Лукайы

6 Иу сабатбон Йесо фӕцӕйцыдис хоры хуымтыл, ӕмӕ-иу йӕ ахуыргӕнинӕгтӕ ӕфсиртӕ ратыдтой+, сӕ къухты-иу сӕ аууӕрстой ӕмӕ-иу сын сӕ нӕмгуытӕ ахордтой+. 2 Уый фенгӕйӕ фарисейтӕй чидӕртӕ загътой: «Сабаты+ цы не ’мбӕлы, уый цӕмӕн аразут?»+ 3 Фӕлӕ сын Йесо загъта: «Никуы кастыстут, ӕви, Давид+ цы бакодта, йӕхӕдӕг дӕр ӕмӕ йӕ адӕм дӕр куы сӕххормаг сты, уӕд?+ 4 Хуыцауы хӕдзармӕ бацыд, нывонд дзултӕ йын радтой+, ӕмӕ дзы бахордта ӕмӕ дзы радта, йемӕ чи уыд, уыдонӕн дӕр, кӕд ӕмӕ дзы хӕрын ӕмбӕлди ӕрмӕстдӕр сауджынтӕн»+. 5 Стӕй ма сын ноджыдӕр загъта: «Адӕймаджы Фыртӕн сабатыл цӕуы йӕ бар»+.

6 Иннӕ сабат+ куы ’рхӕццӕ, уӕд бацыд ӕмбырдгӕнӕнмӕ ӕмӕ адӕмы ахуыр кодта. Уым уыди, йӕ рахиз къух хуыскъ кӕмӕн уыд, иу ахӕм лӕг+. 7 Чиныджыдӕснытӕ ӕмӕ фарисейтӕ та лӕмбынӕг кастысты+ Йесомӕ, кӕддӕра йӕ сабаты сдзӕбӕх кӕнид, зӕгъгӕ – куыд ӕй фӕаххосджын кодтаиккой, уый агуырдтой+. 8 Фӕлӕ сын уый зыдта сӕ хъуыдытӕ+ ӕмӕ, йӕ къух хуыскъ кӕмӕн уыд, уыцы лӕгӕн загъта: «Сыст ӕмӕ разӕй слӕуу». Лӕг сыстад ӕмӕ разӕй слӕууыд+. 9 Уӕд сын Йесо загъта: «Зӕгъут-ма мын, сабаты цы ’мбӕлы – хорз+ хъуыддаг саразын ӕви ӕвзӕр? Искӕй* фервӕзын кӕнын ӕви фесафын?»+ 10 Уый фӕстӕ се ’ппӕтыл дӕр йӕ цӕст ахаста ӕмӕ лӕгӕн загъта: «Дӕ къух-ма мӕм ӕрбадар». Уый йӕм йӕ къух бадардта, ӕмӕ йын адзӕбӕх+. 11 Уӕд уыдон мӕстӕй рафыхтысты, ӕмӕ, Йесойӕн цы бакӕной, ууыл уынаффӕ кӕнын байдыдтой+.

12 Иуафон Йесо хохмӕ кувынмӕ ссыди+, ӕмӕ ӕнӕхъӕн ӕхсӕв арвыста Хуыцаумӕ кувгӕйӕ+. 13 Куы сбон, уӕд та йӕ ахуыргӕнинӕгтӕм фӕдзырдта, ӕмӕ дзы дыууадӕсы равзӕрста, схуыдта сӕ апостолтӕ+. 14 Уыдон уыдысты: Симон,– Петр+ кӕй схуыдта, уый,– ӕмӕ йе ’фсымӕр Андрей, стӕй уӕд Иаков, Иоанн+, Филипп+, Варфоломей, 15 Матфей, Фома+, Алфейы фырт Иаков ӕмӕ, «зынгзӕрдӕ» кӕй схуыдтой, уыцы Симон+, 16 Иаковы фырт Иудӕ ӕмӕ Иудӕ Искариот, гадзрахатӕй йыл чи рацыд, уый+.

17 Уый фӕстӕ семӕ хохӕй дӕлдӕр ӕрцыд ӕмӕ уым фӕз ран ӕрлӕууыд. Уым уыдысты йӕ ахуыргӕнинӕгтӕ бирӕйӕ, стӕй уӕд дуне адӕм+ ӕгас Иудейӕйӕ, Иерусалимӕй ӕмӕ денджызы былгӕронӕй – Тир ӕмӕ Сидоны зӕххытӕй. Уыдон ӕрцыдысты, цӕмӕй йын йӕ ныхӕстӕм байхъуыстаиккой ӕмӕ сӕ низтӕй сдзӕбӕх уыдаиккой+. 18 Суанг ма-иу, дӕлимонтӕ тухӕнӕй кӕй мардтой, уыдон дӕр сдзӕбӕх сты. 19 Гъемӕ иууылдӕр архайдтой Йесойыл андзӕвыныл+, уымӕн ӕмӕ-иу дзы тых+ рацыд, ӕмӕ-иу се ’ппӕт дӕр сдзӕбӕх сты.

