Mootummaan Waaqayyoo Maalidha?

MACAAFNI QULQULLUUN MAAL JEDHA?

“Waaqayyo inni waaqa irraa mootummaa deebiʼee matumaa hin badne . . . dhaabuuf jira.”—Daaniʼel 2:44.

‘Ilmi nuuf kennameera; humni mootummaasaa gatiittiisaarra jira.’—Isaayaas 9:6.

KANA BEEKUUN FAAYIDAA AKKAMII SIIF ARGAMSIISA?

• Bulchiinsa qajeelaa kanarraa dhuunfaatti faayidaa argachuu dandeessa.—Isaayaas 48:17, 18.

• Addunyaa haaraa keessatti, fayyaa guutuufi gammachuu argatta.—Mulʼata 21:3, 4.

WANTA MACAAFNI QULQULLUUN JEDHU AMANUU NI DANDEENYAA?

Eeyyee, yoo xinnaate sababii lamaan kan kaʼe amanuu dandeenya:

• Yesus wanta Mootummaan Waaqayyoo raawwatu argisiiseera. Yesus duuka buutonnisaa Mootummaan Waaqayyoo akka dhufuufi fedhisaa lafarratti akka raawwatamu akka kadhatan barsiiseera. (Maatewos 6:9, 10) Yesus yommuu kadhannaan kun deebii argatu haalli akkamii akka jiraatu argisiiseera.

  Yesus yeroo lafarra ture warra beelaʼan nyaachiseera, warra dhukkubsatan fayyiseera, akkasumas warra duʼan kaaseera! (Maatewos 15:29-38; Yohannis 11:38-44) Yesus yommuu Bulchaa Mootummaa Waaqayyoo taʼu, wantoota gaarii Mootummichi namoota isa jalatti bulaniif godhu argisiiseera.—Mulʼata 11:15.

• Haalli addunyaa kanarratti mulʼachaa jiru Mootummaan Waaqayyoo dhiheenyatti akka dhufu mirkaneessa. Mootummichi lafa kanarratti nagaa fiduusaa dura, addunyaan kun waraana, beelaafi sochoʼa lafaatiin akka hunkuramtu Yesus, dursee raajii dubbateera.—Maatewos 24:3, 7.

  Yeroo ammaa wantoonni kun yommuu raawwataman argaa jirra. Kanaaf, Mootummaan Waaqayyoo dhiheenyatti rakkoowwan kana hunda akka hambisu mirkanaaʼoo taʼuu dandeenya.