Нымӕцтӕ

3 Йегъовӕ Моисеимӕ Синайы хохыл куы ныхас кодта, уыцы рӕстӕгмӕ Аарон ӕмӕ Моисейӕ чи рацыд, уыдон* уыдысты+: 2 Аароны фырттӕ – йӕ хистӕр фырт Надав, стӕй Авиуд+, Елеазар+ ӕмӕ Ифамар+. 3 Адон уыдысты Аароны фырттӕ, сӕрст сауджынтӕ. Уыдонӕн сӕ къухмӕ лӕвӕрд ӕрцыд бартӕ, цӕмӕй сауджынтӕй лӕггад кӕной+. 4 Фӕлӕ Надав ӕмӕ Авиуд амардысты Йегъовӕйы раз, Синайы ӕдзӕрӕг быдыры Йегъовӕйы размӕ, чи не ’мбӕлд, ахӕм зынг кӕй бахастой, уый тыххӕй+. Фырттӕ та сын нӕ баззад. Елеазар+ ӕмӕ Ифамар+ та дарддӕр дӕр сӕ фыд Ааронимӕ лӕггад кодтой сауджынтӕй.

5 Йегъовӕ Моисейӕн загъта: 6 «Ӕрбакӕн Левийы мыггаг+ ӕмӕ сӕ сауджын Аароны раз ӕрлӕууын кӕн, ӕмӕ йын уыдон лӕггад кӕндзысты+. 7 Уыдон лӕггад кӕндзысты ӕмбырды цатыры раз ӕмӕ афтӕмӕй ӕххӕст кӕндзысты, Аароны раз ӕмӕ сыл ӕппӕт адӕмы раз цы хӕстӕ ис, уыдон. 8 Сӕ бар уыдзысты, ӕмбырды цатыры цы мигӕнӕнтӕ ис, уыдон иууылдӕр+, ӕмӕ афтӕмӕй ӕххӕст кӕндзысты, Израилы фыртты раз сыл цы хӕстӕ ис, уыдон – лӕггад кӕндзысты цатыры раз+. 9 Левитты ратт Ааронӕн ӕмӕ йӕ фырттӕн. Уыдон сты лӕвӕрд*, лӕвӕрд ын сты Израилы фырттӕй+. 10 Аароны ӕмӕ йӕ фыртты сӕвӕр сауджынтӕй, ӕмӕ хъуамӕ ӕххӕст кӕной сӕ хӕстӕ+. Ӕндӕр исчи кувӕн бынатмӕ хӕстӕг куы бацӕуа, уӕд уыцы адӕймаджы хъӕуы амарын»+.

11 Йегъовӕ дарддӕр Моисейӕн загъта: 12 «Израилы фырттӕй ӕз мӕхицӕн исын левитты, Израилы цыдӕриддӕр фыццаггуырдтӕ ис, уыдоны бӕсты+. Ӕмӕ левиттӕ уыдзысты мӕн, 13 уымӕн ӕмӕ алы фыццаггуырд дӕр мӕн у+. Египеты фыццаггуырдты се ’ппӕты дӕр цы бон ныццагътон, уыцы бон ӕз загътон+, цӕмӕй Израилы алы фыццаггуырды дӕр – адӕмӕй дӕр ӕмӕ фосӕй дӕр – снывонд кӕной мӕнӕн+. Уыдон хъуамӕ уой мӕн. Ӕз дӕн Йегъовӕ».

14 Йегъовӕ Моисеимӕ дарддӕр ныхас кодта Синайы ӕдзӕрӕг быдыры+ ӕмӕ йын загъта: 15 «Ныффысс Левийы фыртты сӕ мыггӕгтӕм гӕсгӕ, сӕ хӕдзарвӕндӕгтӕм гӕсгӕ. Хъуамӕ ныффыссай, иу мӕй ӕмӕ уымӕй уӕлӕмӕ кӕуыл цӕуы, уыцы нӕлгоймӕгты се ’ппӕты дӕр»+. 16 Ӕмӕ сӕ Моисей дӕр ныффыста, Йегъовӕ йын куыд бафӕдзӕхста, афтӕ. 17 Адон сты Левийы фырттӕ+: Гирсон, Кааф ӕмӕ Мерари+.

18 Гирсоны фырттӕ уыдысты Ливни ӕмӕ Шимей+, ӕмӕ уыдонӕй рацыд хӕдзарвӕндӕгтӕ.

19 Каафы фырттӕ+ уыдысты Амрам, Ицгар+, Хеврон ӕмӕ Узиил, ӕмӕ уыдонӕй рацыд хӕдзарвӕндӕгтӕ.

