Хъуыддӕгтӕ
25 Фест бӕстӕйы* хицау куы сси+, уӕд ӕртӕ боны фӕстӕ Кесарийӕ ссыд Иерусалиммӕ+. 2 Уым ӕм сауджынты хистӕртӕ ӕмӕ дзуттӕгты дзырддзӕугӕ лӕгтӕ Павелыл хъаст бахастой+ ӕмӕ йын лӕгъстӕ кӕнын райдыдтой, 3 цӕмӕй сын ахӕм хорзӕх ракӕна, ӕмӕ Павелы Иерусалиммӕ ӕркӕнын кӕна. Сӕхӕдӕг та хъавыдысты фӕндагыл йӕ размӕ бабадынмӕ+ ӕмӕ йӕ амарынмӕ. 4 Фӕлӕ сын Фест загъта, Павел хъуамӕ уа Кесарийы ӕмӕ мӕхӕдӕг дӕр тагъд уырдӕм цӕудзынӕн, зӕгъгӕ. 5 «Гъемӕ сымахӕй бартӕ кӕй къухы сты,– загъта уый,– уыдон мемӕ рацӕуӕнт, ӕмӕ кӕд уыцы лӕг ӕвзӕрӕй исты сарӕзта, уӕд йӕ ныхмӕ дзурӕнт»+.
6 Фест уым аст кӕнӕ дӕс бонӕй фылдӕр нӕ фӕци, стӕй Кесаримӕ ӕрыздӕхт. Дыккаг бон ӕрбадт тӕрхоны бадӕныл+ ӕмӕ бардзырд радта, цӕмӕй Павелы ӕрбакӕной. 7 Павел куы ’рбацыд, уӕд ыл Иерусалимӕй ӕрцӕуӕг дзуттӕгтӕ амбырд сты ӕмӕ йӕ райдыдтой бирӕ уӕззау фыдракӕндты аххосджын кӕнын+, бӕлвырдгӕнӕнтӕ ӕрхӕссын та сӕ бон нӕ уыди.
8 Уӕд Павел загъта: «Ӕз ницы тӕригъӕд сарӕзтон нӕдӕр дзуттӕгты Закъоны раз, нӕдӕр кувӕндоны+ раз ӕмӕ нӕдӕр Ромы паддзахы раз»+. 9 Фесты та дзуттӕгты зӕрдӕ балхӕнын кӕй фӕндыд+, уымӕ гӕсгӕ Павелӕн загъта: «Фӕнды дӕ Иерусалиммӕ ацӕуын, цӕмӕй дын ацы хъуыддӕгты тыххӕй мӕ разы уым тӕрхон кӕной?»+ 10 Фӕлӕ йын Павел загъта: «Ӕз лӕууын Ромы паддзахы тӕрхоны бадӕны раз+, ӕмӕ мын тӕрхон дӕр ам хъуамӕ кӕной. Ӕз дзуттӕгтӕн ӕвзӕрӕй ницы сарӕзтон+, ӕмӕ уый дӕхӕдӕг дӕр хорз зоныс. 11 Кӕд ӕз ӕцӕгдӕр фыдгӕнӕг+ дӕн ӕмӕ мын мӕлӕты+ тӕрхон цӕй тыххӕй рахӕссой, ахӕмӕй исты сарӕзтон, уӕд разы дӕн мӕлӕтыл. Фӕлӕ кӕд, ацы адӕм мӕ ныхмӕ цытӕ дзурынц, уыдӕттӕ ӕцӕг не сты, уӕд никӕмӕн ис уый бар, ӕмӕ мӕ сӕ къухмӕ ратта. Ӕз домын Ромы паддзахы тӕрхон!»+ 12 Уӕд Фест йӕ уынаффӕгӕнджытимӕ аныхас кодта ӕмӕ загъта: «Ромы паддзахы тӕрхон домыс, ӕмӕ Ромы паддзахмӕ ацӕудзынӕ».
