Матфейы
17 Ӕхсӕз боны фӕстӕ Йесо йемӕ акодта Петры, Иаковы ӕмӕ йе ’фсымӕр Иоанны ӕмӕ семӕ бӕрзонд хохмӕ ссыд+. 2 Уым сӕ разы йӕ хуыз аивта, ӕмӕ йӕ цӕсгом хурау ныррухс+, йӕ дарӕс та рухсау цӕхӕртӕ калын райдыдта+. 3 Ӕмӕ, мӕнӕ, сӕ разы февзӕрдысты Моисей ӕмӕ Илийа, ӕмӕ йемӕ ныхас кодтой+. 4 Уӕд Петр фӕцырд ӕмӕ Йесойӕн афтӕ бакодта: «Хицау, мӕнӕ нын цы хорз у ам! Кӕд дӕ фӕнды, уӕд ӕз ам ӕртӕ цатыры ӕрӕвӕрдзынӕн: иу дӕуӕн, иу Моисейӕн, иу та Илийайӕн»+. 5 Нырма дзургӕ кодта, афтӕ сӕ урс мигъ ӕрӕмбӕрзта, ӕмӕ мигъӕй райхъуысти хъӕлӕс: «Ай у мӕ уарзон Фырт, мӕ зӕрдӕйы фӕндиаг Фырт+. Хъусут ӕм»+. 6 Ахуыргӕнинӕгтӕ уый куы фехъуыстой, уӕд дӕлгоммӕ ӕрхаудтой – тынг фӕтарстысты+. 7 Фӕлӕ сӕм Йесо бацыди, бавнӕлдта сӕм ӕмӕ сын загъта: «Уӕлӕмӕ сыстут, ма тӕрсут»+. 8 Ӕмӕ хӕрдмӕ куы скастысты, уӕд дзы Йесойы йеддӕмӕ никӕйуал федтой+. 9 Хохӕй фӕстӕмӕ куы ’рцӕйцыдысты, уӕд сӕ Йесо бафӕдзӕхста: «Цалынмӕ Адӕймаджы Фырт мӕрдтӕй нӕ райгас уа, уӕдмӕ, цы федтат, уый тыххӕй макӕмӕн дзурут»+.
10 Уӕд ӕй йӕ ахуыргӕнинӕгтӕ бафарстой: «Ӕмӕ уӕд чиныджыдӕснытӕ афтӕ цӕмӕн дзурынц, раздӕр уал, дам, хъуамӕ Илийа ӕрцӕуа?»+ 11 Йесо сын дзуапп радта: «Илийа бӕгуыдӕр ӕрцӕудзӕн ӕмӕ ӕппӕт дӕр фӕстӕмӕ йӕ къахыл слӕууын кӕндзӕн+. 12 Фӕлӕ уын ӕз зӕгъын: Илийа ӕрцыд, фӕлӕ йӕ нӕ базыдтой, ӕмӕ сӕ цы фӕндыд, уый йын бакодтой. Афтӕ фӕхъизӕмар кӕндзӕн сӕ къухӕй Адӕймаджы Фырт дӕр»+. 13 Ӕмӕ уӕд ахуыргӕнинӕгтӕ бамбӕрстой, Аргъауӕг Иоанны кой сын кӕй кӕны+.
14 Адӕммӕ+ куы бахӕццӕ сты, уӕд ӕм иу лӕг бацыд, йӕ разы йӕ зонгуытыл ӕрхауд ӕмӕ йӕм бахатыд: 15 «Хицау, мӕ фыртӕн мын батӕригъӕд кӕн. Суртӕ кӕны ӕмӕ йӕ уавӕр тынг ӕвзӕр у, йӕхи арӕх куы арты баппары, куы та – доны+. 16 Дӕ ахуыргӕнинӕгтӕм дӕр ӕй бӕргӕ ӕрбакодтон, фӕлӕ йын сӕ бон ницы баци»+. 17 Уӕд Йесо загъта: «О ӕнӕуырнӕг ӕмӕ хӕлд фӕлтӕр!+ Цас ма уыдзынӕн уемӕ? Цас ма уын быхсдзынӕн? Ӕрбакӕнут-ма мӕм ӕй». 18 Ӕмӕ уӕд Йесо хӕйрӕгӕн карзӕй загъта, ныууадз ӕй, зӕгъгӕ, ӕмӕ дзы хӕйрӕг рацыд+, ӕмӕ лӕппу уыцы сахат сдзӕбӕх+. 19 Уый фӕстӕ Йесомӕ йӕ ахуыргӕнинӕгтӕ хибарӕй бацыдысты ӕмӕ йӕ бафарстой: «Махӕн ӕй нӕ бон цӕуылнӕ баци расурын?»+ 20 Уый сын загъта: «Уымӕн ӕмӕ уӕм уырнындзинад фаг нӕй. Ӕцӕг уын зӕгъын: хъыцъыйы нӕмыджы йас уырнындзинад уӕм куы уа ӕмӕ мӕнӕ ацы хохӕн куы зӕгъат, ардыгӕй сыст ӕмӕ уӕртӕ уым ӕрлӕуу, зӕгъгӕ, уӕд афтӕ бакӕндзӕн. Ӕмӕ ницы уыдзӕн ахӕмӕй, уӕ бон цы нӕ уа саразын»+. 21* ––
22 Иухатт Галилейӕйы иумӕ куы ӕрӕмбырд сты, уӕд сын Йесо загъта: «Адӕймаджы Фырты ратдзысты адӕмы къухтӕм+, 23 ӕмӕ йӕ уыдон амардзысты, фӕлӕ ӕртыккаг бон райгас уыдзӕн»+. Уыцы ныхӕсты фӕстӕ ахуыргӕнинӕгтӕ тынг ӕрӕнкъард сты+.
24 Капернауммӕ куы ’рцыдысты, уӕд, кувӕндонӕн хъалон* чи ӕмбырд кодта, уыцы лӕгтӕ Петрмӕ бацыдысты ӕмӕ йӕ бафарстой: «Уӕ ахуыргӕнӕг кувӕндонӕн хъалон нӕ фиды?»+ 25 Уый сын дзуапп радта: «Куыннӕ». Фӕлӕ хӕдзармӕ куы бахызт, уӕд ӕм Йесо фӕраздӕр ӕмӕ йын афтӕ: «Симон, куыд хъуыды кӕныс, зӕххон паддзӕхтӕ фиддон кӕнӕ хъалон кӕмӕй исынц? Сӕ фырттӕй ӕви ӕцӕгӕлӕттӕй?» 26 Ӕмӕ йын дзуапп куы радта, ӕцӕгӕлӕттӕй, зӕгъгӕ, уӕд ын Йесо загъта: «Уӕдӕ фыртты хъалон фидын нӕ хъӕуы. 27 Фӕлӕ ныл цӕмӕй сӕ зӕрдӕ ма фӕхуда+, уый тыххӕй ацу денджызмӕ, ӕнгуыр доны баппар, ӕмӕ фыццаг цы кӕсаг ӕрцахсай, уымӕн йӕ дзых бакӕн, ӕмӕ дзы уыдзӕн ӕвзист ӕхца*. Ӕмӕ сын уый ратт мӕн тыххӕй дӕр ӕмӕ дӕхи тыххӕй дӕр»+.