Хъуыддӕгтӕ

2 Фӕндзайӕм бон*+ куы ралӕууыд, уӕд ахуыргӕнинӕгтӕ иууылдӕр иу хӕдзары ӕрӕмбырд сты. 2 Ӕмӕ ӕвиппайды уӕларвӕй ахӕм уынӕр ӕрыхъуыст, цыма тыхджын дымгӕ сыстад, ӕмӕ, цы хӕдзары бадтысты, уый уынӕрӕй байдзаг+. 3 Ӕмӕ ауыдтой арты+ ӕвзӕгты хуызӕн ӕвзӕгтӕ. Уыцы ӕвзӕгтӕ кӕрӕдзийӕ фӕхицӕн сты ӕмӕ дзы алкӕуыл дӕр иу ӕрцыд. 4 Ӕмӕ се ’ппӕт дӕр Хуыцауы сыгъдӕг тыхӕй+ схайджын сты ӕмӕ алы ӕвзӕгтыл+ дзурын райдыдтой, Хуыцау сӕ йӕ сыгъдӕг тыхӕй кӕй цы ӕвзагыл дзурын кодта, ууыл.

5 Уыцы рӕстӕг Иерусалимы уыдысты, дунейы алы бӕстӕтӕй чи ’рцыд, уыцы уырнӕг+ дзуттӕгтӕ+. 6 Ӕмӕ уынӕр куы райхъуыст, уӕд уыцы хӕдзары раз дуне адӕм ӕрӕмбырд, ӕмӕ джихӕй баззадысты, уымӕн ӕмӕ ахуыргӕнинӕгтӕ дзырдтой алкӕмӕн дӕр йӕхи ӕвзагыл. 7 Ӕмӕ сӕ дисӕн кӕрон нал уыди ӕмӕ кӕрӕдзи фарстой: «Ацы адӕм иууылдӕр галилейӕгтӕ+ не сты? 8 Ӕмӕ нӕ уӕд алкӕмӕн дӕр йӕ мадӕлон ӕвзагыл куыд дзурынц? 9 Мах стӕм парфиӕгтӕ, мидиӕгтӕ+, еламӕгтӕ+, Месопотамийы цӕрджытӕ, стӕй Иудейӕйы+, Каппадокийы+, Понты+ ӕмӕ Азийы*+, 10 Фригийы+, Памфилийы+, Египеты ӕмӕ Киренӕмӕ хӕстӕг Ливийы алы рӕтты цӕрӕг адӕм, Ромӕй ӕрцӕуджытӕ, дзуттӕгтӕ ӕмӕ, дзуттаг дин чи райста, уыдон+, 11 критӕгтӕ+ ӕмӕ аравиӕгтӕ+ ӕмӕ не ’ппӕт дӕр хъусӕм, Хуыцауы стыр хъуыддӕгты тыххӕй нӕ мадӕлон ӕвзӕгтыл куыд дзурынц, уый». 12 Гъемӕ иууылдӕр дисы бафтыдысты ӕмӕ кӕрӕдзи рафӕрс-бафӕрс кодтой: «Ай цы хабар у?» 13 Фӕлӕ сыл чидӕртӕ та худтысты ӕмӕ дзырдтой: «Уыдон уӕртӕ сӕхи адджын сӕнӕй хорз федтой»+.

14 Уӕд Петр иуӕндӕс+ апостолимӕ адӕмы размӕ рацыд ӕмӕ сын хъӕрӕй загъта: «Иудейӕйӕ ӕрцӕуӕг адӕм ӕмӕ Иерусалимы цӕрджытӕ+ уе ’ппӕт дӕр, лӕмбынӕг мӕм байхъусут ӕмӕ йӕ зонут: 15 ацы адӕм расыг не сты+, сымах куыд ӕнхъӕл стут, афтӕ, уымӕн ӕмӕ ныр боны ӕртыккӕгӕм сахат* у. 16 Уый у, пехуымпар Иоилы уылты кӕй тыххӕй загъд уыд, уыцы хабар: 17 „Фӕстаг бонты,– зӕгъы Хуыцау,– ӕз мӕ тых+ ӕруадздзынӕн алыхуызон адӕймӕгтыл, ӕмӕ уӕ фырттӕ ӕмӕ уӕ чызджытӕ пехуымпариуӕг кӕндзысты. Уе ’рыгон лӕппутӕ уындзысты цӕстылуайӕнтӕ, уӕ зӕронд лӕгтӕ та уындзысты фынтӕ+. 18 Уыцы бонты мӕ тых ӕруадздзынӕн суанг мӕ цагъар-нӕлгоймӕгтыл ӕмӕ мӕ цагъар-сылгоймӕгтыл дӕр, ӕмӕ уыдон пехуымпариуӕг кӕндзысты+. 19 Ӕз арвыл равдисдзынӕн диссӕгтӕ ӕмӕ зӕххыл нысӕнттӕ: туг, арт ӕмӕ фӕздӕджы къуыбылӕйттӕ+. 20 Йегъовӕйы стыр ӕмӕ кадджын бон куы ’рцӕуа+, уый размӕ хур+ баталынг уыдзӕн ӕмӕ мӕй туг фестдзӕн. 21 Фӕлӕ Йегъовӕмӕ йӕ номӕй чидӕриддӕр кувы, уый фервӕздзӕн“+.