13 Цалдӕр боны фӕстӕ Кесаримӕ ӕрцыдысты паддзах Агриппӕ* ӕмӕ Вереникӕ* Фестӕн раарфӕ кӕнынмӕ. 14 Цалдӕр боны дзы куы фесты, уӕд Фест паддзахӕн Павелы хабар радзырдта:
«Ам нӕм ис, Феликс ахӕстоны кӕй ныууагъта, ахӕм лӕг. 15 Ӕмӕ Иерусалимы куы уыдтӕн, уӕд мӕм сауджынты хистӕртӕ ӕмӕ дзуттӕгты хистӕр лӕгтӕ уыцы адӕймагыл хъаст бахастой+ ӕмӕ куырдтой, цӕмӕй йын стӕрхон кӕнон. 16 Фӕлӕ сын ӕз загътон, Ромы закъонмӕ гӕсгӕ адӕймаджы искӕй къухмӕ раттӕн кӕй нӕй, цалынмӕ, йӕ ныхмӕ чи дзуры, уыдонимӕ+ нӕ фембӕла ӕмӕ йын йӕхи сӕрыл дзурыны фадат нӕ фӕуа, уӕдмӕ. 17 Гъемӕ ардӕм куы ’рцыдысты, уӕд ӕз дӕр фӕстиат нал кодтон, фӕлӕ дыккаг бон тӕрхоны бадӕныл ӕрбадтӕн ӕмӕ йӕ ӕрбакӕнын кодтон. 18 Уӕд уыцы лӕгтӕ сыстадысты ӕмӕ райдыдтой йӕ ныхмӕ дзурын, фӕлӕ, ӕз цы фыдракӕндтӕй ӕнхъӕл уыдтӕн, уыдонӕй йӕ иуы дӕр нӕ фӕаххосджын кодтой+. 19 Ӕрмӕст быцӕу кодтой сӕ дины тыххӕй+ ӕмӕ цавӕрдӕр Йесойы тыххӕй, уыцы адӕймаг, дам, амард, фӕлӕ Павел дзырдта, удӕгас, дам, у+. 20 Гъемӕ, уыцы быцӕуӕн кӕрон куыд скӕнон, уый бӕлвырд нӕ зыдтон, ӕмӕ уымӕ гӕсгӕ Павелы бафарстон, зӕгъын дӕ нӕ фӕнды Иерусалиммӕ ацӕуын, цӕмӕй дын ацы хъуыддӕгты тыххӕй уым тӕрхон кӕной+. 21 Фӕлӕ Павел ӕркуырдта+, зӕгъгӕ мын цалынмӕ мӕ хъуыддаг Цытджын паддзах* нӕ аскъуыддзаг кӕна, уӕдмӕ мӕ ахстӕй дарӕнт. Ӕмӕ ӕз дӕр бардзырд радтон, цӕмӕй йӕ ам дарой, цалынмӕ йӕ Ромы паддзахмӕ нӕ арвитон, уӕдмӕ».
22 Уӕд Агриппӕ Фестӕн загъта: «Мӕн дӕр фӕнды уыцы лӕгмӕ байхъусын»+. «Тӕккӕ райсом ӕм байхъусдзынӕ»,– загъта йын Фест. 23 Иннӕ бон Агриппӕ ӕмӕ Вереникӕ уыцы хъӕздыг кондӕй ӕрцыдысты+ ӕмӕ бацыдысты тӕрхоны уатмӕ, семӕ ма бацыдысты ӕфсады сӕргълӕуджытӕ ӕмӕ горӕты кадджын адӕм дӕр. Фест бардзырд радта, ӕмӕ Павелы ӕрбакодтой. 24 Ӕмӕ Фест загъта: «Паддзах Агриппӕ ӕмӕ, ам чи ис, уыдон иууылдӕр! Ацы адӕймаджы тыххӕй мӕм Иерусалимы дӕр ӕмӕ ам дӕр дзуттӕгтӕ се ’ппӕт дӕр хъаст хастой ӕмӕ хъӕр кодтой, удӕгасӕй, дам, ын ныууадзӕн нӕй+. 25 Фӕлӕ куыд федтон, афтӕмӕй йын мӕлӕты тӕрхон цӕй тыххӕй рахӕссон, ахӕмӕй ницы сарӕзта+. Гъемӕ Цытджын паддзахы тӕрхон куы ’рдомдта+, уӕд загътон, уымӕ йӕ кӕй арвитдзынӕн. 26 Фӕлӕ мӕ буц хицаумӕ ацы лӕджы тыххӕй бӕлвырдӕй цы ныффыссон, уый нӕй. Уый тыххӕй йӕ ӕрлӕууын кодтон уӕ разы, уӕлдайдӕр та дӕ разы, паддзах Агриппӕ, цӕмӕй йын йӕ хъуыддаг куы равзарӕм+, уӕд мӕ бон уа фыстӕджы исты ныффыссын. 27 Ахст лӕджы цӕмӕй аххосджын кӕнынц, уыдӕттӕ ма ныффыссон ӕмӕ йӕ афтӕмӕй арвитон, уый мӕм раст нӕ кӕсы».