20 Мерарийы фырттӕ+ уыдысты Махли+ ӕмӕ Муши+, ӕмӕ уыдонӕй рацыд хӕдзарвӕндӕгтӕ.

Адон иууылдӕр сты левитты хӕдзарвӕндӕгтӕ.

21 Гирсонӕй рацыд Ливнийы хӕдзарвӕндаг+ ӕмӕ Шимейы хӕдзарвӕндаг+. Адон сты, Гирсонӕй чи рацыд, уыцы хӕдзарвӕндӕгтӕ. 22 Сӕ нӕлгоймӕгтӕ, иу мӕй ӕмӕ уымӕй уӕлӕмӕ кӕуыл цыд, уыдон се ’ппӕт дӕр+ фыст ӕрцыдысты ӕмӕ уыдысты авд мин фондзсӕдӕ+.23 Гирсонӕй чи рацыд, уыцы хӕдзарвӕндӕгтӕ уыдысты цатырӕн фӕстӕрдыгӕй+. Сӕ цатыртӕ ӕвӕрд уыдысты ныгуылӕнырдыгӕй. 24 Гирсоны хӕдзарвӕндаджы хистӕр уыд Елиасаф, Лаелы фырт. 25 Гирсоны фыртты+ бар уыди ӕмбырды цатыр+, йе ’мбӕрзӕнтӕ+, цатыры бахизӕны ӕмбӕрзӕн+, 26 цатыры ӕмӕ нывондхӕссӕны алыварс чи ис, уыцы кӕрты ӕмбӕрзӕнтӕ+, кӕрты бахизӕны ӕмбӕрзӕн+ ӕмӕ цатыры бӕттӕнтӕ+ – уыцы лӕггадимӕ цыдӕриддӕр баст уыд, уый.

27 Каафӕй рацыд Амрамы хӕдзарвӕндаг, Ицгары хӕдзарвӕндаг, Хевроны хӕдзарвӕндаг, Узиилы хӕдзарвӕндаг ӕмӕ Каафы хӕдзарвӕндаг. Адон сты, Каафӕй чи рацыд, уыцы хӕдзарвӕндӕгтӕ+. 28 Иу мӕй ӕмӕ уымӕй уӕлӕмӕ кӕуыл цыд, уыцы нӕлгоймӕгтӕ уыдысты аст мин ӕхсӕзсӕдӕ. Уыдонӕн сӕ бар уыд сыгъдӕг бынат+. 29 Каафӕй рацӕугӕ хӕдзарвӕндӕгты цатыртӕ уыдысты цатырӕн йӕ хуссарварс+. 30 Каафӕй рацӕугӕ хӕдзарвӕндӕгты хистӕр уыд Елицафан, Узиилы фырт+. 31 Сӕ бар уыд+ бадзырды чырын+, стъол+, цырагъдарӕн+, нывондхӕссӕнтӕ+, сыгъдӕг бынаты лӕггадгӕнгӕйӕ кӕмӕй архайдтой, уыцы мигӕнӕнтӕ+, ӕмӕ, цатыры мидӕгӕй цы ӕмбӕрзӕн+ уыд ауыгъд, уый – уыцы лӕггадимӕ цыдӕриддӕр баст уыд, уый.

32 Левитты хистӕрты хистӕр уыди Елеазар+, сауджын Аароны фырт. Елеазар уыди, сыгъдӕг бынат кӕй бар уыд, уыдоны цӕстдарӕг.

33 Мерарийӕ рацыд Махлийы хӕдзарвӕндаг+ ӕмӕ Мушийы хӕдзарвӕндаг+. Адон сты, Мерарийӕ чи рацыд, уыцы хӕдзарвӕндӕгтӕ+. 34 Сӕ нӕлгоймӕгтӕ, иу мӕй ӕмӕ уымӕй уӕлӕмӕ кӕуыл цыд, уыдон се ’ппӕт дӕр фыст ӕрцыдысты ӕмӕ уыдысты ӕхсӕз мин дыууӕсӕдӕ+. 35 Мерарийӕ цы хӕдзарвӕндӕгтӕ рацыд, уыдоны хистӕр уыди Цуриил, Авихаилы фырт. Уыдонӕн сӕ цатыртӕ уыдысты цатырӕн йӕ цӕгатварс+. 36 Мерарийы фыртты бар уыдысты цатыры фӕлгӕттӕ+, йӕ хъилтӕ+, йӕ цӕджындзтӕ+, йӕ бынӕвӕрӕнтӕ* ӕмӕ йӕ мигӕнӕнтӕ иууылдӕр+ – уыцы лӕггадимӕ цыдӕриддӕр баст уыд, уый+, 37 стӕй кӕрты цӕджындзтӕ+, сӕ бынӕвӕрӕнтӕ+, сӕ къӕбӕлтӕ ӕмӕ сӕ бӕттӕнтӕ.