22 Израилӕгтӕ, байхъусут ацы ныхӕстӕм: назаретаг+ Йесо уыди Хуыцауӕй ӕрвыст адӕймаг. Уый рабӕрӕг, Хуыцау уе ’хсӕн+ йӕ къухӕй цы хъомысджын хъуыддӕгтӕ+ сарӕзта ӕмӕ цы диссӕгтӕ ӕмӕ нысӕнттӕ равдыста, уыдонӕй. Ӕмӕ афтӕ кӕй у, уый уӕхӕдӕг дӕр зонут. 23 Ӕмӕ сымах уыцы лӕджы ӕрцахстат, фыдгӕнджыты къухӕй йӕ хъӕдыл ныххуыдтат ӕмӕ йӕ амардтат+, Хуыцау куыд сфӕнд кодта ӕмӕ бирӕ раздӕр куыд аскъуыддзаг кодта, афтӕ+. 24 Фӕлӕ Хуыцау мӕлӕты рӕхыстӕ атыдта+ ӕмӕ йӕ райгас кодта+, уымӕн ӕмӕ уый гӕнӕн нӕ уыди, цӕмӕй ма йӕ мӕлӕт дарддӕр урӕдтаид+. 25 Давид Йесойы тыххӕй афтӕ загъта: „Йегъовӕ ӕдзухдӕр ис мӕ цӕстыты раз. Уый ис мӕ рахиз фарс, цӕмӕй макуы фӕцудон+. 26 Уый тыххӕй райы мӕ зӕрдӕ ӕмӕ ме ’взаг фырцинӕй дзуры. Ӕз цӕрдзынӕн ныфсимӕ+, 27 уымӕн ӕмӕ мын ды мӕ уд* ингӕны* нӕ ныууадздзынӕ, иузӕрдион дыл чи у, уый ӕмбийын нӕ бауадздзынӕ+. 28 Ды мын бацамыдтай царды фӕндаг. Ды мын дӕ хорзӕхӕй бахай кӕндзынӕ ӕмӕ мын мӕ зӕрдӕ цинӕй бафсаддзынӕ“+.

29 Ӕфсымӕртӕ! Мыггаджы хистӕр Давиды тыххӕй ӕргом зӕгъын хъӕуы уый, ӕмӕ мӕлгӕ дӕр акодта+ ӕмӕ йӕ ӕвӕргӕ дӕр бакодтой, ӕмӕ йӕ зӕппадз дӕр нырма лӕууы. 30 Давид уыди пехуымпар, стӕй йӕ зыдта, Хуыцау ын кӕй расомы кодта ӕмӕ йын зӕрдӕ кӕй бавӕрдта, дӕ паддзахбадӕныл дӕ байзӕддӕгтӕй иуы ӕрбадын кӕндзынӕн, зӕгъгӕ+. 31 Ӕмӕ уымӕ гӕсгӕ Давид бирӕ раздӕр зыдта, Чырысти* кӕй райгас уыдзӕн, ӕмӕ уый кой кодта, зӕгъгӕ йӕ Хуыцау ингӕны* нӕ ныууадздзӕн ӕмӕ йӕ буар нӕ бамбийдзӕн+. 32 Гъе уыцы Йесойы Хуыцау райгас кодта, ӕмӕ уымӕн мах иууылдӕр стӕм ӕвдисӕнтӕ+. 33 Ӕмӕ Йесо уӕларвмӕ кӕй ссыд, Хуыцауы рахиз фарс кӕй ӕрбадт+ ӕмӕ йын йӕ Фыд зӕрдӕ кӕмӕй бавӕрдта, уыцы сыгъдӕг тых кӕй райста+, уымӕ гӕсгӕ ныл уыцы сыгъдӕг тых ӕруагъта, ӕмӕ сымах уыцы хабар уынут ӕмӕ хъусут. 34 Давид та уӕларвмӕ не ссыд+, фӕлӕ йӕхӕдӕг афтӕ загъта: „Йегъовӕ мӕ Хицауӕн загъта: „Бад мӕ рахиз фарс+, 35 цалынмӕ дын де знӕгты дӕ къӕхты бын не ’рӕвӕрон, уӕдмӕ“+. 36 Уӕдӕ ӕппӕт Израилы адӕм фидарӕй зонӕнт: сымах хъӕдыл кӕй байтыгътат+, уыцы Йесойы Хуыцау скодта Хицау+ ӕмӕ Чырысти».

