Нымӕцтӕ

6 Уый фӕстӕ Йегъовӕ Моисейӕн загъта: 2 «Израилы фырттӕн афтӕ зӕгъ: „Исчи, нӕлгоймаг уа ӕви сылгоймаг, сӕрмагонд дзырд куы ратта, Йегъовӕйы раз уыдзынӕн назорей*+, зӕгъгӕ, 3 уӕд хъуамӕ йӕхи хиза сӕн ӕмӕ карз нозтӕй. Ма нуазӕд нӕдӕр сӕнӕй конд дзмари*, нӕдӕр карз нозтӕй конд дзмари, нӕдӕр, сӕнӕфсирӕй цы нуазинӕгтӕ кӕнынц, уыдон+. Ма хӕрӕд сӕнӕфсир, хус сӕнӕфсир дӕр. 4 Цалынмӕ назорей уа, уӕдмӕ йын, сӕнӕфсирӕй цы аразынц, уыдӕттӕй ницы ис хӕрӕн, фӕнды цъӕх сӕнӕфсир уӕд, фӕнды йӕ цъӕрттӕ.

5 Назорей йӕ дзырд куы ӕххӕст кӕна, уыцы рӕстӕг йӕ сӕрыл сӕрдасӕн хъуамӕ ма андзӕва+. Йегъовӕйӕн хибаргонд цы рӕстӕгмӕ у, уыцы рӕстӕг цалынмӕ нӕ фӕуа, уӕдмӕ хъуамӕ йӕ сӕрыхъуынтӕ ма ӕлвына+ ӕмӕ уымӕй ӕвдиса, Хуыцауы сӕрмагонд лӕггадгӕнӕг кӕй у, уый. 6 Йегъовӕйӕн хибаргонд цы рӕстӕгмӕ у, уыцы рӕстӕг хъуамӕ мардмӕ* хӕстӕг ма цӕуа+. 7 Йӕ фыд амӕла ӕви йӕ мад, йе ’фсымӕр ӕви йӕ хо, уӕддӕр хъуамӕ йӕхи ма фӕчъизи кӕна+, уымӕн ӕмӕ йӕ сӕрыл ис, Хуыцауы раз назорей кӕй у, уый нысан.

8 Цалынмӕ назорей уа, уӕдмӕ Йегъовӕйы цӕсты уыдзӕн сыгъдӕг. 9 Фӕлӕ йӕ разы исчи ӕвиппайды куы амӕла+, ӕмӕ, назорей уӕвгӕйӕ, йӕ сӕр куы фӕчъизи кӕна, уӕд хъуамӕ, цы бон ӕй сыгъдӕг кӕной, уыцы бон йӕ сӕр адаса+. Хъуамӕ йӕ адаса ӕвдӕм бон. 10 Ӕстӕм бон та ӕмбырды цатыры бахизӕны размӕ сауджынмӕ хъуамӕ ӕрбахӕсса дыууӕ ӕхсинӕджы кӕнӕ дыууӕ лӕппын бӕлоны+. 11 Ӕмӕ дзы сауджын иуы ӕрхӕсдзӕн тӕригъӕды тыххӕй нывондӕн+, иннӕйы та – судзинаг нывондӕн+, ӕмӕ уыцы адӕймаджы тӕригъӕдӕй ссыгъдӕг кӕндзӕн, уымӕн ӕмӕ, мардмӕ* кӕй бавнӕлдта, уый тыххӕй фӕаххосджын. Ӕмӕ уыцы бон хъуамӕ йӕхи* ссыгъдӕг кӕна. 12 Ӕмӕ ногӕй суыдзӕн Йегъовӕйы раз назорей+, ӕмӕ аххосы тыххӕй нывондӕн хъуамӕ ӕрбакӕна, афӕдз кӕуыл нӕма цӕуы, ахӕм фыркъа+. Уый размӕ назорей цас уыд, уыцы рӕстӕг нымад нал цӕудзӕн, уымӕн ӕмӕ, назорей уӕвгӕйӕ, йӕхи фӕчъизи кодта.

