2 Самуилы
кӕнӕ, грекъаг Септуагинтӕмӕ гӕсгӕ, ПАДДЗАХӔДТЫ ДЫККАГ ЧИНЫГ
1 Саул куы амард ӕмӕ Давид амаликӕгты+ куы ныццагъта, уӕд Давид Секелагмӕ+ ӕрбаздӕхт ӕмӕ дзы дыууӕ боны фӕци. 2 Ӕртыккаг бон, Саулы ӕфсад кӕм уыдысты, уырдыгӕй ӕрбацыд иу адӕймаг+, йӕ уӕлӕдарӕс ӕрыскъуыдта+ ӕмӕ йӕ сӕрыл сыджыт байзӕрста+, афтӕмӕй. Давидмӕ куы бацыд, уӕд зӕххыл ӕрхауд+ ӕмӕ йын йӕ сӕрӕй ныллӕг акуывта.
3 Давид ӕй бафарста: «Кӕцӕй ӕрбацыдтӕ?» Ӕмӕ йын уый дзуапп радта: «Израилы ӕфсадӕй ралыгътӕн». 4 Давид ын загъта: «Дӕ хорзӕхӕй, радзур-ма мын, цы дзы ӕрцыд». Уый йын загъта: «Адӕм тохы быдырӕй лидзӕг фесты ӕмӕ дзы бирӕтӕ фӕмард+. Саул+ ӕмӕ йӕ фырт Ионафан+ дӕр фӕмард сты». 5 Уӕд Давид лӕппуйы бафарста: «Кӕцӕй йӕ зоныс, Саул ӕмӕ йӕ фырт Ионафан кӕй амардысты, уый?»+ 6 Лӕппу загъта: «Афтӕ рауад, ӕмӕ ӕз дӕр Гелвуйы+ хохыл фӕдӕн. Ӕмӕ уым уыди Саул дӕр, йӕ арцыл+ ӕрӕнцой кодта, афтӕмӕй. Ӕмӕ йӕм бӕхуӕрдӕттӕ ӕмӕ барджытӕ ӕрбаввахс сты+. 7 Саул фӕстӕмӕ фӕкаст, ӕмӕ мӕ куы федта, уӕд мӕм фӕдзырдта, ӕмӕ йын ӕз загътон: „Мӕнӕ дӕн!“ 8 Стӕй мӕ бафарста: „Чи дӕ?“ Ӕз ын дзуапп радтон: „Амаликаг“+. 9 Уӕд мын загъта: „Дӕ хорзӕхӕй, рацу ӕмӕ мӕ амар. Фыррыстӕй мӕ бон фезмӕлын нал у, фӕлӕ мӕ уд+ нырма мӕ мидӕг ис“. 10 Ӕз ӕй зыдтон, ахӕм уӕззау цӕфы фӕстӕ кӕй нал фервӕздзӕн, ӕмӕ йӕм бацыдтӕн ӕмӕ йӕ амардтон+. Стӕй йын йӕ сӕрӕй йӕ паддзахы худ+ раластон, йӕ къухӕй та – йӕ цонгдарӕн, цӕмӕй сӕ мӕ буц хицаумӕ ӕрбахастаин».
11 Уӕд Давид йӕ уӕлӕдарӕсмӕ фӕлӕбурдта ӕмӕ йӕ ӕрыскъуыдта+, ӕмӕ афтӕ бакодтой, йемӕ цы адӕм уыди, уыдон се ’ппӕт дӕр. 12 Ӕмӕ кӕуын ӕмӕ ӕрдиаг кӕнын райдыдтой+ ӕмӕ изӕрмӕ ком дардтой+, Саул ӕмӕ йӕ фырт Ионафан ӕмӕ Йегъовӕйы адӕм, Израилы адӕм+, карды комӕй кӕй фӕцагъды сты, уый тыххӕй.
13 Давид бафарста, хабар ын чи ӕрбахаста, уыцы лӕппуйы: «Кӕцон дӕ?» Уый йын загъта: «Ӕз дӕн ӕрцӕуӕггаг, амаликаджы фырт»+. 14 Давид ын загъта: «Куыд бауӕндыдтӕ+ Йегъовӕйы сӕрст+ лӕггадгӕнӕгмӕ дӕ къух сисын ӕмӕ йӕ амарын?“ 15 Ӕмӕ лӕппутӕй иумӕ фӕдзырдта ӕмӕ йын загъта: «Бацу ӕмӕ йӕ амар». Уый дӕр ӕй барӕхуыста, ӕмӕ амард+. 16 Ӕмӕ йын Давид загъта: «Дӕ туг дӕхиуыл ис+, уымӕн ӕмӕ дӕхӕдӕг ныллӕууыдтӕ ӕвдисӕн дӕхи ныхмӕ+, дӕхӕдӕг загътай, Йегъовӕйы сӕрст лӕггадгӕнӕджы амардтон, зӕгъгӕ»+.
17 Ӕмӕ Давид Саулыл ӕмӕ йӕ фырт Ионафаныл+ скодта хъарӕг+, 18 «Ӕрдын»+, зӕгъгӕ, ӕмӕ загъта, цӕмӕй уыцы хъарӕг Иудӕйы+ фырттӕн бацамоной. Мӕнӕ куыд фыст у Йашары чиныджы+:
19 «О Израил, дӕ бӕрзӕндтыл дын дӕ фидыц бабын кодтой+.
Тыхджынтӕ фӕмард сты!
20 Ма радзурут уый тыххӕй Гефы+,
Ма фехъусын кӕнут уый тыххӕй Аскалоны+ уынгты,
Цӕмӕй филистимӕгты чызджытӕ ма цин кӕной
Ӕмӕ, сунӕтгонд чи нӕу, уыдоны чызджытӕ фырцинӕй ма зарой+.
21 Гелвуйы хӕхтӕ+, ӕртӕх уыл мауал уӕд, къӕвда уыл мауал ӕруарӕд, ӕмӕ уӕ быдыртӕ кувинагӕн тыллӕг мауал раттӕнт+,
Уымӕн ӕмӕ уым фӕхынджылӕг кодтой тыхджынты уартӕй, Саулы уартӕй,
Ӕмӕ нал ис сойӕ сӕрст уарт+.
22 Ионафаны ӕрдын фӕстӕмӕ афтидӕй никуы ӕрбаздӕхт+,
Саулы хъама ӕнӕ уӕлахизӕй фӕстӕмӕ никуы ӕрыздӕхт+,
Калдтой знӕгты туг, бахызтысты-иу тыхджынты фиуы.
23 Саул ӕмӕ Ионафан+, сӕ цӕргӕйӕ – адӕмӕн уарзон ӕмӕ адджын.
Сӕ мӕлӕт дӕр иумӕ ӕрцыд+.
Уыдысты цӕргӕстӕй цӕрдӕгдӕр+,
Домбӕйттӕй – тыхджындӕр+.
24 Израилы чызджытӕ, кӕут Саулыл.
Уый-иу уыл скодта сырх-сырхид нывӕфтыд дарӕс,
Уӕ уӕлӕдарӕс-иу уын сызгъӕринӕй срӕсугъд кодта+.
26 Хъыг дыл кӕнын, ме ’фсымӕр Ионафан,
Тынг адджын мын уыдтӕ+.
Дӕ уарзт мын уыди сылгоймаджы уарзтӕй бирӕ зынаргъдӕр+.
27 Фӕмард сты тыхджынтӕ!+
Фесӕфтысты хӕцӕнгӕрзтӕ!»