Michoomakee Eeguuf, Michuu Gaarii Taʼuu Qabda

Michoomni jaalalarratti kan hundaaʼedha. Waaʼee Yihowaa barachaa yommuu adeemtu, jaalalli isaaf qabdu guddachaa adeema. Jaalalli Waaqayyoof qabdu yommuu guddatummoo, fedhiin isa tajaajiluuf qabdus ni guddata. Kunimmoo duuka buutuu Yesus Kiristos akka taatu si kakaasa. (Maatewos 28:19) Dhugaa Baatota Yihowaa keessaa tokko taʼuudhaan, barabaraaf michuu Waaqayyoo taʼuu dandeessa. Haataʼu malee, Dhugaa Baatuu Yihowaa taʼuuf maal gochuu qabda?

Seerasaa eeguudhaan Waaqayyoon akka jaallattu argisiisi. “Waaqayyoon jaallachuu jechuunis abboommota isaa eeguu dha; abboommonni isaa immoo baʼaa ulfaatoo miti.”—1 Yohannis 5:3.

Wanta baratte hojiirra oolchi. Yesus, seenaa kana gochuun barbaachiisaa akka taʼe ibsu dubbateera. Namni ogeessi tokko manasaa dhagaarratti ijaarrate. Namni gowwaan tokkommoo cirracharratti ijaarrate. Yommuu bokkaa cimaan roobu, manni dhagaarratti ijaarame utuu hin jigin kan hafe siʼa taʼu, inni cirracharratti ijaarame garuu ni jige. Yesus, namni dubbiisaa dhagaʼee hojiirra oolchu, nama ogeessa manasaa dhagaarratti ijaarratee wajjin akka wal fakkaatu dubbateera. Namni dubbiisaa dhagaʼee hojiirra hin oolchine garuu, nama gowwaa manasaa cirracharratti ijaarrate fakkaata. Atoo namicha isa kam fakkaachuu barbaadda?—Maatewos 7:24-27.

Of murteessuu. Kana jechuun kadhannaadhaan Yihowaatti dhihaattee, barabaraaf fedhasaa raawwachuu akka barbaaddu itti himta jechuudha. Fedha Waaqayyoo raawwachuunkee duuka buutuu Yesus Kiristos taʼuukee argisiisa.—Maatewos 11:29.

Cuuphaa. “Maqaa gooftaa waammadhuu cuuphami! Cubbuu kees of irraa dhiqsiisi!”—Hojii Ergamootaa 22:16.

Garaa guutuudhaan Waaqayyoon tajaajili. “Waanuma gootan hundumaa namaaf utuu hin taʼin akka waan gooftaadhaaf hojjettaniitti garaa guutuudhaan hojjedhaa!”—Qolosaayis 3:23.