Хъуыддӕгтӕ

27 Италимӕ+ кӕй цӕудзыстӕм, уыцы уынаффӕ куы рахастой, уӕд Павелы ӕмӕ ма ӕндӕр ахст адӕмы бакодтой ӕфсӕддон хицау Юлийы бар – уый уыд Августы ӕфсӕддон къордӕй. 2 Сбадтыстӕм, Адрамитӕй чи цыд, ахӕм науыл ӕмӕ араст стӕм,– нау цыди, Азийы былгӕрӕтты цы наулӕууӕнтӕ уыд, уыдонмӕ. Немӕ ма уыдис македойнаг Аристарх+ дӕр, Фессалоникӕйӕ. 3 Дыккаг бон рахызтыстӕм Сидоны. Ӕмӕ Юлий Павелӕн ахӕм хорздзинад+ ракодта, ӕмӕ йӕ йе ’мбӕлттӕм ауагъта, цӕмӕй йӕм фӕкастаиккой+.

4 Уырдыгӕй дарддӕр араст стӕм ӕмӕ цыдыстӕм Кипрмӕ хӕстӕг ӕмӕ афтӕмӕй нӕхи ӕмбӕхстам, нӕ ныхмӕ чи дымдта, уыцы дымгӕйӕ. 5 Стӕй ахызтыстӕм Килики ӕмӕ Памфилийы рӕзты ӕмӕ бацыдыстӕм ликиаг горӕт Мирӕйы наулӕууӕнмӕ. 6 Уым ӕфсӕддон хицау ссардта, Александрийӕ+ Италимӕ чи цыд, ахӕм нау* ӕмӕ нӕ ууыл сбадын кодта. 7 Уырдыгӕй куы рараст стӕм, уӕд бирӕ бонтӕ сабыргай фӕцыдыстӕм ӕмӕ тыххӕй-фыдӕй бахӕццӕ стӕм Книды онг, уымӕн ӕмӕ нӕ дымгӕ размӕ цӕуын нӕ уагъта. Ӕмӕ уый фӕстӕ цыдыстӕм Критмӕ хӕстӕг ӕмӕ афтӕмӕй нӕхи дымгӕйӕ ӕмбӕхстам. Уым ахызтыстӕм Салмоны рӕзты, 8 ӕмӕ былгӕрӕтты тыххӕйты цӕугӕйӕ бахӕццӕ стӕм, Хорз Наулӕууӕнтӕ кӕй хонынц, уыцы бынатмӕ,– уырдӕм хӕстӕг уыд горӕт Ласейӕ.

9 Уӕдмӕ рацыд бирӕ рӕстӕг, фесты Сыгъдӕггӕнӕн боны+ комдарӕнтӕ* дӕр, ӕмӕ науыл цӕуын ӕдас нал уыди. Уымӕ гӕсгӕ сын Павел бауынаффӕ кодта: 10 «Хорз адӕм, куыд кӕсын, афтӕмӕй ныл фӕндагыл исты бӕллӕх ӕрцӕудзӕн ӕмӕ ӕрмӕст ласинӕгтӕн ӕмӕ науӕн нӕ, фӕлӕ нӕхицӕн* дӕр стыр зиан ракӕндзӕн»+. 11 Фӕлӕ ӕфсӕддон хицау, Павел цы дзырдта, уымӕ нӕ байхъуыста, фӕлӕ наутӕрӕг ӕмӕ науы хицаумӕ. 12 Уыцы наулӕууӕн зымӕг арвитынӕн кӕй нӕ бӕззыд, уымӕ гӕсгӕ сӕ фылдӕр дзырдтой, зӕгъгӕ, дарддӕр ацӕуӕм, кӕд исты хуызты Криты наулӕууӕн Финикмӕ бахӕццӕ уаиккам, цӕмӕй зымӕг уым арвитӕм. Уыцы наулӕууӕн та кӕсы цӕгат-ныгуылӕнмӕ ӕмӕ хуссар-ныгуылӕнмӕ.

