Марчы
8 Иу бон та йӕ разы ногӕй ӕрӕмбырд дуне адӕм, ӕмӕ сӕм, цы бахордтаиккой, уый нӕ уыди. Уӕд Йесо йӕ ахуыргӕнинӕгтӕм фӕдзырдта ӕмӕ сын загъта+: 2 «Тӕригъӕд сты+ ацы адӕм. Ныр ӕртӕ боны ам мемӕ сты, ӕмӕ, цы бахӕрой, уый сын нӕй. 3 Сӕ хӕдзӕрттӕм сӕ ӕххормагӕй куы ауадзон, уӕд фӕндагыл исты кӕндзысты. Бирӕтӕ сӕ дардӕй ӕрцыдысты». 4 Фӕлӕ йын йӕ ахуыргӕнинӕгтӕ загътой: «Ам цӕрӕг дӕр куы нӕй, уӕд уыйбӕрц адӕмы фаг дзул кӕм ссарӕм?»+ 5 Уӕд сӕ бафарста: «Цал дзулы уӕм ис?» Уыдон ын дзуапп радтой, авд, зӕгъгӕ+. 6 Ӕмӕ уӕд адӕмы зӕххыл ӕрбадын кодта, уыцы авд дзулы райста, Хуыцауӕн бузныг загъта+, ӕрсаста сӕ ӕмӕ сӕ йӕ ахуыргӕнинӕгтӕм алӕвӕрдта, адӕмыл сӕ байуарут, зӕгъгӕ. Ӕмӕ уыдон дӕр афтӕ бакодтой+. 7 Уыди ма сӕм цалдӕр гыццыл кӕсаджы дӕр. Ӕмӕ уыдоны тыххӕй дӕр Хуыцауӕн куы раарфӕ кодта, уӕд сын загъта, цӕмӕй уыдон дӕр адӕмыл байуӕрстаиккой+. 8 Адӕм бахордтой ӕмӕ бафсӕстысты. Цы къӕбӕртӕ дзы баззад, уыдонӕй та ма байдзаг кодтой авд чыргъӕды+. 9 Афтӕмӕй та дзы уыди цыппар мин лӕджы бӕрц. Уый фӕстӕ сӕ арвыста+.
10 Адӕм куыддӕр ацыдысты, афтӕ йӕ ахуыргӕнинӕгтимӕ бӕлӕгъы сбадт ӕмӕ ӕрбаленк кодтой Далмануфӕмӕ+. 11 Уым ӕм бацыдысты фарисейтӕ, ӕмӕ йӕ цӕмӕй ракъахтаиккой, уый тыххӕй йӕм бауырдыг сты, арвӕй нын диссаг равдис, зӕгъгӕ+. 12 Йесо арф ныуулӕфыд+ ӕмӕ загъта: «Ацы фӕлтӕр диссаг цӕмӕн агуры? Ӕцӕг уын зӕгъын: уыдон иу диссаг дӕр нӕ фендзысты»+. 13 Уыйадыл сӕ ныууагъта, фӕстӕмӕ бӕлӕгъы сбадт ӕмӕ денджызӕн йӕ иннӕ фарсмӕ араст.
14 Фӕлӕ сӕ ферох семӕ дзултӕ рахӕссын. Бӕлӕгъы та сӕм иу дзул йеддӕмӕ ницы уыд+. 15 Ӕмӕ Йесо йӕ ахуыргӕнинӕгты фӕдзӕхсын байдыдта: «Кӕсут, уӕхи хъахъхъӕнут фарисейты, стӕй Ироды ӕнхъизӕнӕй»+. 16 Уӕд, дзул сӕм кӕй нӕй, уый тыххӕй кӕрӕдзийӕн уайдзӕф кӕнынмӕ фесты+. 17 Йесо уый куы федта, уӕд сын афтӕ: «Дзул уӕм кӕй нӕй, уый тыххӕй кӕрӕдзийӕн уайдзӕф кӕнынмӕ цӕмӕн фестут?+ Ау, ныр дӕр ма йӕ нӕ зонут ӕмӕ йӕ не ’мбарут? Уӕ зонд ӕй нӕма ахсы?+ 18 „Цӕстытӕ уыл куы ис, уӕд куыннӕ уынут? Хъустӕ уыл куы ис, уӕд куыннӕ хъусут?“+ Ау, рох уӕ фӕци: 19 фондз дзулы+ фондз мин лӕгыл куы адих кодтон, уӕд ма дзы цы къӕбӕртӕ баззад, уыдонӕй цал чыргъӕды байдзаг кодтат?» Уыдон загътой: «Дыууадӕс»+. 20 «Ӕмӕ авд дзулы цыппар мин лӕгыл куы адих кодтон, уӕд дзы цы къӕбӕртӕ баззад, уыдонӕй та цал чыргъӕды байдзаг кодтат?» Уыдон ын дзуапп радтой: «Авд»+. 21 Ӕмӕ сын уӕд загъта: «Ау, ныр дӕр ма йӕ не ’мбарут?»+
22 Вифсаидӕмӕ куы ’рцыдысты, уӕд ӕм уым ӕрбакодтой иу куырм лӕджы ӕмӕ йын балӕгъстӕ кодтой, цӕмӕй йыл андзӕвыдаид+. 23 Уӕд ын Йесо йӕ къухыл ныххӕцыд, хъӕуӕй йӕ ракодта, йӕ цӕстытыл ын бату кодта+ ӕмӕ йыл йӕ къухтӕ ӕрӕвӕрдта. Стӕй йӕ бафарста: «Исты уыныс?» 24 Лӕг акаст ӕмӕ загъта: «Уынын адӕмы – цыма бӕлӕстӕ сты, афтӕ мӕм зынынц, фӕлӕ рацу-бацу кӕнынц». 25 Уӕд та йын ногӕй йӕ къухтӕ йӕ цӕстытыл авӕрдта, ӕмӕ лӕг адзӕбӕх – йӕ цӕстырухс раздӕхт ӕмӕ хорз уынын райдыдта. 26 Уый фӕстӕ йӕ сӕхимӕ арвыста ӕмӕ йӕ бафӕдзӕхста: «Ӕрмӕст хъӕумӕ ма бацу»+.