37 Уыцы ныхӕстӕ адӕмы зӕрдӕты арф ахызтысты+, ӕмӕ Петры ӕмӕ иннӕ апостолты бафарстой: «Ӕфсымӕртӕ, цы кӕнгӕ нын у?»+ 38 Петр сын загъта: «Цӕмӕй уӕ тӕригъӕдтӕ хатыргонд ӕрцӕуой+, уый тыххӕй ӕрфӕсмон кӕнут+ ӕмӕ уӕ алчидӕр Йесо Чырыстийы номыл+ донаргъуыд райсӕд+. Ӕмӕ уӕд райсдзыстут лӕвар+ – Хуыцауы сыгъдӕг тых. 39 Уымӕн ӕмӕ уымӕй Хуыцау зӕрдӕ бавӕрдта+ сымахӕн ӕмӕ уӕ сывӕллӕттӕн, стӕй, дард+ чи у, уыдонӕн дӕр – нӕ Хуыцау Йегъовӕ кӕй равзара, уыдонӕн се ’ппӕтӕн дӕр»+. 40 Петр ма сын уыдӕттӕ бирӕ ӕндӕр ныхӕстӕй дӕр бӕстон ӕмбарын кодта* ӕмӕ сӕ фӕдзӕхста: «Уӕхи хизут ацы хӕлд фӕлтӕрӕй!»+ 41 Ӕмӕ йын йӕ ныхӕстӕ йӕ зӕрдӕмӕ чи айста, уыдон донаргъуыд райстой+. Уыцы бон ахуыргӕнинӕгтыл бафтыд ӕртӕ мин адӕймаджы* бӕрц+. 42 Ӕмӕ уыдон дарддӕр дӕр, апостолтӕ цы амыдтой, уымӕ зӕрдиагӕй хъуыстой, алцӕмӕй дӕр кӕрӕдзийӕн хай кодтой+, иумӕ хордтой+ ӕмӕ ӕдзухдӕр куывтой+.

43 Уӕд адӕмы се ’ппӕты* дӕр тас бацыд. Хуыцау та апостолты къухӕй ӕвдыста бирӕ диссӕгтӕ ӕмӕ нысӕнттӕ+. 44 Уырнӕг чи сси, уыдон иууылдӕр иумӕ ӕмбырд кодтой ӕмӕ сын алцыдӕр уыд иумӕйаг+. 45 Сӕ мулк+ ӕмӕ сӕ фӕллӕйттӕ уӕй кодтой ӕмӕ уыцы ӕхцайӕ алкӕмӕн дӕр ӕххуыс кодтой, чи цы хъуаг ӕййӕфта, уымӕ гӕсгӕ+. 46 Ӕмӕ-иу алы бон дӕр кувӕндоны иумӕ ӕрӕмбырд сты+. Уыдон кӕрӕдзимӕ цыдысты ӕмӕ сӕ къӕбӕр иумӕ адджынӕн хордтой+, цӕстмӕ митӕ сӕм нӕ уыд, 47 ӕмӕ Хуыцауы кадджын кодтой ӕмӕ сӕ уыди ӕппӕт адӕмы хорзӕх+. Ӕмӕ сыл Йегъовӕ алы бон дӕр ӕфтыдта+, ирвӕзындзинады фӕндагыл-иу чи слӕууыд, ахӕмты+.