Лукайы

19 Уый фӕстӕ Йесо бацыд Иерихонмӕ+, йӕ фӕндаг ууылты акодта. 2 Уым та уыд иу адӕймаг, Закхей, зӕгъгӕ,– хъалонисджыты хицау ӕмӕ хъӕздыг лӕг. 3 Закхейы тынг фӕндыд Йесойы фенын+, фӕлӕ ныллӕг кӕй уыди, уымӕ гӕсгӕ йӕм адӕмӕй нӕ зынд. 4 Гъемӕ размӕ алыгъд ӕмӕ йӕ цӕмӕй федтаид, уый тыххӕй хъӕддаг легъуибӕласмӕ сбырыд, уымӕн ӕмӕ Йесойӕн йӕ фӕндаг ууылты уыд. 5 Йесо уырдӕм куы бахӕццӕ, уӕд ӕм уӕлӕмӕ скаст ӕмӕ йӕм сдзырдта: «Закхей, рӕвдздӕр дӕлӕмӕ ӕрхиз, абон дӕ хӕдзары ӕрлӕудзынӕн». 6 Уый дӕр уайтагъд ӕрхызт, ӕмӕ йӕ цингӕнгӕ суазӕг кодта. 7 Фӕлӕ адӕм уый куы федтой, уӕд се ’ппӕт дӕр хъуыр-хъуыр кӕнын райдыдтой+, уыцы тӕригъӕдджын адӕймагмӕ куыд ӕрлӕууыд, зӕгъгӕ. 8 Закхей та сыстад ӕмӕ Йесойӕн загъта: «Хицау, мӕ мулкӕн йе ’мбис ратдзынӕн мӕгуыртӕн, ӕмӕ хӕрамӕй кӕмӕй цы байстон+, уымӕн ӕй цыппар ахӕмӕй бафиддзынӕн»+. 9 Ӕмӕ йын уӕд Йесо загъта: «Абон ацы хӕдзармӕ ӕрцыд ирвӕзындзинад, уымӕн ӕмӕ ацы адӕймаг дӕр Авраамы фырт у+. 10 Адӕймаджы Фырт та уымӕн ӕрцыд, цӕмӕй, чи фесӕфт, уыдоны бацагура ӕмӕ сӕ фервӕзын кӕна»+.

11 Йӕ ахуыргӕнинӕгтӕ уыдӕттӕм куы хъуыстой, уӕд ма сын радзырдта фӕсномыг ныхас дӕр, уымӕн ӕмӕ йӕ Иерусалиммӕ бирӕ нал хъуыд, ӕмӕ йӕ ахуыргӕнинӕгтӕ та афтӕ ӕнхъӕлдтой, ӕмӕ Иерусалиммӕ куы бацӕуа, Хуыцауы паддзахад растдӕр уӕд кӕй раргом уыдзӕн+. 12 Гъемӕ сын загъта: «Кадджын мыггагӕй чи уыд, иу ахӕм лӕг цыди дард бӕстӕм, цӕмӕй паддзахы бартӕ райстаид ӕмӕ фӕстӕмӕ ӕрыздӕхтаид+. 13 Ӕмӕ йӕ дӕс цагъармӕ фӕдзырдта, радта сын дӕс минӕйы* ӕмӕ сын загъта: „Ме ссыдмӕ сӕ спайда кӕнут“+. 14 Фӕлӕ дзы йе ’мбӕстӕгтӕ уыдтой се сӕфт+, ӕмӕ йын йӕ фӕдыл минӕвӕртты арвыстой, нӕ нӕ фӕнды, цӕмӕй нын ацы адӕймаг паддзах уа, зӕгъгӕ+.

