Dubartoonni kun bakka awwaalaa duwwaa taʼe yommuu argan baayʼee naʼanii taʼuu qaba! Maariyaam Magdalaan, gara “Simoon Pheexirosii fi barataa kan biraa isa Yesuus jaallatu[utti]” fiigde. Barataan kun Yohaannis ergamaa dha. (Yohaannis 20:2) Taʼus, dubartoonni gara biraan bakka awwaalaa kana jiran maleekaa tokko argan. Bakka awwaalaa kana keessa immoo maleekaa “uffata adii uffate” gara biraatu jira.—Maarqos 16:5.

Ergamaan inni tokko akkana isaaniin jedhe: “Hin sodaatinaa, Yesuus isa muka irratti fannifamee ture sana barbaadaa akka jirtan ani beeka. Inni akkuma jedhee ture duʼaa waan kaʼeef amma as hin jiru. Kottaa, bakka reeffi isaa kaaʼamee ture iyyuu ilaalaa. Kanaaf dafaa dhaqaatii, ‘Inni duʼaa kaʼeera, isin dursee gara Galiilaa ni dhaqa, isin achitti isa ni argitu’ jedhaa barattoota isaatti himaa.” (Maatewos 28:5-7) Kanaaf, dubartoonni kun “hollachaa fi ajaaʼibsiifachaa” barattootatti himuuf fiigaa deeman.—Maarqos 16:8.

Amma Maariyaam, Pheexirosii fi Yohaannisiin argite. Arganaa, “Gooftaa awwaalcha keessaa fudhataniiru; eessa akka isa kaaʼanis hin beeknu” isaaniin jette. (Yohaannis 20:2) Pheexirosii fi Yohaannis fiiguu jalqaban. Yohaannis Pheexiros caalaa saffisa waan qabuuf dursee bakka awwaalichaa gaʼe. Gad jedhee achi keessa yommuu ilaalu kafana qofa arge; garuu keessa hin seenne.

Pheexiros akkuma achi gaʼeen awwaalicha keessa seene. Uffata quncee talbaa irraa hojjetamee fi huccuu mataa Yesuusitti maramee ture arge. Yohaannisis bakka awwaalichaatti ol seenee erga ilaalee booda wanta Maariyaam dubbatte amane. Yesuus kanaan dura isaanitti himee kan ture taʼus, isaan keessaa namni akka inni duʼaa kaʼe hubate hin jiru. (Maatewos 16:21) Wanti taʼe kun dalga isaanitti taʼaa gara manaatti deebiʼan. Maariyaam ishiin bakka awwaalaatti deebite garuu achumatti hafte.

Yeroo kanatti, dubartoonni kaan Yesuus duʼaa akka kaafame barattootatti himuuf deemaa jiru. Utuu isaan fiigaa jiraniis Yesuus isaanitti dhufee, “Nagaan isiniif haa taʼu!” jedhe. Isaanis miilla isaa irratti kufanii “isaaf sagadan.” Achiis Yesuus, “Hin sodaatinaa! Gara Galiilaa dhaqanii achitti akka na argan obboloota kootti himaa” isaaniin jedhe.—Maatewos 28:9, 10.

Yeroo kirkirri lafaa taʼee fi maleekonni mulʼatanitti loltoonni bakka awwaalichaa turan ‘hollatanii akka nama duʼee taʼanii’ turan. Erga of baranii booda gara magaalaa dhaqanii “wanta taʼe hunda dura buutota lubootaatti himan.” Luboonnis maanguddoota Yihudootaa wajjin dhimmicha irratti mariʼatan. Achiis wanta taʼe dhoksuuf loltoota kanaaf mattaʼaa kennuudhaan, “Barattoonni isaa halkan dhufanii utuu nuti rafaa jirruu reeffa isaa hatan” jedhanii akka dubbatan gochuuf murteessan.—Maatewos 28:4, 11, 13.

