Хъуыддӕгтӕ
17 Амфипол ӕмӕ Аполлонийыл куы ахызтысты, уӕд ӕрцыдысты Фессалоникӕмӕ+. Уым уыди дзуттӕгты ӕмбырдгӕнӕн. 2 Ӕмӕ та Павел йе ’гъдаумӕ гӕсгӕ+ ӕмбырдгӕнӕнмӕ бацыд ӕмӕ фӕд-фӕдыл ӕртӕ сабаты адӕмимӕ ныхас кодта Фыстадмӕ гӕсгӕ+. 3 Ӕмбарын сын кодта, Чырысти кӕй хъуамӕ фӕхъизӕмар кодтаид+ ӕмӕ ӕртыккаг бон мӕрдтӕй кӕй хъуамӕ райгас уыдаид+, ӕмӕ сын Фыстадӕй бӕлвырдгӕнӕнтӕ хаста. Дзырдта сын: «Ӕз уын цы Йесойы тыххӕй хъусын кӕнын, гъе уый у Чырысти»+. 4 Гъемӕ дзы чидӕртӕ систы уырнджытӕ+ ӕмӕ Павел ӕмӕ Силӕмӕ+ ӕрбаиу сты. Уырнджытӕ ма систы, Хуыцауӕн чи куывта, уыцы грекъӕгтӕй, стӕй номдзыд сылгоймӕгтӕй дӕр бирӕтӕ.
5 Уӕд дзуттӕгтӕ сӕ фырхӕлӕгӕй+, базары фӕзы дзӕгъӕллӕуд чи кодта, уыдонӕй цалдӕр фыдзонд лӕджы семӕ ракодтой, адӕмы ӕрӕмбырд кодтой ӕмӕ ӕгас горӕт сызмӕстой+. Ӕмӕ Иасоны хӕдзармӕ бабырстой+, цӕмӕй Павел ӕмӕ Силӕйы адӕммӕ ракодтаиккой. 6 Куы нӕ сӕ ссардтой, уӕд Иасоны ӕмӕ цалдӕр ӕфсымӕры горӕты хицӕутты раз балӕууын кодтой ӕмӕ хъӕр систой: «Уыцы адӕм ӕгас дуне сызмӕстой+, ӕмӕ ныр ардӕм дӕр ӕрхӕццӕ сты, 7 ӕмӕ сӕ Иасон суазӕг кодта. Адон се ’ппӕт дӕр цӕуынц Ромы паддзахы* закъӕтты ныхмӕ+ ӕмӕ дзурынц, зӕгъгӕ, дам, ис ӕндӕр паддзах+, Йесо». 8 Адӕм ӕмӕ горӕты хицӕуттӕ уыдӕттӕ куы фехъуыстой, уӕд скатай сты. 9 Ӕмӕ горӕты хицӕуттӕ Иасонӕй ӕмӕ иннӕ ӕфсымӕртӕй се суӕгъд кӕныны тыххӕй, цас хъуыди бафидын, уыйбӕрц ӕхца райстой ӕмӕ сӕ рауагътой.
10 Тӕккӕ уыцы ӕхсӕв+ ӕфсымӕртӕ Павел ӕмӕ Силӕйы Веримӕ арвыстой. Уыдон уырдӕм куы ’рхӕццӕ сты, уӕд бацыдысты дзуттӕгты ӕмбырдгӕнӕнмӕ. 11 Вериаг дзуттӕгтӕ фессалоникӕгтӕй хуыздӕр зондыл хӕст уыдысты: уыдон Хуыцауы ныхасмӕ тынг зӕрдиагӕй хъуыстой ӕмӕ алы бон дӕр Фыстад+ лӕмбынӕг иртӕстой+, зӕгъгӕ нын цы дзурынц, уый ӕцӕгдӕр афтӕ у ӕви нӕ+. 12 Афтӕмӕй уыдонӕй бирӕтӕ систы уырнджытӕ. Адӕмы ’хсӕн нымад чи уыд+, уыцы грекъаг сылгоймӕгтӕй ӕмӕ нӕлгоймӕгтӕй дӕр бирӕтӕ баууӕндыдысты. 13 Фӕлӕ фессалоникаг дзуттӕгтӕ куы базыдтой, Павел Верийы дӕр кӕй хъусын кӕны Хуыцауы ныхас, уӕд уырдӕм дӕр ӕрцыдысты, цӕмӕй адӕмы сызмӕстаиккой+ ӕмӕ сӕ сӕ ныхмӕ скодтаиккой+. 14 Уӕд ӕфсымӕртӕ Павелы ӕвӕстиатӕй арвыстой, загътой йын, цӕмӕй денджызы былы онг ацыдаид+. Силӕ ӕмӕ Тимофей та уым баззадысты. 15 Павелимӕ чи рацыд, уыдон ӕй суанг Афинты онг ахизын кодтой. Ӕмӕ сын Павел бафӕдзӕхста, зӕгъгӕ, Силӕ ӕмӕ Тимофейӕн+ зӕгъут, цӕмӕй мӕм, гӕнӕн ӕмӕ амалӕй, тагъддӕр ӕрцӕуой. Ӕмӕ стӕй фӕстӕмӕ раздӕхтысты.
