Хъуыддӕгтӕ

1 Феофил+, фыццаг чиныджы дӕм ныффыстон, Йесо уӕларвмӕ куы ацыд, уӕды онг цы куыст кодта ӕмӕ цӕуыл ахуыр кодта, ӕппӕт уыдӕтты тыххӕй+. 2 Йесо уӕларвмӕ куы ацыд, уый размӕ+ Хуыцауы сыгъдӕг тыхы* фӕрцы йе ’взӕрст+ апостолтӕн бафӕдзӕхста, цы кӕнын сӕ хъӕудзӕн, уый. 3 Ӕмӕ сын йӕ хъизӕмӕртты фӕстӕ йӕхи бирӕ хӕттыты равдыста, цӕмӕй ма дызӕрдыг кодтаиккой, ӕгас кӕй у, ууыл+. Цыппор боны дӕргъы йӕ уыдтой, ӕмӕ сын Хуыцауы паддзахады хабӕрттӕ ӕмбарын кодта+. 4 Семӕ куы фембӕлд, уӕд сын бафӕдзӕхста: «Иерусалимӕй макӕдӕм ацӕут+, фӕлӕ ӕнхъӕлмӕ кӕсут, мӕ уӕларвон Фыд уын зӕрдӕ цӕмӕй бавӕрдта+ ӕмӕ уын ӕз цӕй кой кодтон, уымӕ, 5 уымӕн ӕмӕ Иоанн донӕй лӕвӕрдта аргъуыд, сымах та цалдӕр боны фӕстӕ аргъуыд райсдзыстут Хуыцауы сыгъдӕг тыхӕй»+.

6 Иуафон та куы ӕрӕмбырд сты, уӕд ӕй йӕ апостолтӕ бафарстой: «Хицау, Израилы паддзахад+ фӕстӕмӕ йӕ къахыл ныр не слӕууын кӕндзынӕ?» 7 Уый сын загъта: «Мӕ уӕларвон Фыд цы рӕстӕджытӕ ӕмӕ афонтӕ снысан кодта*+, уыдон зонын сымах нӕ хъӕуы+. 8 Фӕлӕ уыл Хуыцауы сыгъдӕг тых куы ’рцӕуа, уӕд хъаруйӕ схайджын уыдзыстут+, ӕмӕ мын уыдзыстут ӕвдисӕнтӕ+ Иерусалимы+, стӕй ӕгас Иудейӕйы ӕмӕ Самарийы+, ӕмӕ суанг зӕххы кӕрӕттӕм дӕр»+. 9 Уыцы ныхӕстӕ сын куы загъта, уӕд сӕ цӕстыты раз уӕларвмӕ ссыд+, мигъ ӕй ӕрбамбӕрзта, ӕмӕ йӕ нал уыдтой+. 10 Уӕларвмӕ куыд сцӕйцыд+, уымӕ куыд кастысты, афтӕ сӕ цуры февзӕрд дыууӕ лӕджы урс+ дарӕсты 11 ӕмӕ сын загътой: «Галилейаг лӕгтӕ, цы лӕуут ӕмӕ арвмӕ цы кӕсут? Уе ’хсӕнӕй уӕларвмӕ чи ацыд, уыцы Йесойы уӕлӕрвтӕм ссӕугӕ куыд федтат, фӕстӕмӕ дӕр афтӕ ӕрцӕудзӕн»+.

12 Уый фӕстӕ, Оливӕбӕлӕсты хох кӕй хонынц, уырдыгӕй Иерусалиммӕ ӕрыздӕхтысты+. Уыцы хохмӕ Иерусалимӕй сабатбоны цыды бӕрц* йеддӕмӕ нӕу+. 13 Ӕмӕ куы ’рхӕццӕ сты, уӕд, кӕм ӕрлӕууыдысты, уыцы уатмӕ схызтысты+. Уыдон уыдысты Петр ӕмӕ Иоанн, Иаков ӕмӕ Андрей, Филипп ӕмӕ Фома, Варфоломей ӕмӕ Матфей, Алфейы фырт Иаков ӕмӕ, зынгзӕрдӕ кӕй схуыдтой, уыцы Симон, стӕй Иаковы фырт Иудӕ+. 14 Се ’ппӕт дӕр ӕдзух иумӕ Хуыцаумӕ куывтой+, семӕ ма уыд цалдӕр сылгоймаджы+, стӕй Йесойы ӕфсымӕртӕ+ ӕмӕ йӕ мад Марийӕ дӕр.

