Матфейы

9 Ӕмӕ уӕд Йесо сбадт бӕлӕгъы, ахызт иннӕ фарсмӕ ӕмӕ бацыд йӕ райгуырӕн горӕтмӕ+. 2 Уым ӕм чидӕртӕ хуыссӕныл ӕрбахастой, паралич кӕй ныццавта, ахӕм лӕджы+. Йесо сын федта сӕ уырнындзинад ӕмӕ рынчынӕн загъта: «Ма тыхс, мӕ хъӕбул, хатыр дын сты дӕ тӕригъӕдтӕ»+. 3 Чиныджыдӕснытӕй чидӕртӕ та сӕхинымӕр дзырдтой: «Ай мӕнӕ Хуыцауы куы фауы!»+ 4 Йесо сын сӕ хъуыдытӕ зыдта+ ӕмӕ сын загъта: «Ахӕм ӕвзӕр хъуыдытӕ цӕмӕн ис уӕ зӕрдӕты?+ 5 Цы ӕнцондӕр у зӕгъын: „Хатыр дын сты дӕ тӕригъӕдтӕ“ ӕви: „Сыст ӕмӕ цу“?+ 6 Фӕлӕ мӕ фӕнды, цӕмӕй йӕ зонат: Адӕймаджы Фыртмӕ ис уыцы бар, цӕмӕй зӕххыл тӕригъӕдтӕ хатыр кӕна...»+ Ӕмӕ рынчынӕн загъта: «Сыст, сис дӕ хуыссӕн ӕмӕ уӕхимӕ ацу»+. 7 Уый дӕр сыстад ӕмӕ сӕхимӕ ацыд. 8 Адӕм уый куы федтой, уӕд сӕ тас бацыд, ӕмӕ кадджын кодтой+, адӕймагӕн ахӕм бар чи радта+, уыцы Хуыцауы.

9 Йесо уырдыгӕй куы фӕцӕйцыд, уӕд хъалонӕмбырдгӕнӕны бадгӕ федта иу лӕджы, Матфей, зӕгъгӕ, ӕмӕ йын загъта: «Мӕ фӕдыл рацу»+. Уый дӕр сыстад ӕмӕ йӕ фӕдыл ацыд+. 10 Фӕстӕдӕр, иу хӕдзары фынгыл куы бадт*+, уӕд уырдӕм ӕрбацыд бирӕ хъалонисджытӕ ӕмӕ тӕригъӕдджынтӕ, ӕмӕ Йесо ӕмӕ йӕ ахуыргӕнинӕгтимӕ ӕрбадтысты. 11 Фӕлӕ фарисейтӕ уый куы федтой, уӕд ын йӕ ахуыргӕнинӕгтӕн загътой: «Уӕ ахуыргӕнӕг хъалонисджытимӕ ӕмӕ тӕригъӕдджынтимӕ иу фынгыл цӕмӕн бады?»+ 12 Уый фехъусгӕйӕ Йесо загъта: «Дохтыр+ рынчынты хъӕуы, ӕнӕниз чи у, уыдоны нӕ, фӕлӕ. 13 Уӕдӕ ацӕут ӕмӕ уал базонут, цӕуыл дзурӕг сты ацы ныхӕстӕ: „Мӕн нывӕндтӕ нӕ хъӕуы, фӕлӕ, фӕлмӕнзӕрдӕ уат, уый“+. Ӕз рӕстгӕнджыты ӕрхонынмӕ не ’рцыдтӕн, фӕлӕ тӕригъӕдджынты».

14 Уӕд ӕм ӕрбацыдысты Иоанны ахуыргӕнинӕгтӕ ӕмӕ йӕ бафарстой: «Мах дӕр ӕмӕ фарисейтӕ дӕр ком куы дарӕм, уӕд дӕ ахуыргӕнинӕгтӕ цӕуылнӕ дарынц ком?»+ 15 Йесо та сын загъта: «Сиахс+ цалынмӕ йе ’мбӕлттимӕ уа, уӕдмӕ цӕуыл хъуамӕ хъыг кӕной? Фӕлӕ ӕрцӕудзӕн ахӕм рӕстӕг, ӕмӕ сиахсы акӕндзысты+, ӕмӕ уӕд дардзысты ком+. 16 Зӕронд дарӕсыл ног хъуымацӕй ӕмпъузӕн ничи ӕвӕры, уымӕн ӕмӕ ног хъуымац куы сбада, уӕд дарӕсӕй ратондзӕн, ӕмӕ скъуыд ноджы стырдӕр фӕуыдзӕн+. 17 Уӕдӕ ног сӕн дӕр зӕронд лалымы ничи ныккӕны. Куы йӕ ныккӕнай, уӕд та лалым атондзӕн, ӕмӕ сӕн дӕр акӕлдзӕн, ӕмӕ лалым дӕр фесӕфдзӕн+. Фӕлӕ ног сӕн ныккӕнынц ног лалымы, ӕмӕ уӕд сӕн дӕр ӕнӕхъӕнӕй баззайы, ӕмӕ лалым дӕр»+.

