Иоанны
2 Дыууӕ боны фӕстӕ та галилейаг горӕт Канӕйы+ уыди чындзӕхсӕв, ӕмӕ уым уыд Йесойы мад+ дӕр. 2 Чындзӕхсӕвмӕ фӕхуыдтой Йесойы ӕмӕ йӕ ахуыргӕнинӕгты дӕр.
3 Сӕ сӕн куы фӕци, уӕд Йесойӕн йӕ мад+ афтӕ зӕгъы: «Сӕн сӕм нал ис». 4 Фӕлӕ Йесо йӕ мадӕн загъта: «Ӕмӕ ууыл ӕз ӕмӕ ды цӕмӕн хъуамӕ мӕт кӕнӕм?*+ Мӕнӕн мӕ рӕстӕг нӕма ’рцыд»+. 5 Ӕмӕ уӕд йӕ мад лӕггадгӕнджытӕн загъта: «Куыддӕриддӕр уын зӕгъа, афтӕ бакӕнут»+. 6 Уым та дзуттӕгты ӕгъдаумӕ гӕсгӕ хи сыгъдӕг кӕнынӕн+ лӕууыди ӕхсӕз стыр дурыны* ӕмӕ-иу сӕ мидӕг уыди дон. 7 Ӕмӕ сын Йесо загъта: «Дурынтӕ донӕй байдзаг кӕнут». Уыдон дӕр сӕ сӕ тӕккӕ дзаг бакодтой. 8 Ӕмӕ сын уӕд загъта: «Ныр дзы иу гыццыл сисут ӕмӕ йӕ къӕбицы хицаумӕ ахӕссут». Гъемӕ уыдон дӕр афтӕ бакодтой. 9 Къӕбицы хицау, сӕн+ цы дон фестад, уымӕй куы федта, уӕд усгурмӕ фӕдзырдта,– сӕн кӕцӕй уыди, уый та нӕ зыдта, зыдтой йӕ, дурынтӕй дон чи систа, ӕрмӕстдӕр уыцы лӕггадгӕнджытӕ,– 10 ӕмӕ йын загъта: «Алчи фынгыл фыццаг хорз сӕн ӕрӕвӕры+, ӕмӕ адӕм куы ануазынц, уӕд та – ӕвзӕрдӕр. Ды та хорз сӕн нырмӕ ныууагътай». 11 Йесо ацы диссаг сарӕзта галилейаг горӕт Канӕйы. Уый уыд йӕ фыццаг диссаг, ӕмӕ уымӕй равдыста йӕ тых+. Ӕмӕ йыл йӕ ахуыргӕнинӕгтӕ баууӕндыдысты.
12 Уый фӕстӕ Йесо йӕ мадимӕ, йе ’фсымӕртимӕ+ ӕмӕ йӕ ахуыргӕнинӕгтимӕ ӕрцыд Капернауммӕ+, фӕлӕ дзы цалдӕр боны йеддӕмӕ нӕ фесты.
13 Уӕдмӕ ӕрхӕстӕг дзуттӕгты Куадзӕн+, ӕмӕ Йесо ацыд Иерусалиммӕ+. 14 Уым кувӕндоны федта, галтӕ, фыстӕ ӕмӕ бӕлӕттӕ+ чи уӕй кодта, уыдоны, стӕй, сӕ бынӕтты чи бадт ӕмӕ ӕхца чи ивта, уыдоны дӕр. 15 Гъемӕ бӕндӕнтӕй ехс скодта ӕмӕ сӕ сӕ фыстимӕ ӕмӕ сӕ галтимӕ кувӕндонӕй ратардта. Ӕхцаивджытӕн дӕр се ’хцатӕ ныппырх кодта ӕмӕ сын се стъӕлттӕ афӕлдӕхта+. 16 Бӕлӕттӕ чи уӕй кодта, уыдонӕн та загъта: «Адӕттӕ ардыгӕй ахӕссут! Мӕ Фыды хӕдзарӕй+ мын базаргӕнӕн мауал аразут!»+ 17 Ӕмӕ уӕд йӕ ахуыргӕнинӕгтӕн сӕ зӕрдыл ӕрлӕууыди, афтӕ кӕй ис фыст: «Дӕ хӕдзары мӕт мӕ хӕрдзӕни»+.
18 Уӕд ӕй дзуттӕгтӕ бафарстой: «Адӕттӕ аразыны бар дын кӕй ис, уый нын цавӕр диссагӕй+ равдисдзынӕ?» 19 Йесо сын дзуапп радта: «Мӕнӕ ацы кувӕндон+ ныппырх кӕнут, ӕмӕ йӕ ӕз ӕртӕ бонмӕ сараздзынӕн». 20 Ӕмӕ йын уӕд дзуттӕгтӕ загътой: «Ацы кувӕндон цыппор ӕхсӕз азы арӕзтой, ды та йӕ ӕртӕ бонмӕ сараздзынӕ?» 21 Фӕлӕ, кувӕндоны+ тыххӕй дзургӕйӕ, уый йӕ буары кой кодта. 22 Ӕмӕ мӕрдтӕй куы райгас, уӕд ын йӕ ахуыргӕнинӕгтӕ йӕ ныхӕстӕ ӕрхъуыды кодтой+, ӕмӕ баууӕндыдысты Фыстадыл ӕмӕ, Йесо цы дзырдта, ууыл.
23 Йесо Иерусалимы Куадзӕны бӕрӕгбоны+ куы уыди, уӕд ыл* адӕмӕй бирӕтӕ баууӕндыдысты+, цы диссӕгтӕ арӕзта, уыдон уынгӕйӕ+. 24 Фӕлӕ уыцы адӕмыл Йесо йӕхӕдӕг кӕронмӕ не ’ууӕндыд+, уымӕн ӕмӕ се ’ппӕты дӕр зыдта. 25 Ӕмӕ йын адӕймаджы тыххӕй исчи исты дзырдтаид, уый дӕр ӕй нӕ хъуыди, уымӕн ӕмӕ йӕхӕдӕг зыдта, адӕймаджы зӕрдӕйы цы ис, уый+.