Йезекил

41 Уый фӕстӕ мӕ бакодта сӕйраг уатмӕ* ӕмӕ, бахизӕнӕн фӕрсырдыгӕй цы къултӕ уыд, уыдон сбарста. Ӕмӕ иу къулӕн дӕр йӕ фӕтӕн уыд ӕхсӕз ӕлмӕрины ӕмӕ иннӕ къулӕн дӕр – ӕхсӕз ӕлмӕрины. 2 Бахизӕны уӕрх уыди дӕс ӕлмӕрины. Бахизӕнӕн фӕрсырдыгӕй цы къултӕ уыд, уыдоны уӕрх иуырдыгӕй дӕр уыди фондз ӕлмӕрины ӕмӕ иннӕрдыгӕй дӕр – фондз ӕлмӕрины. Сбарста сӕйраг уатӕн йӕ дӕргъ, ӕмӕ уыди цыппор ӕлмӕрины, йӕ уӕрх та – дыууын ӕлмӕрины.

3 Стӕй бахызт мидӕггаг уатмӕ ӕмӕ, йӕ бахизӕнӕн фӕрсырдыгӕй цы къултӕ уыд, уыдон сбарста, ӕмӕ уыдысты дыууӕ ӕлмӕрины. Бахизӕн уыд ӕхсӕз ӕлмӕрины, бахизӕнӕн йӕ уӕрх та иуырдыгӕй дӕр уыд авд ӕлмӕрины ӕмӕ иннӕрдыгӕй дӕр – авд ӕлмӕрины. 4 Уый сбарста мидӕггаг уаты къулы дӕргъ, сӕйраг уаты раз цы къул уыд, уый, ӕмӕ уыди дыууын ӕлмӕрины+. Йӕ уӕрх дӕр уыди дыууын ӕлмӕрины. Ӕмӕ мын уый фӕстӕ загъта: «Ай у Ӕппӕты сыгъдӕг бынат»+.

5 Уый сбарста хӕдзары къул, ӕмӕ уыд ӕхсӕз ӕлмӕрины. Фӕрсырдыгӕй дзы цы уӕттӕ уыд, уыдонӕй алкӕцыйӕн дӕр йӕ уӕрх уыди цыппар ӕлмӕрины. Уыдон уыдысты хӕдзары алыварс. Афтӕ уыди хӕдзары алыварс кӕрӕй-кӕронмӕ+. 6 Фӕрсырдыгӕй дзы цы уӕттӕ уыд, уыдон уыдысты иу иннӕйы сӕрмӕ, ӕмӕ уыдысты ӕртӕ уӕладзыджы. Ӕмӕ алы уӕладзыджы дӕр уыди ӕртын уаты. Уыцы уӕттӕ уыдысты хӕдзары алыварс кӕрӕй-кӕронмӕ, уыдон иу кодтой хӕдзары къулимӕ, цӕмӕй сын уыдаид быцӕу, фӕлӕ хӕдзары къулыл ныхӕст нӕ уыдысты+. 7 Уӕладзыг цас уӕлдӕр уыд, афтӕ уӕттӕ дӕр уыдысты уӕрӕхдӕр. Хӕдзарӕн дыууӕрдыгӕй хӕрдмӕ цыди тымбыл асинтӕ+. Хӕдзары алыварс кӕрӕй-кӕронмӕ цы уӕттӕ уыди, уыдон цас уӕлдӕр уыдысты, афтӕ уыдысты уӕрӕхдӕр. Бинаг уӕладзыгӕй уӕллаг уӕладзыгмӕ+ схизӕн уыд астӕуккаг уӕладзыгыл.

8 Ӕз федтон, хӕдзар ӕнӕхъӕнӕй дӕр кӕй лӕууыд бӕрзонд бындурыл. Фӕрсырдыгӕй дзы цы уӕттӕ уыд, уыдоны бындур та фисыны онг* уыд иу хъӕз лӕдзӕг – ӕхсӕз ӕлмӕрины+. 9 Фӕрсырдыгӕй уӕттӕн се ’ддаг къулы фӕтӕн уыди фондз ӕлмӕрины. Хӕдзарӕн фӕрсырдыгӕй цы уӕттӕ уыд, уыдонӕн сӕ бындуры кӕрӕттыл ӕддӕрдӕм уыди афтид бынат.

10 Хӕрӕндӕттӕ+ ӕмӕ хӕдзары ’хсӕн алырдыгӕй дӕр уыди дыууын ӕлмӕрины. 11 Фӕрсырдыгӕй уӕттӕм бахизӕн уыд, бындурыл афтид бынат кӕм уыди, уыцырдыгӕй. Иу бахизӕн уыд цӕгатырдыгӕй, иннӕ бахизӕн та – хуссарырдыгӕй. Бындурыл цы афтид бынат уыди, уымӕн йӕ фӕтӕн алырдыгӕй дӕр уыд фондз ӕлмӕрины.

12 Хӕдзары раз цы афтид бынат уыд, уый раз ныгуылӕнырдыгӕй цы агъуыст уыд, уымӕн йӕ уӕрх уыд ӕвдай ӕлмӕрины. Агъуыстӕн йӕ къулы фӕтӕн алырдыгӕй дӕр уыди фондз ӕлмӕрины, йӕ дӕргъ та – нӕуӕдз ӕлмӕрины.