13 Ӕмӕ хуссарӕй рог дымгӕ куы радымдта, уӕд загътой, зӕгъгӕ, ныр, кӕдӕм фӕнд кӕнӕм, уырдӕм фӕхӕццӕ уыдзыстӕм. Уӕд науӕнгуыр систой ӕмӕ Криты былгӕрӕтты ацыдысты. 14 Бирӕ нӕ рацыд, афтӕ дзы сыстад тыхджын дымгӕ+, Евракилон* чи хуыйны, уый. 15 Дымгӕ науы ӕрцахста, ӕмӕ нау йӕ ныхмӕ цӕуын нӕ фӕрӕзта. Гъемӕ мах дӕр нау тӕрыныл нал архайдтам, ӕмӕ нӕ дымгӕ хаста. 16 Кавдӕ чи хуыйны, уыцы гыццыл сакъадахмӕ хӕстӕг куы фӕцӕйцыдыстӕм, уӕд нӕ дымгӕйӕ ӕмбӕхста, фӕлӕ уӕддӕр, науӕн фӕстӕрдыгӕй цы бӕлӕгъ+ уыди, уый тыххӕйты баурӕдтам. 17 Ӕмӕ бӕлӕгъ наумӕ куы систам, уӕд науы фӕрстӕ бӕндӕнтӕй кӕрӕдзимӕ ӕлвасын байдыдтой. Цӕмӕй дымгӕ науы Сиртмӕ ма ахастаид ӕмӕ уым тӕнӕджы ма ныссагъдаид, уый тыххӕй бӕндӕнтӕ райхӕлдтой ӕмӕ стыр наупӕлӕз ӕруагътой, ӕмӕ нӕ дымгӕ дарддӕр хаста. 18 Тыхдымгӕ нӕ кӕй раппар-баппар кодта, уымӕ гӕсгӕ дыккаг бон, науыл цы уыд, уыдон калын райдыдтой+. 19 Ӕртыккаг бон та наугӕрзтӕй цыдӕртӕ ракалдтой сӕхи къухӕй.

20 Бирӕ бонты дӕргъы хур дӕр ӕмӕ стъалытӕ дӕр кӕй нӕ разындысты ӕмӕ нӕ тыхдымгӕ+ дӕр кӕй хоста, уымӕ гӕсгӕ нӕ фервӕзыны ныфс нал уыди. 21 Стӕй адӕм хӕргӕ дӕр рагӕй нал бакодтой. Уӕд Павел се ’хсӕн слӕууыд+ ӕмӕ загъта: «Хорз адӕм, мӕ ныхасмӕ мын куы байхъуыстаиккат ӕмӕ Криты куы баззадаиккам, уӕд ныл ацы бӕллӕх не ’рцыдаид ӕмӕ нын ахӕм зиан нӕ ракодтаид+. 22 Фӕлӕ уын ныр зӕгъын: уӕ ныфс ма асӕттӕд, уымӕн ӕмӕ сымахӕй иу адӕймаг* дӕр нӕ фесӕфдзӕн. Фесӕфдзӕн ӕрмӕстдӕр нау. 23 Уымӕн ӕмӕ, ӕз кӕй цагъар дӕн ӕмӕ кӕмӕн лӕггад кӕнын+, уыцы Хуыцауы зӕд+ ӕхсӕвы мӕ разы ӕрлӕууыд 24 ӕмӕ мын загъта: „Ма тӕрс, Павел. Ды хъуамӕ ӕрлӕууай Ромы паддзахы+ раз, ӕмӕ, науыл демӕ чи ис, уыдоны се ’ппӕты дӕр Хуыцау фервӕзын кӕндзӕн“. 25 Уӕдӕ уӕ ныфс ма асӕттӕд, ӕз ӕууӕндын Хуыцауыл+, алцыдӕр уыдзӕн, зӕд мын куыддӕриддӕр загъта, афтӕ. 26 Ӕрмӕст нӕ хъуамӕ цавӕрдӕр сакъадахмӕ рахӕсса»+.

27 Цыппӕрдӕсӕм ӕхсӕв нӕ уылӕнтӕ Адрийы денджызы рахӕсс-бахӕсс кодтой, ӕмӕ ӕмбисӕхсӕв наудзаутӕ бамбӕрстой, цавӕрдӕр зӕхмӕ кӕй феввахс кӕнынц, уый. 28 Донӕн йӕ арф сбарстой, ӕмӕ разынд ӕртын ӕхсӕз метры. Гыццыл дарддӕр та йӕ ногӕй сбарстой, ӕмӕ разынд дыууын авд метры. 29 Науы къӕдзӕхтӕм куы бахӕсса, уымӕй кӕй тарстысты, уымӕ гӕсгӕ фӕстӕрдыгӕй цыппар науӕнгуыры ӕрӕппӕрстой ӕмӕ ӕнхъӕлмӕ кастысты, куы ма сбон уаид, зӕгъгӕ. 30 Наудзаутӕ та алидзынвӕнд скодтой ӕмӕ, цыма бырынкъырдыгӕй науӕнгуыр ӕппарынц, афтӕ донмӕ бӕлӕгъ ӕруагътой. 31 Фӕлӕ Павел ӕфсӕддон хицау ӕмӕ ӕфсӕддонтӕн загъта: «Ацы адӕм науыл куы нӕ баззайой, уӕд нӕ фервӕздзыстут»+. 32 Уӕд ӕфсӕддонтӕ бӕлӕгъы+ бӕндӕнтӕ акъуырдтой, ӕмӕ бӕлӕгъ феуӕгъд.

