Иоанны
18 Йесо уыцы ныхӕстӕ куы загъта, уӕд йӕ ахуыргӕнинӕгтимӕ Кедроны+ дӕлвӕзы* иннӕ фарсмӕ ацыд, ӕмӕ уым дыргъдонмӕ бацыдысты+. 2 Уыцы бынат зыдта йӕ уӕйгӕнӕг Иудӕ дӕр, уымӕн ӕмӕ-иу Йесо йӕ ахуыргӕнинӕгтимӕ уым арӕх уыди+. 3 Гъемӕ Иудӕ йемӕ ракодта ӕфсӕддонты къорд ӕмӕ, сауджынты хистӕртӕ ӕмӕ фарисейтӕ кӕй рарвыстой, уыцы хъахъхъӕнджыты, ӕмӕ рухсгӕнӕнтимӕ, судзгӕ цырӕгътимӕ ӕмӕ хӕцӕнгӕрзтимӕ уырдӕм ӕрбацыдысты+. 4 Йесо та, цы йыл ӕрцӕудзӕн, уыдӕттӕ зонгӕйӕ+, размӕ рацыд ӕмӕ сӕ бафарста: «Кӕй агурут?» 5 Уыдон ын дзуапп радтой: «Назаретаг Йесойы»+. Ӕмӕ сын загъта: «Уый ӕз дӕн». Семӕ лӕууыд йӕ уӕйгӕнӕг+ Иудӕ дӕр.
6 Фӕлӕ сын афтӕ куы загъта, уый ӕз дӕн, зӕгъгӕ, уӕд фӕстӕмӕ алӕууыдысты+ ӕмӕ зӕххыл ӕрхаудтой. 7 Ӕмӕ та сӕ ногӕй бафарста: «Кӕй агурут?» Уыдон ын дзуапп радтой: «Назаретаг Йесойы». 8 Ӕмӕ та сын Йесо загъта: «Куы уын загътон, уый ӕз дӕн. Кӕд мӕн агурут, уӕд адоны ауадзут». 9 Афтӕ уымӕн загъта, цӕмӕй сӕххӕст уыдаиккой йӕ ныхӕстӕ, кӕй мын радтай, уыдонӕй иу дӕр нӕ фесӕфт, зӕгъгӕ+.
10 Уӕд Симон Петр, цы хъама йӕм уыди, уый фелвӕста, хистӕр сауджыны цагъары дзы ӕрцавта ӕмӕ йын йӕ рахиз хъус ахауын кодта+. Уыцы цагъарӕн йӕ ном хуынди Малх. 11 Фӕлӕ Йесо Петрӕн загъта: «Дӕ хъама йӕ кӕрддзӕмы нывӕр+. Ау, мӕ Фыд мын цы къус радта, уый хъуамӕ ма бануазон?»+
12 Уӕд ӕфсӕддонтӕ, ӕфсады сӕргълӕууӕг ӕмӕ, дзуттӕгтӕ кӕй рарвыстой, уыцы хъахъхъӕнджытӕ Йесойы ӕрцахстой, сбастой йӕ 13 ӕмӕ уал ӕй фыццаг акодтой Аннӕмӕ, уымӕн ӕмӕ уый уыди Кайафӕйы каис, ӕмӕ Кайафӕ та уыцы аз хистӕр сауджын уыд+. 14 Уый уыди, дзуттӕгтӕн афтӕ чи бауынаффӕ кодта, хуыздӕр уын у, ӕмӕ адӕмы сӕрвӕлтау иу адӕймаг амӕла, зӕгъгӕ, уыцы Кайафӕ+.
15 Симон Петр ӕмӕ ма ноджыдӕр иу ахуыргӕнинаг цыдысты Йесойӕн йӕ фӕдыл+. Уыцы ахуыргӕнинаг зонгӕ уыди хистӕр сауджынимӕ, ӕмӕ уый дӕр Йесоимӕ хистӕр сауджыны кӕртмӕ бахызт. 16 Петр та дуармӕ баззад+. Ӕмӕ уӕд, хистӕр сауджынимӕ зонгӕ чи уыд, уыцы ахуыргӕнинаг ӕддӕмӕ рацыд ӕмӕ, дуаргӕс чи уыд, уыцы лӕггадгӕнӕг-чызгимӕ аныхас кодта ӕмӕ Петры мидӕмӕ бакодта. 17 Ӕмӕ лӕггадгӕнӕг-чызг Петры бафарста: «Ды дӕр уыцы адӕймаджы ахуыргӕнинӕгтӕй нӕ дӕ?» Фӕлӕ уый загъта: «Нӕ дӕн»+. 18 Уыцы рӕстӕг та цагъартӕ ӕмӕ хъахъхъӕнджытӕ арт скодтой+, уымӕн ӕмӕ уазал уыди. Ӕмӕ лӕууыдысты ӕмӕ сӕхи тавтой. Петр дӕр семӕ лӕууыд ӕмӕ йӕхи артмӕ тавта.