Loltoonni Roomaa hojii isaanii irra utuu jiranii yoo rafan ajjeefamuu dandaʼu. Kanaaf luboonni akkana jedhanii waadaa galan: “Wanti kun [sobni waaʼee rafuu isaanii dubbatamu] gurra bulchaa biyyaa yoo buʼe, nuti dhimma kana isaaf ni ibsina; isin hin yaaddaʼinaa.” (Maatewos 28:14) Loltoonni kun mattaʼaa fudhatanii wanta luboonni jedhan raawwatan. Kanaaf, sobni reeffi Yesuus akka hatame odeeffamu Yihudoota gidduutti babalʼate.

Maariyaam Magdalaan amma iyyuu bakka awwaalichaatti gaddaa jirti. Gad jedhee awwaalicha keessa yommuu ilaaltu maleekota uffata adii uffatan lama argite! Maleekaan inni tokko bakka reeffi Yesuus kaaʼamee ture karaa mataa isaa, inni tokko immoo karaa miilla isaa taaʼaniiru. Maleekonni kun, “Dubartii nana maaliif boossa?” jedhaniin. Maariyaam, “Gooftaa koo fudhataniiru; eessa akka isa kaaʼanis hin beeku” isaaniin jette. Maariyaam duubatti yommuu garagaltu nama tokko argite. Innis gaaffii maleekonni kun gaafatanii turan erga ishii gaafatee booda, “Eenyuun barbaadda?” jedheen. Ishiinis nama ashaakiltii kunuunsu waan ishiitti fakkaateef, “Yaa gooftaa, situ fudhate yoo taʼe, ani akkan isa fudhadhuuf eessa akka isa keesse natti himi” jetteen.—Yohaannis 20:13-15.

Maariyaam haasofsiisaa kan jirtu Yesuus isa duʼaa kaafame taʼus, yeroo kanatti isa hin beekne. Yommuu inni “Maariyaam!” jedhee ishii waamu garuu Yesuus taʼuu isaa barte. Isa baruu kan dandeesses akkaataa kanaan dura ittiin ishii waamuun waan ishii waameefi dha. Maariyaam gammachuudhaan “Raaboonii!” (hiikni isaa “Barsiisaa!” jechuu dha) jetteen. Maariyaam, Yesuus gara samiitti ol baʼa jettee waan sodaatteef isa qabde. Kanaaf, Yesuus akkana ishiidhaan jedhe: “Ani amma iyyuu gara Abbaatti waanan ol hin baaneef, jabeessitee na hin qabin. Kanaa mannaa dhaqiitii obboloota kootiin, ‘Ani gara Abbaa koo fi gara Abbaa keessanitti, gara Waaqa koo fi gara Waaqa keessanitti ol nan baʼa’ jedhii isaanitti himi.”—Yohaannis 20:16, 17.

Maariyaam bakka ergamoonnii fi barattoonni walitti qabamanii jiranitti fiigde. Achiis, “Ani Gooftaa argeera!” isaaniin jette. Wanta kana dubartoota warra kaan irraas dhagaʼanii turan. (Yohaannis 20:18) Taʼus, wanti isaan dhagaʼan kun ‘oduu faayidaa hin qabne isaanitti fakkaate.’—Luqaas 24:11.

Guyyaan isaa Dilbata, Niisaan 16 dha; barattoonni baayʼee gaddaniiru. Awwaalichi duwwaa kan taʼe maaliif akka taʼe hubachuu hin dandeenye. (Maatewos 28:9, 10; Luqaas 24:11) Guyyuma kana xinnoo turee, Qalayophaa fi barataan tokko Yerusaalemii gara Emaahus ishii naannoo kiiloo meetira 11 fagaattuu deemuu jalqaban.