38 Ӕмбырды цатыры бахизӕны акомкоммӕ та, скӕсӕнырдыгӕй, уыдысты Моисейы, Аароны ӕмӕ йӕ фыртты цатыртӕ. Уыдонӕн сӕ бар уыди кувӕн бынат+, ӕмӕ афтӕмӕй ӕххӕст кодтой, Израилы фыртты раз сыл цы хӕстӕ уыди, уыдон. Ӕндӕр исчи кувӕн бынатмӕ хӕстӕг куы бацыдаид, уӕд уыцы адӕймаджы хъуыди амарын+.

39 Моисей ӕмӕ Аарон Йегъовӕйы фӕдзӕхстмӕ гӕсгӕ левиттӕй сӕ хӕдзарвӕндӕгтӕм гӕсгӕ кӕй ныффыстой, уыцы нӕлгоймӕгтӕ, иу мӕй ӕмӕ уымӕй уӕлӕмӕ кӕуыл цыд, уыдон ӕдӕппӕтӕй уыдысты дыууын дыууӕ мины.

40 Уый фӕстӕ Йегъовӕ Моисейӕн загъта: «Ныффысс Израилы фыццаггуырдты, иу мӕй ӕмӕ уымӕй уӕлӕмӕ кӕуыл цӕуы, уыцы нӕлгоймӕгты+, ӕмӕ сӕ банымай. 41 Ӕмӕ левитты райс мӕнӕн, Израилы цыдӕриддӕр фыццаггуырдтӕ ис, уыдоны бӕсты+, стӕй левиттӕн сӕ фос дӕр – Израилы фыртты фыццагзад нӕл фосы бӕсты+. Ӕз дӕн Йегъовӕ». 42 Ӕмӕ Йегъовӕ Моисейӕн куыддӕриддӕр загъта, афтӕ Израилы фыццаггуырдты се ’ппӕты дӕр ныффыста. 43 Фыст чи ’рцыд, уыцы фыццаггуырдтӕ, иу мӕй ӕмӕ уымӕй уӕлӕмӕ кӕуыл цыд, уыцы нӕлгоймӕгтӕ ӕдӕппӕтӕй уыдысты дыууын дыууӕ мин дыууӕсӕдӕ ӕвдай ӕртӕ.

44 Йегъовӕ ма Моисейӕн загъта: 45 «Израилы цыдӕриддӕр фыццаггуырдтӕ ис, уыдоны бӕсты райс левитты, Израилы фырттӕн сӕ фосы бӕсты та – левитты фос. Ӕмӕ левиттӕ уыдзысты мӕн+. Ӕз дӕн Йегъовӕ. 46 Израилы фыццаггуырдтӕ левиттӕй сты дыууӕсӕдӕ ӕвдай ӕртӕ адӕймаджы фылдӕр+, ӕмӕ сӕ балхӕнынӕн+ 47 алы адӕймаджы тыххӕй дӕр хъуамӕ райсай фӕйнӕ фондз сиклы*+, сыгъдӕг бынаты сиклтӕй. Сиклы ис дыууын герӕйы+. 48 Ӕмӕ уыцы ӕхца хъуамӕ раттай Ааронмӕ ӕмӕ йӕ фырттӕм, Израилы фыццаггуырдтӕ цал адӕймаджы фылдӕр сты, уал адӕймаджы тыххӕй». 49 Гъемӕ Моисей ӕрӕмбырд кодта ӕхца, Израилы фыццаггуырдтӕ левиттӕй цал адӕймаджы фылдӕр уыдысты, уал адӕймаджы тыххӕй. 50 Израилы фыццаггуырдты тыххӕй райста иу мин ӕртӕсӕдӕ ӕхсай фондз сиклы, сыгъдӕг бынаты сиклтӕй. 51 Уый фӕстӕ Моисей уыцы ӕхцатӕ Йегъовӕйы фӕдзӕхстмӕ гӕсгӕ радта Ааронмӕ ӕмӕ йӕ фырттӕм, Йегъовӕ Моисейӕн куыддӕриддӕр загъта, афтӕ.