Захари

3 Хуыцау мын равдыста хистӕр сауджын Йесойы+. Йесо лӕууыд Йегъовӕйы зӕды раз, йӕ рахиз фарс та лӕууыд Сайтан*+, цӕмӕй йӕ ныхмӕ цыдаид+. 2 Уӕд Йегъовӕйы зӕд+ Сайтанӕн загъта: «Йегъовӕ дын уӕд тӕрхонгӕнӕг+, Сайтан! Иерусалим чи равзӕрста, уыцы Хуыцау Йегъовӕ дын уӕд тӕрхонгӕнӕг!+ Ацы адӕймаг, артӕй цы ӕрдӕгсыгъд суг раскъӕфынц, уый хуызӕн нӕу?»+

3 Йесойыл та уыди чъизи дарӕс+, ӕмӕ афтӕмӕй лӕууыд зӕды раз. 4 Ӕмӕ зӕд, йӕ разы чи лӕууыд, уыдонӕн загъта: «Йӕ чъизи дарӕс ын раласут». Стӕй Йесойӕн загъта: «Уыныс, дӕ тӕригъӕдӕй дӕ ссыгъдӕг кодтон+, ӕмӕ дыл ныр скӕндзысты бӕрӕгбоны уӕлӕдарӕс»+.

5 Уӕд ӕз загътон: «Йӕ сӕрыл ын сыгъдӕг сарыхъ ӕркӕнӕнт»+. Ӕмӕ йыл сыгъдӕг сарыхъ ӕмӕ уӕлӕдарӕс скодтой. Йегъовӕйы зӕд дӕр уым лӕууыд. 6 Ӕмӕ Йегъовӕйы зӕд Йесойӕн бафӕдзӕхста: 7 «Афтӕ зӕгъы ӕфсӕдты хицау Йегъовӕ: „Мӕ фӕндӕгтыл мын куы цӕуай ӕмӕ дыл мӕ разы цы хӕс ис, уый куы ’ххӕст кӕнай+, уӕд мӕ адӕмӕн* тӕрхон кӕндзынӕ+ ӕмӕ мын мӕ кӕртытӕм дӕ хъус дардзынӕ. Ӕмӕ дын бар ратдзынӕн, цӕмӕй-иу, ам чи ис, уыдонимӕ мӕ разы ’рлӕууай“.

8 „Хистӕр сауджын Йесо, байхъус-ма, дӕ хорзӕхӕй, дӕхӕдӕг дӕр ӕмӕ де ’мбӕлттӕ дӕр, дӕ разы чи бады ӕмӕ нысанӕн лӕвӕрд чи у, уыдон+. Мӕнӕ фӕкӕнын мӕ лӕггадгӕнӕджы+, йӕ ном хуыйны Тау!+ 9 Уый у, Йесойы раз кӕй ӕрӕвӕрдтон, уыцы дур!+ Ацы иу дурыл ис авд цӕсты+. Ӕз ыл фыстытӕ скъахдзынӕн+,– зӕгъы ӕфсӕдты хицау Йегъовӕ,– ӕмӕ ацы бӕстӕйы тӕригъӕд иу бонмӕ фесафдзынӕн“+.

10 „Уыцы бон,– зӕгъы ӕфсӕдты хицау Йегъовӕ,– сымах баддзыстут сӕнӕфсиры бын ӕмӕ легъуибӕласы бын ӕмӕ кӕрӕдзиимӕ ныхас кӕндзыстут“»+.