Йезекил

1 Ӕртынӕм аз, цыппӕрӕм мӕйы, мӕйӕн йӕ фӕндзӕм бон, уацары+ чи уыд, уыцы адӕмимӕ Ховары цӕугӕдоны+ раз куы уыдтӕн, уӕд арв байгом+ ӕмӕ федтон цӕстылуайӕнтӕ Хуыцауӕй+. 2 Мӕйӕн йӕ фӕндзӕм бон, паддзах Йехони+ уацары фӕндзӕм аз куы уыди, уӕд, 3 халдейты+ зӕххыл Ховары цӕугӕдоны раз Йегъовӕйӕ уыд+ ныхас Йезекилмӕ+, сауджын Вузийы фыртмӕ. Ӕмӕ уыцы бынаты Йезекилыл уыди Йегъовӕйы къух+.

4 Ӕмӕ федтон ахӕм цӕстылуайӕн: цӕгатырдыгӕй ӕрбацӕйцыд тыхджын дымгӕ+, стыр мигъ+ ӕмӕ арвӕрттывды хуызӕн арт+. Мигъы алыварс уыди ирд рухс, арты астӕуӕй та зынди урс сызгъӕрины* хуызӕн цыдӕр+. 5 Арты астӕу уыди цыппар уӕларвон удгоймаджы хуызӕн чидӕртӕ+. Хуызӕй уыдысты зӕххон адӕймӕгты хуызӕн. 6 Алкӕцыйӕн дӕр дзы уыди цыппар цӕсгомы+ ӕмӕ цыппар базыры+. 7 Сӕ къӕхтӕ уыдысты ӕмраст, фадхъултӕй дӕлӕмӕ та сын уыдысты роды къӕхты хуызӕн+. Ӕмӕ цӕхӕртӕ калдтой ӕрттиваг ӕрхуыйау+. 8 Сӕ цыппар базырӕй алкӕцыйы бын дӕр уыди адӕймаджы къух+, ӕмӕ сӕ цыппарӕн дӕр уыди цӕсгӕмттӕ ӕмӕ базыртӕ+. 9 Сӕ базыртӕ ӕндзӕвыдысты кӕрӕдзийыл. Уыцы уӕларвон удгоймӕгтӕ-иу цӕугӕ-цӕуын никӕцырдӕм фӕзылдысты. Алкӕцы дӕр дзы цыди, йӕ цӕсгом кӕцырдӕм уыд, уыцырдӕм+.

10 Сӕ цӕсгӕмттӕ та уыдысты ахӕм: цыппарӕн дӕр уыди адӕймаджы+ цӕсгом, рахизырдыгӕй+ – домбайы+ цӕсгом, галиуырдыгӕй+ цыппарӕн дӕр – галы+ цӕсгом, ӕмӕ цыппарӕн дӕр уыди цӕргӕсы цӕсгом+. 11 Ахӕм уыдысты сӕ цӕсгӕмттӕ. Сӕ базыртӕ+ та уыдысты хӕрдмӕ ист. Алкӕцыйӕн дӕр дзы уыди, кӕрӕдзийыл чи ӕндзӕвыд, дыууӕ ахӕм базыры, дыууӕ базырӕй та ӕмбӕрзтой сӕ буӕрттӕ+.

12 Алкӕцы дӕр дзы цыди, йӕ цӕсгом кӕцырдӕм уыд, уыцырдӕм+. Хуыцауы тых* сӕ кӕцырдӕм кодта, уыцырдӕм цыдысты+. Цӕугӕ-цӕуын-иу никӕцырдӕм фӕзылдысты+. 13 Уӕларвон удгоймӕгтӕн сӕ хуыз уыди судзгӕ зынгты хуызӕн+. Се ’хсӕн размӕ-фӕстӕмӕ кодтой цырӕгъты хуызӕн цыдӕртӕ+. Цырӕгъты арт тынг рухс кодта ӕмӕ арты ’хсӕнӕй цыди арвӕрттывдтытӕ+. 14 Уӕларвон удгоймӕгтӕ размӕ ӕмӕ фӕстӕмӕ цӕугӕйӕ уыдысты арвӕрттывды хуызӕн+.

