfama Yesus, “Gatii utuu itti hin baasin fudhattan, isinis gatii utuu itti hin baasisin kennaa!” jechuudhaan bartoota isaatiif kennee wajjin wal sima.—Maatewos 10:8.

Guutummaan qayyabannaa kanaa yeroo hammamiitiif tura?

Yeroon qayyabannaan kun fudhatu haala kee irratti kan hundaaʼe dha. Kitaabni Macaafni Qulqulluun Maal Barsiisa? jedhamu boqonnaa 19 qaba. Boqonnaa filatte qofa ykn guutummaa isaa saffisa barbaaddeen qayyabachuu dandeessa.

Yeroon xumuru Dhugaa Baatuu Yihowaa taʼuun qabaa?

Lakki. Namni hundi wanta itti amanu filachuuf mirga akka qabu sirriitti beekna. Haa taʼu malee, namoonni beekumsa buʼuuraa Macaafa Qulqulluu irraa argatan irratti hundaaʼanii, murtoo barbaadan gochuu dandaʼu.

Odeeffannoo dabalataa eessaan argachuu dandaʼa?

Weebsaayitiin jw.org jedhamu, wanta Dhugaa Baatonni Yihowaa itti amananii fi hojiiwwan isaan hojjetan ilaalchisee odeeffannoo sirrii kenna.

Macaafa Qulqulluu akka na qayyabsiisan gaafachuu kanan dandaʼu akkamitti?

Namoota intarneetii, xalayaa, akkasumas kitaaba lakkoofsi bilbila uummataa irratti tarreeffametti fayyadamuudhaan Macaafa Qulqulluu qayyabachuuf gaafachaa jiran

● Unka www.jw.org/om irra jiru guutii ergi.
Teessoo fuula lammaffaa barruu kanaa irra jiru keessaa isa sitti dhihaatutti barreessi.
Dhugaa Baatota Yihowaa naannoo kee jiran haasofsiisi.

a Macaafa Qulqulluu nama tokko dhuunfaatti ykn namoota muraasa wal faana ni qayyabsiisna.

b Dhugaa Baatota Yihowaatiin kan qophaaʼe. Afaan 260 oliin koppiin miliyoona 230 ol maxxanfameera.

MAATIIWWAN NI GARGAARA

“Haati manaa koo Macaafa Qulqulluu qayyabachuu yeroo jalqabdetti jijjiirama guddaan ishee irratti arge. Jireenyi maatii keenyaa ni fooyyaʼe. Wanta isheen barachaa jirtu beekuu waan ani barbaadeef, anis qayyabachuun jalqabe. Wanti ani baradhe nama gaarii akkan taʼu na gargaareera. Macaafa Qulqulluu qayyabachuun keenya Maatiin keenya akka walitti dhihaatu taasiseera.”—Iiziikiʼeel.

“Macaafa Qulqulluu qayyabachuu ergan jalqabee booda, araada qoricha nama hadoochu fudhachuu nan moʼe, alkoolii garmalee dhuguus nan dhiise; aarii koo toʼachuus nan bare. Manni koo qulqulluu fi seeraan kan qabame dha. Maatii kootiif isa duraa caalaa iddoo guddaa kanan kennu siʼa taʼu, wanta isaan gammachiisu gochuun natti tola. Amma gammachuu guddaan qaba.”—Kaaren.

“Namoonni tokko tokko Macaafa Qulqulluu qayyabachuu kootti na mormanii turan. Abbaan manaa koo garuu murtoo koo kan deggere siʼa taʼu, ‘Wanti namoonni jedhan na hin yaaddessu. Wanti ani barbaadu yeroo ati jijjiirama gaarii gootu arguu dha. Wanta gochaa jirtu ittuma fufi’ naan jedhe. Jireenyi maatii keenyaa akka ammaa gaarii taʼee hin beeku!”—Viiniyaanaa.