Екклесиаст

10 Хӕрздӕф сой мард бындзытӕй куыд сӕвзӕр вӕййы+ ӕмӕ куыд стӕф кӕны, афтӕ иу гыццыл ӕнӕзонд мийӕ къӕм абады, йӕ зонды тыххӕй кӕмӕн аргъ кӕнынц ӕмӕ кадджын чи у, уыцы адӕймаджы номыл+.

2 Зондджын адӕймагӕн йӕ зӕрдӕ ис рахизырдыгӕй+, ӕнӕзондӕн та – галиуырдыгӕй+. 3 Ӕмӕ ӕнӕзонд цыфӕнды фӕндагыл ма цӕуа+, уӕддӕр ӕм ӕмбаргӕдзинад нӕй, ӕмӕ алкӕмӕн дӕр дзуры, ӕнӕзонд кӕй у+.

4 Хицау дӕм куы смӕсты уа, уӕд дӕ бынат ма ныууадз+, уымӕн ӕмӕ, адӕймаг сабыр куы уа, уӕд уый фӕрцы хатыргонд ӕрцӕуынц стыр тӕригъӕдтӕ дӕр+.

5 Хуры бын федтон ахӕм бӕллӕх, ӕмӕ, хицау чи у+, уый ӕруадзы ахӕм рӕдыд+: 6 ӕнӕзонд адӕймӕгтӕ ӕвӕрд ӕрцӕуынц стыр бынӕтты+, аккаг чи у, уыдон та нымады дӕр нӕ вӕййынц.

7 Ӕз федтон лӕггадгӕнджыты бӕхтыл бадгӕ, кънйӕзты та хуымӕтӕг лӕггадгӕнджытау фистӕгӕй цӕугӕ+.

8 Дзыхъхъ чи къахы, уый дзы йӕхӕдӕг ныххаудзӕн+, ӕмӕ, дурӕй амад къул чи басӕтта, ууыл калм фӕхӕцдзӕн+.

9 Дурсӕттӕджы куыст чи кӕны, уый дурӕй йӕхи цӕвгӕ дӕр ныккӕндзӕн. Суг чи сӕтты, уый хъуамӕ йӕхи хъахъхъӕна+.

10 Фӕрӕт куы фӕкъуымых уа ӕмӕ йӕ куы не сцыргъ кӕнай+, уӕд дӕ дӕ хид акалын бахъӕудзӕн. Афтӕ алы хъуыддаг дӕр зонды фӕрцы сырӕзы+.

11 Кӕлӕнтӕм дӕсны чи у, уый йӕ кӕлӕнтӕй калмы куы не ’рсабыр кӕна ӕмӕ йыл калм куы фӕхӕца, уӕд ын йӕ дӕсныдзинадӕй цы пайда ис?+

12 Зондджыны дзыхӕй цӕуы ӕхсызгон ныхӕстӕ+, ӕнӕзонды та йӕхи дзых фесафы+. 13 Йӕ ныхасы райдиан у ӕдылыдзинад+, йӕ кӕрон – ӕнӕзонддзинад ӕмӕ фыдбылыз. 14 Стӕй дзургӕ дӕр ӕгӕр бирӕ кӕны+.

Адӕймаг нӕ зоны, райсом цы уыдзӕн, уый. Йӕ фӕстӕ цы уыдзӕн, уый йын чи зӕгъдзӕн?+

15 Ӕнӕзӕндтӕн сӕ куыст у фыдӕбойнаг+. Ӕгӕр-мӕгуыр, горӕтмӕ куыд цӕугӕ у, уый дӕр нӕ зонынц+.

16 О бӕстӕ, куыд кӕндзынӕ, кӕд ӕмӕ дӕ паддзах сывӕллон у+ ӕмӕ дӕ кънйӕзтӕ сӕумӕцъӕхӕй фынджы уӕлхъус бадынц? 17 Амондджын уыдзынӕ, бӕстӕ, дӕ паддзах уӕздан мыггагӕй куы уа ӕмӕ-иу дӕ кънйӕзтӕ фынгыл, кӕд ӕмбӕлы, уӕд куы ’рбадой, ӕмӕ уый тыххӕй нӕ, цӕмӕй нозтӕй сӕхи феной, фӕлӕ цӕмӕй бахӕрой ӕмӕ сӕм хъару уа+.

18 Зивӕджы тыххӕй цары хъӕдтӕ ӕрзӕбул вӕййынц, ӕмӕ хӕдзары дӕ къух куы ницӕмӕ фӕкӕнай, уӕд цар тӕдзын райдайдзӕн+.

19 Дзул хъӕлдзӕг кӕны кусӕг лӕджы зӕрдӕ, сӕн дӕтты циндзинад+. Ӕмӕ алцыдӕр ис ӕхцайӕ самал кӕнӕн+.

20 Дӕ уаты куы уай, уӕд дӕр паддзахы ма ралгъит+, ӕмӕ дӕ мидӕггаг уаты дӕр, кӕм фӕхуыссыс, уым, ма ралгъит хъӕздыг лӕджы+. Уӕларвон маргъ дын ахӕсдзӕн дӕ ныхас, базыртӕ кӕмӕн ис, уый дын дӕ ныхӕстӕ радзурдзӕн+.