18 Уыдӕттӕ сын куыд дзырдта, афтӕ йӕм ӕрбацыди иу хицау+, йӕ разы йӕ зонгуытыл ӕрхауд ӕмӕ йӕм бахатыд+: «Мӕ чызг афонмӕ амард+. Фӕлӕ цом, дӕ къух ыл ӕрӕвӕр, ӕмӕ райгас уа»+.

19 Йесо сыстад ӕмӕ йӕ фӕдыл ацыди. Йемӕ рацыдысты йӕ ахуыргӕнинӕгтӕ дӕр. 20 Ӕмӕ йӕм уӕд фӕстӕрдыгӕй бацыд, дыууадӕс азы тугцыдӕй+ чи удхар кодта, ахӕм сылгоймаг ӕмӕ йын йӕ уӕлӕдарӕсы хаутыл андзӕвыди+, 21 уымӕн ӕмӕ йӕхицӕн дзырдта: «Йӕ уӕлӕдарӕсыл дӕр ын куы андзӕвон, уӕд дӕр сдзӕбӕх уыдзынӕн»+. 22 Йесо фӕстӕмӕ фӕзылди, ауыдта йӕ ӕмӕ йын загъта: «Ма тӕрс, мӕ чызг, дӕ уырнындзинад дӕ фервӕзын кодта»+. Ӕмӕ уыцы сахат сылгоймаг йӕ низӕй фервӕзти+.

23 Йесо уыцы хицауы хӕдзармӕ куы бацыди+, уӕд дзы баййӕфта уадындзӕй цӕгъдджыты, стӕй бирӕ адӕмы тыхстӕй+, 24 ӕмӕ сын загъта: «Ӕддӕмӕ ахизут, чызг мӕлгӕ нӕ акодта, фынӕй у»+. Уыдон ыл худын райдыдтой+. 25 Куыддӕр адӕмы ӕддӕмӕ ракодтой, афтӕ Йесо бацыди, гыццыл чызгӕн йӕ къухыл рахӕцыд+, ӕмӕ чызг рабадт+. 26 Ӕмӕ хабар айхъуыст ӕппӕт уыцы бӕстӕйыл дӕр.

27 Йесо уырдыгӕй куы рацыд, уӕд йӕ фӕдыл бафтыд дыууӕ куырм лӕджы+ ӕмӕ хъӕр кодтой: «Давиды Фырт, батӕригъӕд нын кӕн!»+ 28 Хӕдзармӕ куы бахызт, уӕд ӕм уыцы дыууӕ куырм лӕджы бацыдысты, ӕмӕ сӕ Йесо бафарста: «Уырны уӕ+, мӕ бон уӕ кӕй у сдзӕбӕх кӕнын?» Уыдон ын дзуапп радтой: «Уырны, Хицау». 29 Уӕд сын сӕ цӕстытӕм бавнӕлдта+ ӕмӕ сын загъта: «Уӕ уырнындзинадмӕ гӕсгӕ уын уӕд». 30 Ӕмӕ цӕстӕй ракастысты. Стӕй сӕ Йесо тынг бафӕдзӕхста: «Афтӕ бакӕнут, ӕмӕ ацы хабар куыд ничи базона»+. 31 Фӕлӕ уыдон ацыдысты ӕмӕ ӕппӕт уыцы бӕстӕйыл йӕ кой айхъуысын кодтой+.

32 Ӕмӕ куы рацӕйцыдысты, уӕд Йесомӕ ӕрбакодтой, йӕ мидӕг хӕйрӕг кӕмӕн уыди, ахӕм ӕгомыг лӕджы+. 33 Ӕмӕ дзы хӕйрӕджы куы расырдта, уӕд ӕгомыг сдзырдта+. Адӕм дисы бафтыдысты+ ӕмӕ дзырдтой: «Ахӕм хабар Израилы никуыма ’рцыд». 34 Фарисейтӕ та дзырдтой: «Уый хӕйрӕджыты суры хӕйрӕджыты ӕлдары хъаруйӕ»+.

35 Йесо зылди ӕппӕт горӕттыл ӕмӕ хъӕутыл, ӕмбырдгӕнӕнты адӕмы ахуыр кодта, хъусын кодта Хуыцауы паддзахады тыххӕй хорз хабар ӕмӕ дзӕбӕх кодта алыхуызон низтӕй рынчынты ӕмӕ, нӕфӕразгӕ чи уыди, уыдоны+. 36 Ӕмӕ уыйбӕрц адӕмы куы федта, уӕд сын фӕтӕригъӕд кодта+, уымӕн ӕмӕ уыдысты ӕнӕфыййау фыстау, ӕфхӕрд ӕмӕ дзӕгъӕл+. 37 Ӕмӕ уӕд йӕ ахуыргӕнинӕгтӕн загъта: «Кӕрдинаг бирӕ ис, кусджытӕ та – гыццыл+. 38 Уӕдӕ курут хуымы Хицауӕй, цӕмӕй йӕ хуыммӕ кусджытӕ рарвита»+.