33 Бонырдӕм Павел се ’ппӕтӕн дӕр лӕгъстӕ кӕнын райдыдта, цӕмӕй исты бахордтаиккой, загъта сын: «Ныр цыппӕрдӕсӕм бон ӕнхъӕлмӕ кӕсут, ӕмӕ уӕдӕй нырмӕ уӕ дзыхмӕ къӕбӕр не схастат. 34 Лӕгъстӕ уын кӕнын, исты бахӕрут, цӕмӕй фӕфидар уат. Зӕгъын уын: уӕ иуӕн дӕр йӕ сӕрӕй иу хъуын+ дӕр не ’рхаудзӕн». 35 Уыцы ныхӕсты фӕстӕ Павел дзул райста, се ’ппӕты раз Хуыцауӕн бузныг загъта+, ӕрсаста йӕ ӕмӕ хӕрын райдыдта. 36 Уӕд се ’ппӕты дӕр ныфс бацыд, ӕмӕ уыдон дӕр хӕрын райдыдтой. 37 Науыл та ӕдӕппӕтӕй уыдыстӕм дыууӕсӕдӕ ӕвдай ӕхсӕз адӕймаджы*. 38 Куы бафсӕстысты, уӕд мӕнӕу денджызмӕ калын байдыдтой, цӕмӕй нау фӕрогдӕр уыдаид+.

39 Куы сбон, уӕд федтой змисбыл донбакӕлӕн, фӕлӕ цы зӕхх у, уый сӕ бон базонын не сси. Ӕмӕ бауынаффӕ кодтой, гӕнӕн ӕмӕ амалӕй нау уырдӕм батӕрӕм+, зӕгъгӕ. 40 Гъемӕ науӕнгуырты бӕндӕнтӕ акъуырдтой ӕмӕ науӕнгуыртӕ денджызы ныппӕрстой, уыцы иу рӕстӕг суӕгъд кодтой науыздахӕнты бӕндӕнтӕ дӕр, стӕй раззаг наупӕлӕз дымгӕмӕ систой ӕмӕ сӕ ных былмӕ сарӕзтой. 41 Ӕмӕ, денджыз дыууӕрдыгӕй дӕр йӕ уылӕнтӕй кӕй ӕхсадта, ахӕм тӕнӕг ранмӕ куы бахаудтой, уӕд нау уым баурӕдтой. Науӕн йӕ бырынкъ ныссагъд ӕмӕ ӕнӕзмӕлгӕйӕ лӕууыд, фӕстӕрдыгӕй та йӕ уылӕнтӕ хостой ӕмӕ йӕ ныппырх кодтой+. 42 Уӕд ӕфсӕддонтӕ сфӕнд кодтой ахст адӕмы амарын, цӕмӕй сӕ мачи аленк кодтаид ӕмӕ ма алыгъдаид. 43 Фӕлӕ ӕфсӕддон хицауы фӕндыди Павелы дзӕбӕхӕй фӕхӕццӕ кӕнын, ӕмӕ сӕ нӕ бауагъта. Ӕмӕ бардзырд радта, зӕгъгӕ, ленк кӕнын чи зоны, уыдон донмӕ ныггӕпп кӕнӕнт ӕмӕ былмӕ фыццаг рахизӕнт. 44 Стӕй иннӕтӕн дӕр загъта, цӕмӕй фӕйнӕджы гӕбӕзтыл кӕнӕ ма науӕй ноджыдӕр цы гӕбӕзтӕ рахауд, уыдӕттӕй истӕуыл былмӕ ленк кӕной. Ӕмӕ не ’ппӕт дӕр зӕхмӕ дзӕбӕхӕй бахӕццӕ стӕм+.