19 Сауджынты хистӕртӕй та сӕ иу Йесойы фарста йӕ ахуыргӕнинӕгты тыххӕй ӕмӕ, адӕмӕн цы амыдта, уымӕй. 20 Йесо йын дзуапп радта: «Ӕз дунейӕн алцыдӕр ӕргом дзырдтон. Адӕмы алкӕддӕр ахуыр кодтон ӕмбырдгӕнӕнты* ӕмӕ кувӕндоны+, дзуттӕгтӕ иууылдӕр кӕм ӕрӕмбырд вӕййынц, уым. Ӕмӕ сусӕгӕй ницы дзырдтон. 21 Мӕн цӕмӕн фӕрсыс? Мӕ ныхӕстӕм мын чи хъуыста, уыдоны бафӕрс. Цы дзырдтон, уый уыдон зонынц». 22 Йесо афтӕ куы загъта, уӕд ӕй хъахъхъӕнджытӕй иу, йӕ фарсмӕ чи лӕууыд, уый, ныдздзӕхст кодта+ ӕмӕ йын загъта: «Уый куыд ныхас кӕныс сауджынты хистӕримӕ?» 23 Йесо йын дзуапп радта: «Кӕд исты раст нӕ загътон, уӕд мын ӕй зӕгъ. Фӕлӕ кӕд раст загътон, уӕд мӕ цӕмӕн цӕвыс?» 24 Уый фӕстӕ йӕ Аннӕ бастӕй арвыста хистӕр сауджын Кайафӕмӕ+.
25 Симон Петр та арты раз куы лӕууыд ӕмӕ йӕхи куы тавта, уӕд ын афтӕ зӕгъынц: «Ды дӕр йӕ ахуыргӕнинӕгтӕй нӕ дӕ?» Фӕлӕ уый нӕ басаст ӕмӕ загъта: «Нӕ дӕн»+. 26 Уӕд та йын хистӕр сауджыны цагъартӕй сӕ иу, Петр йӕ хъус кӕмӕн ахауын кодта, уымӕн йӕ хӕстӕг+, афтӕ зӕгъы: «Дыргъдоны дӕ йемӕ нӕ федтон?» 27 Фӕлӕ та Петр нӕ басаст. Ӕмӕ раст уыцы рӕстӕг уасӕг ныууасыд+.
28 Уый фӕстӕ Йесойы Кайафӕйы хӕдзарӕй акодтой бӕстӕйы хицауы галуанмӕ+. Уый уыди райсомӕй раджы. Фӕлӕ цӕмӕй ма фӕчъизи уыдаиккой+ ӕмӕ сӕ бон Куадзӕны хӕринӕгтӕй хӕрын уыдаид, уый тыххӕй сӕхӕдӕг галуанмӕ мидӕмӕ нӕ бацыдысты. 29 Гъемӕ сӕм Пилат ӕддӕмӕ рацыд ӕмӕ сӕ бафарста: «Ацы адӕймаджы цавӕр хъуыддаджы аххосджын кӕнут?»+ 30 Уыдон ын дзуапп радтой: «Уый фыдгӕнӕг куы нӕ уаид, уӕд ӕй дӕумӕ не ’рбакодтаиккам». 31 Пилат та сын загъта: «Акӕнут ӕй ӕмӕ йын уӕ закъонмӕ гӕсгӕ уӕхӕдӕг стӕрхон кӕнут»+. Дзуттӕгтӕ йын дзуапп радтой: «Махӕн никӕй марыны бар ис»+. 32 Афтӕ уымӕн рауад, цӕмӕй сӕххӕст уыдаид, Йесо, цы мардӕй амӕлдзӕн, уый тыххӕй цы загъта, уый+.
33 Уӕд Пилат фӕстӕмӕ галуанмӕ баздӕхт, Йесомӕ фӕдзырдта ӕмӕ йӕ бафарста: «Ды дзуттӕгты паддзах дӕ?»+ 34 Йесо йын дзуапп радта: «Афтӕ дӕхи зондӕй зӕгъыс, ӕви дын иннӕтӕ радзырдтой мӕн тыххӕй?»+ 35 Пилат та йын загъта: «Ӕмӕ ӕз дзуттаг дӕн? Дӕхи адӕм ӕмӕ дӕ сауджынты хистӕртӕ радтой мӕ къухмӕ+. Цы ракодтай?» 36 Йесо йын дзуапп радта+: «Мӕ паддзахад ацы дунейӕ нӕу+. Мӕ паддзахад ацы дунейӕ куы уаид, уӕд мӕ лӕггадгӕнджытӕ тох кодтаиккой+, цӕмӕй дзуттӕгты къухтӕм лӕвӕрд ма ’рцыдаин. Фӕлӕ мӕ паддзахад ацы дунейӕ нӕу». 37 Пилат та йӕ бафарста: «Уӕдӕ паддзах дӕ?» Ӕмӕ йын уӕд Йесо дзуапп радта: «Дӕхӕдӕг ӕй зӕгъыс, ӕз паддзах кӕй дӕн+. Ӕз уымӕн райгуырдтӕн ӕмӕ уымӕн ӕрцыдтӕн дунемӕ, цӕмӕй рӕстдзинады* тыххӕй ӕвдисӕн лӕууон+. Рӕстдзинады фарс чи у+, уый мӕм хъусы»+. 38 Уӕд ын Пилат загъта: «Рӕстдзинад* та цы у?»
Уыцы ныхӕсты фӕстӕ Пилат ногӕй дзуттӕгтӕм рацыд ӕмӕ сын загъта: «Ӕз ацы адӕймагмӕ ницы аххос ссардтон+. 39 Стӕй уын уе ’гъдаумӕ гӕсгӕ хъуамӕ Куадзӕны иу адӕймаджы рауадзон+. Фӕнды уӕ, ӕмӕ уын уӕ паддзахы рауадзон?» 40 Ӕмӕ уыдон ныхъхъӕр кодтой: «Уый нӕ! Вараввӕйы нын рауадз!» Вараввӕ та уыди абырӕг+.