16 Павел сӕм ӕнхъӕлмӕ каст Афинты. Ӕмӕ, горӕт мӕнгхуыцӕуттӕй йедзаг кӕй уыди, уый фенгӕйӕ смӕсты+. 17 Гъемӕ ӕмбырдгӕнӕнты дзуттӕгтимӕ+ ӕмӕ иннӕ уырнӕг адӕмимӕ ныхас кодта. Стӕй-иу алы бон дӕр ныхас кодта, базары фӕзы+ кӕуыл ӕмбӕлд, уыдонимӕ дӕр. 18 Фӕлӕ Епикуры ӕмӕ стоикты ахуырӕдтыл хӕст чи уыд, уыцы философтӕй*+ чидӕртӕ йемӕ быцӕу кӕнын райдыдтой. Ӕмӕ иутӕ дзырдтой: «Цымӕ ацы дзӕгъӕлдзыхы цы зӕгъын фӕнды?»+ Иннӕтӕ та: «Куыд ӕм кӕсӕм, афтӕмӕй цыдӕр ӕцӕгӕлон хуыцӕутты кой кӕны». Афтӕ та уымӕн дзырдтой, ӕмӕ Павел хъусын кодта хорз хабар Йесойы тыххӕй ӕмӕ, мӕрдтӕ кӕй райгас уыдзысты, уый тыххӕй+. 19 Уӕд ыл ныххӕцыдысты, Ареопагмӕ* йӕ акодтой ӕмӕ йын загътой: «Зӕгъ-ма нын ӕй, уый цавӕр ног ахуырады+ кой кӕныс? 20 Цыдӕр ӕнахуыр хабӕрттӕ дзурыс, ӕмӕ, цы сты, уый нӕ базонын фӕнды»+. 21 Афинӕгтӕн та се ’ппӕтӕн дӕр ӕмӕ-иу сӕм ӕндӕр рӕттӕй чи ’рцыд, уыдонӕн сӕрибар рӕстӕг сӕ хуыздӕр куыст уый уыди, ӕмӕ-иу исты ног хабӕрттӕ дзырдтой ӕмӕ сӕм хъуыстой. 22 Уӕд Павел Ареопаджы+ астӕу слӕууыд ӕмӕ загъта:
«Афинӕгтӕ, ӕз уынын, сымах хуыцӕуттӕй иннӕтӕй тынгдӕр кӕй тӕрсут+. 23 Уӕ горӕты куы фӕцӕйцыдтӕн ӕмӕ уын уӕ дзуӕрттӕм куы кастӕн, уӕд мӕ цӕст ӕрхӕцыд иу нывондхӕссӕныл, фыст ыл ис: „Ӕнӕзонгӕ Хуыцауӕн“. Гъемӕ сымах ӕнӕзонгӕйӕ кӕмӕн кувут, ӕз уын уыцы Хуыцауы тыххӕй дзурын. 24 Дуне ӕмӕ, дунейы цыдӕриддӕр ис, уый чи сфӕлдыста, уыцы Хуыцау, арв ӕмӕ зӕххы Бардарӕг+, адӕймаджы къухӕй конд кувӕндӕтты нӕ цӕры+. 25 Ӕмӕ цыма исты хъуаг ӕййафы, уыйау ӕй адӕймаджы къухты лӕггад нӕ хъӕуы+, уымӕн ӕмӕ алкӕмӕн дӕр йӕхӕдӕг дӕтты цард+ дӕр, улӕфт+ дӕр ӕмӕ алцыдӕр. 26 Уый иу адӕймагӕй+ рауагъта ӕппӕт адӕмты+ ӕгас зӕххыл цӕрынӕн+, снысан сын кодта рӕстӕджытӕ+ ӕмӕ сӕвӕрдта арӕнтӕ, кӕм цӕрой, уымӕн+, 27 цӕмӕй Хуыцауы агурой+, агурой йӕ зӕрдиагӕй, ӕмӕ йӕ цӕмӕй ссарой+, уӕвгӕ та уый махӕй алкӕмӕй дӕр дард нӕу. 28 Уымӕн ӕмӕ мах уый фӕрцы цӕрӕм, змӕлӕм ӕмӕ стӕм+, уӕ фысджытӕй+ дӕр чидӕртӕ куыд загътой, „мах не ’ппӕт дӕр йӕ цот стӕм“, зӕгъгӕ, афтӕ.
29 Гъемӕ кӕд мах Хуыцауы цот стӕм+, уӕд хъуамӕ афтӕ ма хъуыды кӕнӕм, ӕмӕ Хуыцау+, сызгъӕрин, ӕвзист кӕнӕ дурӕй цы скӕнынц, адӕймаг йӕ арӕхстдзинад ӕмӕ йе ’рхъуыдыйы фӕрцы цы саразы, уый хуызӕн у+. 30 Фӕлӕ Хуыцау нал кӕсы, адӕм ӕй куы нӕ зыдтой, уыцы рӕстӕджытӕм+, ӕмӕ ныр ӕппӕт адӕмӕн дӕр дзуры, цӕмӕй ӕрфӕсмон кӕной+, 31 уымӕн ӕмӕ снысан кодта, йе ’взӕрст лӕджы къухӕй дунейӕн раст тӕрхон+ кӕд кӕндзӕн, уыцы бон. Ӕмӕ афтӕ кӕй уыдзӕн, уый се ’ппӕтӕн дӕр сбӕлвырд кодта, мӕрдтӕй йӕ кӕй райгас кодта+, уымӕй».
32 Мӕрдты райгасы тыххӕй куы фехъуыстой, уӕд иутӕ худын райдыдтой+, иннӕтӕ та загътой: «Уый тыххӕй ма дӕм ӕндӕр хатт байхъусдзыстӕм». 33 Уӕд Павел се ’хсӕнӕй рацыд, 34 фӕлӕ йӕм дзы чидӕртӕ ӕрбаиу ӕмӕ систы уырнджытӕ. Се ’хсӕн уыди Ареопаджы+ тӕрхонгӕнӕг Дионисий, стӕй иу сылгоймаг, Дамар, зӕгъгӕ, ӕмӕ ма ӕндӕртӕ дӕр.