MATA DUREE FUULA JALQABAA
Barsiifata Kee Toʼachuu kan Dandeessu Akkamitti?
OSTIIN yommuu saʼaatiin isaa iyyu hirriba keessa ture. Haa taʼu malee yeruma sana siree isaa irraa kaʼee, uffata ispoortii galgala qopheeffate uffatee, akkuma waggaa darbe torbanitti al sadii gochaa ture sochii qaamaa salphaa taʼe gochuuf deeme.
Looreen abbaa manaa ishii wajjin wal lolteetti. Aarii fi abdii kutachuudhaan gara kushinaatti fiigdee chokoleetii laastikii tokko guutuu fudhattee akkuma kanaan dura yeroo aartu gochaa turtetti hunda isaa nyaatte.
Ostiinii fi Looree wanti wal isaan fakkeessu maali dha? Beekanis beekuu baatanis lamaan isaanii iyyuu humni guddaan tokko, jechuunis barsiifanni dhiibbaa isaan irratti godheera.
Ati hoo? Jireenya kee keessatti barsiifanni gaariin guddifachuu barbaaddu jiraa? Tarii sochii qaamaa yeroo hunda gochuuf, hirriba gaʼaa rafuuf ykn namoota jaallattu yeroo yeroodhaan gaafachuuf galma baafatteetta taʼa.
Karaa gara biraa immoo barsiifata gadhee kan akka tamboo xuuxuu, nyaata faayidaa hin qabne hedduu nyaachuu ykn Intarneetii sakattaʼuudhaan saʼaatii hedduu dabarsuu dhiisuu barbaadda taʼa.
Barsiifata gadhee moʼuun ulfaataa taʼuu akka dandaʼu beekamaa dha. Barsiifanni gadheen siree guyyaa qorraa taʼetti namatti hoʼuu wajjin wal fakkaata jedhama. Siree akkanaa keessa galuun salphaa siʼa taʼu, achi keessaa baʼuun garuu ulfaataa dha!
Kanaafuu, barsiifata kee toʼachuu fi barsiifatawwan kun akka si miidhan utuu hin taʼin, akka si fayyadan gochuu kan dandeessuu akkamitti? Yaadawwan qajeelfama Kitaaba Qulqulluu irratti hundaaʼan armaan gadii sadii ilaali.