13 Ай у закъон назорейы тыххӕй. Цы рӕстӕгӕй загъта, уыдзынӕн назорей, зӕгъгӕ, уыцы рӕстӕг цы бон фӕуа+, уыцы бон ӕй ӕрбакӕндзысты ӕмбырды цатыры бахизӕны размӕ. 14 Ӕмӕ Йегъовӕйӕн хъуамӕ ӕрхӕсса йӕ кувинаг: афӕдз кӕуыл нӕма цӕуы, ахӕм ӕнӕсахъат фыркъа судзинаг нывондӕн+, афӕдз кӕуыл нӕма цӕуы, ахӕм сыл уӕрыкк тӕригъӕды тыххӕй нывондӕн+ ӕмӕ иу ӕнӕсахъат фыр фарны нывондӕн+, 15 стӕй чыргъӕд соимӕ конд+ донгонд гуылтимӕ*, ӕппӕты хуыздӕр ссадӕй+, ӕмӕ сойӕ сӕрст донгонд лауызтимӕ+, семӕ ма хъуамӕ уа хоры кувинаг+ ӕмӕ кувинаг нозт дӕр+. 16 Сауджын сӕ сӕвӕрдзӕн Йегъовӕйы раз ӕмӕ нывондӕн ӕрхӕсдзӕн йӕ тӕригъӕды тыххӕй нывонд ӕмӕ йӕ судзинаг нывонд+. 17 Уый фӕстӕ сауджын фыры ӕрхӕсдзӕн Йегъовӕйӕн фарны нывондӕн+ донгонд гуылты чыргъӕдимӕ иумӕ. Стӕй ӕрхӕсдзӕн хоры кувинаг+ ӕмӕ кувинаг нозт дӕр.

18 Назорей ӕмбырды цатыры бахизӕны раз йӕ сӕр адасдзӕн+ ӕмӕ йӕ сӕрыхъуынтӕ – назорей кӕй уыд, уый нысан – фарны нывонды бынмӕ цы арт судзы, уым баппардзӕн. 19 Назорей йӕ сӕр куы адаса, уӕд сауджын райсдзӕн доныфых+ фыры уӕн, чыргъӕдӕй сисдзӕн донгонд гуыл ӕмӕ донгонд лауыз+ ӕмӕ йын сӕ йӕ къухтыл ӕрӕвӕрдзӕн. 20 Сауджын сӕ Йегъовӕйы раз дыууӕрдӕм атилдзӕн – уый у, кӕй батилынц, ахӕм кувинаг+. Уыцы кувинаг у табуйаг ӕмӕ у сауджыны, дыууӕрдӕм кӕй атилынц, уыцы риуыгуыдыр+ ӕмӕ рахиз агъд куыд сты, афтӕ+. Уый фӕстӕ, назорей чи уыди, уымӕн йӕ бон уыдзӕн сӕн нуазын+.

21 Назорейӕн йӕ бон куы уа, закъонмӕ гӕсгӕ+ йӕ цы кувинӕгтӕ хъӕуы ӕрхӕссын, уыдонӕй уӕлдай Йегъовӕйӕн ӕндӕр кувинӕгтӕ ӕрхӕссын ӕмӕ уый тыххӕй дзырд куы ратта, уӕд хъуамӕ, цы загъта, уый бакӕна. Уый у закъон назорейы тыххӕй“».

22 Уый фӕстӕ Йегъовӕ Моисейӕн загъта: 23 «Аарон ӕмӕ йӕ фырттӕн зӕгъ: „Израилы фырттӕн-иу арфӕ кӕнут+ афтӕ:

24 „Йегъовӕ дын раарфӕ кӕнӕд+ ӕмӕ дӕ йӕ базыры бын бакӕнӕд+.

25 Йегъовӕйы цӕсгомы рухс дӕм кӕлӕд+ ӕмӕ дын йӕ хорзӕхӕй бахай кӕнӕд+.

26 Йегъовӕ дӕм йе ’ргом раздахӕд+ ӕмӕ дын раттӕд фарн*“+.

27 Израилы фырттӕн хъуамӕ арфӕ кӕной мӕ номӕй+, цӕмӕй сын ӕз арфӕ кӕнон»+.