13 Уый сбарста хӕдзар, ӕмӕ йӕ дӕргъ уыди сӕдӕ ӕлмӕрины. Сбарста, хӕдзары раз цы афтид бынат уыд, уый дӕр, стӕй агъуыст ӕмӕ йӕ къултӕ, ӕмӕ сӕ дӕргъ иумӕ уыди сӕдӕ ӕлмӕрины. 14 Хӕдзары раззаг хайы уӕрх ӕмӕ, скӕсӕнырдыгӕй хӕдзарӕн разырдыгӕй цы афтид бынат уыд, уый уӕрх иумӕ уыди сӕдӕ ӕлмӕрины.

15 Уый фӕстӕ сбарста, хӕдзары раз цы афтид бынат уыд, уый раз фӕстӕрдыгӕй цы агъуыст уыд, уымӕн йӕ дӕргъ ӕмӕ, йӕ дыууӕ фарс дӕр цы тыргътӕ уыди, уыдон, ӕмӕ сӕ дӕргъ уыди сӕдӕ ӕлмӕрины.

Сбарста сӕйраг уат, мидӕггаг уат+ ӕмӕ, кӕртырдӕм чи каст, уыцы ӕмбӕрзтсӕр бахизӕн. 16 Ӕртӕйӕн дӕр уыди къӕсӕртӕ, иуырдыгӕй нарӕгдӕр чи уыд, ахӕм рудзгуытӕ+ ӕмӕ тыргътӕ. Алы къӕсӕрӕй бахизгӕйӕ дӕр фенӕн уыди, къултӕ иууылдӕр пъолӕй рудзгуыты онг кӕй уыдысты хъӕдӕй ӕмбӕрзт+. Рудзгуытӕ дӕр уыдысты хъӕдӕй конд. 17 Бахизӕны сӕрмӕ цы хай уыд, уымӕн, мидӕггаг уатӕн ӕмӕ ӕддаг хайӕн, мидӕггаг уаты къултӕн ӕмӕ ӕддаг хайы къултӕн уыди бӕлвырд дӕргъ ӕмӕ уӕрх. 18 Уым къултыл уыд херувимты+ ӕмӕ пальмӕбӕласы нывӕфтыдтӕ+. Пальмӕбӕлас уыди дыууӕ херувимы ’хсӕн. Алы херувимӕн дӕр уыд дыууӕ цӕсгомы+. 19 Иуырдыгӕй пальмӕбӕласырдӕм здӕхт уыд адӕймаджы цӕсгом, иннӕрдыгӕй пальмӕбӕласырдӕм здӕхт уыд ӕвзонг домбайы цӕсгом+. Сӕ нывӕфтыдтӕ уыдысты хӕдзары ӕппӕт къултыл дӕр. 20 Сӕйраг уаты къулыл, пъолӕй, бахизӕны сӕрмӕ цы хай уыд, уый онг уыди херувимты ӕмӕ пальмӕбӕласы нывӕфтыдтӕ.

21 Сӕйраг уаты дуары тарвӕзтӕ уыдысты цыппӕрдигъон+. Ӕмӕ мидӕггаг сыгъдӕг уаты раз федтон ахӕм цыдӕр: 22 уыди дзы хъӕдын нывондхӕссӕн, йӕ бӕрзӕнд уыд ӕртӕ ӕлмӕрины, йӕ дӕргъ – дыууӕ ӕлмӕрины, ӕмӕ йӕ тигътӕн уыди быцӕутӕ+. Йӕ фӕрстӕ кӕрӕй-кӕронмӕ уыдысты хъӕдӕй конд. Ӕмӕ мын уый загъта: «Ай у, Йегъовӕйы раз чи лӕууы, уыцы стъол»+.

23 Сӕйраг уатӕн ӕмӕ мидӕггаг сыгъдӕг уатӕн уыди фӕйнӕ дыууӕ дуары+. 24 Алы дуар дӕр уыди дыууӕ хайӕ конд, ӕмӕ дыууӕ хайы дӕр гом кодтой. Иу дуар дӕр конд уыди дыууӕ хайӕ ӕмӕ иннӕ дуар дӕр – дыууӕ хайӕ. 25 Ӕмӕ уыдоныл, сӕйраг уаты дуӕрттыл, уыди херувимты ӕмӕ пальмӕбӕласы нывӕфтыдтӕ+, къултыл чи уыд, ахӕмтӕ. Ӕмбӕрзтсӕр бахизӕнӕн йӕ сӕрмӕ ӕддӕрдыгӕй уыди хъӕдын карниз. 26 Ӕмбӕрзтсӕр бахизӕны къултыл, хӕдзарӕн фӕрсырдыгӕй цы уӕттӕ уыди, уыдоны къултыл ӕмӕ карнизты бынмӕ иуырдыгӕй дӕр ӕмӕ иннӕрдыгӕй дӕр уыд, иуырдыгӕй нарӕгдӕр чи уыд, ахӕм рудзгуытӕ+, стӕй сыл уыди пальмӕбӕласы нывӕфтыдтӕ.