Йезекил
6 Ӕмӕ мын Йегъовӕ афтӕ загъта: 2 «Адӕймаджы фырт, акӕс Израилы хӕхты ’рдӕм ӕмӕ сын+ зӕгъ ахӕм ныхас+: 3 „Израилы хӕхтӕ, байхъусут Дунедарӕг Хуыцау Йегъовӕйы ныхасмӕ!+ Дунедарӕг Хуыцау Йегъовӕ афтӕ зӕгъы хӕхтӕн ӕмӕ къуыбыртӕн+, цӕугӕдӕттӕн ӕмӕ дӕлвӕзтӕн: „Мӕнӕ ӕз! Ӕз уыл хъама рауадздзынӕн ӕмӕ уын уӕ кувӕн бынӕттӕ*+ ныппырх кӕндзынӕн. 4 Уӕ нывондхӕссӕнтӕ дзӕгъӕл баззайдзысты+, уӕ будсудзӕн нывондхӕссӕнтӕ уын ныппырх кӕндзысты ӕмӕ уӕ чи фӕцагъды уа, уыдоны ныккалдзынӕн уӕ фаджыс-хуыцӕутты раз+. 5 Израилы фырттӕн сӕ мӕрдтӕ ӕрӕвӕрдзынӕн сӕ фаджыс-хуыцӕутты раз ӕмӕ уын уе стджытӕ уӕ нывондхӕссӕнты алыварс ныккалдзынӕн+. 6 Кӕмдӕриддӕр цӕрат+ – уӕ горӕттӕ фестдзысты хӕлддзӕгтӕ+, уӕ кувӕн бынӕттӕ дзӕгъӕл баззайдзысты ӕмӕ хӕлддзӕгтӕ фестдзысты+, уӕ нывондхӕссӕнтӕ дзӕгъӕл баззайдзысты ӕмӕ сӕ ныппырх кӕндзысты+. Уӕ фаджыс-хуыцӕуттӕн сӕ кой дӕр нал уыдзӕн+, уӕ будсудзӕн нывондхӕссӕнтӕ уын фехалдзысты+ ӕмӕ, уӕ къухтӕ цы скодтой, уыдонӕй фӕд дӕр нал баззайдзӕн. 7 Чи цагъды кӕна, уыдон уе ’хсӕн хаудзысты+. Ӕмӕ йӕ базондзыстут, ӕз кӕй дӕн Йегъовӕ+.
8 Уыцы хабар куы ’рцӕуа, уӕд уӕ ӕз кӕйдӕрты ныууадздзынӕн – алы бӕстӕтыл куы ныххӕлиу уат, уӕд сымахӕй адӕмты ’хсӕн хъамайӕ чи аирвӕза, уыдоны+. 9 Чи уӕ аирвӕза, уыдон мӕ ӕрхъуыды кӕндзысты, уацары сӕ кӕмӕ акӕной, уыцы адӕмты ’хсӕн+, ӕрхъуыды кӕндзысты, мӕ зӕрдӕ куыд рысти сӕ хӕтаг зӕрдӕйы тыххӕй, мӕнӕй чи аздӕхт+, уыцы зӕрдӕйы тыххӕй, ӕмӕ сӕ цӕстыты тыххӕй, сӕ фаджыс-хуыцӕуттӕм мондагкаст чи кӕны+, уыцы цӕстыты тыххӕй. Се ’ппӕт ӕвзӕр ӕмӕ ӕлгъаг хъуыддӕгты тыххӕй сӕхицӕн фенад уыдзысты+. 10 Ӕмӕ йӕ базондзысты, ӕз кӕй дӕн Йегъовӕ. Ӕз дзӕгъӕлы нӕ дзырдтон+, уыцы бӕллӕхы хай сӕ бакӕндзынӕн, зӕгъгӕ“+.
11 Афтӕ зӕгъы Дунедарӕг Хуыцау Йегъовӕ: „Дӕ къухтӕ кӕрӕдзийыл ӕрцӕв+, дӕ къӕхтӕй зӕхх ӕрхой ӕмӕ дзур: „Мӕгуыры бон!“ – Израилы адӕмы ӕппӕт ӕвзӕр ӕмӕ ӕлгъаг хъуыддӕгты тыххӕй+, уымӕн ӕмӕ уыдон фӕцагъды уыдзысты хъамайӕ+, ӕххормагӕй+ ӕмӕ фыднизӕй+. 12 Дард ран чи ис+, уый фыднизӕй амӕлдзӕн, хӕстӕг ран чи ис, уый хъамайы амӕттаг бауыдзӕн, чи баззайа ӕмӕ чи аирвӕза, уый та ӕххормагӕй амӕлдзӕн. Ӕмӕ сыл мӕ судзгӕ маст иууылдӕр ныккалдзынӕн+. 13 Ӕмӕ сӕ чи фӕцагъды уа, уыдон куы уой сӕ фаджыс-хуыцӕутты ’хсӕн+, сӕ нывондхӕссӕнты алыварс+, алы бӕрзонд къуыбырыл+, алы хохы цъуппыл+, алы пӕлӕхсар бӕласы бын+ ӕмӕ алы къалиуджын стыр бӕласы бын+, се ’ппӕт фаджыс-хуыцӕуттӕн нывӕндтӕ кӕм хастой, цӕмӕй сын сӕ тӕф ӕхсызгон уыдаид, уыцы ран+, уӕд ӕй базондзыстут, ӕз кӕй дӕн Йегъовӕ+. 14 Ӕз сӕм мӕ къух сисдзынӕн+ ӕмӕ, кӕмдӕриддӕр цӕрой, уым сын сӕ зӕхх ӕдзӕрӕг бӕстӕ фестын кӕндзынӕн, ӕмӕ уыдзӕн, Дивлафы ’рдыгӕй цы ӕдзӕрӕг быдыр ис, уымӕй фыддӕр. Ӕмӕ йӕ базондзысты, ӕз кӕй дӕн Йегъовӕ“».