Yeroo kanatti waaʼee wanta raawwatame kanaa waliin dudubbachaa deemu. Achiis namni isaan hin beekneen tokko isaanii wajjin deemuu jalqabe. Namichis, “Wanti isin waliin dudubbachaa deemtan kun maali dha?” jedhee isaan gaafate. Qalayophaan akkana jedheen: “Ati keessummaa taatee kophaa kee Yerusaalem keessa jiraachaa jirtaa? Wantoota yeroo kanatti magaalattii keessatti taʼan hin beektu jechuu dhaa?” Namichis, “Wantoota akkamii?” jedhee gaafate.—Luqaas 24:17-19.

Isaanis, “Waaʼee Yesuus nama Naazireet sanaa ti kaa; . . . namichi kun Israaʼeliin bilisa baasa jennee abdannee turre” jedhaniin.—Luqaas 24:19-21.

Qalayophaa fi michuun isaa wanta raawwatame namichatti himuu isaanii itti fufan. Dubartoonni tokko tokko bakka reeffi Yesuus itti awwaalame dhaqanii iddoo awwaalaa duwwaa fi wantoota dinqisiisoo taʼan akka argan jechuunis, maleekonni isaanitti mulʼatanii Yesuus duʼaa kaʼuu isaa dubartoota sanatti akka himan isatti dubbatan. Achiis namoonni kaan gara awwaalichaa akka dhaqanii fi isaanis “akkuma dubartoonni sun jedhan taʼee [akka] argatan” isaaf ibsan.—Luqaas 24:24.

Barattoonni kun wanta kana hubachuun akka isaan rakkise ifa dha. Namichi isaanii wajjin jiru, ilaalcha dogoggoraa akka isaan gaddan taasise fuulleetti sirreessuudhaan akkana jedheen: “Isin warra hubannaa hin qabnee fi garaan keessan wanta raajonni dubbatan hunda dafee hin hubanne nana! Kiristoos dhiphinni kun hundi irra gaʼuu fi gara ulfina isaatti galuun isaa sirrii mitii?” (Luqaas 24:25, 26) Kiristoosiin ilaalchisees wantoota Kitaabota Qulqulluu keessatti dubbataman hedduu isaaniif ibse.

Dhuma irrattis sadanuu Emaahusitti dhihaatan. Barattoonni lamaan caalaatti isa dhaggeeffachuu waan barbaadaniif, “Amma dhihuu jala waan gaʼee fi aduunis lixuu jala waan geesseef nu bira buli” jedhanii isa kadhatan. Innis isaan bira buluuf walii gale; achiis maaddiitti dhihaatan. Isa baruu kan dandaʼan, erga inni kadhannaa dhiheessee, daabboo caccabsee isaaniif kennee booda dha; inni garuu isaan jalaa dhokate. (Luqaas 24:29-31) Amma Yesuus duʼaa akka kaʼe mirkanaaʼoo taʼaniiru!

Barattoonni lamaan wanta karaa irratti isaan mudate akkana jedhanii dubbatan: “Yommuu inni karaa irratti nutti dubbachaa fi Kitaabota Qulqulluu akka gaariitti nuu ibsaa ture sanatti garaan keenya nu keessatti gubachaa hin turree?” (Luqaas 24:32) Yeruma sana gara Yerusaalemitti kan deebiʼan siʼa taʼu, achittis ergamoonnii fi barattoonni walitti qabamanii argatan. Qalayophaa fi michuun isaa wanta raawwatame dubbachuu isaanii dura, warri kaan, “Gooftaan dhuguma kaʼeera, Simoonittis mulʼateera!” jedhanii utuu dubbatanii dhagaʼan. (Luqaas 24:34) Achiis, lamaan isaanii Yesuus akkamitti akka isaanitti mulʼate dubbatan. Eeyyee, isaanis Yesuusiin arganiiru.

