Ӕмбисӕндтӕ

25 Адон дӕр сты Соломоны ӕмбисӕндтӕ+. Ӕрӕмбырд сӕ кодтой ӕмӕ сӕ рафыстой Иудӕйы паддзах Езекийы адӕм+.

2 Хуыцауӕн кад хӕссы, хъуыддаг ӕмбӕхстӕй кӕй дары, уый+; паддзӕхтӕн та кад хӕссы, хъуыддаг кӕй равзарынц, уый+.

3 Арвы бӕрзӕнд+, зӕххы арф+ ӕмӕ паддзахы зӕрдӕ – нӕй сын раиртасӕн+.

4 Ӕвзистӕй чъизитӕ рахицӕн кӕн, ӕмӕ иууылдӕр сыгъдӕгӕй рацӕудзӕн+.

5 Паддзахы цурӕй фесаф фыдгӕнӕджы+, ӕмӕ йӕ паддзахбадӕн рӕстдзинады фӕрцы фидар лӕудзӕн+.

6 Паддзахы раз дӕхи бӕрзонд ма ӕвӕр+ ӕмӕ-иу номдзыд лӕгты бынаты ма ’рлӕуу+. 7 Цӕйнӕфӕлтау дӕ, зонгӕ кӕимӕ дӕ, уыцы кадджын лӕджы цӕсты фегад кӕна+, фӕлтау дын йӕхӕдӕг зӕгъӕд, мӕнӕ-ма ам ӕрлӕуу, зӕгъгӕ+.

8 Адӕймагыл бахъаст кӕныныл тагъд ма кӕн, науӕд дӕ тӕрхоны фӕстагмӕ ӕгады бынаты куы сӕвӕра, уӕд куыд кӕндзынӕ?+ 9 Хъуыддаг дӕхӕдӕг равзар йемӕ+, ӕмӕ йын йӕ сусӕг ныхас ма радзур+, 10 уымӕн ӕмӕ йӕ кӕмӕн зӕгъай, уый дын бауайдзӕф кӕндзӕн ӕмӕ де ’фхӕрӕн ныхӕстӕ фӕстӕмӕ нал райсдзынӕ.

11 Сызгъӕрин фӕткъуытӕ ӕвзист нывӕфтыд къусты мидӕг куыд фидауынц, афтӕ фидауы, йӕ афоныл кӕй зӕгъай, ахӕм ныхас+.

12 Ныхасмӕ чи байхъусы, уымӕн зондджын уайдзӕфгӕнӕг у сызгъӕрин хъусцӕджы хуызӕн, хуыздӕр сызгъӕринӕй конд аивгӕнӕны хуызӕн+.

13 Хуымгӕрдӕнты афон миты уазал куыд уа+, афтӕ у иузӕрдион минӕвар, чи йӕ рарвиты, уыдонӕн – йӕ хицӕутты* ног хъарутӕ бауадзы+.

14 Йӕхицӕй чи ӕппӕлы, лӕвар скӕндзынӕн, зӕгъгӕ, фӕлӕ йӕ дӕтгӕ та чи нӕ ракӕны, уыцы адӕймаг ӕнӕдон мигътӕ ӕмӕ ӕнӕкъӕвда дымгӕйӕ уӕлдай нӕу+.

15 Фӕразондзинад ӕрфӕлмӕн кӕны хицауы зӕрдӕ дӕр, ӕмӕ фӕлмӕн ӕвзаг стӕг дӕр асӕтты+.

16 Кӕд мыд ссардтай, уӕд дзы дӕ фаг бахӕр+. Ӕгӕр бирӕ дзы куы бахӕрай, уӕд дзы дӕ зӕрдӕ схӕццӕ уыдзӕн+.

17 Искӕй хӕдзармӕ арӕх ма цу, цӕмӕй дӕ ма схъыг уа ӕмӕ дӕ йе сӕфт ма фена.

18 Иннӕйы ныхмӕ мӕнгӕвдисӕн чи лӕууы, уый уӕззау хъилӕй, хъамайӕ ӕмӕ цыргъ фатӕй уӕлдай нӕу+.

19 Зын сахат мӕнгард чи разына, ахӕм адӕймагыл зӕрдӕ дарын саст дӕндаг ӕмӕ къуылых къахӕй уӕлдай нӕу+.

20 Уазал бон йӕ дзаумӕттӕ чи ласы, уыцы адӕймаг, содӕйыл туаг сӕн чи кӕны ӕмӕ ӕнкъард зӕрдӕйӕн зарджытӕ чи зары, уымӕй уӕлдай нӕу+.

21 Йе сӕфт дӕ чи уыны, уый ӕххормаг куы уа, уӕд ын къӕбӕр бахӕрын кӕн, дойны йын куы уа, уӕд ын дон ратт+. 22 Афтӕмӕй йын йӕ сӕрыл цӕхӕртӕ ӕрӕмбырд кӕндзынӕ+, ӕмӕ дын Йегъовӕ раарфӕ кӕндзӕн+.

23 Цӕгатаг дымгӕ, арӕг сылгоймагау тухитӕ кӕнгӕ, ӕрбахӕссы тыхджын къӕвда+, сусӕг ныхас чи ахъӕр кӕны, уый та иннӕты йӕ ныхмӕ скӕны+.

24 Хъуырхъуыргӕнаг усимӕ иу хӕдзары цӕрыны бӕсты фӕлтау цары къуымы цӕр+.

25 Уазал дон фӕллад удӕн куыд уа+, раст афтӕ у хорз хабар дард бӕстӕйӕ+.

26 Рӕстгӕнӕг фыдгӕнӕджы раз фидар куы нӕ лӕууа, уӕд чъизи суадонӕй ӕмӕ, чи нал бӕззы, ахӕм цъайӕ уӕлдай нӕу+.

27 Ӕгӕр бирӕ мыд хӕрын хорз нӕу+. Ӕмӕ дӕхицӕн кад куы агурай, уӕд уый кад у?+

28 Йӕхиуыл* хӕцын чи нӕ зоны, уый, кӕй ныппырх кодтой ӕмӕ ӕнӕ къултӕй чи баззад, ахӕм горӕтӕй уӕлдай нӕу+.