15 Уӕларвон удгоймӕгтӕм куы кастӕн, уӕд федтон, цыппар цӕсгомы кӕмӕн уыд+, уыцы херувимтӕй алкӕцыйы раз дӕр зӕххыл кӕй уыди цалх+. 16 Цӕлхытӕ+ цыхуызӕн уыдысты ӕмӕ куыд конд уыдысты, уый уыди хризолиты ӕрттывды хуызӕн+. Ӕмӕ цыппар цалхы дӕр уыдысты иухуызон. Конд та уыдысты, цыма иу цалхы мидӕг ӕндӕр цалх уыди, афтӕ+. 17 Уыдон цыдысты цыппарырдӕм дӕр+. Цӕугӕ-цӕуын-иу никӕцырдӕм фӕзылдысты+. 18 Цӕлхыты чъилтӕ* уыйас уыдысты, ӕмӕ сӕ уындӕй хъуын арц лӕууыд. Ӕмӕ цыппар цалхӕн дӕр сӕ чъилтӕ алырдыгӕй уыдысты цӕстытӕй йедзаг+. 19 Уӕларвон удгоймӕгтӕ-иу куы цыдысты, уӕд-иу сӕ фарсмӕ цыдысты цӕлхытӕ дӕр. Ӕмӕ-иу уӕларвон удгоймӕгтӕ зӕххӕй куы фӕхицӕн сты, уӕд-иу цӕлхытӕ дӕр зӕххӕй фӕхицӕн сты+. 20 Хуыцауы тых сӕ кӕцырдӕм кодта, уыцырдӕм цыдысты, уымӕн ӕмӕ сӕ уырдӕм кодта Хуыцауы тых. Цӕлхытӕ та-иу зӕххӕй фӕхицӕн сты ӕмӕ уыдысты сӕ фарсмӕ, уымӕн ӕмӕ, уӕларвон удгоймӕгтӕ цы тыхӕй хайджын уыдысты, уыцы тых уыди цӕлхыты мидӕг. 21 Уыдон-иу куы цыдысты, уӕд-иу адон дӕр цыдысты. Уыдон-иу куы ’рлӕууыдысты, уӕд-иу адон дӕр ӕрлӕууыдысты. Уыдон-иу зӕххӕй куы фӕхицӕн сты, уӕд-иу адон дӕр зӕххӕй фӕхицӕн сты ӕмӕ уыдысты сӕ фарсмӕ, уымӕн ӕмӕ, уӕларвон удгоймӕгтӕ цы тыхӕй хайджын уыдысты, уыцы тых уыди цӕлхыты мидӕг+.

22 Уӕларвон удгоймӕгты сӕрмӕ уыди пъолы хуызӕн цыдӕр+. Уый цӕхӕртӕ калдта, адӕймаг кӕсгӕйӕ кӕмӕ баззайы, ахӕм ихау, ӕмӕ лӕууыди сӕ сӕрмӕ+. 23 Пъолы бынмӕ сӕ базыртӕ кӕрӕдзийыл ӕндзӕвыдысты. Алкӕцы дӕр дзы иуырдыгӕй йӕ буар ӕмбӕрзта дыууӕ базырӕй ӕмӕ иннӕрдыгӕй дӕр – дыууӕ базырӕй. 24 Куы-иу фӕцӕйцыдысты, уӕд сын хъуыстон сӕ базырты уынӕр, раст цыма стыр дӕтты хъӕр уыди+, цыма Ӕппӕтхъомысджын Хуыцауы хъӕлӕс нӕрыд+, цыма цӕйдӕр гыбар-гыбур уыди кӕнӕ ӕфсады хъӕр-хъӕлӕба цыди, афтӕ+. Куы-иу ӕрлӕууыдысты, уӕд та-иу сӕ базыртӕ ӕруагътой.

25 Сӕ сӕрмӕ чи уыди, уыцы пъолы сӕрӕй хъуысти хъӕлӕс. Куы-иу ӕрлӕууыдысты, уӕд та-иу сӕ базыртӕ ӕруагътой. 26 Ӕмӕ, сӕ сӕрмӕ чи уыди, уыцы пъолы сӕрмӕ уыд сапфирдуры хуызӕн цыдӕр+, паддзахбадӕны хуызӕн+. Уыцы паддзахбадӕныл бадти чидӕр, уыди зӕххон адӕймаджы хуызӕн+. 27 Ӕмӕ ӕз федтон, астӕуӕй уӕлӕмӕ урс сызгъӕринау кӕй ӕрттывта+, йӕ алыварс та цыма арт сыгъди, афтӕ уыд+. Ӕмӕ йӕ астӕуӕй дӕлӕмӕ дӕр уыди арты хуызӕн. Ӕмӕ йӕ алыварс уыд ирд рухс. 28 Тӕрккъӕвда куы рацӕуы, уӕд мигъты ’хсӕн арвӕрдын+ куыд фӕзыны, афтӕ уыди, йӕ алыварс чи уыд, уыцы рухс. Уый уыди Йегъовӕйы кады хуызӕн+. Уый фенгӕйӕ дӕлгоммӕ ӕрхаудтӕн+ ӕмӕ фехъуыстон, чи дзырдта, уый хъӕлӕс.