15 Уыцы лӕг паддзахы бартӕ куы райста ӕмӕ фӕстӕмӕ куы ’рыздӕхт, уӕд фӕдзурын кодта, ӕвзист ӕхцатӕ кӕмӕн радта, уыцы цагъартӕм, цӕмӕй сӕ чи цас бакуыста, уый базыдтаид+. 16 Сӕ иу ӕм ӕрбацыд ӕмӕ йын загъта: „Хицау, дӕ минӕйӕ дын дӕс минӕйы бакуыстон“+. 17 Уый та йын загъта: „Тынг хорз, мӕ дзӕбӕх цагъар! Гыццыл хъуыддаджы дӕхи ӕууӕнкджынӕй кӕй равдыстай, уый тыххӕй дӕ ӕвӕрын дӕс горӕты сӕргъы“+. 18 Уӕд та йӕм бацыд иннӕ цагъар ӕмӕ йын загъта: „Хицау, дӕ минӕйӕ дын фондз минӕйы бакуыстон“+. 19 Ӕмӕ уымӕн дӕр загъта: „Дӕу та хицауӕй ӕвӕрын фондз горӕтӕн“+. 20 Ӕрбацыд ма йӕм цагъартӕй ноджыдӕр иу, ӕмӕ йын уый та загъта: „Хицау, мӕнӕ дӕ минӕ, хӕцъилы тыхтӕй йӕ фӕдардтон. 21 Тӕрсгӕ дӕ кодтон, уымӕн ӕмӕ карз лӕг дӕ ӕмӕ, ӕхцайы куыстгӕнджытӕм цы нӕ раттыс, уымӕй дӕр дӕхион ратоныс, ӕмӕ, цы нӕ байтауыс, уый дӕр ӕркӕрдыс“+. 22 Уӕд ын уый загъта: „О ӕвзӕр цагъар, дӕхи дзыхӕй+ дын тӕрхон кӕндзынӕн. Зӕгъыс, ды зыдтай, ӕз карз лӕг кӕй дӕн ӕмӕ, ӕхцайы куыстгӕнджытӕм цы нӕ раттын, уымӕй дӕр мӕхион ратонын, ӕмӕ, цы нӕ байтауын, уый дӕр ӕркӕрдын?+ 23 Ӕмӕ мын уӕд ме ’взист ӕхца ӕхцайы куыстгӕнджытӕм цӕуылнӕ радтай? Уӕд ӕй, фӕстӕмӕ ӕрыздӕхгӕйӕ, проценттимӕ райстаин“+.

24 Уый фӕстӕ, йӕ разы чи лӕууыд, уыдонӕн загъта: „Райсут ын йӕ минӕ ӕмӕ йӕ раттут, дӕс минӕйы кӕмӕ ис, уымӕн“+. 25 Фӕлӕ йын уыдон загътой: „Хицау, ӕмӕ уымӕ дӕс минӕйы куы ис!“– 26 „Зӕгъын уын: кӕмӕ ис, уымӕн ратдзысты ноджы фылдӕр. Кӕмӕ нӕй, уымӕн та, цы йӕм ис, уый дӕр байсдзысты+. 27 Ме знӕгты та, кӕй нӕ фӕндыд, цӕмӕй сын паддзах уон, уыдоны ардӕм ӕрбакӕнут ӕмӕ сӕ ам мӕ разы амарут“»+.

28 Уыдӕттӕ куы радзырдта, уӕд йӕ фӕндаг адарддӕр кодта Иерусалиммӕ+. 29 Оливӕбӕлӕсты хох+ кӕй хонынц, ууыл цы Виффаги ӕмӕ Вифани ис, уырдӕм куы баввахс, уӕд йӕ ахуыргӕнинӕгтӕй дыууӕйы арвыста+ 30 ӕмӕ сын загъта: «Дӕлӕ разӕй цы хъӕу уынут, уырдӕм ацӕут. Хъӕумӕ куы бацӕуат, уӕд дзы ссардзыстут, адӕймаг кӕуыл нӕма бадт, ахӕм къӕлӕу бастӕй. Суӕгъд-иу ӕй кӕнут ӕмӕ-иу ӕй ардӕм ӕрбакӕнут+. 31 Мыййаг уӕ исчи куы бафӕрса: „Цӕмӕн ӕй уӕгъд кӕнут?“, уӕд-иу ын зӕгъут, Хицауы хъӕуы, зӕгъгӕ»+. 32 Уыдон дӕр ацыдысты, ӕмӕ сын куыд загъта, афтӕ рауад – къӕлӕуы уым ссардтой+. 33 Фӕлӕ къӕлӕуы куы уӕгъд кодтой, уӕд сӕ йӕ хицӕуттӕ бафарстой: «Къӕлӕуы цӕмӕн уӕгъд кӕнут?»+ 34 Уыдон сын загътой: «Хицауы хъӕуы»+. 35 Гъемӕ йӕ Йесомӕ ӕрбакодтой, стӕй йыл се ’ддаг дарӕс ӕрӕппӕрстой ӕмӕ Йесойы къӕлӕуыл сбадын кодтой+.