20 Стӕй йӕ ахуыргӕнинӕгтыл йӕ цӕст ахаста ӕмӕ дзурын райдыдта+:

«Амондджын стут, мӕгуыртӕ+, уымӕн ӕмӕ сымах у Хуыцауы паддзахад.

21 Амондджын стут, абон ӕххормаг+ чи у, уымӕн ӕмӕ бафсӕддзыстут+.

Амондджын стут, абон кӕугӕ чи кӕны, уымӕн ӕмӕ худдзыстут+.

22 Амондджын уыдзыстут, адӕм уӕ се сӕфт куы уыной+, хъоды уыл-иу куы бакӕной, фидистӕ уын куы кӕной ӕмӕ уӕ фыдгӕнджытӕ+ куы хоной Адӕймаджы Фырты тыххӕй. 23 Уыцы бон-иу уӕ зӕрдӕ райӕд ӕмӕ-иу цин кӕнут, уымӕн ӕмӕ уӕм уӕлӕрвты ӕнхъӕлмӕ кӕсы стыр хӕрзиуӕг,– ахӕм митӕ кодтой сӕ фыдӕлтӕ дӕр пехуымпартӕн+.

24 Фӕлӕ мӕгуыр уӕ бон, хъӕздгуытӕ+, уымӕн ӕмӕ царды цинӕй уӕ хай райстат+.

25 Мӕгуыр уӕ бон, абон ӕфсӕст чи у, уымӕн ӕмӕ ӕххормагӕй мӕлдзыстут+.

Мӕгуыр уӕ бон, абон худгӕ чи кӕны, уымӕн ӕмӕ маст кӕндзыстут ӕмӕ кӕудзыстут+.

26 Мӕгуыр уӕ бон, иууылдӕр уӕ хорзы кой куы кӕной, уымӕн ӕмӕ сӕ фыдӕлтӕ дӕр мӕнг пехуымпартӕй хорз дзырдтой+.

27 Фӕлӕ ӕз сымахӕн, чи мӕм хъусы, уыдонӕн, зӕгъын: уарзут уе знӕгты+, йе сӕфт уӕ чи уыны, уыдонӕн хорзы+ цӕут, 28 чи уӕ ӕлгъиты, уыдонӕн арфӕ кӕнут ӕмӕ уӕ чи ӕфхӕры, уыдоны тыххӕй кувут+. 29 Дӕ уадул дын чи ныццӕва+, уымӕ бадар иннӕ дӕр, ӕмӕ дын дӕ уӕлӕдарӕс чи иса+, уымӕн ратт дӕ хӕдон дӕр. 30 Чифӕнды дӕ цыфӕнды ма ракура – ратт ын ӕй+, ӕмӕ дӕ кӕд исчи исты райса, уӕд-иу ӕй фӕстӕмӕ ма ’рцагур.

31 Ӕмӕ уӕ куыд фӕнды, цӕмӕй уын адӕм уой, афтӕ сын ут уӕхӕдӕг дӕр+.

32 Кӕд сымах, чи уӕ уарзы, уыдоны уарзут, уӕд диссагӕй цы аразут? Тӕригъӕдджынтӕ дӕр уарзынц, чи сӕ уарзы, уыдоны+. 33 Ӕмӕ кӕд, хорзы уын чи цӕуы, сымах дӕр уыдонӕн цӕут хорзы, уӕд диссагӕй цы аразут? Афтӕ кӕнынц тӕригъӕдджынтӕ дӕр+. 34 Стӕй кӕд, фӕстӕмӕ райсын ӕнхъӕл кӕмӕй стут, уыдонӕн ӕфстау дӕттут ӕмӕ сӕ проценттӕ нӕ исут+, уӕд диссагӕй цы аразут? Тӕригъӕдджынтӕ дӕр тӕригъӕдджынтӕй проценттӕ нӕ фӕисынц, цӕмӕй фӕстӕмӕ райсой, цас радтой, уыйбӕрц+. 35 Фӕлӕ сымах уарзут уе знӕгты, хорзы цӕут ӕмӕ ӕфстау дӕттут, фӕстӕмӕ мацӕмӕ ӕнхъӕлмӕ кӕсут+, афтӕмӕй. Ӕмӕ уӕд райсдзыстут стыр хӕрзиуӕг ӕмӕ уыдзыстут Иунӕг Стыр Хуыцауы+ фырттӕ, уымӕн ӕмӕ уый, хорздзинад+ чи не ’мбары ӕмӕ фыдзӕрдӕ чи у, уыдонмӕ дӕр хӕларзӕрдӕ у. 36 Уӕдӕ уӕ Фыд куыд фӕлмӕнзӕрдӕ у, сымах дӕр афтӕ фӕлмӕнзӕрдӕ ут+.