Yeroo kanatti, Yesuus kutaa isaan jiran keessatti yommuu isaanitti mulʼatu hundi isaanii baayʼee naʼan! Yihudoota sodaachuudhaan balbala akka gaariitti cufanii waan turaniif, kana amanuun isaan rakkise. Yesuus amma iyyuu gidduu isaanii dhaabateera. Achiis, “Nagaan isiniif haa taʼu” isaaniin jedhe. Isaan garuu ni naʼan. Akkuma yeroo taʼe tokko isaanitti dhagaʼamee ture, “uumama hafuuraa kan argan isaanitti fakkaate.”—Luqaas 24:36, 37; Maatewos 14:25-27.

Yesuus hafuura ykn qaama yaadaan uumame utuu hin taʼin, dhugumaan isa akka taʼe mirkaneessuuf harkaa fi miilla isaa isaanitti argisiisee akkana jedheen: “Maaliif sodaattu? Shakkiinis maaliif garaa keessan keessatti uumama? Ana mataa koo akkan taʼe harka koo fi miilla koo ilaalaa; qaqqabaatii na ilaalaa, sababiin isaas akkuma ana irratti argitan kana uumamni hafuuraa foonii fi lafee hin qabu.” (Luqaas 24:36-39) Gammachuu fi dinqisiifannaadhaan kan guutaman taʼus amma iyyuu hin amanne.

Inni dhuguma Yesuus taʼuu isaa akka hubatan isaan gargaaruuf, “Wanta nyaatamu qabduu?” jedhee isaan gaafate. Qurxummii waadamaa tokko isaaf kennan, innis ni nyaate. Achiis akkana jedhe: “Inni ani yommuun isinii wajjin turetti [duʼuu koo dura] wantoonni Seera Musee, Raajotaa fi Faarfannaa keessatti waaʼee koo dubbataman hundi raawwatamuu qabu jedhee dubbadhe kana dha.”—Luqaas 24:41-44.

Yesuus, Qalayophaa fi michuun isaa Kitaabota Qulqulluu akka hubatan akkuma gargaare, amma immoo warra walitti qabamanii jiran hunda gargaare. Akkana jedhe: “Akkana jedhamee barreeffameera: Kiristoos ni dhiphata, guyyaa sadaffaattis warra duʼan gidduudhaa ni kaʼa; maqaa isaatiinis yaada geddarachuun inni dhiifama cubbuu argamsiisu Yerusaalemii jalqabee saboota hundumaa keessatti ni lallabama. Isinis wantoota kanaaf dhugaa baatota ni taatu.”—Luqaas 24:46-48.

Sababiin isaa beekamuu baatus Toomaas ergamaan isaanii wajjin hin jiru. Guyyoota itti aananitti warri kaan gammachuudhaan, “Nuti Gooftaa argineerra!” jedhanii isatti himan. Toomaas garuu akkana jedhe: “Harka isaa bakka mismaarri itti rukutame yoon arge, quba koos bakka mismaarri itti rukutame sanatti yoon galche, harka koos cinaacha isaa keessa yoon galche malee ani matumaa hin amanu.”—Yohaannis 20:25.

Guyyaa saddeet booda ammas barattoonni balbala akka gaariitti cufame keessatti kan walitti qabaman siʼa taʼu, yeroo kanatti garuu Toomaas isaanii wajjin jira. Yesuus qaamaan isaan gidduutti argamee, “Nagaan isiniif haa taʼu” jedheen. Achiis Toomaasiin ilaalaa, “Quba kee as keessa galchi, harka koo ilaali; harka kees fidii cinaacha koo keessa galchi; amani malee hin mamin” jedhe. Toomaasis, “Gooftaa ko, Waaqa ko!” jedheen. (Yohaannis 20:26-28) Toomaas amma Yesuus qaama hafuuraa taʼee duʼaa akka kaʼee fi bakka buʼaa Yihowaa akka taʼe mirkanaaʼaa taʼeera.

Yesuus, “Ati waan ana argiteef amantee? Warri utuu hin argin amanan gammadoo dha” jedheen.—Yohaannis 20:29.