27 Уырдыгӕй Йесо йӕ ахуыргӕнинӕгтимӕ араст Филиппы Кесарийы хъӕутӕм. Ӕмӕ сӕ фӕндагыл бафарста: «Цы дзурынц адӕм мӕн тыххӕй, чи, дам, у?»+ 28 Уыдон ын загътой: «Чи дӕ Аргъауӕг Иоанн+ хоны, чи – Илийа+, чи та – пехуымпартӕй чидӕр»+. 29 Уӕд та сӕ бафарста: «Сымах та куыд хъуыды кӕнут, чи дӕн?» Петр ын дзуапп радта: «Ды дӕ Чырысти»+. 30 Уӕд сын ныффӕдзӕхста, мӕн тыххӕй макӕмӕн дзурут, зӕгъгӕ+. 31 Ӕмӕ сын ӕмбарын кӕнын райдыдта, Адӕймаджы Фырт бирӕ хъизӕмӕрттӕ кӕй бавзардзӕн, хистӕр лӕгтӕ, сауджынты хистӕртӕ ӕмӕ йыл чиныджыдӕснытӕ сӕ къух кӕй сисдзысты, стӕй йӕ кӕй амардзысты+, ӕмӕ ӕртӕ боны фӕстӕ кӕй райгас уыдзӕн+. 32 Уыдӕттӕ сын дзырдта ӕргом. Уӕд ӕй Петр иуварс акодта ӕмӕ йын уайдзӕфтӕ кӕнын байдыдта+. 33 Йесо та разылд, йӕ ахуыргӕнинӕгтӕм бакаст ӕмӕ Петрӕн карзӕй загъта: «Ацу мӕ разӕй, Сайтан*! Дӕ хъуыдытӕ Хуыцауы хъуыдытӕ не сты, фӕлӕ адӕймаджы»+.
34 Уый фӕстӕ адӕммӕ, стӕй йӕ ахуыргӕнинӕгтӕм фӕдзырдта ӕмӕ сын загъта: «Мӕ фӕдыл цӕуын кӕй фӕнды, уый йӕхи тыххӕй мауал цӕрӕд, йӕ хъизӕмӕртты хъӕд райсӕд ӕмӕ ӕппынӕдзух мӕ фӕдыл цӕуӕд+. 35 Йӕ цард* бахъахъхъӕнын кӕй фӕнды, уый йӕ фесафдзӕн, йӕ цард мӕн тыххӕй ӕмӕ хорз хабары тыххӕй чи ратта, уый та йӕ бахъахъхъӕндзӕн+. 36 Уӕвгӕ, адӕймаг дуне ӕгасӕй дӕр йӕхи куы бакӕна, йӕ цард та куы фесафа, уӕд ын уый цы пайда у?+ 37 Ӕниу цы ратдзӕн адӕймаг йӕ царды тыххӕй?+ 38 Ацы хӕлд* ӕмӕ тӕригъӕдджын фӕлтӕры раз, мӕн кӕй зоны ӕмӕ мӕ ныхӕстыл кӕй ӕууӕнды, уый худинаг кӕмӕ фӕкӕса, уыцы адӕймагӕй, ай мӕ ахуыргӕнинаг у, зӕгъгӕ, зӕгъын Адӕймаджы Фыртмӕ дӕр худинаг фӕкӕсдзӕн+, йӕ рухс зӕдтимӕ, йӕ Фыды кадимӕ куы ’рцӕуа, уӕд»+.