36 Ӕмӕ къӕлӕуыл куы фӕцӕйцыд+, уӕд се ’ддаг дарӕс фӕндагыл тыдтой+. 37 Фӕндаг Оливӕбӕлӕсты хохӕй кӕм фӕуырдыг, уырдӕм куыддӕр бахӕццӕ, афтӕ йӕ ахуыргӕнинӕгтӕ иууылдӕр,– дуне адӕм,– райдыдтой цин кӕнын ӕмӕ, цы диссӕгтӕ* федтой, ӕппӕт уыдӕтты тыххӕй Хуыцауы кадджын кӕнын+: 38 «Арфӕгонд у, Йегъовӕйы номӕй чи ’рцӕуы, уыцы Паддзах!+ Фарн уӕлӕрвты ӕмӕ кад бӕрзондылбадӕг Хуыцауӕн!»+ 39 Фӕлӕ, адӕмимӕ чи уыдис, уыцы фарисейтӕй чидӕртӕ Йесойӕн загътой: «Ахуыргӕнӕг, дӕ ахуыргӕнинӕгты басабыр кӕн»+. 40 Уый та сын загъта: «Зӕгъын уын: уыдон куы нӕ дзурой, уӕд дуртӕ+ ныхъхъӕр кӕндзысты».

41 Горӕтмӕ куы баввахс ӕмӕ йӕм куы акаст, уӕд ыл ныккуыдта+: 42 «Тӕхуды, ӕмӕ ацы бон, фарн цы хӕссы, уый куы бамбӕрстаис+... Фӕлӕ ныр уый дӕуӕй ӕмбӕхст у+. 43 Уымӕн ӕмӕ дыл ахӕм бон акӕндзӕн, ӕмӕ дын де знӕгтӕ дӕ алыварс цыргъ хъӕдтӕй+ къул сараздзысты+, ӕртыхсдзысты+ дыл ӕмӕ дӕ алырдыгӕй ӕрӕлхъивдзысты+. 44 Дӕхи дӕр дын ныппырх кӕндзысты ӕмӕ дын дӕ хъӕбулты дӕр дӕ мидӕг ныццӕгъддзысты+, ӕмӕ дӕ дур дурыл нал баззайдзӕн+, уымӕн ӕмӕ дӕм Хуыцау бӕрӕггӕнӕг кӕд ӕрцыд, уыцы рӕстӕг нӕ базыдтай»+.

45 Уый фӕстӕ Йесо бацыд кувӕндонмӕ ӕмӕ дзы цы уӕйгӕнджытӕ уыд, уыдоны ратардта+ 46 ӕмӕ сын загъта: «Афтӕ фыст у: „Мӕ хӕдзар уыдзӕн кувӕн хӕдзар“+, сымах та дзы абырджыты лӕгӕт сарӕзтат»+.

47 Ӕмӕ алы бон дӕр кувӕндоны адӕмы ахуыр кодта. Сауджынты хистӕртӕ, чиныджыдӕснытӕ ӕмӕ дзырддзӕугӕ лӕгтӕ та, куыд ӕй фесӕфтаиккой, уый фадат агуырдтой+. 48 Фӕлӕ ницы амал ардтой, уымӕн ӕмӕ адӕмы се ’ппӕты дӕр афтӕ тынг фӕндыд йӕ ныхӕстӕм хъусын, ӕмӕ йӕ уӕгъд нӕ уагътой+.