15 Уӕд иу бон Петр ӕрлӕууыд ӕфсымӕрты ’хсӕн,– уыдысты бирӕйӕ, сӕдӕ дыууын адӕймаджы бӕрц,– ӕмӕ загъта: 16 «Ӕфсымӕртӕ, кӕддӕр Хуыцау йӕ сыгъдӕг тыхӕй+ Давиды уылты загъта Иудӕйы+ тыххӕй, адӕмы Йесойы ӕрцахсынмӕ+ чи ӕрбакодта, уый тыххӕй. Ӕмӕ Фыстадӕй уыцы ныхӕстӕ хъуамӕ сӕххӕст уыдаиккой+, 17 уымӕн ӕмӕ уый немӕ уыди+ ӕмӕ немӕ лӕггад кодта+. 18 Фӕлӕ уыцы лӕг балхӕдта+ зӕхх, йӕ мӕнгард+ мийы тыххӕй йын цы ӕхца бафыстой, уымӕй. Ӕмӕ сӕрбынмӕ куы ’рхауд+, уӕд йӕ гуыбын атыдта ӕмӕ йӕ хуылфыдзаумӕттӕ иууылдӕр ӕддӕмӕ ракалдысты. 19 Уыцы хабар Иерусалимы цӕрджытӕ иууылдӕр фехъуыстой, ӕмӕ уыцы зӕхх се ’взагыл схуыдтой Акелдамӕ, ома «Туджы зӕхх». 20 Псаломты чиныджы афтӕ фыст ис: „Йӕ цӕрӕнбынат сафтид уӕд ӕмӕ дзы цӕрӕг мауал баззайӕд“+ ӕмӕ „Йӕ цӕстдарӕджы хӕстӕ лӕвӕрд ӕрцӕуӕнт ӕндӕр искӕмӕн“+. 21 Уымӕ гӕсгӕ йӕ бынатмӕ равзарын хъӕуы, нӕ Хицау Йесо не ’хсӕн куы уыди, уыцы рӕстӕджы дӕргъы немӕ чи уыд, уыдонӕй искӕй+. 22 Уыцы адӕймаг хъуамӕ уа, Йесойӕн Иоанн донаргъуыд куы радта+, уӕдӕй, Йесо уӕларвмӕ куы ацыд, уӕдмӕ ӕдзухдӕр немӕ чи уыди+ ӕмӕ, кӕй райгас, уый махау чи федта, уыдонӕй»+.

23 Ӕмӕ уӕд фӕндон бахастой дыууӕйы тыххӕй: Иосифы, Варсавӕ ӕмӕ ма Иуст дӕр кӕй хуыдтой, уый тыххӕй, ӕмӕ Матфийы тыххӕй. 24 Стӕй скуывтой: «О Йегъовӕ, ды зоныс, алы адӕймаджы зӕрдӕйы дӕр цы ис, уый+. Ӕмӕ нын бацамон, ацы дыууӕ лӕгӕй кӕй равзӕрстай, 25 цӕмӕй ацы куыст кӕна ӕмӕ апостол+ уа, уымӕн ӕмӕ Иудӕ уыцы кад ницӕмӕ ӕрдардта, ӕмӕ йӕхи фӕндагыл ацыд». 26 Гъемӕ хӕлттӕ сӕппӕрстой+, ӕмӕ схауд Матфийы хал, ӕмӕ иннӕ иуӕндӕс+ апостолмӕ баиу ис.