Йезекил

10 Ӕз акастӕн ӕмӕ федтон, херувимты сӕрмӕ цы пъол+ уыд, уый уӕлейӕ кӕй уыди сапфирдуры+ хуызӕн цыдӕр, паддзахбадӕны+ хуызӕн – уый уыди сӕ сӕрмӕ. 2 Ӕмӕ Хуыцау, кӕттаг+ дарӕсы чи уыд, уыцы лӕгӕн загъта: «Зилгӕ чи кӕны, уыцы цӕлхыты ’хсӕн+, херувимты бынмӕ, бацу, ӕмӕ, херувимты ’хсӕн чи ис, уыцы судзгӕ зынгтӕй+ дӕ дыууӕ къухы дзаг райс ӕмӕ сӕ горӕтыл ӕркал»+. Ӕмӕ уый дӕр мӕ цӕстыты раз уырдӕм бацыд.

3 Уыцы лӕг уырдӕм куы бацыд, уӕд херувимтӕ лӕууыдысты хӕдзарӕн рахизырдыгӕй, ӕмӕ мидӕггаг кӕрт дзаг уыди мигъӕй+. 4 Йегъовӕйы кад+, херувимты сӕрмӕ чи уыди, уыцы кад бацыд кувӕндоны бахизӕнмӕ, ӕмӕ хӕдзар иууылдӕр мигъӕй байдзаг+. Ӕмӕ кӕрт дӕр дзаг уыди Йегъовӕйы кады рухсӕй. 5 Херувимты базырты уынӕр хъуысти+ ӕддаг кӕртмӕ, цыма Ӕппӕтхъомысджын Хуыцауы хъӕлӕс нӕрыд, уыйау+.

6 Кӕттаг дарӕсы чи уыди, уыцы лӕгӕн куы загъта, райс зынгтӕ, зилгӕ чи кӕны, уыцы цӕлхыты ’хсӕнӕй, херувимты ’хсӕнӕй, зӕгъгӕ, уӕд уый бацыд ӕмӕ цалхы раз слӕууыд. 7 Уӕд херувимтӕй иу йӕ къух байвӕзта, се ’хсӕн чи уыди+, уыцы артмӕ+, райста зынгтӕй ӕмӕ сӕ ӕркодта, кӕттаг+ дарӕсы чи уыди, уыцы лӕджы къухты. Уый сӕ райста ӕмӕ рацыд. 8 Херувимтӕн сӕ базырты бын зынди адӕймаджы къухты хуызӕн къухтӕ+.

9 Ӕз акастӕн ӕмӕ федтон, херувимты раз кӕй уыди цыппар цалхы: иу херувимы раз дӕр цалх ӕмӕ иннӕ херувимы раз дӕр цалх+. Ӕмӕ цӕлхытӕ цыхуызӕн уыдысты, уый уыди хризолит дуры ӕрттывды хуызӕн. 10 Цыппар цалхы дӕр уыдысты иухуызон – уыдысты, цыма иу цалхы мидӕг ӕндӕр цалх уыди, афтӕ+. 11 Уыдон цыдысты цыппарырдӕм дӕр. Цӕугӕ-цӕуын-иу никӕцырдӕм фӕзылдысты, уымӕн ӕмӕ-иу цыдысты, сӕр кӕцырдӕм уыд здӕхт, уыцырдӕм. Цӕугӕ-цӕуын-иу никӕцырдӕм фӕзылдысты+. 12 Сӕ буӕрттӕ ӕнӕхъӕнӕй дӕр, сӕ фӕсонтӕ дӕр, сӕ къухтӕ дӕр, сӕ базыртӕ дӕр ӕмӕ цӕлхытӕ дӕр алырдыгӕй уыдысты цӕстытӕй йедзаг+. Цыппарӕй алкӕцыйӕн дӕр йӕ разы уыди йӕхи цалх. 13 Ӕмӕ фехъуыстон, чидӕр цӕлхытӕм куыд фӕхъӕр кодта: «Зилгӕ чи кӕны, уыцы цӕлхытӕ, цӕугӕ ут!»

14 Алкӕцыйӕн дӕр дзы уыди цыппар цӕсгомы+. Фыццаг цӕсгом уыди херувимы цӕсгом, дыккаг – зӕххон адӕймаджы цӕсгом+, ӕртыккаг – домбайы цӕсгом ӕмӕ цыппӕрӕм – цӕргӕсы цӕсгом+.

15 Херувимтӕ-иу зӕххӕй фӕхицӕн сты+ – уыдон уыдысты, Ховары+ цӕугӕдоны раз кӕй федтон, уыцы уӕларвон удгоймӕгтӕ. 16 Ӕмӕ-иу херувимтӕ куы цыдысты, уӕд-иу сӕ фарсмӕ цыдысты цӕлхытӕ дӕр+. Ӕмӕ-иу херувимтӕ сӕ базыртыл куы схӕцыдысты, цӕмӕй зӕххӕй сӕхи уӕлӕмӕ сисой, уӕддӕр-иу цӕлхытӕ иннӕрдӕм нӕ фӕзылдысты, уыдысты-иу сӕ фарсмӕ+. 17 Уыдон-иу куы ӕрлӕууыдысты, уӕд-иу адон дӕр ӕрлӕууыдысты. Уыдон-иу зӕххӕй куы фӕхицӕн сты+, уӕд-иу адон дӕр семӕ зӕххӕй фӕхицӕн сты, уымӕн ӕмӕ, уӕларвон удгоймӕгтӕ цы тыхӕй* хайджын уыдысты, уыцы тых уыди цӕлхыты мидӕг+.

18 Йегъовӕйы кад+ кувӕндоны бахизӕнӕй ацыд ӕмӕ ӕрлӕууыд херувимты сӕрмӕ+. 19 Херувимтӕ сӕ базыртыл схӕцыдысты ӕмӕ мӕ цӕстыты раз зӕххӕй фӕхицӕн сты+. Куы ацыдысты, уӕд цӕлхытӕ дӕр уыдысты сӕ фарсмӕ ӕмӕ ӕрлӕууыдысты Йегъовӕйы хӕдзары кулдуарӕн йе скӕсӕйнаг бахизӕны раз. Ӕмӕ сӕ сӕрмӕ уыди Израилы Хуыцауы кад, уӕлейӕ чи ’рцыд, уый.

20 Уыдон уыдысты, Израилы Хуыцауы паддзахбадӕны бынмӕ Ховары цӕугӕдоны+ раз кӕй федтон, уыцы уӕларвон удгоймӕгтӕ+. Ӕмӕ йӕ бамбӕрстон, уыдон херувимтӕ кӕй уыдысты. 21 Цыппарӕй алкӕцыйӕн дӕр уыди цыппар цӕсгомы+ ӕмӕ цыппар базыры, ӕмӕ сӕ базырты бын уыди адӕймаджы къухты хуызӕн къухтӕ. 22 Сӕ цӕсгӕмттӕ та уыдысты, Ховары цӕугӕдоны раз кӕй федтон, уыцы цӕсгӕмтты хуызӕн, растдӕр ахӕмтӕ+. Херувимтӕй алкӕцы дӕр цыди, йӕ цӕсгом кӕцырдӕм уыд, уыцырдӕм+.