37 Макӕй кой кӕнут, ӕмӕ уӕ кой дӕр никуы ничи ракӕндзӕн*+. Макӕй фаут, ӕмӕ сымах дӕр никуы ничи рафаудзӕн. Хатыр кӕнут, ӕмӕ уын уыдзӕни хатыр+. 38 Дӕттут, ӕмӕ уын дӕтдзысты+. Уӕ роны* уын ӕркӕндзысты рӕдауӕй, ӕрнӕмдзысты йӕ, сцӕгъддзысты йӕ ӕмӕ йӕ афтӕ байдзаг кӕндзысты, ӕмӕ ма дзы кӕлгӕ дӕр кӕндзӕн. Уымӕн ӕмӕ уӕхӕдӕг цы барӕнӕй барат, ахӕм барӕнӕй бардзысты сымахӕн дӕр»+.

39 Уый фӕстӕ ма сын ӕрхаста цӕвиттонтӕ дӕр: «Куырмӕн йӕ бон куырмы кӕнын у? Сӕ дыууӕ дӕр дзыхъхъы нӕ ныххаудзысты?+ 40 Афтӕ ахуыргӕнинаг йӕ ахуыргӕнӕгӕй уӕлдӕр нӕ вӕййы, фӕлӕ, алцыдӕр кӕмӕн бацамоной, уый суыдзӕн йӕ ахуыргӕнӕджы хуызӕн+. 41 Дӕхи цӕсты хъӕд куы нӕ уыныс, уӕд де ’фсымӕры цӕсты хъӕмпыхалмӕ цы кӕсыс?+ 42 Де ’фсымӕрӕн афтӕ куыд зӕгъыс: „Ме ’фсымӕр, ӕри-ма, дӕ цӕсты цы хъӕмпыхал ис, уый дын райсон“, кӕд ӕмӕ дӕхи цӕсты хъӕд нӕ уыныс?+ Цӕстмӕхъус! Раздӕр уал дӕхи цӕстӕй хъӕд раппар+, ӕмӕ уӕд, де ’фсымӕры цӕстӕй хъӕмпыхал куыд райсай, уый дӕр фендзынӕ+.

43 Хорз бӕласыл ӕвзӕр дыргътӕ куыд никуы ӕрзайы, афтӕ ӕвзӕр бӕласыл дӕр хорз дыргътӕ никуы ӕрзайы+. 44 Алы бӕлас дӕр йӕ дыргътӕй бӕрӕг вӕййы+. Дзырдӕн, сындзы къутӕрӕй легъуитӕ кӕнӕ сӕнӕфсир ничи ӕртоны+. 45 Хорз адӕймаг йӕ зӕрдӕйы хорздзинады къӕбицӕй рахӕссы хорздзинад+, ӕвзӕр адӕймаг та йе ’взӕрдзинады къӕбицӕй рахӕссы ӕвзӕрдзинад, уымӕн ӕмӕ адӕймаг, йӕ зӕрдӕ йедзаг цӕмӕй вӕййы, дзургӕ дӕр уый фӕкӕны+.

46 Цы уын зӕгъын, уый куы нӕ кӕнут, уӕд мӕм „Хицау! Хицау!“ цӕмӕн дзурут?+ 47 Мӕнмӕ чи ’рбацӕуы, мӕ ныхӕстӕм мын чи хъусы ӕмӕ сӕ чи ӕххӕст кӕны, уый кӕй хуызӕн у, уый уын зӕгъдзынӕн+: 48 уый у, хӕдзар аразгӕйӕ арф чи ныкъкъахта ӕмӕ йӕ хӕдзарӕн бындур къӕдзӕхыл чи ӕрӕвӕрдта, ахӕм лӕджы хуызӕн. Гъемӕ дон+ куы раивылд ӕмӕ уыцы хӕдзарыл куы ахӕцыд, уӕд ӕй нӕ фенкъуысын кодта, уымӕн ӕмӕ хорз арӕзт уыд+. 49 Мӕ ныхӕстӕ мын чи хъусы ӕмӕ сӕ чи не ’ххӕст кӕны+, уый та у, йӕ хӕдзар сыджытыл, ӕнӕ бындурӕй чи скодта, ахӕм лӕджы хуызӕн. Ӕмӕ йӕ хӕдзарыл дон куы ахӕцыд, уӕд хӕдзар ӕвиппайды ныккалд ӕмӕ ӕнӕхъӕнӕй дӕр ныппырх»+.